小弟在DISCUSS 並無出文
你回應緊0既,都係一個有心引你派膠0既人,並非小弟。
若有人以為我係DISCUSS 出文引HATER, 是否太小學雞?
小朋友, 暑期放完好耐了. 好好努力上班吧...

2019年3月18日 星期一

幪面超人 港人狹窄視野 心態決定境界24

好耐無講過自己果個跌到四腳朝天0既倉,文末講下啦!

先貼下兩條片0既YOUTUBE LINK

幪面超人變身比賽過2,000 likes 達人現身說法:屋企人同女朋友都好支持



【點做到〡高收入筍工】HKTV揸車月入4萬 譚仔阿姐月薪萬五以上


其實幪面超人變身比賽,香港不是首站。早幾個月前已經見日本仔玩,不過香港港玩具業其實幾UPDATE,有展覽就順出推舟出左呢個比賽。片中年青人因超時3秒被扣分,最後得第三,但第一名果位認為佢最好,將部獎品(SWITCH)比左佢!如果係中產港豬?仲唔偷偷地跳起YEAH拎埋獎品走,之後係FB出POST話自己好好彩咩!

利申,真係無睇過任何一集完0既幪面超人(網上人叫佢做拉打RIDER),只係好細過打過以下遊戲:

你都玩過?遊戲連結按㧗

所以,我對RIDER認識識其實好少,如果要揀一隻,我鐘意V3,因為佢唔係黑色!(哈哈哈),同埋好多RIDER玩具都炒到貴,唔好問我點解,真係無追開。

上面條片,各位讀者,真係好值得同另一半一齊睇,如果小朋友夠大,搵埋佢睇。我個女7歲,都識同我講:

"應該搵一份自己有興趣0既工作"

我就全家一齊睇左變身道,連我個工人都睇到唔眨眼!


我又唔會話個RIDER變身有幾高尚,不過都係幾十年不滅文化神話之一。果班上左年紀0既港豬,只係識得SEARCH OPEN RICE 假食評,扮食好西,放上只有爐取暖0既FB 專頁度哂命互LIKE(其實無乜後生仔用,集中哂係三十五以上港媽。。。同埋一堆剛學電腦0既老人),又或旅行日本一泊二食相,極其單一。

只能講,或者佢地人生只係得食同住呢D人生最基本層面,所以即使有兩個錢,生活好少少,都只係停留係食同住放面可以提升自己水平,其實水平一路無提升過!

話人買唔起樓?結果某模型店後生老闆,講自己間鋪都二千呎。。。(呢條友成日靚抽,講野比我更正),人地理想變事業,再變番理想,果班日日番工出糧一生三宅當目標0既港豬係唔會明白。

講兒子?如果我個仔有一樣可以咁專注0既野,總好過佢無仁心地讀好書做個醫生!當然作為父母,都希望小朋友第日可以溫飽幸福,不過,生命無TAKE2,倒不如活一次自己不會後悔0既人生,千祈唔好到老先去做自己想做0既事(大把老港豬去旅行!)


譚仔阿姐月入15K果條片,後面個一段年青人COMMENT好有意思,我又唔係鐘意寫影評0既劇透L,唔想CAP哂D圖出黎,或者我節錄一下吧:

A 若一些目標,你要放下人生的追求或自己的尊嚴,就沒有意思

B 大人(老人)覺得買樓重要,但我們覺得不是這樣,錢會用在不同地方,所以不能比較。

C 條路自己揀,跌低唔好喊。(註:原出處為"仆街唔好喊")

我最鐘意寫野比年青人睇(有幾多年青人睇又另一回事),如果年紀同我一樣有番咁上下,其實都已經過左最好玩0既時光,溝女,玩通頂,四圍癲0既日子已經一去不返。

失去左呢D日子0既人,去睇唔起仲有能力去花既人,仲要教化年青人要同佢當年一樣,放棄無限可能性去走單一單結果人生路,係咪可笑?

