以下是本網誌一系列文章

心態決定境界:多是講人,用以投射一般膠人膠事,免各位中人生誤區。

我可以唔撈嗎:純粹以時間倒數紀錄自身情況,現在回看,得啖笑。

我的財富大道:被我太太喻為三幅被,不停重覆,多為資產與時間描述,亦有提及我的工作/生意如何煉成。

我的實習時代:就係小弟大學修物理治療時實習經歷

2019年7月20日 星期六

皮老闆吹水谷 第二次谷聚記趣

是咁的,由BLOGGER本熊兄熱心提議,攪個網聚,結果一呼百應,成七十幾人報名。

開頭我以為好大獲,擺左我上枱(一半半啦,其實我都想見下大家),不過又覺得幾十人實在太難攪,不過洗濕左個頭,死就死啦。

果真天時地利人和,BLOGGER福䘵壽兄又有相熟場地可以包場,令我地今次谷聚可以係一個無其他人0既地方舉行。地方好大,仲有個STAGE可以講野。

最令人頭痕0既,係付款方式,由首次谷聚0既人教路,其實都好易收哂幾十人0既錢。

最後人和,報名七十幾,預計有一半都偷笑啦,點知最後黎到0既,都有六十人,真出席者應有五十五左右。

收錢,場地,人數,全部都OK,死就死啦~~~


上圖是本次谷聚合照,為保各位私穩,除了我自己無打格外,其餘全部變成阿寶及艾達(G SELF女主角,高達動畫少有美女駕駛員)

也謝謝谷友 K HO 送我這個面具,如我在現具店見到,都會想買一個,仲有變聲器,實在太正!


初初諗,會否大家好似母校母會站著如嘍囉,點知又唔會喎。就各有各組傾(希望無悶親各位),又有人識換位傾(認真重要),開頭我仲以為要忙過結婚去做迎賓,點知佢地自己破哂冰,我可以匿埋一邊站著如嘍囉了!哈哈哈~~~

平時我都唔會咁著,今日我著番上次番母校頒獎個件衫,同埋早排轉左髮型,應該好過之前啦!(上次件衫無幾可有機會著,極浪費!)

當日頒小型獎學金張相!
若然你係街度見過個男人咁著,一定唔係我。
我有八年無著過皮鞋!

聚會有感1(感覺類)

我發現,大家搵到我個BLOG0既原因大同小異,不過留低繼續睇0既原因就人人唔同。

我唔識投資,所以揀股呀,估值呀,睇高低位呀,就應該唔係睇我。

我最好睇0既(投資方面),應該係我做左D乜,同埋點做(直頭係D制點按!),又或者蝕到HIHI個陣如何一笑置之面對。我成日都講,無論你有幾叻都好,站在高處笑人伸手但又唔講好少少,一黎令人誤會,二黎亦做唔到教人0既目的。

當年我搵點樣期權轉倉,都搵左好耐,唔係無人講,係大家覺得太簡單,唔識又未做過0既人係理解唔到0既。

最後,令我有動力的,係覺得我古怪/FUNNY0既意見,其實投資或許寫得太多,我本身係想講價值觀一事,例如唔買樓都可以財自,做生意要睇興趣,學做愛唔好問處女等等。可能真係要回想一下,有冇D比我的前度女友系列相似0既經歷,或者可以滋潤一下個BLOG。

同時,BLOG中財自路有跡可尋,有根有據,或許給後生過我0既人,感覺生命滿希望吧!若我放在自己真實生活,只會比人覺得我晒命!

聚會有感2(出席者問答類)

講番出席者,正因我唔係開班L,WHATSAPP GROUP要求是捐款到慈善機構而非報讀投資班,結果大家對此GROUP期望很不一樣。至少勁人如云,而大家可以快過GOOGLE咁答到好多古怪問題,連SPEED DATING 著咩好/家中如何安裝尿兜都有人答!

其實我記性好差好差,而家唔寫聽日已全忘記。

有人買了一千萬保險融資,面不改容!勁呀!

很多人問創業,我認為要睇年紀,現時工作薪金的機會成本,以及興趣!

有人告知跟我開IB戶口買期權,IB真係要比番佣金我!

