2014年12月31日 星期三

小時候 小茶飯 做咸SITE!

上次講過賣翻版, 已經係大學二年班0既事, 當時應該係 20歲仔.


其實, 再早多一兩年, 我中七個陣, 已經用過呢D 無聊方法搵外快.

講你都唔信, 就係整個咸網!!!

當然, 唔係個D 叫雞網, 又唔係個D THISAV 咁大規模, 我只係整個網站黎厄D 咸蟲入去而已.

當年, 網絡廣告仲有唔少係PAY PER CLICK, 而個TRACKING 機制無而家咁完善, 結果用少少電腦知識就可以搵錢....

廢話少講, 點整? 如下圖


呢個我亂COPY 番黎0既賭場BANNER, 我怕 BLOGSPOT 唔比我POST 女人相....

道理相同, 就係個網頁有七條BANNER, 只有一條先CLICK 到去真正咸SITE (真係自己整的, 其實只係有幾張咸相而已)

難得D 咸蟲又真係會CLICK 哂咁多BANNER....當然, 用少少抄番黎0既JAVA SCRIPT 就可以令到佢地唔會知道條先係真SITE 啦.

第二步就係要引D 人黎睇, 呢個實在太簡單, 去各大新聞組出POST 便可. 當年未有討論區, 大家都係經NEWS READER 去討論, 個D 叫做新聞組. 香港係有VALUE INVESTMENT 新聞組架, 而家都仲存在, 我都係常客, 不過講期權而非正股.

個咸網可能只係用左三十分鐘就完成, 宣傳左兩日, 加埋二十分鐘左右, 可以搵到幾錢???

搵到近四千蚊港紙!!! (又係可以去一次東南亞旅行0既金額) 之後間美國0既真咸網公司, 寄信黎話唔再計PAY PER CLICK, 我就無玩了.

當年佢係由美國寄張美元匯票過黎, 對中七生0既我真係唔知點變番港紙.

最後去左港基國際銀行兌換, 唔收CHARGE! 真好. 咩銀行黎? 即係而家富邦銀行.


***

兩次搵錢經歷, 一次賣老翻, 一次做咸SITE...我係咪壞人? 究竟佢地有冇被我害到???

三十幾年黎, 真係問心無愧(除左小時候欺凌同學有點內疚), 遠比起口中吸血同時又要講民主自由, 又要扮講道理亂九投訢, 玩剪梯落石抗拒新移民0既香港人....

如有終極審判(SORRY, 我無信教的), 或有閻王, 我相信我0既下場遠好過呢班自命香港人0既舊移民.

2014年12月30日 星期二

八年前的期權老師 自在居士BLOG

第一次做倉, 無記錯係2007 年八月.

小弟並非修讀商科或金融, 幾乎是純理科出身的我, 只能靠網上文章, 討論區, 新聞組學習當年前輩的期權套路. 就好似偷睇高手係度打功夫咁.

最令我困擾, 都係"點解轉倉會有錢收"? (呢個有機會再講我點睇得明)

其中一個BLOG, 叫自在居士, 我估可能唔少人睇過, 佢UPDATE 到2013 年一月就停左....

唔通又係輸到唔寫???

佢2011 年8 月之後, 經過股票期權災難日, 轉為做跨價/期0既期權策略....尤其信奉(錯信)財演黃國英, 走去做IRON CONDOR....財演又叫呢招做鐵兀鷹/

睇唔明? 即係咁....

2012-2014 大升又大跌( 大跌多), 可能佢就係咁死左.

講番呢位BLOG 友, 係我啟蒙. 對於當時玩左兩年股票0既我, 佢解釋得好好! 節錄佢最PURE 又最BASIC 個三篇文章.

為保留原文, 個人意見在最底

************

這3篇是以前在 Yahoo Blog 的舊文, 轉存在此.


股票期權攻略 (一)(2007/06/21)

參與股票期權 (股權) 的金錢遊戲已經有四年, 當中累積了不少成功與失敗的經驗, 總的來說可以為我找到生活費用而不用很貼市, 值得繼續參與和向友好介紹一下.

股權是實物交收的, 而且到期前任何一日都可以被行使, 除了是風險愛好人士, 一般不會用槓杆或者只是間中用低於兩倍, 基本的策略是:

1. 有錢沽PUT, 等接貨或變癈紙

2. 有貨沽CALL, 等交貨或變癈紙

3. 極看淡時可以買PUT

"有錢沽PUT", 是類似銀行的股票掛勾高息票據, 直接在期權市場做, 有五個好處:

1. 回報較高

2. 不需付全部價值金額, 只付約五分一按金, 其餘錢留在紅簿仔再收息

3. 自己選擇合乎風險回報預期的行使價

4. 接貨後可以用 "有貨沽CALL"

5. 亦可以有方法不接貨, 節省買賣股票的使費 (明日詳談這個)


股票期權攻略 (二)(2007/07/05)

沽出了 put 之後, 有兩個可能性:

一是到期仍是價外, 變了廢紙, 吃盡了當初所收的期權金. 這是沒有煩惱的事.

二是股價跌破或快將跌破行使價, 變了價內, 隨時有機會要接貨. 這便有幾個選擇了:

1/ 乾脆等結算接貨, 然後再沽出 covered call 或直接等股票升值. 在牛市可能賺最多, 但亦涉及買賣股票較大的使費, 以及要調撥資金去股權戶口.

2/ 在結算前擇個吉日平倉, 再沽出同行使價的下月 put, 收取新一筆的期權金, 價內值保持而有新的時間值. 除非已經跌破行使價甚多以致時間值太少, 這個操作可以一直滾下去好像收租一樣, 而股票的自然增長會令情況愈來愈好. 這就是著名的 "無限復活".

3/ 如果覺的原先的行使價確是太高, 不安全, 可以擇吉日平倉, 再沽出較低行使價的遠期 put. 這樣大致可以收回轉倉的成本, 但會損失了一期的時間值利潤, 而心理上會平和許多.

4/ 如果見跌勢很確定, 可以考慮在臨近行使價時沽出等量的價內 call, 這樣便會對沖了一段價內 put 的虧損, 並收取了多一點時間值, 再待臨近結算時同時平倉. 這是可以保住原有的利潤而又當月了結問題, 但要注意這是等於沽了一套價內的勒束式, 如果之後股價又意外地波動, 風險便照樣計算了. 我從古以來只做過一次, 心理壓力亦頗大.

有空再討論其他股票期權策略的應用問題.


股票期權攻略 (三)(2007/09/15)

這個結尾篇拖了很久, 一開始打算是有的, 但後來又覺得可有可無, 只是一些零碎的思緒. 還是把它了結比較心安吧.

前文詳述 "有錢沽put" 的情況, 因為是較多機會用到的. 另一個常見的情況是 "有貨沽call", 一般在接了貨的情況下會用. 如果一開始未有貨又未沽put, 是否值得用呢 ? 我看是未必. 現價買貨再沽出價外call, 其效果是相當於直接沽出相同行使價的價內put, 而節省了使費, 就算期間正股有派息, 也大致反映了在期權金上了.

期權另有一個功用是買入作對沖或賭博用, 我不是很有興趣, 特別在股票期權上, 前提是不作槓桿的, 想買入搏一個大升浪, 直接買入正股便可以, 更有防守力, 可以贏得更大. 如果想買跌, 在期指那邊買put會容易一些. 至於買put為現貨作對沖, 我以為只是對那些不方便作大手沽出的基金才有意義, 作為散戶走位靈活, 沒有必要花這些錢.

書本上有很多複雜有趣的期權策略, 看上去很吸引, 但在實戰現場, 問問價, 計計數, 會發現能成交的價遠比書本上的例子差, 加上不平宜的交易費用, 變成紙上談兵.

一定不可忘記的, 是沽空頭call的風險. 沒有貨沽call是很危險的, 因為升了的股票不一定會跌回來, 而且不知會升到何處. 還要記著的是, 不要想著沽put和沽call可以對沖, 兩者是沒有關係的.

沽權要沽幾遠才好 ? 這是一種風險取向問題. 有人喜歡沽很遠, 但就要沽很大的數量才有足夠的利潤, 極端一點便是喜歡沽指數期權極遠價倉的朋友了, 沽1手只賺千幾元, 沽5手便是承了500萬貨的風險. 這是搏一種極少發生、但發生了後果嚴重的風險. 經過這兩個月, 我們感受這種風險是會發生的. 在這種新形勢下, 我反而喜歡沽接近等價的put, 收取最大的時間值, 沽很小量便足夠, 下跌時的損失亦減少. 這是搏一種經常發生、但發生了後果也可以接受的風險.

期權策略是否比直買股票好 ? 我現時不是這樣想 -- 起碼在牛市中不是. 在不用槓桿的前提下, 用期權賺到的回報率總是有限, 不像這幾年很穩健的公司也能上漲幾倍. 在上落市和跌市時, 能夠提供某程度的保障, 而且能滿足一種 "個個月有收入" 的打工仔心態, 是其價值所在.


我想期權系列應該可以完結了, 沒有寫的, 可能是漏了, 可能是想留些秘技給自己.

****************

我無乜意見, 當年只係學識操作, 今日睇番先知原來佢講0既野, 咪就係我留言講0既野LAW! 當日唔明, 今日已成常識.

希望對各位新手初哥有用, 舊人也可溫故知新.

都係要講個句, 人人現金流, 可承受風險都唔一樣. 我咁做又未必適合你, 切記盲目亂跟. (2014 年男主人現金流未計日常開知, 估計達到二百萬....即平圴每月都有十幾萬收入. 唔好見我SHORT 你又SHORT.)