唔知邊條毒L白痴碌葛話數學最準唔會厄人唔會錯,其實剛剛相反,好多野,係計唔到。感情健康文化知識等等。

即使你有三個碩士學位,人生會滿足過我屋企個件(由細到大都比人錫0既)童顏靚太太?或者降一級,連由細到大都比老師偏心0既男主人,佢連燈尾都睇唔到。。。

我認為,買樓前計數,好0岩;計數後買樓,就好有問題喇!(唔一樣架!)

相信,唔少人都有玩FB(至少我呢個年紀會啦),不妨睇下有幾多朋友親人,當初夢想已被消磨?無錢個陣,係咪仲開心過而家有錢無光陰?當然,佢地唔會表達出黎,邊有人豬左仲會笑自己?

點算?唯有搬下龍門,講下自己財富有多少,樓有多少,好讓佢白白浪費0既人生可以量化,可以說服"他比你好"

******
忘了報倉

原來恒大已經升過左交貨位。。。另外比亞迪已經正數!騰訊都好快正數了!(扣埋期權金)

最差個三隻,都係吉利,舜宇,瑞聲!三隻加埋應該蝕成四十萬左右。。。


註:權金收益,約29萬。

六月個倉到期,又睇下點攪啦!

2019年3月12日 星期二

退休倒數100天 我可以唔撈嗎 45

離金盆XX之日,重有100日。

圖文不符,吹水GROUP講開搬屋
原來有搬屋公司代PACK的!!仲要唔貴!
上圖係老婆親自幫我搬高達模型,其他野才找搬屋吧。

雖租約6月30日完,但應該6月尾就開始唔做,留番十日八日去清場。

為免自己唔記得,100天內,完成以下動作,立文以作紀錄

事有分緩急,如A為要先做,C就不需急

A申請東亞張理大舊生信用卡
A申請理大圖書館証



因為申請需時,同埋現在都用得,所以應該做左先!
申請圖書証原因有三,一黎可以靜靜地寫下BLOG,又可以寫下書(如有);二黎有個地方可以放空(屋企/公共圖書館/會所閱讀空間都比唔到咁正環境);三黎,比自己出下街,長期懶洋洋留係屋企,絕對對身心都唔徤康。

四樓自閉位原來變成咁


B賣高達波子機
B賣噴油泵
B賣噴油抽風箱
B賣高達模型(暫定唔賣?)


二手都賣緊五千幾,我平過佢啦。。。

上圖連結

尋找蘇眉的故事


都係模型相關,最初呢D野,算係工作上一種調劑。除左波子機外,其他野平走就走吧。波子機,希望遇到有心人,最好係有鋪頭會接收佢,咁我第時都可以去睇下。。。

C清左個得一條魚0既魚缸
C清理雜物

清走一切儀器工具雜物,應該踏入6月先做。尤其有D幾重0既搵食工具,可以送比行家,可能佢都唔知原來有呢D用途。仲有D消耗品,送哂比行家實有人要。至於個魚缸,真係唔識攪,抽走D水,條魚(??),D泥(???)。

題外話,鋪頭二十步之內,開左另一間炒旦,老闆好後生,市場好相近,不過應該係唔太搵到錢。唔知佢係咪開頭個陣見到有我才搬進來,似乎。。。佢個如意算盤打唔響了。

D停工具合約(應該六月完,不用賠)
D停寬頻會約(好似要賠一年。。。)
D清走店內傢具(錢可解決)

呢D應該可以最後做,比錢就得,要例個清單唔難,錢可以解決到。

止凡問,會否攪個飯局?當然唔會啦,退出工作是另一個開始!不過就會同自己現實世界的朋友,係鋪頭食下乳豬西餅影下相吧。

當年開鋪𨾏乳豬!

至於退休後D錢點分配?留下一篇再講吧!