沽出一年期CALL OPTION當然唔會比做十二次即月OPTION權金多,但要連勝12個月無事唔升穿,其實極難。為免日煩夜煩,我會選擇做一年,怕升穿無仇報,就不如唔好做,等佢升多D先。

槓桿比去到2,其實如果係固定收益資產,其實都好安全。不過若然太過集中,隻野一旦違約,即時MARGIN RATIO去到100%,就咁好大獲!另外,財自與否,亦可參考被動現金流及每月提款既比例。

總現金正數,例如持有HKD但又沽左USD,係要比息的,不要太天真。

另,沽出股票,NLV不變,但MAINTENANCE MARGIN 變,係會安全左,亦降低槓桿比。

原來不少人報過投資班,OPTION J/撚蛇/美股隊長都有,最好笑有人唔捨得比錢撚蛇,GOOGLE下有冇人講,點知GOOGLE到我,慳番三千幾!

席間有唔少睇落去30出頭0既年青人(唔知係咪KEEP得好),我真心希望我0既操作無老點你,始終人人風險承受能力不一樣,我0既投資成績極一般,期權都成日奶野,當個反面教材還好,學下我如何按制好了。

已移居台灣谷友亦提醒,頭一年兩公婆財自還好,過左一年後,可能要各自尋找多一點空間,我相信是免太悶及免引來太多爭執吧。

福兄全家抱恙,希望佢地快D好番!

有人為左出席谷聚,唔去送老婆機,希望佢唔駛跪LEGO!

聚會有感3(個人展望)

大家還記得我為何寫BLOG嗎?就係希望被人搵到,幫下有相信諗法但未知可行與否0既人,如要量度成績,只有此BLOG點擊率(YOUTUBE觀看時數是另一障礙),大家不停分享出去(尤其分享到醫療界別人士),會是我的原動力!

最後,或許一個唔同你講你D錢,但係自言自語講自己D錢0既皮老闆,又不會謀住你D錢,會令各位感到無壓力吧!(我仲記得東昇兄話我有氣場)

學太太講果一句

"財自後,唔應該搵疏遠了的舊朋友,應該去識D新朋友。"

人生另一階段,不用再抱殘守缺,既然以前你睇唔透我+我又點唔明你,不如今生就此作罷。
各位,見過面,如今你們就是我的新朋友了!真好~~~~!

錯過左今次?肯定有下次!或許下次各位帶埋太太出黎,免佢地以為我地攪攪震!!!如有下次,應該有某美股優先股女BLOGGER加入,真好。

再一次多謝本熊兄福兄,令此谷聚得以完滿完成!期待下次帶埋太太出席!

另,我或許好多遺漏,希望其他BLOGGER能補完!(後再加LINK,謝謝!)

2019年7月17日 星期三

身邊朋友的FAQ 我的香港財務自由路(四)

好耐無UPDATE,希望各位無走到啦!!

其實本來打算每隔兩三日做完運動就打下BLOG文,點知呢期真係忙過番工。

對於一個近二十年無做開運動0既人,我估我成績都OK,體重由67KG去到64KG了!(大約三個星期吧)

本人寫BLOG只為點擊率,各位0既留言及定時收看,絕對是一種鼓舞!而此BLOG廣告收入,會全數捐出。

剛剛,我將一年BLOGGER收入,再自己貼小小,在母校成立了一個很小很小的獎學金,也在剛剛的星期一上台頒了獎。金額少到自己有點慚愧,但,莫於小善而不為,有機會寫文講下。

自現實生活對外宣佈退休後,很多關心小弟的朋友,都問左我唔少問題,亦有唔少意見比番我,可惜我一向唔太聽人意見。

同風中追風兄傾開,亦打趣同我個五十幾歲財自0既外母傾開,原來一講退休,好多人都會問相同問題!

希望各位會PLAN提早收山的朋友,能有此文幫助一下,至少:YOU ARE NOT ALONE!

以下歸類,好難講問果個人係善意定潤你,不過點都好,我一向統一答案。

1 退休後有咩做?

做自己鐘意做0既野,呢一刻未諗(諗左都唔想講,例如同你講獎攪學金,又會越講越又易被人誤會)

最正常,我會答陪下屋企人,睇住D小朋友(其實我工人好幫得手!)

如果熟少少,我會話寫下網絡文章,去試下做個無人睇0既YOUTUBER

如果我當你係朋友,應該咁答:這不是一個終結,而是另一個開始!

2 會唔會好悶?

