小弟在DISCUSS 並無出文
你回應緊0既,都係一個有心引你派膠0既人,並非小弟。
若有人以為我係DISCUSS 出文引HATER, 是否太小學雞?
小朋友, 暑期放完好耐了. 好好努力上班吧...

2019年1月10日 星期四

悼念我的好友兼BLOGGER

今晚,我去了一個喪禮。

他是我的中學好同學,真的是碩果僅存的好同學,更是難得畢業後還會見面的同學。

同時,佢亦都係一位BLOGGER。

連結如下:




















當年同佢兩個麻甩佬食TEA,老婆幫我BOOK左SKY100,去到唔係情侶就係港女打卡,我兩個麻甩好似HEHE咁。。。

正因走得突然,我也不是同班同學,結果只有收到他妹妹FB訊息才知道人已走,未能在醫院一見。

簡單闡述一下,就是年青高血壓引致中風,留院一星期左右便走了。

這事發生不足一星期,我才在地鐵站見到他,還問他:

"有冇在街上暈倒過?",答案是否定的,當時也不以為然。

依稀記得他還說有吃血壓藥控制病情。

儀式中,播左以下一曲,是他喜愛的歌曲:



這位同學,正直、善良、樂天。表面睇上去佢好似無乜目標,其實了解佢0既人,就知佢其實係有PLAN的。

當年外國讀書會計番香港,做過幾份相關工作,都唔0岩佢心水(佢網誌有提及的)。

正因佢朋友多,有門路拎到某D貨,結果開始想創業。當時我唔知佢係想做淘寶,否則應該會阻止佢,其實香港人錢係最好厄。。。

後尾開始發現身體有問題,去做過唔同工作,連木工都去學,最後,正因揸的士可以彈性時時番工,就做左一排的士司機。

此路不通,總有路會通,這位朋友就係咁有彈性,拎低起又放得低,不會因為大學生身份,只願做文職,只願簡簡單單打份工。

至少,創業0既勇氣,唔係人人都有!

感情方面,可能真係無乜人知,其實佢係有溝女啦,朋友絕對唔毒L,只係低調0者。

人走了,也留下文字,以下是他的網誌連結<努力成為閒人的閒人>。大家如有看過,也可去留個言悼念一下。雖人已走,文字留下的信念還在的。

其中有朋友分享,頗有意思:

"很多人從來都未曾活在當下,只有生存過,但卻沒有生活過;而SCOTTIE他真正有在生活過。"本來應該是英文版本,但我忘記了原句。。。


2019年1月6日 星期日

HAPPY MONDAY STARTS 我可以唔撈嗎 44

講投資

先唔理舜宇,瑞聲同埋惠理集團呢D無機會番家鄉0既蟹貨(女主人串我以後都係買番D正常悶股),近日收息組合都跌埋一份,不過一於少理。

本來想再沽多次建行期權,上月收左幾千蚊,食髓知味。不過今個月價唔岩。再想做,佢已經急跌,做黎都無肉食。

成個組合,升得比較易發現(WELL,真係成個星期都唔會LOGIN睇一次),應該係GLD。順手SC即月GLD@126,收番幾千蚊港紙。

回望一下,GLD自己做SC,絕對係好過買GLDI。相信QYLD同埋MORT呢類自動SHORT CALL0既東西都一樣,自己做好過比人做。

另外,因早前有兩隻債被贖回,將果舊錢分成若干份,早兩日買左幾手盈富。本來想做埋期權SC,點知一年期權庄家開價個SPREAD實在太大,完全做唔落手。

講生活

十二月份,同女主人北上左兩次,都係飲飲食食。喜茶的確係唔錯,火鍋呀、酸菜魚呀,都真係幾OK。朝早唔想出去食?叫美團外賣去酒店。。。

呢一刻,香港錢番內地消費,認真係抵,仲要質素好過20年前。

點解同20年前比?我係指同班港叔港嬸廿年前番上去食野揼骨比,當年佢地用平價食垃圾,今時今日,雖無以前咁平,但食物係有機會好過香港,裝修同服務更加係無得彈。



上次過港珠澳番澳門,今次番左兩次大陸,其實都快。

1的士上深圳灣口岸,一地兩檢之下,快過上澳門好多。。。
2的士去落馬洲鐵路站(唔係口岸啊!),基本上行去過關,另一邊就係福田地鐵站。

唯一同女主人掙扎0既,就係過夜定唔過夜,交通咁方便,其實即日來回重方便過入屯門/天水圍呢D不毛之地!




講工作

放左自己一輪假,都成半個月,不過好多日都番左公司執頭執尾,其實唔似放假。

踏入一月,開工大吉。

今日係星期日,明天係星期一,亦都係我第一個開始放假0既星期一!2019年,終於實行四天工作了。

做多半年,正式退休,最多唔夠駛就慳D。

預計手尾如下

3月份要開始賣左鋪頭個噴油泵,同埋部高達波子機
4月份要開始BOOK同用下噴油場
5月份申請番個自修空間,暫定最方便係POLYU圖書館!

鋪頭D高達模型,真係唔知賣唔賣好。。。

講資產

女主人資產561萬(上月已修正,應為553萬),男主人股票回升(??),現有269萬(上年比235萬),可見呢一年大上大落無乜增值,工作收入投入後可能都蝕埋。

若真係要由IB抽錢出黎,AVAILABLE FUND(不可用盡,否則一跌就比人賣股救倉。。。),大約有七球港紙。

建行只要唔減派息,第一年退休生活係幾穩陣。因為我暫時當其他固定收息資產剛剛夠比孖展息(當然無咁少啦),所以實際上利息收入係多過支出0既。

2018年12月29日 星期六

當年老豆教落...

本來想講下今個月嘅兩次深圳遊記(女主人開始替我更新FACEBOOK專頁,都係飲飲食食吧!)

為免個blog變咗窮L遊記(我同我老婆呢排成日睇0既YOUTUBE CHANNEL),都係講下第二啲!

其實好多題材都已經定好咗,不過硬係的唔起心肝去寫。

**********

小弟有個乜七都唔叻嘅老豆(無錯,我唔係算憎佢,只係覺得佢太廢。),喺我好細個嗰陣講過以下兩個觀點:

可能要講下佢背景,佢算係建築業入面,唔駛學歷,只要學師,要落地盤但又唔算要太多體力勞動0既工種。係澳門讀過下名校,讀到中二三就比人踢走左,肯定係操行問題。對住我個目不識丁0既阿媽,當然會有一種佢係知識分0既感覺。

一如維園讀新聞當真0既阿伯,佢講既野,又可以幾格物明德?

幾時講過?應該都有廿幾三十年。。。因為我應該上左中學已同佢無計傾。希望我自己小朋友唔會咁啦。

1)學好日文第日打工好有用

我估當年應該係198X年,日本經濟應該勁好。。。識日文可能可以做日資公司吧?可惜當年只係好想有一部任天堂紅白機同埋龍珠閃卡,從來無諗過去學日文(現在的我,反而想學下俄文泰文,不過以小弟語言天份,都係算吧啦。)

而家?學日文直頭係潮流啦,可以去旅行用!真係識日文0既,我生活中只認識兩位。其中一位係大學個陣學,現在工作根本從不相關。另一位?應該係大學畢業後學,現在生活?唔掂。。。

勉強叫做炒旦期間識得另一位,應該佢程度係可以教人,不過當年都係同我一齊炒埋D爛旦。

昔日強國日本,今日爛船都有三根釘!只不過,若然果陣起步去融合,現在只會愛得太遲,光陰錯配。

2)做白領好過做藍領(揸筆搵食好)