2019年3月7日 星期四

十年挑戰的花生 一班同學去BBQ

(寫完,我都係覺得我寫花生/寫溝女,遠遠叻過寫投資!笑死無命賠呀!)

話說,香港地少人多(呢句好老土),小學雞去旅行,通常都會BBQ!

話說有一班小朋友,佢地想燒野食,但係咁細個,唔係個個都識透爐(起爐)架MA!

最普遍,梗係用炭精!我咁大個人都未透過爐,次次都係食果個。不過見人透得多,都略知一二,燒著舊炭精再令夠炭精係溫度足夠之下,燒著圍係佢附近0既炭!

GOOGLE一下,原來好多方法架!

咁呢D野,網上都好多人教既!

呢班小學雞,有一個同學仔特別熱心,唔收錢主動出手,學校又無優點比佢,同學又無比錢佢,連女同學香吻一個都無,肯幫手算唔話得啦!當然,呢D免費勞工,總會好多朋友(想坐順風車有的,真心的朋友也不少),結果佢個爐最熱鬧最多野食!

點知有個讀左四十五年書都未畢業,可能腦筍未生埋,又以為自己好叻,年年都係考第三(級)0既所謂自命高材生,走黎指指點點,又話佢D炭精計錯數,燃點時間無理據云云。

爐中有好學同學仔問佢應該點,問多兩句,唔教不得止,仲比呢位專才(哈!)窒到一面屁。。。

坐熱心同學隔黎咁岩有個冷艷美人,正正係偽專才杯茶,不屑呢位老坑偽專才,講左句:"阿叔,你背都寒埋,飲多D高鈣奶啦,你以為你真係年青小學生呀?"隔離爐仲有幾個後生妹妹,係度瘋狂恥笑。

老坑高材生,並唔係玉風臨風(吹夢的巨人咁就有佢份!),唔好話冷艷美人,連地鐵初戀情人都唔吼佢呀。。。

我怕大家唔知我講乜,記得睇埋上圖D字。。。唔好錯FOCUS

吹夢巨人構想圖

之後,有個阿婆校工行過又留低兩句,正所謂:"敵人既敵人"就係朋友,話今年唔知邊個居士話,今年只吹西此風,仲話十九幾年前已經叫人咁樣撥D風!難怪點咁耐都唔著!(實情好多爐都點著左啦佢都ON9)

拿,呢位校工阿婆呢,平時係屋企都無乜人理佢架喇。。。更何況係小學世界。正如學校生活,校工?WE DONT GIVE A SHIT!成個過程,佢彷如空氣,結果佢就周圍去唔同0既爐度亂九唱人。。。同學們已經習以為常佢亂咁吠,繼續WE DONT GIVE A SHIT


其實,有人幫下手透爐,點解咁多人有意見?

事緣係因為有個完美主義固執高材生,係幾年間學校旅行都指出果位同學透爐有錯誤,未能令到爐火係短時間之內變得夠大夠熱可以用黎燒雞翼同燴蕃薯!

而阿熱心同學,本住人人有得燒,唔理佢大細火,繼續透。有人學左透得好,當然有人透到一劈屎啦!不過唔難發現,唔少人霸左個大爐,仲帶左好多好多炭黎燒,即使熱心同學方法唔係最好最準最岩,人地個爐夠大個炭夠多,山大斬埋有柴,個火分分鐘大過精準計算0既小戶。。。

其實無話邊個對與錯,只係你睇唔到佢想求精,佢又睇唔到你想普及化而已。

批評別人總係容易,小弟工作十9幾年(真係就黎十九年了!),聽盡所有業界閒言閒語,朋友間0既誤解(如果有人搵我寫書,我肯定係以呢個背景再講投資心路!),真係聽到慣哂,而我又比較爭一夕意氣,好在有個女主人比我發牢騷,容我可以嘻笑怒罵之下無視閒言閒語。

小弟金句:"你咁叻,不如你又黎試下做丫!睇下做唔做得到?"