忙到PK就真,可能退休前段,會多左人約飯局吧。其實每日45分鐘運動,執下屋睇下電視玩下高達打下機,已經令我唔得閒寫BLOG文。

平時去街,若第二日要工作,我會感覺就住就住,留番D精神明天工作。而家?玩都盡興D啦!

怕悶?我退休前已經試過日日行下街,其實除非落雨,悠閒地走在街上,其實好舒服,再唔係,戴個HEAD SET 聽住歌,感覺現在的人生及時間都是自己的。

日復日工作,即使我工作極有成功感,但都唔及而家正!

3 會唔會去下旅行,做下義工?

我以前工作,每日都係做三五個鐘,無壓力,受客專重,收入六位數。我從來無需要去RELAX一下,旅行我都麻麻(我又唔想鬧我太太。。。旅行我會發脾四)。

做義工?NO WAY,要做善事要幫人,有好多方法,話唔埋我定時寫下BLOG,又可以幫人開竅,搵到自己鐘意0既人生,咁樣唔係比免費勞工0既義工更加有效?

喂,我並唔係失敗到要用以上兩種方式去打發時間,去等死啊!

(真係唔好咁問,我會覺得你好低層次,又或者唔識問,想求其搵下野問我而已)

4 會唔會搵其他野/工做下?

基本上,大部份人係問我會唔會再搵錢。乜錢真係咁重要咩?要無時無刻唔放過任何機會?

我答得好直接:我唔打算做任何搵錢0既事。

我心諗:如果我走去打工,搵雞水咁多工時又長,咁我為乜要放棄本來極之爽0既炒旦小生意呢?

5 夠唔夠錢駛?

呢個通常唔會直接問,同男人D頭髮/女人去微整一樣,非常忌諱!

其實我真心好想你問,亦唔介意你問。

因為,我都想你明白,其實只要控制好自己,接受一些新事物,錢係可以夠駛0既!

即使真係財自唔到,多個被動收入,總好過只係得樓9流流慢慢等丫。。。

其實控制物慾,已經係成功0既一半!(睇下個D財自爸爸,好多成功0既另一半,係靠自己個另一半!哈哈哈哈哈~~~~ 我唔係啊~)

現在成績?未知通漲能否追到,不過每月很肯定有錢剩,暫時未有方法去計,只係八月份開始每月出錢比自己,睇下月尾係咪月光族!(另一部份繼續留係戶口啦當然。)

IB可以SET RECURRING WIRE WITHDRAWAL
每月一次免費!


6 你就好啦,我都好想好似你

呢個超級FAQ,尤其係對你無乜大好感個D,正正常常講呢句,好睇佢語氣。若然係街撞到,劈頭第一句咁講,我心中想回番佢粗口。

不過諗諗下,呢種妒嫉,其實正正因為佢地無能/無能用。

小弟口衰,細個至大個都唔係好識言語遮掩自己,結果,被誤會次數真係多不勝數,一遇上有妒嫉者,就會被不停放大。

結果,好處係,真係朋友的,就真係好交心朋友。

相反,想大班人食下飯吹下水,呢D飯局就我無份了。

黎緊吹水谷又有飯局,今次成60人,希望大家都唔會"那年十八 母校舞會 站著如嘍囉"啦!!(若小弟有咩講錯得罪,請多多包涵,只係我唔識包裝講野,未必係你心想咁樣。。。)

*****

明天同太太及小朋友去睇TOY STORY早場,連個仔都話,寧願坐前D都唔想比人個頭檔住!你仲諗住買飛坐中間?

2019年7月4日 星期四

年青退休生活如何比較? 我的香港財務自由路(三)

本來應該講下要預留多少BUFFER財自,不過放低左就無寫,開番篇草稿又唔記得想講咩重點,哈哈。

今日應該係我財自第十天。

昨天交番鋪頭鎖匙比業主,拎番按金,總算正式停止哂所有炒旦小茶飯。

有冇唔捨得?少少啦,不過而家去玩去街去食野,少左好多牽掛,同平時放假好唔同,完全係兩種感覺。

另外,減重大計開始中,其實都係去會所跑下步(管理費業主交,無理由唔用下。),點解會所無 iMoney 睇?否則可以做完運動嘆下。

十日間,磅數減少左,頭幾日我覺得係疴左屎,流左汗而成。

不過今日再磅,由最初67.X𥑇到65.X,應該不是屎吧!(同埋每天我去哂廁所先去跑)