至少, 我經歷過兩次期權大跌市, 隨BLOG 附送舊文股票期權災難日, 睇下當時我心情係點?
http://blog.xuite.net/hk70s/blog/115365560
真係唔好亂跟!!!

2014年12月29日 星期一

男女主人外遊, 每日有一篇日記提供

男主人有儲文習慣, 所以好多時日誌都係打定左之後再EDIT,

明天早機出遊,今次女主人話事女主人PLAN, 地點係大阪.

我估我除左睇大阪城同埋奈良隻鹿之外, 應該對其他野無乜興趣.

(下一站係我PLAN, 如無意外係去上海, 如又夾到時間就去埋交銀股東大會)

我決定係我唔係香港呢幾日, 每日POST 一篇網誌, 已經排程每日 00:00AM 出一篇!

大家留下言啦, 留言必覆! 我珍惜各位每個留言, 亦係一路寫落去0既動力!

明天29/12 出發, 2/1 先番, 一落機, 女主人又番鋪, 我又番我間鋪了, 真係苦命人.
(早兩日行過模型店, 佢請人, 我仲話不如一齊唔撈去做同事...哈哈!)

黎個預告先

30/12
自在居士 期權BLOG 評

31/12
小時候 小茶飯 做咸SITE!

1/1
假如我只一個

每次去旅行, 我地都自制旅遊書. 書局買個D 唔0岩用....而男主人對執位排版等工序非常執著同純熟, 所以會整以下精美東西....





各位, 2015 年再見! 見到訂閱人數上升, 好開心呢.

2015 年, 定必分享更多人生經歷, 投資取向, 預祝大家2015 新年快上!!

2014年12月27日 星期六

三百幾萬期權倉 轉倉雜記

巴黎開班, 小弟要做野去唔到, 幫佢宣傳下.

http://parisvalueinvesting.blogspot.hk/2014/12/blog-post_23.html

股票期權轉倉好多人都識, 轉十幾廿張倉好易, 按個制就得. 如果轉幾百張, 或者個銀碼大, 而該股票期權成交又唔係好高的話, 要轉都幾頭痕.

理論歸理論, 實戰上...以下三點唔一定跟足書本
1. 庄家開價
2. 所開張數足夠平倉/開倉與否
3. 買賣差價

尤其係已經極價內期權!!!

本來SHORT 左
2014 年十二月到期 CALL 交通銀行@5.75, 一共473張, 現價6.96 就總值 329萬

SHORT CALL 全備兌, 唔駛按金 (否則咁價內我會好頭痕)

一共473張, 如果係 致富買, 都唔可以一次過做, 唯有靠打電話, 不過我未試過咁多張數打電話

再者, 咁價內, 未必有人開價!!! 有人開, 佢張數都唔夠我平倉....同樣, 開新倉都未必有人開價, 反而好多庄博大霧亂開CHEAP價!!

最後結果....

全平倉! 分左三日做, 真係好煩....無圖無真相.

18/12
平左 100 張, 開番88 張 2015 年十二月 交通銀行@5.75
打個和, 有十二張唔駛做, 佢地自由喇


19/12
再平173 張, 開番185 張2015 年十二月交通銀行@5.75
即係有錢入袋, 不過轉左 273 張! (仲有200 張要努力)

22/12 (市大升....)
平左200 張(其中三十張係六蚊, 不是5.75), 無人肯出價, 結果平得好散....
最後發現仲有39 張剩, 我無比佢地自由
另外開番2015 年一月(一個半月期) SHORT CALL 7.25, 如到價再算.


最關心梗係, WIN OR LOST? 自己諗諗.

由2014十二月到2015 十二月

價錢無變, 即係話如大升無我分 (我仲有近九百手係銀行....)

除非有人行駛, 否則股息袋袋平安. 預計派人仔0.27, 即係HKD 約 0.303 左右(已扣H股息稅及手續費), 總值 143000 左右. (已低估)

另外, 現金權金有11000 蚊, 好少. 再另外, 有39 手SHORT CALL 如變廢紙, 又可以再SHORT 過.

除此外, 無利息支出, 只係損失了套現機會成本.

現價回報:

(143000+11000)/3292000 = 4.68%

拿, 我唔會用買入價(4.91 仲未扣上年派息) 計, 如計就係 6.6%, 如用行駛價計, 為 5.7%, 呢D 都係無意思. 現價才有參考用呀!

唔駛管理費, 差餉, 地租, 物業稅, 遠勝唔少細價樓收租仔!!! (無槓桿之下)
(男主人住新界西又唔係好西, 316 萬收租只能收一萬多D, 頂多一萬至萬一, 管理費要7XX....)

同埋, 仲有幾球不用審查備用信貸可用, 你要壓力測試同埋要TU? 我唔駛的....


幾時出手? 有排都未係時候. 文章已寫好, 亦已PLAN 好買貨次序. 手中持貨, 如股息不變, 升到9 蚊或10 蚊而股票基本面不變, 而市況情緒又唔對路, 就可能要全賣出去.
  (這是我的價值投資)

2014年12月24日 星期三

女主人店受訪,今期100毛

大家都買番本啦。

礙於紅海乃秘密,唔講得係邊條毛。

今次真係100毛訪問5毛。我係女主人唔係。

雖然我地都懷疑過點解訪問我地,不過後尾都估到佢題材係乜。

女主人受多個媒體採訪過,包括 tvb(j2, 翡翠台,創富坊都拍過), atv, roadshow, 新假期,星島,東方,太陽,蘋果,香港寬頻電視,nowTv....

話唔埋,你都係電視見過呢個80 後長曲頭髮日本風既妹妹仔。。。

佢最開心,就係人地唔信佢生左兩件。。。

2014年12月21日 星期日

貸款精明眼 1

見有人講開私貸, 我又講下自己經驗.



由N 年前樓按仲係五厘息個陣, 我已經有借開, 當年買未跌價0既中信泰富, 由廿幾蚊買升到四十蚊放(06-07 年), 做埋SHORT CALL OPTION, 又撞正大升市, 梗係和味.

當年實際年利要成七厘息架, 不過計過數係有SO 0既....

舊事唔講, 先講左點計實際年利率. 用ANDROID APP 如下

https://play.google.com/store/apps/details?id=com.ameyniel.credit


我都係網上CAP 圖, 只要輸入年期, 本金同埋每月還款, 佢自動計番實際年利出黎, 好好用.
當然, 而家最抵梗係按左層樓出黎, 屬有抵押貸款.

無抵押之下, 有三厘以下已經借得過, 如果去到 2.8% 就更好.
唔同人, 唔同TU, 入息証明, 同某銀行借款次數, 會影響你0既利率, 有機會再講.

我可以唔撈嗎系列加左一通的排名, 好多散戶呢. 我咁都排到81. 文章如下

http://hk70s.blogspot.hk/2014/12/5.html

2014年12月20日 星期六

走失比亞迪,燈神水浸尿

真係機緣巧合....

平時我個 WATCH LIST 好日都唔改, 咁0岩早一日有人同我講比亞迪而家抵買, 佢次次掂到35 蚊就彈番上39蚊 (WOW....什麼TA!?)

當然我都係一笑置之, 不過心裏都覺得如果全股反哂艇, 佢係可以望望, 就立刻加左1211 入WATCH LIST.

我用呢個 ANDROID APP 睇股(PLAY STORE 已下架....)
http://m.apk.tw/app/18666/

點知, 昨日睇睇見到1211 跌成50%!!! 嘩哈哈...我以為睇錯....

當然, 最後都無買到...今日升左十幾%, 一買一賣好和味. 似曾相識上次個隻係蒙牛....

這些機會不是我的. 明天買, 我又唔敢了. 哈哈哈~~~~

蟹左好多白銀0既白銀戰士孫先生, 真係GREAT MIND THINK ALIKE!! 佢老友"水浸尿"原來重倉1211.HK !!!


留意圖內圈住個D COMMENT!!! 哈哈...

真係燈神一堆....白銀, 死左幾世, 日本樓, 蝕匯蝕到你有排收租都未番家鄉, 最後連正股都炒粉!!! 比亞迪當日最勁跌到得番19.X, 今日升番都係 28.6 咋!!!

先唔講有冇息, PE 幾多, 跟燈神買左真係慘....GOGOLE 一下, 呢位火弟弟2012年係19.X 減持, 之後升番又增持....真係高買低賣喎!

佢係咪真係當年炒857 中石油有一千萬?? 拿, 我唔知, 不過如果有, 就唔係同朋友夾錢買堆田區個D 樓黎收租, 當年仲係未升值, 好平架咋....有又駛乜夾錢???

女主人話, 佢搵好多, 又做電台節目(已被CUT!), 又出書....

我都出過書啦, 搵得幾多? 哈哈哈哈~~~~~

2014年12月18日 星期四

我可以唔撈嗎 5

又一批客人食完埋單....

我記得當年2006 咁上下, 我同客人個阿哥講, 應該2014 可以退休唔做....

當初當然係計過數, 唔係吹水啦. 留意, 果陣我仲係一條友未識女主人, 更加無小朋友啦.

睇番今日, 真係可以退架, 如果仲係自己一個丫MA!

呢期阿細佬唔知係咪想串我, 問我係咪退休, 講左咁耐都未成事.


其實, 如果一支公, 真係退左幾世了....