其實仲有下句:"做唔到/唔敢做呀?你都係聽日準時DUP低頭番工,日日等八號風啦!"

我覺得透爐如投資,精準又好,求其又好,目的都係著火/有回報,做到咪得!我唔叻投資,但我知道,係資訊有限0既情況之下,有人肯免費地持續分享,其實已經十分不錯!

番外篇

有個隔離間小學0既經過,明明係名校校服學生,點知講野成日都左一句L,右一句L,講多兩句咪又係露底!原來係佢班入面專做透爐0既透爐小風紀,不過佢成績又唔係真係好好,成日考第二,又眼紅考第一果個年年獎學金,自己雖比上不足比下有餘。

二奶命,長期無人注意,結果做人太抑壓,行過見到熱心同學個爐,兜口兜面一句達過黎(笑死無命賠,大家心神意會吧):

"DLLM,我都話,透壚呢D野唔L識就唔好透啦,錯L哂!快D淋熄個壚,D雞翼同豬扒生食啦,小心個火燒L死你呀!拿,買定朱古力薯片去旅行食咪好LAW!價錢又升左喇,我仲用D錢買左隻KINDER出奇旦幾威威?!唔買零食?你地死L梗,一定見唔L到未來!"

講完,以為自己好叻,其實幾乎全部人滴哂汗。。。考第二原來會影響人生,好可憐呢!

其實,行過批評0既人有咁多個,個個都身懷絕技,但又唔會攤開教人。何必要追住一D誠心分享0既人?心理不平衡???

我又唔會標榜自己係公屋仔,不過以小弟出身,即使而家無哂所有錢,從頭黎過,我最多係唔開心,但我知我跟本無野可以輸,至少,我有個同我同一陣線0既太太,有兩個對人生仲係充滿好奇0既小朋友。

我既工作,唔受氣,搵到少少臭錢(家庭年收入,上年應該有三球),受客人專重,一切運作全自主若意氣用事可以話唔做佢生意就唔做。

再者,現在我應該勉強夠錢退出工作,去尋找人生另一個金錢以外0既起點。

人生中,樣樣都有一些,我現在覺得十分滿足呢!

希望以上諸位,可以睇開一點,施比鬧/怨/嘈,更有福呢。

最後,放番條LINK

10 years challenge-匯控


一切萬惡根源都係呢度!哈哈!

2019年2月28日 星期四

失敗的投資 女主人整餅

近日股升樓又升,連金都升。

係人人都嬴緊幾架車幾層樓0既時候,小弟都幾失敗,計計埋都輸近一球幾(雖然佔比不多,不過都好肉痛!)。

首先係美股,半年前錯手按錯SC做SP,結果買多左ATVI,而ATVI 呢半年股價由八十幾跌到四十。。。。WELL!本來蝕少少,結果蝕多一倍。



教訓?下次按錯唔好佛系~~~ 同埋得些好意就沽左佢算。



之後,應該係港股。我中左吉利,舜宇,瑞聲,仲要呢十隻股票係舊年六月高位買入。不過好彩當年有做期權,扣減權金同我一路無計入0既股息,應該都係蝕四十個左右~又可以用黎買車啦你話係咪先~

教訓?下次都係唔好咁衝動,哈哈。。。又不妨再坐一會,敗家仔番唔到家鄉0者,十隻入面有幾隻已經好近家了。

最後,應該係WINDSTREAM債!呢個都算係無妄之災,首日個庭判左,如果即時沽,可能都係輸六成,而家佢DEFAULT左,進入CHAPTER11,真係半生不死。當年TOY我走得切,佢CH11左半年先死。WIN 應該唔太係營運問題,谷中有愛,認為可以佛系一下(其實都無得揀。)