我唔否認可能佢番工辛苦,所以覺得做文職好。而家又點?我唔知而前做個船務文員,或者做間TRADING0既文員有幾高人工,同埋以前勞動力可能真係唔係咁值錢。

而家做地盤應該高人工過文員仔好多!一個係體力勞動,一個係腦力+光陰勞動,橙同蘋果好難比。若只比人工,文員仔真係唔得。

唔用地盤,用跟車?或者用一技之0既藍領,例如整水電工。。。應該都好過一般文職。再者,能創業機會更高。

原因?因為大家都想舒舒服服有人照呼,加上家事常識低,簡單如度下屋企有幾大,都可以假手於人,尤其係大多小弟一輩0既中年港豬,真係拎條頸出黎比人宰的。

點解我會咁記得?我都幾肯定佢同我講過好多次!當然呢D就係講道理,教緊仔。好彩我當年好早已經同佢無乜兩句,否則我而家唔會咁隨心所欲。

時移世易,咁而家呢啲觀點種啱唔啱呢?

易地而處,今日望住個幾歲0既仔,同佢講做乜最好,係咪真係有效?倒不如教佢做個好人,做事隨心而行,不要隨波逐流更好吧!(就如小弟吹水WHATSAPP GROUP所講:應該一堆讀書唔叻0既港媽會衝出黎,話佢開心就得,但另一邊就會去讀名校,谷考試,十八般武藝,晒自己FB。。。)

兩姐弟又打街機,下星期考試又有咩好驚?

當然,講就易,做就難。尤其係資訊不平衡但極流通0既香港,所謂:

"你不愛競爭?但競爭會找上你!"

知易行難!既然父母都做唔到,首要應該唔好迫仔女去做,父母自己真正自由,贖番自己條命,咁先有資格講。係咪?

好多人既指指點點,社會上太多0既聲音同意見,係咪真係有用?寫出自己意見0既人,係咪真係咁把炮?

有幾多人,真係可以隨心而行?還是只希望有一大堆守護0既理由,而留在大家所謂0既NORM?父母自己都做唔到,又點去以身作則教仔女去追夢?

************

或許女主人對退休唔撈有一點點憂慮,但個人認為,這應該是一個䦒始,而非終結!雖然我淡淡說句,最多咪慳D駛,其實我真係打算有咩事,就慳D駛,絕無任何後著。

難得取回選擇權,將一切學歷,職場優勢RESET一次,去體驗一D大部份人都唔會經歷0既階段,此刻應無價。也希望子女大過左也會明白,人生非單程路,只要想得出,就有機會走得到。

2018年12月22日 星期六

我也談談 買唔買樓好

近日得閒左好多,又開始放假啦,結果可以慢慢清文。

呢幾日都係鋪頭無所事事地渡過,好應該UPDATE下呢邊。

其實,要寫既文章真係有太多,我已經用GOOGLE NOTE一一記低,係呢個聖誕假可以慢慢打。

今日女主人有事煩,佢心情唔靚我都幾擔心,因為我同佢兩邊小生意盡量都唔干涉,所以我都無問太多。叫佢食番回頭草,佢話寧願執左佢!做小生意好處就係咁,想點就點,不用為五斗米折腰。

小弟生意仔,進入倒數階段,最後半年我就會退休了!

小生意的壞處?就係今日唔知聽日事,無得月月出糧,當然心態上好唔同。至少,我地唔會走去計每月收入同支出,就女主人而言,一時可以好好,一時又可以好差。佢今次出事係技術性問題,一係有得做,一係無得做。(當然,一定解決到,只是完美與否吧)

向好處看吧!

若我現在生意仔出了問題,我應該不會理會,等它慢慢死去吧!