因為多左屋企人, 開支大左一倍有多, 反而通漲係股票同收入都完全追到0既, 樓價升幅更加係微不足道. 反而人數增加令要買0既樓大左就真.

屋租坐少D 的士已番番黎, 鋪租我加價4% 已攪掂, 女主人鋪租因為鋪頭大左, 生意更好....租金成本係高, 但係對於做生意同收租黎講, "做埋唔夠交租" 都係同你講下笑0既0者...

講番股票, 以2010 年中, 資產總值急跌, 亦令我明白到股票價格及股息可升可跌, 引申到, 其實所有野都係一樣.

同時, 當時孖展太多令自己損失左幾十萬, 當時覺得條數好大(無記錯資產最高時期有5M左右), 而家睇番...其實又係得啖笑, 2011 年間, 眨下眼就搵番番黎了.

現持貨有三份一已被期權SHORT CALL 定死, 要平過市價賣出, 另外三份二可以自由沽, 真係進可攻退可守. 學前輩話齋, 攻守備同時準備好, 真係心安理得好多, 雖然大升市的話會食唔哂, 但對於操控八位數字流動資產, 咁樣易過十上十落好多.

至於不動產, 除非你唔做孖展, 否則要換番錢, 都唔係話咁易.

價格受供求影響, 而非其成本, 亦非閣下0既還款能力. 做過大頧孖展又遇過跌市0既人先會明白, 有時唔係你賣唔賣, 而係你敢唔敢唔賣.

有冇人記得, 鄧小閑講過, 若股價跌, 佢會出售部份股票以降低孖展比率? 我可以話你知佢理論正確但唔係人人做到!!! 到你身在大跌市之中, 你唔會陰D 陰D 蝕賣求存架. 係升市期間, 你可以好貪心, 好冷靜. 但跌市0既時候心情係點? 我估好多人未試過, 或者上兩次跌市未夠多錢未入肉所以無視左.

走到呢一刻, 我見到出口, 同時亦知道, 預多少少錢係必需0既.

等待累積現金0既日子, 同時亦等待終極孖展出招. 我連點樣買都已經寫定日記, 只係未PUBLISH 出黎. 學前輩話齋, 幾時要買? 到個陣你一定知, 只係在乎你敢唔敢買.

預計最後孖展額為四球左右, 兩年還三球, 剩下的, 以戰養戰. 如果無機會出招, 收完股息搵機會套現, 拎番千萬現金再搵方法入過市.

題外話, 我D 客好多都好有錢, 佢地都未敢話自己係全港TOP 1% 0既人, 如果只係得幾件或者十幾件濕九細價收租樓, 就覺得自己係人上人, 真係唔怕比人笑井底之蛙?

無聊附加, 一通排名...不包括全部流動資產.



2014年12月17日 星期三

小朋友利是錢 + 市評

我估以前好多家長都係私吞小朋友D 利是錢的.

好彩, 我細個D 利是錢自己保管番, 不過呢, 就只係放係銀行. 條數實在太細, 我估係大學時候不知不覺用左了.

到而家, 自己D 小朋友呢, 係大家都同意之下, 買左股票.

邊隻? 因為實在太多意見, 梗係買匯豐啦!! 我唔理佢賺定蝕, 買佢有買貴, 無買錯! (出處: 市場老千2005-2011)

而家依然蟹緊...平均價好似係80 咁上下. 一路以股代息, 又睇下十年後回報如何?



買碎股 , 一通真係好方便. 剛剛我老豆生日, 醒左二千蚊比小朋友, 買左30股.



第二部, 講下期權倉

近呢個月都係煩緊究竟轉唔轉倉好, 巴黎兄一句提醒左我, 我係可以由佢行使.

而家有三個打算

1. 由佢被行使, 套現二百七十一萬.

2. 轉倉到明年十二月, 張數減少. 可收股息, 下次被行使又少D.

3. 由佢被行使, 之後買貨再開過SHORT CALL. 慳左買賣差價, 但一兩日間股價變動會有風險. 可收股息.

(如果揀3, 點解唔做SHORT PUT? 因個別股票期權買賣差價較大, 好多時股息+SC權金會多過SP 權金, 書本上0既理論係唔WORK 0既. 我估指數期權會貼價好多)

(揀1 呢, 可以等到派息前先諗入唔入番市, 預計到時有350萬現金買貨, 有半年時間比我睇位入, 不過如果一路升, 就蝕哂章了....)

第三部, 近日市況

1. 近兩日, 牛熊兩閒中
2. 全球陣營大對決, 真係唔知企邊邊, 不如乜都唔郁食下花生先.
3. 大家都留意都有國家用某商品打擊別國, 別國又同佢死過, 唔好忘記, 大國仲有一招加息可以殺所有人一個措手不及.

人人買野, 我就CASH IS KING.

WATCH LIST 如下
內銀, 跟開繼續睇, 直到派息少於5厘
渣打, 已穿110, 好快紅底都無埋, 再睇.
油股, 真係睇下會唔會插到出血

2014年12月11日 星期四

心態決定境界 2



男主人間澳牛都有鄰居, 有D 有兩句, 有D 幾年來無溝通,,,,

睇水牌呢, 佢做D 野好高檔, 亦唔係"飲食"行業, 平時少見有客人, 不過呢D 好難估佢做唔做得掂.

我估, 以下係佢間鋪一個員工0既錯事....

平時掉拉圾, 正常都有個垃圾袋裝住架! 係佢地連袋都唔用就咁全部倒哂入去...

好彩佢D 垃圾都係D 正常野, 點解我會知係佢? 因為我見過佢幾次倒垃圾LAW!!

曾經, 有過衝動想放一PACK 垃圾袋係佢門口等佢以後記得用袋...不過呢個念頭當然打消左啦, 我怕佢一下就估到係我.

點知, 今日又見到佢做呢D 事...應該係同一個員工(我估佢得一個員工), 食完飯, 而家垃圾箱又好滿, 好彩佢無夾硬塞入去. 佢就咁放左係垃圾箱隔離, 如上圖.


不過, 其實佢係咪可以好D 手尾? 個飯盒個袋打番個結都得卦.....

阿員工, 間公司唔係你0者, 你都係打份工, 但係有少少公德可唔可以?

呢位姐姐, 我估都係三十左右, 唔靚, 少肥. 有冇人要真係一半半, 又未到見到掉頭走個隻, 不過就至少唔係我杯茶了.

其實, 清潔, 倒垃圾. D 姐姐都係辛苦工, 你都係做多一步0者 , 方便自己又方便人地丫....


2014年12月9日 星期二

80 後乜撚野當父母係包伏???

晴報原文...

80後上班族三包袱:供樓 養家 通脹

我只抽一句黎講, 其他基金佬九UP 就由佢得啖笑啦

"有調查發現,25至29歲年輕人,各逾4成認為供養父母、按揭或租金,以及通脹為生活最大挑戰。"

先講我覺得最成理由個樣, 按揭及租金. 其實而家全港人人SUFFER, 唔可以話係年青人壓力. 有按揭但層樓升值的話, 投資初哥應該好開心好爽, 非壓力. 果件 80後求死隊長有得比你睇, 你睇佢幾開心? 好似小朋友打爆機咁架.

通脹都係問題之一, 不過無理由係年青人包伏, 因為佢地人工仲有得升, 唔理有冇跟通脹啦. 反而, 低收入0既老年人或中年人先最慘, 以前月月清, 而家要月月慳先夠食,

利申, 我係爭少少就80後0既70後, 我老婆係標準80後, 唔頭又唔尾.

拿, 80後要同人比, 梗係無理由同其他年齡層....

最後一樣先令人可笑. 竟然當供養父母係包伏. 唔知係SET 問卷果個有問題, 定係答果個口直心快講錯野.



難道當初父母生你出黎, 有當你係包伏? 但問卷又唔會覺得子女係包伏喎! 上討論區睇下, 其實好多打工仔80 後都係比好少家用, 咩叫好少? 就係你0既家用唔夠父母基本生活啦, 老人家正常開支唔高, 點解咁都唔比多D? 你一個月比三兩千就覺得盡左責? 但係, 你樓按皮幾野又覺得供得好抵喎!

供養父母, 最好梗係可以供足幾十年, D 人會樂意供樓, 但覺得供父母係包伏???

更過份者, 用D 錢黎買收租樓, 貪個少少現金流, 都唔比多D老豆老母, 真係小心比雷劈.

果班80後初哥收租佬, 以為有幾層濕九收租樓, 但係可能未結婚或者未有小朋友, 就覺得自己係半退休狀態, 哈哈哈....一睇佢D 日常開支, 父母個份, 竟然係三五千, 我會覺得, 佢仲少過賓妹...

唔好話發財應否立品, 如果要係網上好似求死隊長咁哂自己戰績, 不如檢討下你D 現金流係邊D 地方慳番黎.

男女主人雙方家長都有比家用佢地, 每邊至少五位數以上, 有時仲會多D. 

因為我地分開比(我固定比我父母, 我老婆又比我父母而我事後先知,), 再加上政府0既福利之下, 我父母其實生活都無煩惱. 我外母都係四十幾, 有份工, 我地都照比的.

如果可以, 我不知幾想可以供多幾十年, 如果唔計呢一份, 我已經財務自由好耐了. 如果我好似刻下個班80 後無老婆無子女無小朋友, 我估我工作十年已可以自由, 不用做到而家,

唔係佢地有冇能力或有冇錢養自己, 而家盡孝道係應份, 並不是開支, 更不是包伏!!!