臨退休先攪獲咁0既野,真係令人擔憂。

不過都係個句,即使做多一年,呢個現像都唔會改變。即使做多三五年,小朋友都大哂了,此刻無價。

唯有,吸取教訓吧。

小弟非投資高手,只能講句,我乜都試下,無乜野可以輸,唔試就笨。

至於其他選擇方面,我多數都唔講出黎,原因?哈哈哈。。。

昨日跟老婆坐UBER(個人不喜),仲要坐中一架慢過巴0既!結果車上傾左一陣工作。

女主人二月應該要蝕,因為放左半個月假!另外,轉左新合作伙伴似乎都幾好,收費仲平左少少!前日見過一個,個樣好似赤木剛憲!老老實實的~~~

至少我,竟然有知情BLOGGER想問我行頭0既事,我都係個句,有心有天份可以做到好大,如果係退休過日晨,真係可免則免了。當然,好睇你個市場定位啦。。。

UBER上,同老婆講,其實小弟已經年紀不少,就如最初識佢個陣同佢講,我呢行做多幾年,會因年紀大左,開始覺得做唔到。

昨日,就正正有此感覺,自己當年創新的東西,十年後,已經變舊。想找新改變?卻已欠缺當年動力。雖然每年每季都會作出修改,但始終本質不變,好難有大突破,或許早已被年青行家追過了。

又有知情BLOGGER講,KEEP住現在做到無生意為止,預計可以搵多兩三年錢每月十萬八萬而又一星期番四日,但我又唔想最後比人覺得做唔住才執,所以唔會咁啦。

投資同工作0既選擇,我係咪好傻?

同錢掛鉤,是的!

同自己交代的話,工作上我已經超額很多完成了!
至於投資,慢慢來吧,每次都係急而出事,反正有貨在手,等多一陣也可。
家庭與子女,好睇命水,能抽多時間,趁佢地會同你玩時陪多D,好過等白哂頭對住老婆四目交投吧。

太太昨日同佢閨蜜去左整餅!好唔好食?我太太是地獄廚神。。。



2019年2月22日 星期五

2019情人節入廠維修記 自己投資收息買醫保

首先,為免太多唔知點覆0既留言,希望大家唔好留保重呀,身體健康之類。。。

健康與否同有女與否一樣,都是命吧。


自幾個月前,我發覺自己講野太急時會氣促,平時一向都無呢個問題,我有諗過係咪其他因素引致。當然,之後又成日形住形住咁啦。。。(就好似年青少女遲左黎M,又驚有左,結果越驚又越遲。。。)

係2月13日晚入左院(浸會醫院),未入院前,食左個平價日式放題!最後的晚餐~~~睬~



小弟0既醫保係宏利最平個隻,如下圖:

再加額外醫療保𨺑個D唔CAP 啦!

結果每次入院(對上一次係連續幾星期發燒,2016年),都人生交叉點,唔知住咩房型好。拿,私家房又唔好了,不過最大8人VS最細2人,就難揀一D。

打星果D係婦產科,可無視!

(我又應疑我上次免費UPGRADE左去半私家,但係醫生當左我真係住半私家,一日多少少就收左我4800巡房!)


醫生按病房類型收費AIA指獨特- 香港經濟日報



巡房費| Hong Kong Sanatorium & Hospital



到揀房時其實無得揀咁滯!唔知點解,可能房少?中間三至五人個D房,次次都滿。其實住滿人,5人同9人應該相差無幾。

最後揀左二人啦!


印象中,我個危疾係加埋醫保一齊係個投連保度。每月加埋扣我六百幾蚊(好似有180蚊係危疾,即係每月四百幾係醫保吧?)

如果要做到投資收入交保費,就唔駛用投連保呢類東西啦!?(我係WHATSAPPS GROUP 學的,大家都好神通廣大,我既功用只係提供每日花生/笑話!)