所以,係九年前,我倆已經不喜歡太死板的路,尤其理財方面,希望維持高流動性。又因我倆生意唔大,但平均搵錢又多過一般打工仔,雖則不是三更窮五更富,不過流動性同埋隨時可以轉身,比一切重要。再者,小弟行兼業恐怕有年齡限制,盡快搵夠走人比較理想。

買唔買樓自住好,其實因應個人情況多於一切別人意見,投資則是另一故事!我的情況又同大部份人不同,資產雖然唔多,不過總算做到所謂租務自由。何謂租務自由?係自己個區想租邊度都OK,搬屋搵人攪吧!搬屋其實唔算太麻煩,當做大掃除而已,未搬過屋/不懂有效搬屋的人才會有這種感覺吧?加租?既然錢可以解決,為何一定要搬???


大量未試過在租金上升期租樓的人,他們或許只看到壞處!動之以錢,什麼幫人供樓云云;此路不通的話,動之以情,搬屋很煩。

對我來說,租金持續上升,同去電腦場買條RAM一樣,這個時期若價格上升,付錢便解決。

若然有一日生意失敗投資失敗,或股息不足以交租食飯,可以選擇搬到小一點的單位,再由日常開支著手。我現在的情況,未必人人相同,於我而言,進可攻退可守。一邊收股息債息等樓跌又可以,即使樓價一路升到上太空,我也不會太SUFFER(總有一半人以上比我更糟吧?),再者我又隨時可以拔營離開香港。。。

WHATSAPP GROUP中有人問及是否安全感不足?非也,只是大家價值不同玩法不同,以及生命所追求的不一樣吧。

此篇靈感來自90後BLOGGER TAMINV,以及小弟WHATSAPP GROUP中一些對話,年輕的不買,以及有點資產的不買,總有個原因。

你在想投資,我們在想生活,完全是不同世界呢。

2018年12月20日 星期四

港珠澳大燆實測 VS 坐船過澳門

小弟坐過兩次, 兩次都係白事.

(轉左WIN10 之後,無左全形符號、好唔習慣!唯有用倉頡!)

第一次,應該係開通之後第三四日。果日係星期日!

去時即上金巴,極快,回時點知大擠塞(主要香港人),等左一個鐘先上到。

當然果陣剛剛開,梗係不能作準啦。

今日係星期三!逝世已過一年,我終於可以去拜下我阿媽!!

*************

以下提供方法,肯定唔係最平選擇,不過可能係最快方法。

香港的士+金巴+澳門的士!

今日一早,9:30開始集合,大約9:35上左的士,我CALL一口價的士,雖未算最平,但肯定有車。



到左香港口岸,因為我帶住兩個細路,不能自助過關,要排櫃位,不過其實都好快!

留意,如果用自助售票機,一張八達通係買唔到小童同長者票(買到,但要用小童及長者八達通),所以我又係櫃位買,都係唔駛排!成人港紙hkd65,小童/長者33!



之後基本上係直上金巴,好快就到左澳門口岸。

澳門的士,個邊係無人搭!但的士好多,因為齋出口岸都已經20蚊。



時間用左幾多?其實上面D圖都講左,對住新界人黎講,真係快過坐船!仲有,路程無咁顛簸!

我9:35出發,11:00或更早已經上左澳門的士。連埋過關,1小時25分鐘。
我很肯定的士到碼頭再坐船唔得!噴射飛航話船程60分鐘,我從來未試過60分鐘之內到,因為一黎要等埋發叔上船,二黎佢有時因應海上情況行得較慢,三黎大量不文明人爭住落船。。。仲未計過關同埋香港段的士時間(九龍成日塞,尤其廣東道一帶)。

貴嗎?我又計下

1人坐船
的士到尖沙咀(當你坐85的都要90),船飛170(去零頭,當你遇唔到幾蚊黃牛黨),唔計澳門的士(睇你去邊),要$260。

1人坐金巴經港珠澳
的士到港珠澳香港口岸200(睇你咩位,坐唔坐85),金巴66,唔計澳門的士(睇你去邊),要$266。

咁好睇你程的士去邊!
時間?其實好睇你船程夾唔夾(15分鑵一班都可以無位!),又或者金巴駛唔駛排!