2014年12月5日 星期五

小時候, 小茶飯, 賣翻版

明天雖番早 (10:00 - 7:00), 但係等緊個頭乾, 又分享下小時候搵錢樂趣,

其實都唔係小時候, 呢一個已經係大學年代0既事情.

當年讀0既大學科目, YEAR 1 已含有解剖學.

咁上堂除左用書, 用NOTES, 聽教授講野, 仲可以去ANATOMY LAB 睇屍體. 其實一D 都唔駛驚, 因為全部都醃製過0既. 唔係恐佈片個種咁樣衰....

之但係, 果D 味道, 係會令你之後個一兩年唔會食臘肉, 你估下點解? 哈哈....

當年呢一科, 好似有唔少人係 ALEVEL 三條A 入黎, 嘩!!! 用番而家D 說話黎講, 佢已經係當年神科~~~! 結果, 屋村仔0既我, 見盡不少名校生點樣自私, 點樣陰濕, 亦都知道, 為左讀書個GRADE, 可以去到幾盡~~~~

D 鬥爭小器野就無謂講, 正因為人人都好努力讀書, 我無啦啦發左少少財....


就係呢隻ADAM'S INTERACTIVE ANATOMY, 以前仲係56K 年代, 街外翻版CD 只有WINDOWS, OFFICE, PHOTOSHOP 呢D 大路野, 又點會有呢隻CD?

又咁0岩, 我有同學唔知點樣有一隻(已好耐無聯絡, 估計佢已經成為黃絲), 佢又COPY 左一隻比我....

結果, 我打算賣翻版碟!!! 當然大家讀完左唔會買, 我諗住賣比師弟妹...

以前CDR 仲係1倍速, 唔知係乜? 即係燒一隻CD 要兩粒鐘, 仲要佢唔好燒死喎!

為解決呢個問題, 我出左黃金買隻8倍速行SCSI 0既, 係當時要三千幾蚊, 去買個陣個SALES 以為我講笑. (乜我似買唔起咩? 不過三千蚊當年已可去東南亞旅行...)

8倍速, 燒一隻十分鐘攪掂, 我燒左五隻, 貼係告示版話有得賣....

第二日嚇左我一跳, 成百人係條走廊到等我....可見呢個神科D 人幾讀得書幾認真.

之後拿拿臨開工狂燒....

最後搵番CDR 錢之外, 都執左幾千蚊. 忙到要個朋友幫我收錢.,,,

類似搵錢事件, 不止一次, 得閒又講下.

有時, 藍海紅海只係一念之差, 多留意身邊事物, 總會有好事發生.

人生道路, 尤其年青時, 平坦的不一定是好.

呢個神科, 2001 年後, 因就業前景問題, 成為一科威 DDEEE 就入到0既水泡科, 同一畢業0既同學呢? 由鬥讀書變成鬥爭一份工. 更勁係有人幫私人公司做義工一個月為求人地請佢....

2014年12月4日 星期四

老千BLOG: 大平洋恩利, 你痴九線???

以下係女主人七仔換番黎, 一直唔捨得用. 不過都係要用左佢, RX-78 好定係紅渣好呢???


今日臨出門口, 見到電視股票報價, 1174 太平洋恩利, WTF!? 而家得番0.3!!! 當年BLOG 界炒得好熱, 最高去到2.97!!!

試下GOOGLE 打 "太平洋恩利 BLOG", 真係大開眼界....呢一刻仲有人加倉.

其實想博佢大升, 不如底位睇下一D 大價股, 偶有驚喜.

好多BLOG 友都有買, 半年前0既內銀...已經好和味.

早前7X 蚊0既中移動, 我都買左少少, 不過太早放, 等唔到佢變紅底....

拿, 馬後砲無用0既, 而家大牛市....左幾日, 買乜都升啦.

希望下列說話唔會得罪各BLOG 友, 買左渣打個D 朋友, 會否太早入貨? 自從穿左120 之後, 非常無人吼, 大市上升又無佢份, 跌又跌埋一份.

真心想買的話, 等待下一周期, 如果成個市跌, 渣打就會再跌得更深, 到時防守力更好(鬼唔知咩!)

當年匯豐係點走勢, 大家又記得嗎?

除左太平洋恩利, 早一兩年都仲有好多古怪野, 波司登....

究竟係散戶中伏, 定係中左扮散戶0既人0既伏???

明明有大盤, 何必玩特別?

(自佔中運動開始, 大戶角力, 真係唔知個市想點...一路挾高但又無人平倉....)

2014年12月3日 星期三

復活價內期權三個方案


話說, 呢隻內銀由4.7 升到今日6.58....

自己有三份一買入價為4.91, 但又有今年十二月SHORT CALL @5.75

買入紀錄以下有LINK

即係話, 要平貨交比人...

如果唔做期權, 當初利息開支又無得COVER, 再者, 收左HKD 0.29 (扣哂股息手續費等等), 女主人話, 交就交, 不用唔開心.

刻下有三個諗法去轉倉

1. 繼續轉倉做番5.75, 轉去三月等業績, 收番權金先算. 非常被動....

2. 升少少價位, 例如6蚊, 轉倉至明年十二月, 做計無權金收入, 但預計可收0.303 股息.

3. 轉去明年十二月 7.25 倉, 唯要張數量X3, 即係所有內銀股會被CALL 走! 若往後再升到8 蚊 9 蚊我就無份. 但如果要交貨, 突然多左一千萬CASH....

呢一刻, 我老婆乜都唔識之下揀左方案 2, 我個人暫時就覺得方案1 同 2 都可取, 唯方案2 可能要被綁好耐, 如股市急跌, 帳面會有損失,

另外, 手頭上現金約有45萬, 唔多又唔少, 如收埋今年股息再加明年工作收入所儲, 2015 年年尾會有170 萬現金, 所以等買貨又得, 沽哂佢就無謂了...

習慣月中先轉倉, 到時再算!~

三個病人--- 地獄黑仔王

女主人話我好耐無UPDATE 網誌, 原因太多不能盡錄, 決定一日打兩篇補番數!!

女主人終於生完日....不過又係無乜點特別過. 原因太複雜, 不明白的就不明白.

今年真係太忙, 仲要大家一齊黑仔左N日....

成個月前....

佢生日前, 先有我病左, 小病是福, 今次無發燒, 所以苦命人如常工作(都要交鋪租, 係咪?), 係把聲死左成個星期...中途仲要死左個搵食工具....

之後個囡再病埋...攪左成個星期, 睇左四個醫生, 最後還是政府最好!!! 川琦症是也...一世人只會一次, 可以好大件事, 可以乜事都無. 已出院. 而家好生猛同細佬係爺麻屋企.

佢住院期間, 大家輪住係醫院看夜通頂....


點解唔同我地住? 咪就係女主人要做手術, 良性瘤, 現在 POST-OP DAY 6, 仲未復原哂. 明天再覆診.

呢兩位病人, 看在我眼裏, 都好安全, 要的只是時間. 正因為我清楚明白事情發展, 結果又有人覺得我唔關心佢...唉...

呢個就回應番我自己講, 小病是福.

做得投資BLOG, 呢個故事, 就係人類唔明白0既時候, 會以為好大件事, 看在熟悉人眼中, 其實一切只是時間問題.

AH 滬港通通車後, 某D 股價大升, 基本因素有冇變? 又即管坐下順風車....

2014年11月26日 星期三

手術

女主人今天下午就做我人生中第一個手術了,請保佑我.

沒到那一刻,還不懂得緊張。

2014年11月16日 星期日

心態決定境界

話說,男主人公司久唔久就訂一次紙,辨公室文具是也。
因貪平,每次都訂多d, 圖為相等於二萬張A4 紙重量。

結果,就辛苦左搬樓梯個司機叔叔。久唔久就會換司機,我估係換街車司機吧。

今次個阿哥,年紀可能同我差唔多,同我疊d 紙疊到咁。(我已經整過下, 否則後果...)

開左部份後發現, 表面包裝爛哂....算, 我唔係完美主義買家, 一用就知唔對路, D 紙唔係好乾身....

結果, 影印機JAM 左兩個星期紙(FYI 一年JAM 紙唔夠十張, 佢可以一星期JAM 三十張....)



其實疊整齊d 都唔係好難,我已非常有禮對佢。可能佢覺得重,又覺得佢只係送輕量貨物所以心有不甘吧。

如果比多d 搬運費我係ok 的,自問弱質書生一個我堅搬唔郁。

你份工做乜,就好應該做好佢。尤其係我地呢d 自負盈虧既細菌級生意。

而家經濟好, 大家唔憂做, 投訴0既都係買唔到樓呀, 人工唔夠人高呀, 儲唔到錢之類; 若經濟唔好彩逆轉, 重回有人要扮番工厄屋企人, 要食二手飯0既年代, 呢一刻既發展, 可能係千載難逢, 可一不可再.

2014年11月11日 星期二

墨西哥餐: 做乜要咁辛苦?

話說,男主人日日係鋪頭炒旦做其澳牛式生意,做死又賺死,日日做到無停手。

女主人有一花生友一句,點解要做得咁辛苦?