點跑?我覺得同投資一樣。我唔會辛苦自己,正正常常去做就得,不信秘方,不催谷。

吹水WHATSAPP GROUP 中,除左投資勁人外,仲有好多運動鐵人!比左好多有用建議我,不過我自己就會就住自己跑,慢慢跑,唔好心急,一下子耗盡體力,第二日累到無心機再繼續,其實前功盡廢!(女主人都係咁,一開始就谷到最盡)

同人比?大家方向唔同,我自出娘胎都無試過咁固定去運動(同同學打下波,上PE堂才會運動,不會刻意定量),我一早已經知道自己一做運動,只係增加心跳呼吸已經可以燒脂減磅,同埋戒掉晚上狂食零食已應可非常成功!

同樣,十幾年前我發現,我收入係同年同系同學三倍時,我都知道提早退休財自跟本是必然做到,只在乎何時退同埋等待一個決心而已。

*****

財自路,其實也一樣,只要了解自己,定個目標,其實人人都做得到。

呢幾日,遇到識我0既人,口中都係講:

"你就好啦,退休喇,我都想好似你咁"

呢D真係唔知係佢潤我定係客套說話,其實財自又好,減肥又好,有需要同人比?

YES & NO

減重,梗係成效同人比,不過又唔駛過份執著。當你發現成效好WORK果陣,同自己比更有用!講重點,如果成績見得人,同人比只能自high,有乜9用?應該同自己比吧。

同自己比?財務狀態都一樣,我開支少物質慾念低,所要用既錢比一般同年中產同學可能較少,要被動收入追到唔難。而且,我又無諗過要留錢比子女,即使蝕通脹又如何?

同人地比?更加有趣,因為我贏既唔係錢多錢少,我贏既係時間同青春。

“咁你咪好叻仔?” yes or no,我放棄左可以住大屋揸靚車豪華遊既後續生活。

你以為我無所事事好得閒先去做運動? 非也,就係我有青春去花,追求健康身體,沒工作煩惱的個人意志,更精要既係,我有“無任何逃避理由”去負擔的家庭責任。

我記得,風兄講過,醫院內好多患者都無乜親人陪,因為要番工(詳略吧);同樣,好多爸爸放工番屋企就休息,因為已經盡左搵錢義務,家務及照顧小朋友是否可放埋一邊??

同樣,為工作犧牲了的家庭崗位,只要財自,便責無旁貸地要背上。

"我見你平時都幾得閒” 

你咁講我,唔會刺激到我神經,我有家庭有目標有未來有後代仲有好多人生achievement 趕住要去unlock,你話我得閒我真係覺得你讚緊我,因為我時間管理好

除非人生只係剩下等死,否則聽到呢句應該開心。

時間點用係相對既,同人比?我比人話我得閒,我會沾沾自喜;同自己比? 我覺得每朝30分鐘運動,平時我hea 睇新聞都用左啦!如果可以換來身型同健康,不是十分美好嗎?

財自最多人唔敢面對以下三點

一是怕唔夠錢
二是缺乏工作成就的生活
三應該是如何使用(不是打發)時間

我建議係,先試下同人比,覺得自己感覺良好的,再同自己比!
時機成熟與否,自己決定吧。
因為大部份對你指指點點0既人,都係未自由過,沒有FREE WILL的。

最後,感謝女主人比我放縱一下,間房變左高達房(通常都係港女HELLO KITTY),等我SETTLE好D高達後,再補番張靚相!

上面部高達波子機好重啊!!!

2019年7月2日 星期二

你班上左岸0既中坑老坑 心態決定境界27

首先,此文非政治立場POST。

廢老最鐘意砌高達啦,一定係除非唔係!
已經拍左片喇~~~

本人自認是偏藍,但極討厭果班豬到不得了0既五毛左膠豬隊友,總之兩面不是人,兩面不討好。自少人生便如是,只能認命。

昨日外遊,不過見FACEBOOK有個中學同學(佢細我少少,一齊未夠40歲),出左以篇潮文,連女主人都覺得佢講野過份,行文講下呢條友。

其實只因譚雞蟲同埋鐘破產兩位過氣明星,去左撐藍維穩活動,咁網上又大把人話唔聽佢D歌(下,我都唔係呢個年代,關我X事?),又爛唱片等等。

其實同老人BLOGGER一樣,呢兩件過氣野,跟本無人GIVE A SHIT,佢出唔出現都唔係好關事。

咁阿中學同學係邊個?原來我係2015年已經提過佢:

心能決定境界3 - 論創業 <叫朋友做影相佢當我點佢>


建議入去睇,當年寫應該全神D,不過我都簡介一下:

2009年,中學同學三個人,傾下計,我教佢地期權,有人教番我保力加(受惠者卻是我轉教的女主人),事後比人私底下話我做乜咁好死教佢地,WELL。。。

當年我都有提過,見佢鐘意影相,都成十幾年興趣,不如去影下婚照啦。點知佢一堆理由(上條LINK)話做唔過。

結果,幾年後,佢咪又去左幫人影婚照,打份頹廢IT SUPPORT邊有肉食丫。

當年有另一中同,一早入行,買入地鐵物業後沽出,已全家移民英國爽歪歪了。

佢?同年紀,遲入行,2019年今日,佢只係買左屯門D濕九廢樓(聽聞係美樂,我唔肯定),日9日係FB講佢D作品,客人FEEDBACK,西客講價。。。

以上呢D我炒旦生意全部都有,但我從不晒,因為我怕晒左之後太多生意煩到自己!!!講價?唔好意思,正價都唔做你生意!(唔係我串,其實好多人都做到)

可惜,我已經上個月執左笠了!

****

講番正題,點解開文講呢個人?連我EQ滿分0既太太睇完都覺得過份,應該拎出黎講下算有價值。

佢SHARE樂神壇廢老篇文,講左幾句令人嬲嬲地又好好笑0既說話,佢POST完就刪左文,我CAP唔到圖!!!佢提左一句,非常擊中(我對號入座)但又可笑!

"佢地呢D上左岸0既中坑老坑"

我唔知我39算唔算中坑,上左岸我又未係,不過我又唔駛為兩餐煩,算係基層出生香港人呢個年紀有一兩分成就0既正常故事(或者大家沽左層樓就做到),不過佢咁多年打工、創業、結婚生仔浮沉中,到頭來眼見就黎40都仲係要同班後生去比較,真係慘慘豬。其實佢已經係中坑了!

政治唔講,講錢又得,講生活也可以,我成日講,要比較,就要咁:

1 用同年紀0既人比
2 起跑線無視,公屋學校中,當年屋企有錢個D,大個左咪又係咁!
3 現實點,用錢/資產比;夢想點,用人生目標比;幸福點,用結婚生仔長輩生活比
4 唔鐘意比較?問下自己係咪真問唔想比,定係唔夠人比啦

阿中學同學,可能你無諗過會觸動到我神經,不過。。。

用錢比?我唔蝦你,算

用夢想比?SO SO99Y我唔知你夢想係乜,玩FB定去遠行帶MUA(同化粧師影近距合照)都唔帶埋個太太?(同太太就KEEP DISTANCE。。。)

幸福比,兒女未必能比,我太太靚過你老婆幾十條街(佢件前度唔錯,自己唔揀,人地嫁埋去美國了),雖我母親已不在,但至少我真係唔見你會特別日子同親人影張相。行街見到佢地都好似無乜精神咁。

我呢件表面上上左岸0既廢中,
講到呢到就算。

最後,我鐘意動盪,因為有危才有機,
才有可能洗牌比年青一輩上位
否則社會只會死氣沉沉。
咪以為我係坐係度鬧年青人0既公園阿叔啊!!!

執笠最後帶哂番屋企,我唔係賣型架!

預告:黎緊會幫兩位BLOGGER好友寫書0既序,忙左幾日(跑步+執笠),要開始了。。。

下面係最片,無訂閱頻道0既等我UPDATE下你啦~

IB 如何睇槓桿率? 何時要追保證金(補孖展)? 如何轉介面語言?

2019年6月24日 星期一

吹水GROUP飯聚後記

話說小弟係颱風山竹襲港期間,開左個吹水WHATSAPP GROUP,只要向指定團體捐100蚊,就可以入黎。

咁因為保持神秘感(說穿了就係我外型唔見得人,得把死人口),正常都唔會見非BLOGGER0既朋友。

不過早陣子本熊兄連同一眾朋友攪左個飯局,邀請埋我,咁我見平日都傾開,咁就去啦。

有冇擔心比人發現原來係七頭一名?無喎!