今日我5人過澳門
5人坐船
的士,五人的到尖沙咀(當你坐85的都要90),船飛成人170X2,小童及長者150X3(去零頭,當你遇唔到幾蚊黃牛黨),唔計澳門的士(睇你去邊),要$880。

5人坐金巴經港珠澳
的士,五人的到港珠澳香港口岸200(睇你咩位,坐唔坐85),金巴成人66X2,小童及長者33X3,唔計澳門的士(睇你去邊),要$431。

真係差一個DOUBLE!但係又快左又舒服左呢(金巴VS噴射船)!都係個句,只要金巴有得即上,基本上係唔會慢過坐船,仲有今次我無用自助過關。。。

呢篇想寫好耐,雖然同投資無關,下個星期應該會多番D文架喇!

*********

以下心急人+避旅行團小心得

的士落車後,香港出境大堂自助E道係最右最右!自助過關之後,部自動售票機係最左(人手櫃位係中間邊左)!出番去用中右邊通道較近金巴上車處。

出左澳門口岸,的士站係最右!!右到肉眼都睇唔到。。。(今次去指示多左,應該易搵好多)

*******

重點真係要講多次,方法不是鬥平(我全的士),係鬥快成份多。所以個D咩欣澳轉車、長者優惠坐車、咩鬼又慢又等客0既中港直通巴就唔好計啦!

仲有,小弟新界西選區的,如果你自己住中上環,都係坐番船吧。剛開通時,我由太子坐的士去港珠澳,都仲係快過坐船的!即係如果你係長沙灣美孚荔枝角,港珠澳應該快過坐船,全的士仲平一截TIM!

最後,講錢呢,應該打和點係兩人或以上。一條友係貴過坐船的,若你有四五個人去,單程坐船已經等如大橋來回價了!

2018年12月3日 星期一

女主人收息組合換倉 我可以唔撈嗎 43

講投資

十一月尾開始,港股上番黎。




以上係三球倉,繼續蝕到HIHI!

只計今日大升,已經為整個組合帶來六十多萬脹面升幅(與上星期比),可惜有唔少都係2018年中買,蝕到HIHI。

相反,美股真心好慘。。。
ATVI被迫接貨,而且已經跌到50蚊邊,賬面虧損HKD三十萬!其實當時係想做SC點知做左SP,我又求X其唔理佢。。。哈哈。

為左維持貸款水平係一千萬港元內,我自願回左加元計0既EIT.UN,從此遠離此市場。

另外,現在只剩五隻債券,未能搵到適合月份0岩心水0既換貨。。。

再另外,因為女主人0既BCS.PRD 被贖回,入左DKT@24.8


因女主人個倉係我包底,賬面其實係蝕少少。。。

再另外,今日做左即月(十二月)建行SC@7.25,收番四千幾HKD。


講工作

十一月忙完一輪,十二月似乎都幾HONEY MOON。工作日數時數雙雙減少,幸好有小弟吹水WHATSAPP GROUP 提供飲食地圖,等每一日番工搵野食多好多選擇。

講完又講,踏入2019年,四天工作,將番工時間減至最低,番一番去又回家。所以,要增加行街睇玩具0既時數。

二月開始,要將鋪頭模型做個了斷,另外出售噴油箱同氣泵。。。

四月開始,要搵新地方噴油。

重有,六月走時,要洗走個魚缸,雖然只得番一條金青苔。。。

六月真係唔做,財政有否壓力?係呢個跌市時,我真係有諗過,不過解決方法都係個句,慳D駛咪得,再者太太重有工作(哈)!