當然,聽在耳中不是味意。

原因,呢位朋友個伴侶都係同行,佢做墨西哥餐。

唔同既係,佢年資少,自己又唔係好知前輩點做。佢個師傅係墨西哥餐權威,我估有唔少人睇過佢著作,肯定各blog 友之中一定有。

可惜師傅唔係 sales, 教唔到佢d 乜。

墨西哥餐無乜人食就一早知,一定唔及茶記炒旦咁多人幫襯。但做得好的確可以獨步市場。
原來唔辛苦,係改做無鋪經營。齋做外賣自取,結果可以多d 時間陪屋企人。。。

咁花生友自己呢?恰巧又係女主人同行,不過做文職。

花生友我對佢評價好正面,但佢伴侶我就麻麻。感覺佢推個女人出黎做野自己龜縮係屋企做外賣自取。

話哂我都係半個老行尊,咁做可以有幾多收入有得計。

女主人中庸友善,一句: 每人有佢自己選擇既生活方式。

但,若果屋企欠人一身債要還六位數,要照顧屋企老人家,養工人,小朋友。身為男人都唔快快出黎撈搵多兩個錢,早日甩債,點都講唔去。

咁辛苦為乜?經濟好成咁,而家唔搵等幾時?

口痕講下,女主人今晚會上電視,某收費電視台。見到有個後生曲髮靚靚地既女老闆就係佢喇。

我無裝收費電視,唯有遲d 睇link.

上圖為我至愛!!

2014年11月1日 星期六

替 NOTEBOOK 更換 SSD 重生!!!


見有人講攪機(電腦), 我又講下先.

男主人屋企用DESKTOP, 偶爾打機, 所以部機都OK 勁, 至少行緊XEON 架~



鋪頭部電腦呢, 已經係2009 年貨仔 (Fujitsu e8420 , 大學價) , 行得又慢又熱, 半年前把心一橫, 換左部SSD! 咩黎, 行得好快0既HARD DISK....其實已經唔係叫HARD DISK, 好似係SOLID STATE DRIVE.

換左真係如重生, 可惜第一次唔識CLONE 個舊HARDDISK 過去, 要砍掉重練, 安隻老番(以前無RESTORE PARTITION)

鋪頭部機只係用黎PRINT 野同遠端 FILE ACCESS, 所以基本上細細隻就夠, 當年買左一隻64GB, 六百幾.

個人認為, 呢d 舊 notebook, 求其用平價ssd 已可!

故事未完....

老婆鋪頭部機重舊 ( hp 631 , 腦場買), 又開始熱到SHUT DOWN, 同佢換埋, 因為佢要用黎工作整圖打字覆客 N樣東西, 買左隻512GB, $16XX (64GB 已跌到三舊水有找, 各位舊NOTE BOOK 重生有望!!!) 再者, 女主人有會計系統係部機, 行sql, 我能力以外唔敢亂黎!

我本身已經有線可經USB 接HD, 都買左個OPTICAL DRIVE 轉SATA 備用, 後尾發現係SIDE 錢, 因為過DATA 太慢, 我直接拆出黎駁去DESKTOP 做DISK CLONING!

步驟如下

1. 先連接你個新SSD, 開始, 桯式欄打DISK MANAGEMENT, 開個硬碟管理員 (呢一刻駁左都睇唔到架, 因為你未間PARTITION)

2. 先SET 番個PARTITION 比新SSD, FORMAT 個陣記得SET 佢做4K 同埋SET 做 MBR (MASTER BOOK RECORD), 否則舊BIOS BOOT 唔到!

3. 我用 EaseUS TODO backup free 做disk clone, 已經可以做disk clone, 咁notebook 個recovery partition 都會clone 埋, 可以用番跟機正版!

4. clone 完插番入notebook 就攪掂~~~ (題外話, 佢隻舊HD 點算???)

2xx gb data, 用左我兩粒鐘.....

下一個重生, 應該係老豆個部notebook....

2014年10月31日 星期五

我可以唔撈嗎 4

我估我寫到100 都未到真正唔撈!

唔同地方0既信箱成日收到唔同0既管理費, 差餉地租等信, 一睇, 嘩, 都真係幾多!! 呢D 唔係成本? 未見官先打八十!

我依然以股票為主要及單一主動可控資產. 雖持有內銀股有被批割肉派息之嫌, 但不用槓桿而有現價五厘息以上實在難搵!

用槓桿的話, 真係會抛離十萬八千丈....

見有人留意2888, 暫時可作WATCH LIST, 佢由高股價低派息, 到而家5 厘息低股價. 但佢收入差唔多番番2009 年, 除非失去紅底, 否則好難動心買入, 因為未知2014 派息是否依舊.

原本, 我係打算今年退下火線, 而家, 改為增加休息日一天.

十幾年前(又比老婆話我長氣), 小伙子乜都無乜都唔識, 亂打亂撞死做爛做. 到今日, 其實可以選擇唔做又或者做少D.

既然只係揀左做少D, 點解其他地方唔可以對自己好D?

我怕, 到唔駛為錢銀出力之時, 沿途失去0既野更加多...

今日, 的起心肝, 去練葵花寶典.



或者之後呢段日子, 係比我諗下點樣同老婆仔女享受自由之路0既方法.

雖我自由, 但我老婆唔退, 我仔女依舊要番學讀書過佢地0既日子, 我無理由日日同阿爸阿媽飲茶架MA!

P.S. 十月果然係跌唔落0既, 但係出得黎行預左要還, 國家隊無可能長駐幫拖. 又或者有人本來平倉無啦啦變中伏買突左, 已經寫好左一篇文講下點買下一轉貨, 到真正出手個陣才PUBLISH 吧.

2014年10月23日 星期四

預知事件,量力而為

話說, 個女幼稚園, 十月頭有一個環保之廢物旦糕設計比賽. 女主人滿心歡喜話要參加....

我當然要阻止啦, 因為入面太多家庭主婦, 仲有好多比賽經驗, 我地呢D "業餘"家長跟本連去比賽資格都無.

開放日, 發現得獎作品係咁樣0既!!



老婆當然慶幸無花心機參加, 唔睇尤自可, 一睇...真係無乜邊 D 係廢物利用, 一半都唔知有冇.

除非佢份工係教人做手工, 平時剩好多呢D 材料, 咁先可以整到咁. 我估人面的確係用廢物撐住, 但係出面係廢物我堅係唔信....

講番今次佔街事件, 結果幾乎可以預計, 所以再講D 乜都無用. 唯有下次立會投票, 票債票償.

另外, 似乎今次股市都係跌唔落, 都好0既, 我未有足夠彈藥去做新一輪買貨行動, 反正都係借, 唔係有冇錢, 而家安全邊際唔高, 博唔過.

預計下次買量為4M, 同時亦為黎緊兩年搵到0既錢找個出路.

如預知終有一跌(或兩跌, 三跌), 何不計下數睇下偷到幾多隻雞?

2014年10月21日 星期二

快樂二三事



今天, 很快樂喲, 發生的事情都很奇妙。

女主人的第二次考車路試順利PASS, 太好了。圖為上次肥佬相片。




知道結果那一刻, 心情真的很興奮, 終於我成功了。

至於買不買車, 那是另外一件考慮事情, 最怕是對其他道路使用者構成危險,

對於這一點, 我還是很沒信心的。

反正, 引用男主人之前對我說的一句說話"過左海就係神仙"。

最近呢, 女兒幼稚園校慶, 因為佢好想有人帶佢返學校玩遊戲, 所以我就一早起床帶佢出門去。

幸好有陪佢去, 因為我發覺到原來個女在學校好多人識同好多人鍾意, 可能佢生得可愛。

有兩個老師都主動要同佢影相, 又主動走過來同佢傾計。

對個女在學校的生活了解多左, 覺得很快樂。

2014年10月15日 星期三

舊移民笑新移民, 聞所未聞!

哈哈, 原句出處


我立場係反怗中的, 因為呢班人咁做都唔會爭取到D 乜....

當然, 佢有佢地爭取, 只要唔好影響到我, 至少呢一刻, 我都唔會有咩反抗, 最多FB 鬧下佢地0者.

近呢幾年, 最睇唔過眼0既, 係個D 近年環境好左少少, 就目中無他人0既人, 唔係指BLOG 友, 而係指身邊0既朋友....(女主人0既臭串客人數字亦不停上升...)

想當年, 佢仲係份工人工底, 朝不保夕0既時候, 人人平等, 窮就一齊窮啦.

呢幾年, 搵左份好D 0既工(我估三四萬左右啦), 開始學人講起文化, 講本土主義. 開始排外, 保護自己資源, 更不知所謂0既係, 覺得自己土生土長, 讀過下書, 好似高人一等咁....

其實, 大家都唔係咩原居民, 又憑咩講呢D 說話? 我自己都係香港出世, 但上一代爸爸係澳門人, 媽媽係廣東語系0既內地人. 當年偷渡去澳門生活, 再識左我老豆....

我都仲有一半係非大陸, 難為個D "以為自己好左少少" 0既人可以咁樣落石剪繩!!!

如果唔係當初本土人無歧視佢地父母, 可能佢已經餓L 死左啦!

我知可能呢一刻真係好多單親綜緩, 又或者全家食老綜唔做野, 但係佢地下一代係咪一定會跟番呢條路? 佢地朋輩間唔會比較? 難道新移民下一代都係港人口中蝗蟲, 都唔想出人頭地?

我估每個地方0既年青人都係想闖下0既!!

反觀香港呢一代, 唔係話無用, 唔係話唔叻, 問題係太身嬌肉貴, 結果要冒險, 要捱, 要辛苦0既工作唔會去做. 造成社會上萬幾蚊洗碗就無人做, 七千蚊份顯鳩文員又爭住做(但係又要做, 又要呻人工低...)

再咁落去, 香港真係玩完, 何不比多D 機會新移民, 等佢地下一代提供一同視野0既人力資源? 我讚成比多D 內地人落黎的.