例如,我每月交$650,若以5%回報計算,一次過投資156000就攪掂。當然,佢每年加保費又另計。。。個人認為,投資一些大路ETF(例如SPY,或者盈富也可),已經可以做到。

同樣道理,小弟個人壽TERMS係匯豐做,500萬保額都唔駛500蚊一個月,咁大約我一次過投資12萬係5厘0既投資內,咁就已經唔駛再理佢了。

當然,我無計過架保費呢回事。。。咁,不如做多少少錢,買一D5厘息以上0既債券?

反正保險都係至少玩足二三十年,唔少評級高0既公司0既永續債都係可以考慮之列呢!

講番入院。。。

做左心臟超聲波,CHEST X RAY,運動心電圖,食道及胃鏡,抽血等化驗。。。

最後係乜事都無,只係食道、胃同十二指腸有少少潰瘍,連幽門螺旋菌都無。

醫生攪GAG說:"咁以後連續講野要計時,唔好過三十秒"

我同女主人0既情人節就係一齊係醫院渡過,做哂檢查後成個下午就度等醫生黎。仲一齊睇埋日落,都算幾浪漫架!


過左幾日,女主人見DYSON個唔知乜鬼風筒有貨,就自行買左當情人節禮物了。


原來叫Dyson Airwrap™ Complete 造型器!我都有用,男人用家有咩用後感?無咁嘈、風力較為適中吧!

最後抽多次水,情人節應該係唔少人好唔得閒0既日子,即使唔忙,都唔會有太多心機做其他野。可以一連出兩篇文講樓、講人生價值只有樓、講夾心階層無樓必死,講90/00後無上車買樓機會,我估佢真係好可憐好寂寞,窮得只剩下樓。。。

遲來的,祝大家有情人的,早日搵到共同目標,富好貧好,生命只有一次,何不瘋癲一次?

2019年2月9日 星期六

十倍高槓桿保險融資的回報 VS 三倍買REITS

豬年第一篇,其實真係太懶,一路無更新而已。

今個月0既我可以唔撈嗎應該又會脫期,一黎唔想計,二黎一定係少左錢,因為我同女主人都放足半個月假!

感謝 WHATSAPP GROUP 各路猛人,令小弟獲益良多,在此分享近日討論過0既投資。

拿,投資我真係乜七都唔識,咁係咪要去買樓呢(買金又得唔得?)?咁如果我千萬個不願去買樓(並唔係錢銀問題哦。。。親!),又如何?

錢,乃死物,雖然好多人係香港活得不如意,份工又唔太開心,有層樓增下值,可以平衡一下心理;比成功感,香港地莫過於用錢計,我一早知,唔駛人提0既。

雖我又唔係襌師級,並不超然物外,不過我又覺得我有我堅持,關人忍事?

難道,用我炒旦知識,對一眾成年人指指點點,話佢地唔識炒旦就就唔好亂黎?其實我日日都見,日日都同老婆講,太多理論佢未必明,再者明左又要識用,又係另一回事。

講番正題,某開班大師近日又提保險融資,可以用十倍界王拳,46萬買等值800萬。

有朋友計過數,如下:

岩岩略略計算張保單
800萬 借754萬
供期46萬
以2.5%pa計算
每年利息18.85萬
3年合共56.55萬
3年後贖回得881萬
還款754萬
回報係127萬
付出係(46+56.55)=102.55萬
(127/102.55)-1*100%~24%
***但還款利息不是一開始俾的,每月供,所以計番time應有3x%

載番個頭盔,我無驗過真定假有冇計錯數架!(同某開班大師略有不同,一個三年回,一個三年零一日贖回!)

其實以複利計,年息我估都係十厘之內。以我有限認知(又載頭盔喇!),風險如下

1加息,就唔係2.5PA
2提早贖回要罰錢,越早贖罰得越勁,開班大師好似叫七年先好贖回!上文例子只係保單價值,而非落袋現金!
3高槓桿,有咩事(應該唔會有,除左加息),加少少,回報已經差好遠。
4呢個有待証實,保証年回報係可以變的。。。

開頭睇到我都心郁郁,其實邊有咁大隻XX隨街跳?有人講,用黎送比二奶/私生子一流;又有人講,用黎走資;當然有米個班,買幾球只係碎銀,當做個資產配置而已。

抄人我最叻!以下係偷大陸同胞0既圖!