十二月,女主人將一個PART TIME轉左做FULL TIME,希望個同事快D跟得上,等女主人可以得閒同男主人玩下深圳遊。。。

講生活

外母懷疑工人打斧頭!估計每日可能打十至廿蚊。。。當然,唔知真定假,佢個人正正常常又幾客氣,係有時可能懶懶地。其實我都OK,出聲就無謂,唯有係買送地點限制一下吧。

另想講下自己個女,今個學期後段已無跟佢D功課,見佢自己做又唔係太多錯,應該又可以放手由得佢自己做,今年只要過到乘數表,咁就應該OK了。第一次考試完左,佢考全級第八,雞校當中算係咁,我地以為佢今年會考十幾。



自己電腦換左KEYBOARD,CHERRY 青鈾PBT鍵,係幾爽,不過好嘈。。。哈哈!台灣牌子IROCKS,應該都係大陸製。


講資產

好耐無講過。簡單兩句。以下係淨資產計,已減貸款,真材實料絕無水份。

女主人連佢D股票554萬(對比上年438萬)

男主人不計建行倉233萬(八月高位351萬,上年比234萬),可見美股港股男主人皆蝕到入肉,工作帶來的現金流都幫唔到幾多!

唔計收息建行,兩人加埋都八球了,選擇?幾時都有。

不過,女主人的確後勁淩厲!軟飯王非我莫屬!

2018年11月13日 星期二

物理治療師弟也買樓

自從小弟有埋WHATSAPP GROUP 後,生活比以前更充實。至少,資訊都來得快一點,即使各有各聲音,有股有樓有仔女!

小弟已是十多年前畢業,執業日子長度數以日計(哈,只有四天)!他日財自唔再做炒蛋,應該都不可以做回一個物理治療師,因我早已把所學東西忘記了!

不過,一堆讀書高不成低不就0既人格就依然記得。以機會主義衡量,呢堆醫生助手ALLIED HEALTH 有兩特性。

<1>執輸行頭,慘過敗家
<2>怕死求穩陣,千祈唔好衰

同時基於讀乜做乜,大家一畢業應該都想做番本行,結果就好穩定咁做番本行。

照計我班同學入面百幾人,最成功又多曝光的,應該不是當年好成績的人。

做得好唔好,不是看成績吧?應看其熱誠看其人格。當然,要量化計算,收生只能以成績。大量醫你唔死等你自然復原的醫護人員自然出現。

以下新聞,當然係同學間FB內,屌哂鬼(我覺得呢三個字最適合)。說到底,其實也是飯碗問題。

上圖女同學好漂亮!不過,該位女教授,應該係我當年數一數二地垃圾。。。

我覺得,多個競爭,才有進步,無論治療師方面以及師資方面也一樣!說實在,當年教學的其實非常參差,多一間鬥,絕對是好事。物理治療亦非奢侈品,若人數上升,價格可以下降/變得更透明,亦是一件美事。

我講得肉酸!即使業者否認是飯碗問題,多年爭取DIRECT ACCESS(免醫生轉介),其實也是飯碗問題。說到底,也是校工(治療師)和老師(醫生),本質上的差異。

要麼不玩這個遊戲,去重讀個中醫或脊醫吧!

"去年RT靠父母的退休金,成功買下一個荃灣西新盤「上車」,首期約500萬元。RT說,當初父母本著「買磚頭最穩陣」的道理,令他「半逼半自願」地踏上業主路。"


其餘文章是這位小朋友的無病呻吟,可以忽略。我同太太一致認為此人很肯定有女朋友,只是會換,有些不承認是女朋友而已。

這個月,買樓一買即跌變成常態,半年後這位小朋友可能有更多苦水要吐。

夾錢投資增財力
80後港日兩地建物業王國


呢個CASE用圖講解較好,同朋友合資,可以無限資金。
不過,點解仲要做物理治療師?應該辭工四圍去睇樓吧,不停看才能找到好盤。。。奇怪。



比較得意,我個GROUP有職業治療師,有護士。但係竟然無物理治療師!哈哈。。。歡迎加入呢!
Related Posts Plugin for WordPress, Blogger...