大家諗下, 當初細細個家窮, 如果唔係有公屋, 你大個出黎做野可以儲到錢? 可以唔駛擔憂住屋? (而家要買樓, 因為要結婚生仔0者.) 當初有幾多人父母係受惠公屋政策? 以前私樓更少....

舊移民笑新移民, 聞所未聞!

講番我個朋友, 佢而家0既人工, 我十年前已有....我唔算有錢, 但係"有錢洗, 有錢剩" 0既感覺我比佢更清楚, 其實跟本無乜大不了.

十年後, 我比佢(地)生活得更辛苦, 因為我有我自己0既目標, 我清楚知道自己做緊乜.

短暫0既辛苦, 如果可以換黎一個什至多個選擇權(留或去, 駐足還是挾錢走), 未來係咩政治環境我都唔怕.

佔領街頭, 未見其利先見其害. 旺角有店頂唔順要摺, 即時比人話佢一路經營不善, COMMENT 個D 人肯定未做過生意.

下一篇文再講. (本來等女主人寫下佢近況, 不過佢病左好耐...)

2014年10月7日 星期二

我的小生意續約了

話說, 我店鋪租約到期了....

同老婆出去睇新鋪, 發現選擇真係唔多, 即使係比多D 錢, 都唔夠而家呢度方便同四正...

結果, 再簽多兩年...預計兩年後應該可以收山, 頂多再加多半年至一年!!

租金其實加幅唔多, 只係17%. 認真唔算貴....

當然, 唯有加番係貨價度, 大約加左 4-5% 就可抵銷加租影響, 重有錢入袋! 話時話, 我三年都無加過價了...

老婆仲幫我請左個清潔, 哈哈...三年都無吸過塵0既地毯你想像到有幾恐佈嗎? 至於我自己, 想換過鋪頭D 裝備, 就當係少少裝修吧.

計過數, 預計下年繼續可以維持6 位數字純利, 比我頂多兩年啦...而家鋪頭D 菜式應該都好襟用, 有排都唔駛大執, 或者咁講, 同業係經濟好0既時候, 都幾不思進取...

同我同期個一輩, 做黎做去都係個D 方法, 明明唔係好菜都賣出去. 新入行個D, 唔知係咪覺得要創新, 結果好騎尼好好笑, 明明想食羅漢齋, 佢放左舊五香肉丁係上面...其實佢知唔知係犯法, 出左事保險唔賠0既呢??

真係不得不讚自己, 呢三年入面, 原來已做到好出名, 無奈只有我識做菜, 請人番黎都無用. 貨物超級供不應求要玩排隊, 有時諗到呢度, 覺得如果兩年後親手執左佢, 係咪有D 可惜?

重係度佔緊0既佔領街頭活動, 似乎已經係強弩之末, 應該無乜威脅了!

我0既收入非常穩定, 基本上每年某D 時候就已經計到之後個大半年收入. 相反老婆份小生意就難估好多....

今日佢一發市, 就一張七萬蚊0既單..雖然佢純利部份較少. (女主人近期有人追佢...哈哈!! 我成日笑佢收兵, 唔知佢會否以網誌講下個情況.)

我鋪個業主見到佢, 重話估唔到佢咁後生, 其實, 佢已經係兩個小朋友0既媽媽了! 只係佢成日扮細...厄哂D 客.

相反, 我估D 人見到我, 一係以為我係做IT, 一係以為我係砌模型...WELL...

2014年9月30日 星期二

我可以唔撈嗎 3

身心已極疲累, 唔係因為我去左佔中, 而係上個星期全家輪流病左....






個女因病無得去生日會, 我覺得好可惜. 老師留番D 小食比佢, 幾好人!

始終, 一如所料, 對囡0既感情比對仔簡單好多...有時候, 仔同老豆真係隔世有仇, 但你又唔可以由得佢頹, 因為你都成長過, 做過男人, 知道即使你係首富個仔, 你都會有好多事情要自己攪掂自己面對.

佔中就黎佔到我個鋪, 只要一到, 應該唔會有生意...

同樣地, 鋪頭要搬, 又係煩.

刻下計下今日賬面少左廿幾萬! 哈哈....股市仲有排跌, 遲D 再另寫下我有咩部署.

埋單計數, 要退休, 其實都唔係唔得, 不過要好慳....

1. 首先要削減父母家用20%, 我唔想亦都唔會.
2. 要慳D 洗...呢個係廢話.
3. 至少要捱到下次股息派發

呢一刻現金只係得十幾廿萬, 唔足以撐幾耐架咋. 如做到十二月租約完結, 頂多六十萬, 唔好得幾多...

當然, 大前題係我無計女主人, 但佢工作收入受經濟影響太大, 若突然下滑就ALL FAMILY DIE!
我0既本業呢, 算係有D 錢0既人必須品, 經濟唔算太影響我, 或者咁講, 最後先影響到我, 只係我做到好悶, 成日幻想唔Q 做.

呢一刻全家產加埋應該未有1000 萬, 不過估計過多幾個月就有了.

有前輩提到, 若股息跌, 如何是好? 我有心理準備, 馬死落地行. 去做下PART TIME 應該可以應付到. 如果唔派息點算? 咁就真係焗住賣股票喇...

加息週期可能會加快, 各借貸買股朋友要小心.

2014年9月27日 星期六

如何救回極價內期權短倉

應唐人BLOG 友所提及, 整理後舊文重寫


當你持有極價外期權, 點算???

話說, 我係2007 年12 月開左個 SHORT PUT HKB 142.5 倉....



隨後匯控股價下跌, 期權金不停比人追按, 好彩夠錢比. 同時亦轉左倉去其他日期, 去到2008 年六月, 又收左D 錢

之後, 再由2008 年六月轉去2009 年三月, 又賺DD 權金....


途中, 認真夠薑, 係七月加多八張 SHORT PUT HKB 115 以及 SHORT CALL 122.5


結果, SHORT CALL 轉倉, SHORT PUT 變廢紙....

睇到呢度, 都係重覆以上動作, 無謂CAP 圖. 十月, 十一月都係咁, 月月有錢入袋幫補.

十二月已經出事, SHORT CALL 100, HORT PUT 142.5 及 112.5 已經成價內....好慘.

2009 年之間, 有幾張比人行使左, 結果就要SHORT COVERED CALL, 由70 做到80....賬面更係蝕啦!!

2009 年三月世紀大供股之後, 變成咁. 留意, SP131.96 權金成94 蚊!!! 估計當時HKB 只值4X 元...咁都無比人行使, 簡直係奇蹟!!!


之後股價一路升, 按金減少! 哈哈.

最關鍵係做左下面0既動作! 有二萬幾蚊入袋.

用50 張OPTION 黎救 10 張OPTION 真係不智....仲要係NAKED CALL, 千祈唔好學. SHORT PUT 金額要170萬, 如果當初接貨, 金額要77萬.

當時因為手頭上多左舊錢, 否則唔會咁做. 同埋個時間好短, 八月做十月倉.


結果, HKB 升過左85, 全部SHORT PUT 無事變成廢紙. 唯有SHORT CALL 係六月....

之後又唔識死, SHORT PUT 番 82.5....哈哈! 當時股價約90

去到11 月, 重大膽, SHORT PUT HKB 價內, 留意張數少左, 兩者權金差唔多, 當時股價為90.7. 我預25 張接貨都係95 萬, 綽綽有餘啦....


股價跌到87 , 我又轉SP 倉去一月, 再轉去九月, 股價已經跌到84.

到左2010 年六月, SHORT CALL 倉都變埋廢紙.

到左呢度, 當初所有因SHORT PUT 142.5 而造成0既壓力已經完全無事, 途中仲執左唔少錢....

**************

心水清既BLOG 友, 應該留意到仲有25 張 SP 95 蚊....

以下係後記

中途有部份比人行使左, 我即時沽番出去, 再做番SHORT PUT....

由95 再轉去 92.5

2011 八月就係股票期權災難日, 我0既HKB, BCM 同埋CLI 同時唔夠按金, 經女主人搶求無效, 平倉蝕左60 萬 (埋單三年權金一次無哂, 三年間白做, 不過, 真係蝕0既應該係股票賬面值, 損失閒閒地一二百萬)....

哈哈. 2008 死唔去, 竟然2011 死掉.

呢個故事唔係教你救倉, 只係想講, 量力而為, 有時候, 只係時辰未到!!!

果陣仲係我個囡剛出世....

2011 年年尾, 我工作出左D 煩惱, 結果下定決心脫離拍檔, 收入首月已升左兩倍...高峰期真係要交標準稅架!

所以, 投資我係亂九黎, 但現金收入係唔錯的, 切記唔好唔知頭唔知路走去跟我....


2014年9月25日 星期四

外母的投資 -- MPF (2012)

舊文重寫, 當時係2012 年 9月 13日

都係個句, 投資真係好個人!!!

2013 年新聞

話說07 年間股市好到不得了, 咁0岩唔知點解同外母傾開MPF, 佢都未到五十, 揀保本, 當然緊係提下佢可以轉. 轉去乜? 咪又係所謂HSBC 高風險個堆MPF, 可以有幾高丫. 都係買股票0者.

呢幾年MPF 表現唔駛講, 大家都知外母MPF 蝕左唔少....

結果有幾次食飯佢都提起, 當然佢未必係怨我, 但係如果而家叫佢轉番保本, 咪好蝕章??? 股市低迷先黎止蝕, 唔係下話?!

(後記, 好多人MPF 都應該番左家鄉了.)