因為,係我心中有個諗法,唔寫文但係又會入其他群組吸收資訊0既,都係花白了頭四五十歲阿伯大嬸類。

即使今次飯局11人當中有三位女性,成班大叔大嬸,我預想圖都係咁。。。


約左係油麻地一間酒家食,食物好OK喎!不過我估在場男仕可能唔夠(本身我細食,是OK的)。

其實,今次係有BLOGGER架!包括我,本熊同埋福褖壽兄!席間亦有好多勁人,不輪投資又好,八卦事又好!咁都有得八?梗係有,去得多講座,自然見得多開班BLOGGERE啦。

究竟想像同現實有冇出入?好大!!明顯大家0既年紀後生好多好多,女0既仲要全部都唔係阿嬸唔係師奶!(有人仲係油麻地比飛仔撩。。。比人果位應該開心過個飛仔!我都想有人行過黎問我買唔買二手中學書/去唔去OCAMP!)

一去到,已有兩男一女到左,佢地傻傻的自爆左係邊個!無錯,我地11人從未見過,要互相去估。

結果就玩左個遊戲,大家各自估下全部人是誰,然後同時POST在GROUP,全中者今晚FREE DINNER。當然我一開聲就比人認出,而亦有一人全中,其實好多人都係爭少少就中哂,三位女士難估之外,幾位斯文型男性亦難辨認。

席中,有STARMAN哥幼齒年代0既老師!哈哈!

講D乜?投資股樓REITS當然有,仲有講下小朋友。雖然素不相識,都十分投緣,希望不是小弟一廂情願啦~哈哈~ 講左咩特別野?我已經忘記了!

小弟有紀念品!謝謝某師姐個仔割愛!


最後,我又推下我新出果兩條片,係我財自第一天0既行程!

如果你斷左片唔知我講乜?可以睇番呢個:


仲有第二屆女人認高達大賽!


謝謝各位支持及訂閱!小弟昨天和朋友開了FAIRWELL PARTY,很是盡興,將來會更多更新BLOG及YOUTUBE!但精神依舊,你的留言是我的動力!

2019年6月17日 星期一

虛擬與現實世界的我 心態決定境界26

一晚出左兩篇,上一篇講出水豆,要CLICK入去才看到。

難得今日同女主人一齊收工,坐的士順手車埋佢(平時分開坐,浪費金錢呢!)

有唔少野,係屋企時好少講,一黎唔想長輩知(錢銀又好,人生去向也好),二黎又唔想會搭咀0既小朋友八卦。(若小朋友想了解多D爸爸,到我死左,睇我個BLOG就知了。)

小弟的父親節禮物!
(阿囡越黎越靚,開始有種仙氣。。。)

的士上,好多時會講下自己野,老婆話,講錢怕的士佬老笠(哈!)

近日遊行反惡法一事,我支持年輕人去追自己想要的東西,背後會否有大人/人大陰謀,我就唔知了。

這不是重點,而是多得whatsapp吹水group一眾谷友都好克制,至少都好比面小弟,無乜亂子出現,罵戰當然無,連post link迫人睇都唔多。

這也不是重點(不要打頭),我同太太講,在虛擬世界裏,大家都好客氣好比面,現實生活裏,大家都以為我on9的(或者咁講,驚死我害佢/覺得我吹水)。箇中原因,女主人一矢中的:

"佢地唔知你做d乜,咪覺得你好似好勁law!現實生活d人會覺得:車,你好巴閉咩?!"

所以,佢再一次千叮萬囑,要我繼續保持神秘感(哈)!同樣地,我一向都話我0既小生意係一d好低微好不值一提,一d都無謙虛成份

不過,blog文中的事情的確真實,收入是真的,資產是真的,唔駛受氣也是真的,非常想點就點也是真的!最引以為傲的,是我不吸年青一輩錢,全是上一輩港人資金貢獻上。

好比水電工一樣,你唔整?你識唔識整丫?shut up and give the money 啦!

另,我唔會(亦無需要)特別提我公屋出身,父母親基層,仲加個廢柴爛賭父親,憑著自己點努力點奮鬥達到今日財自!咪玩啦。如果我要厄人,話我係神秘ANGEL FUND 咪得LAW!係咪?(上到鏡頭,支支吾吾扮專家攪掂啦!)


現實世界,有冇人信我D屎橋最後掂左?梗係有啦!我老婆咪係其一,當然仲有舊同學,講得出來,有時雖然ON9無道理,但這些奇兵方法,正常人只有保守正常思維,又點會比到你?