UM。。。近日RW0U升左近一成,大家又開始講。(不過我無貨)

若然三倍槓桿,
以46萬買番138萬等值RW0U又點?

年息HKD32851(我當借SGD息口計,不過轉番HKD好溝通)
收股息約HKD79212(5.74%)
一年淨落袋有(79212—32851)/460000=10%
當然,RW0U股價會變,雖然相對低槓桿,不過股價跌一樣有機會爆。仲有派息可以減(當然可以加!)

以上只係純粹資訊分享,不構成任何建議,我只係拾人牙慧,再深入D?

I KNOW YOU KNOW I DONT KNOW!

小弟呢期無乜現金,乜都無打算買,只係之前跌得低低地個陣買左好少盈富而已。

越近退休之日,越怕唔夠錢駛!不過我相信慢慢會習慣,不用太杞人憂天,再者做多一年,都係多幾十萬,實質幫助不大,倒不如貫徹始終,睇0岩先落手,免得好似上年六月咁,蟹到HIHI!

2019年1月28日 星期一

女性香氣的烙印

以前溝女,講0既除左樣,身材,其實仲有氣味。。。

有D毒女,頭都唔太洗,件衫有剛由衣櫃拎出黎既樟腦味,講真,除非你勁靚,否則都應該無乜下文。

唔好講上網識丫,淨係自己讀書D女同學,行過陣味香D,都令人印象加分啦!

出到黎做野,正正常常女人都會用下香水,結果對於小弟咁好鼻0既人黎講,真係嗅覺大污染!!

我好鼻0既程度,近乎食神級數,所以繁忙時間坐地鐵,有時比死更難受,好彩我早創業,否則我應該唔會再坐地鐵。

最憎個D懶係名牌香水,一黎太濃,二黎標榜有前味、尾味的,其實係幾隻味合埋(聞到架!!)。。。再加埋一堆剩女係車上搽HANDCREAM,個陣牛油果味真係好難頂(我真係唔明點解唔可以係玫瑰/甘菊,要係牛油果!!!)

題外話,唔知邊個講,剩女三寶:頸巾,HANDCREAM,暖水壺!

呢幾年,見唔少鋪頭都有自己獨特香味,例如BODY SHOP, LUSH,KEILH'S,CRABTREE & EVELYN都有自己獨特氣味!

你睇我唔用護膚品都UP到佢呢D品牌,就知氣味個種洗腦程度不比視覺同味覺低啦。。。女性香味可以刺激男姓,一早已有大把研究做過啦。

生意亦如是,若店鋪有獨特氣味,唔係一式一樣個種喎,相信可以提高回頭率!

講明先,我無錢收架!不過我覺得應該好WORK,又有善事在其中,大家不妨支持一下。

BLOG 友R兄辛苦了數月,他和朋友合力創辦的公司Good Scent終於在近日開張,為市場提供了經濟可靠的Scent Marketing方案,小型店舖每月只需付出數百元,便可以從數百種香味中選擇獨一無二的味道,大大增加用戶體驗,

讓商戶提升至高級酒店級的服務水平。  而R兄他們也很熱心公益,打頭炮便在即將開始的維園年宵舉行「GOODSCENT香氣,為香港打氣」活動,義賣香水套裝,所有收益不扣除成本,全數撥捐樂施會作扶貧發展項目之用,非常值得支持。

以下是FB活動連結:


我問過R兄,佢話請左多位美女大專生到場幫手,可惜我問佢有冇得送香吻,就被佢婉拒了,其實我係想要R兄香吻呢!

小溫馨提示:要去趁早,太迫,多人去你連女都睇唔到!!
Related Posts Plugin for WordPress, Blogger...