講完MPF, 早幾日佢又比中銀X港D 職員TUM, 我發現佢地真係好鐘意TUM D 得十幾萬又唔係多錢0既長輩買野. 我初中個陣我阿媽都成日比佢地撩, 唔知係好定唔好, 我阿媽唔貪心, 一次都無買過. (可能買左重好? 我唔知喎...)

個PLAN 大約係咁, 分兩年供, 每年供80000, 即係一共十六萬. 之後每年可以拎番萬幾蚊, 如是者十年, 到最後個年又可以拎番一個DOUBLE即係三萬幾.

詳細我無睇過有冇風險, 都係我老婆口述比我聽, 今日計一計, 年回報得1%!!! 可能我係細節上會計錯, 但係都唔會高得去邊. 而銀行CLAIM 有3%, 即係我計錯啦.

最奇怪係, 最尾個年比多個DOUBLE 你, 又點計? 是否數學遊戲??

當然, 唔通我叫外母買哂盈富基金咩....呢D 野都係自己試好, 叫人做就無謂喇.

其實佢又唔駛煩無野做無錢洗, 唔通我同女主人唔理佢咩~~~ 有錢就洗左佢啦. 佢呢個年紀, 最後扮無錢食政府先係皇道.

捱到年底, 還清D 孖展數, 閒錢又可以買貨了. 我係硬頸, 係咁做就咁做, 買磚頭? NO WAY...我唔知道十年或者廿年後重係唔係香港, 更重要係我唔知我有冇耐性佢慢慢供完佢.

(後記, 最後D 錢當然買左貨, 百幾萬. 及後再借又再還了.)

七位數0既孖展數, 2012 年開始供, 年底就應該供完. 用黎買樓我仲SSD 緊, 只能自HIGH 每月有現金流, 賬面開心中...買股重衰, 是負數.

哈哈哈哈哈~~~~~

不過我會繼續每年七位數咁樣做呢D 傻事.

後記, 外母係台山有層樓(同女主人兩份買, 可能係唯一外母的資產.

有機會講下小朋友0既利是錢...

2014年9月23日 星期二

我都有情緒

我都有我情緒, 有我感受, 你有咩唔鍾意可以走左去, 但我唔可以。


2014年9月22日 星期一

比較 証券行 (一通 致富 耀才) 射倉 速度

新文章又同步fb 作news feed。



舊文重寫。

証券行買股而家真係好平佣, 但係放係果度安全嗎? 其實可以買完射倉去銀行.

先介紹我用開咩APP 計佣金
https://play.google.com/store/apps/details?id=com.webihk.StockExpenses


上圖假設買左三手匯控, 約十萬蚊. 如果買過一球, 個佣金差距更誇張!!! 5蚊VS幾千!

皆因, 一通有....傳說0既五蚊雞佣!

好多人懷疑咪真, 安唔安全. 其實一通呢間野零服務, 
職員只係幫你開戶, 其實一切都要網上做, 其實對我黎講係好事!!

買左幾耐先可以射倉?正常T+2 交收後, 例如你星期一買,  星期三就交收完. 留意一通會叫你等到T+3, 不過其實星期三收市後就可以射走佢.

因銀行射倉手腳較慢, 個人心得, 早半日或一日去你想射個間行(例如中銀....)攪左射倉先. 我用中信, 即日星期三個晚會係銀行戶口見到... 一通交收資料, 建議網上問佢.

呢個方法, 唔好地方如下

1. 轉錢入戶口
轉錢買股需時, 小額 PPS 轉賬十萬以下即時過數, 如果支票要CLEARING 左先得...好似我咁輸唔切會錯失時機. 如果你十萬以上, 又無佢指定銀行戶口, 就要等一日.

2. 射倉要親身去銀行. 建議中午收市去攪. 否則要同師奶排隊, 佢地買股你射倉, 會阻住人地.

總括黎講, 5 蚊+射倉手續費, 好大機會平過係BANK 買....

覺得有用就留個言支持下啦, 我估初用證券行0既人有幫助.

3. 三間券行射倉效率

自己銀行用中信, 因為OD 夠平.

三間股票行, 一通, 耀才, 致富, 我都有股票係入面, 趁放假得閒就一日去哂三間射倉.

先去中信, 記哂三間0既對家資料, 股數, 職員幫你攪掂! (我成日去, 佢認得我服務梗係好)

證券行, 建議收市去, 無謂阻人發達~

先去耀才, 帶身份証, 對家(中信)資料, 職員幫你攪掂!
開到七點的

行多兩分鐘到致富, 同樣帶身份証, 對家(中信)資料, 職員幫你攪掂!
開到六點

速度兩間都差唔多, 十分鐘內攪掂.

最後去一通, 其實唔駛親身去, 佢網上有介面自己攪掂, 果度D 職員都唔會想幫你攪, 因為網上攪到就唔好攪佢地, 5 蚊雞係咁, 我接受的.

附: 對家資料有三個, 
一. CAASS ID
二. CONTACT 電話
三. 聯絡人
(其實間野叫乜無乜所謂, 對CAASS ID 就得)

三間野手續費都係200 內, I DONT CARE...(銀行射入唔收, 射出條數好甘, 無必要唔好射出, 除非你要實物.)

經過左一個交易日, 截止今日下午六時
只有耀才轉到, 非常快!! 抵讚!!

過左兩個交易日, 一通都射倉成功. 

過左三個交易日, SEND 個EMAIL 問致富, 唔知係咪我黑仔, 竟然話唔見左我張FORM...即日補番比佢. 佢話第二日就OK. 又睇下點.

過左四個交易日, 終於係晚上見到D 貨射左倉. 致富人為錯誤下令今次測試完全輸哂.

2014年9月20日 星期六

(女主人)我的工作

男主人帶個女同兩老潛返內地飲喜酒,  而我, 要繼續我的辛苦命-返工。

近日的艾瘋熱, 個個都在搶機, 我沒有別人的恆心跟毅力, 所以我搶不到, 再等等, 也沒所謂, 我維粹想湊下熱鬧, 買得到就當是給自己的生日禮物。

說起生日, 想一想, 我就來30歲了, 又是一個大心理關口。小時候想長大, 當大了又想扮年青, 想起也覺得好笑。今年, 我一定要好好過, 男主人, 你識做喇。

我寫野沒有什麼條理, 我算是一個比較隨心而行的人, 想起什麼事情就寫什麼事了, 男主人說我沒有條理, 但這樣做人不是比較舒服嗎? 只要不太過就可以了, 至少我自己是這樣想。因此, 我常常被另一半投訴沒手尾, 衝動, 哈哈。

說說最近工作, 好朋友兼同事放假回來, 膊頭終於可以放輕一點。工作中有人跟自己分擔, 是很幸福的一件事情。遇到問題, 感覺不是只有自己一個人。而前文提到要走的人, 又決定不走了, 又願意繼續幫我們工作了, 我的膊頭又再放輕一點。 原本打定輸數全虧的一個訂單, 又出人意表的收到錢。 一切事情都好像順心起來, 太好了。

我的工作跟男主人不同, 我常羨慕他可以不用受氣工作, 相反, 我的工作是要應對不同的人, 深深體會到這世界什麼人都有。 最近, 我看到一句話覺得說得很好。


這是我深深體會的。

我希望我的小朋友, 不一定要琴棋書畫樣樣皆通, 但至少識如何做一個"仁"。




2014年9月15日 星期一

我的藍海一: 我的生意像澳牛

網絡世界, 一不留神, 可被起底.

女主人叫我小心, 當然我都好小心.

不過, 有時候又會諗, 起左又點, 若然能夠令我狠下決心唔做呢行, 可能都係一種解脫....

因為行頭細, 所以撈左一段日子已經有小成, 工作亦幾近飽和, 應接不暇.

相比女主人, 佢D 客入面會有麻煩客人, 真係獲獲新鮮, 無賴者眾, 惡人亦不少. 少則R 電視框, 多則話上網唱衰你....當中是否粗人? 非也.

我深信, 仗義每多屠狗輩. 反而越以為自己讀得書多, 但係無乜錢個D, 先係最無賴. TVB 厄你架咋, 有錢人好多都好有品. 或者咁講, 佢地都唔在乎個少少著數, 亦都明白, 有好多野唔係老細控制得到. 大家取其共識, 你好我好0者.

佢小茶飯上0既事務, 我係好難明白0既, 因為我0既小茶飯同佢剛剛相反!

*****

我D 客呢? 個個都好比面我, 又有手信, 又有月餅. 近呢一兩年有D 客仲特登上黎見下我, 睇下我咩樣!! (SO FUNNY! 佢地覺得我好似變魔術好神奇...想知我係個咩人, 其實就係T SHIRT 牛仔褲0既中青一個, 行過樓盤都無人SELL 我個D)

去到呢個境界, 自然可以選客人...只要貨物靚, 抬錢都會黎買黎搶.

當然, 我又唔係澳牛(請GOOGLE "澳牛 高登"), 我又唔會咁串0既....



同澳牛相同0既係, 呢幾年生意自動飛埋黎唔駛憂, 都幾好, 不過就日日做到無停手了.

其實, 我呢個茶餐廳侍仔, 係非常ENJOY 呢個工作, 只可惜一做N 年, 已覺得好悶, 我知咁樣唔係好0岩, 就好似係冷氣房度話做乜咁舒服一樣. 直到今時今日, 我都覺得好開心, 做到好HIGH. 人生有樣咁0既工作, 其實好理想, 完全無壓力又有錢唔受氣工時又唔長...只係我覺得悶.