若然你網上睇到我,覺得我好攪笑又另類,恭喜你,你搵到一片ON9新大陸,錢就唔會多左,不過人生不只一條路,講都講到我口爛了。(記得BOOKMARK啊!)

相反,現實生活中,常被人誤解,年紀越大0既,佢地個框框越細,越比人當你老點!

上星期本熊兄福䘵壽兄及一眾吹水谷一圍十一人的聚會,食左餐飯,其實席間我都係好怕講錯野,如有無心得罪,你就當係我細路仔/傻仔吧。(當天細節,我唔記得哂啦,過程可以另文再述)

女主人又再次講得好好:財自後,唔應該搵疏遠了的舊朋友,應該去識D新朋友。

人生另一階段,不用再抱殘守缺,既然以前你睇唔透我+我又點唔明你,不如今生就此作罷。

****

最後,先不論小生意係咪真係咁低下,我對我自已就有以下意見:

要估一個壞人幾時做壞事係好易,要估佢幾時做好事就極難;同樣,要估明哥幾時派飯好易,要估葉繼歡幾時會扶阿婆過馬路就好難!

結果,往績唔好0既(以訛傳訛也可以,並非真實往績,真實世界中有人鐘意安安份份,請你別另類,OK?),或者好似我咁有個句就講出0既,一定比人定左型。

講多次,"要估一個壞人幾時做壞事係好易,要估佢幾時做好事就極難"

政局有時也如是;股市有時也如是。

出水豆!忙過番工! 我可以唔撈嗎50

我成日想更新呢度架。。。

話說五月中,我個女出水豆!

家中未出過0既人:女主人、阿仔

家中出過0既人:工人、外母(佢偶爾過來)

我?我印象中無出過,但唯人可以知我出過未0既阿媽已經不在人世,無得問要等報夢,我老豆係廢0既,不提也罷。

為免大家中招,阿女被隔離在房兩星期。

到佢好番,就到女主人中水豆。。。佢自我隔離,我?訓廳!就係咁,一直提唔起勁出文,今天只能作個生活UPDATE。

而BLOG文都偏向講生活多,始終現時無乜新資金再投入,同埋一動不如一靜吧。

****

一日作息,可以好忙,亦可以好得閒,今個星期已經試過一連四日無番工,其中一日屋企打機,仲攰過番工呢!哈哈!!

打乜?打呢個。。。

唔好笑我低能,呢套卡通片其實好有意思,比海綿寶寶更神。
講好多人生,包括愛情0既取捨,友情0既偉大!
仲要係成人角度睇,非單單小朋友角度喎!

而個女已考完試(趕得切係考試前好番),我又唔駛跟佢功課同溫書。。。

過埋今日, 仲有三日要工作, 過多四日我就唔做了。

月底交還鋪位及機器,正式同畢業後唔夠一年就開始0既炒旦工作說再見。咁就做左十幾年,有冇唔捨得?只有少少,因為心情早就收拾好了。反正炒旦這一行,鐘意可以做返(但收入得番1成都無),不過我唔會再做就是。

當初諗住做十年就會變老左,就做唔到,而家十九幾年,乜都賺左。我太太識我時都講過,估唔到彊越老越辣,後期越做感覺越輕鬆。

放棄工作值得否?若然可以早D體會別人體會唔到0既野,已經唔係用錢可以量度。再者,從來我都係獨斷獨行,如果唔係會溝女,相信現在我只是一個平日收工ON99,一個人去吉野家打邊壚0既中坑。

我唔鐘意即興,所以退休計劃早有部署,寫BLOG/VLOG其一二,減肥/湊小朋友其三四。至於其他事情,要等埋太太退出,先陪佢去做吧。

家本位之下,好多人卦住番工/打著要番工旗號,忽略身邊太多人和事/個人理想,基本生活是緊要,但再多錢的生活於我無用,若然到我80歲打回原形一窮二白,我都會選擇現在退休。

AV男優VS財自老獨L,你會點揀?

班老野叫你努力D累積財富,其實幾好笑,佢地年華已去,無得揀,唯有迫你揀同佢一樣0既路。一個無青春0既人叫你放棄青春換金錢,乖乖走所有老人走過(走錯)0既路,新時代0既你,會否太蠢?
Related Posts Plugin for WordPress, Blogger...