你睇我好, 我睇你好!

********

我0既小小茶飯, 要由大學畢業開始, 當人人搵工0既時侯, 我發現, 其實一早發現, 我並唔鐘意本科工作.

回想當初, 放棄唔出黎執業而去做D 九唔搭八0既工作, 係大學同學眼中真係十萬個看我不起, 其實當初我都唔知想點, 只係知自己乜都無, 點解唔乜都試下?!

結果一年內, 我已經追到一般同學0既人工, 其實只係經濟唔好, 佢地都唔係搵得多.

我依舊死做爛做, 乜都試下, 點知唔知由幾時開始, 每月收入D 錢越黎越多, 我再無同佢地去比較, 因為我知佢地追唔到我之餘, 我有更好目標. 當時做一個月可能係佢地兩三個月人工, 已經覺得好爽....

轉眼又過左幾年, 我發現無論佢地如何升職, 升到最高級, 都唔及我一個月死做爛做咁多, 以錢而言, 當初選擇也算正確吧. 我阿媽久唔久叫我搵番份正職, 其實佢唔知我做緊乜...

至於亂九投資之路, 大約八九年前(2005), 我從朋友身上學識左買股票, 原來只係按個制. 朋友係價值派, 當時大圍都興講呢D, 我咪又聽下. 發現原來自己係可以快人一步唔撈, 只要慳慳地.

近呢幾年, 經濟好到不得了, 生意好到去一個我無諗過0既程度. 同時我當初以為我呢份工作, 做十幾年就因某D 完因要被迫退休, 點知今時今日依舊繼續.

澳牛精要, 乃忌廉炒滑蛋! 我已經唔記得我個一次去有冇食過, 不過做呢D 特殊市場, 就係要去一D 無人知0既藍海! 人人做茶記, 點解得你排長龍比伙記鬧都仲要食?

我呢個藍海, 其實不止我一個(忌廉炒蛋都唔止佢一間啦), 見過有D 人真係好串, 趕客啦, 鬧客啦, 係佢面前除衫嚇佢...嘩, 真係好奇怪. 結果換黎0既報復都係成正比, 因果循環吧.

眼見兩三年前市場開始有類似0既野出現, 開頭都煩過, 後尾打探後發現, 係呢段日子, 我0既PRODUCT 不停進步, 你忌廉炒蛋咁簡單? 我連外脆內軟0既多士都研發埋啦...每年我都有新野, 你點追?

當上有父母, 下有老婆仔女個陣, 發現當初個銀碼唔係好夠, 唔緊要, 又再做多兩年LAW...物價升幅唔夠我快, 租金升幅? 女主人話, 坐少D 的士已經等如番個數目了.

我係D 好簡樸0既人, 唔駛好大洗, 夠用, 夠去比屋企人生活就得. 希望係人生路上, 可以活出一片藍海. 人生在世未必要追逐一D 人人以為必然需要0既野(就似我當初畢業, 一定要做本科咩?), 例如車, 樓, 同埋番狗, 如果要七老八十先去旅行, 先去做自己想做0既事會否太遲? 人生有限, 一般人為錢奔波日子都好長, 結果一D 好無謂又想做0既事就擱置一邊, 如果可以仲係年青0既時候去衝衝衝試下, 你話幾美好呢?

如果可以工作0既年數少過讀書0既年數, 其實係人生成功一事黎0既.

P.S. 女主人0既生意, 看似紅海一片, 其實都係藍海黎. 就係當初發現藍海, 先至能成為小茶飯.

2014年9月13日 星期六

事情總會有過去的一天

真係遲睡早起, 零晨5點鐘起左身, 次次陪小朋友睡, 陪到自己都昏迷過去, 到自然醒後, 又係一個咁尷尬時間。

前個星期煩擾我的煩惱, 昨日又再見曙光。心, 又可以放輕一點。
整件事, 令我又再深深一次體會到, 作為最終的服務提供者, 就算你前期工夫做得多好,
但你供應鏈上的任何一方不配合或有偏差, 都會影響甚大, 只能靠後期工夫盡量去補救。
令我覺得最挫敗的, 是我不能把事情做好, 令客人對著我哭, 真的覺得自己好差勁。
整件事情, 最無辜的是客人,  賺錢, 實在不能沒掉良心。
慶幸, 昨天出最後一批貨, 都是小問題, 再找人去善後, 應該就可以解決掉。
這事情, 足足持績了一年, 希望盡快劃上一個句號。
事情總會有過去的一天, 這是我一直深信的一句話, 亦因為這句說話, 幫我渡過了不少煩惱。


親愛的同事即將放完產假, 終於不用再一個頂兩個了, 包袱可以暫時放輕一點。
不過有件事情, 實在覺得可惜。
好人材難求, 一個一直幫我們工作的人, 最近堅決跟我提出, 大家合作關係要終止了。
當中涉及了複雜的私人情感, 以前一直都是我同事處理這方面的工作安排,  我很少接觸。自從我身兼兩職後, 自然也接棒這一環節工作, 跟這個人開始熟絡起來, 就是這樣, 做出事了...(聲明: 我沒有出事) 就算對方從沒有說出口, 但事情已做得太出面了, 不知所措的我, 只有繼續扮無知。

男主人, 好像完全沒有危機感呢...
縱使我也沒有半分想過...

覺得可惜是因為我"毀掉"了一段曾經這麼好的合作關係。這一星期, 我都嘗試勸服對方繼續幫我們工作, 但想深一層, 這樣做法有點自私, 明知對方是對自己有意思, 唔應該利用這點。
咁同電視劇中被人謾罵卑鄙女人有咩分別...所以, 我放棄了。
大家都知道底線在那, 就不應該去觸及, 當任何一方嘗試去觸及, 大家關係轉變了, 那工作關係就變得複雜了。況且, 大家都是有家室的人, 何苦呢?

要找回一個同樣幫手的人, 又不知道要踫多少次壁。


又說說別的事, 昨天媽媽生日, 在這生日上送上小小心意, 雖然價值不高, 但對我來說金介指意義甚大。

很清楚記得當年我十多歲, 那年很流行香薰營銷, 我認識的人當中已有三個, 包括我哥哥。有天, 媽媽竟然要把家中值錢金器都當掉, 為的就是用來填補我哥被營銷騙去借財務公司的錢, 那時我還小, 營銷公司實際是怎樣操作, 我沒有深入去研究。但腦海中深深記住的一幕, 是我媽當年那開櫃拿出金器的情景, 就連結婚金介指也當斷。那時的我對自己說, 等我大一點有能力時一定要買回金介指俾我媽。
這, 物輕意義重。


打完, 6點38分, 嘗試再去睡睡。

2014年9月12日 星期五

短評:鄧小閑BLOG 系列二

伸延閱讀



(為免影響原文味道, 個人意見係最底)



I have a dream, 擁有10萬股《滙豐》,以現值計約為1400萬,絶不是容易的事情。但參照下表,1991年10萬股《滙豐》只值約103萬,如果能以借貸於15前年買入該批股份,再以月供形式攤還,一定容易很多。


股息與利率
用借貸買股票,有一大考慮:股息收入不足抵消孖展利息支出。91年時《滙豐》股息是4%,而孖展利息是12.5%,相差8.5%,即借貸100萬,每年股民要叧付利息8.5萬,但這個負利息收入的情況不是絶對或長期的,2006年借貸利率是8%,即100萬需付年息8萬元,但當年以約103萬元買入的股份,股息已由4萬元升至58.8萬,即利息收入是正數50萬多。

  
 
 
巿場利率
股息x10萬股
1991/8  
$10.33
4%
12.5% ($129,125)
$40,000
2006/8
$10.33 (成本價)
4.12%
8% ($82,640)
$588,100
2006/8
$141 (巿價)
8%


由這個實例可見:
1. 以短線而言(投資第一年,1991),股息收入不能抵消借貸成本。($40,000<$129,125)
2. 以長線角度(15年後,2006),股息收入大幅高於利息支出,($588,100>$82,640)
3. 投資者可以想像到一段時間後,累積股息收入大於累積利息支出,利息的正收入將用於減除負債(最初借貸買股票的103萬及早期累積的利息支出)。負債減少,利息支出亦同時遞減,最後投資者可完全清還借貸、擁有資產。
4. 這是一個現金流遊戲,投資者要成功必須明白『增長與波動』,
5. 巿場利率是波動,可以升、可以跌,主要是受通脹及就業情況影響,絶不是遞增性。(91年時是12.5%,03年時是4.5%,06年是8%,這是我的孖展息率情況)
6. 股息主要是受業績影響,若業務及盈利是穏定增長,股息也很大可能是穏健增長性,若不能找到股息有穏步增長股份,以息養息的投資就會失敗。
7. 股民應以買入價計算股息率,不能單以巿場上的即時股息率及利率作參考,股息率高於利率的情況是非常罕見,所以股民應用買入價及考慮一年後、五年、或十年後的股息率及利率的情況。
8. 衡量巿價時,若發覺一段長時期後,股息的收益也無法彌補利息支出,這情況已暗示股價偏高,隨時下調或大跌,股民應避免買入,甚至沽出早前低位買入的股份,目的是高沽低買,避開股災,再從低位出發。(日後股災篇再談)


開設孖展戶口
年青人到銀行或股票行開設孖展戶口,常遇到以下問題:
1. 知訊混亂:銀行職員經常不太清楚公司産品,一時說可以,一時又話不能。
2. 態度冷淡:股票經紀可能問很多問題:資產數目、入息証明、炒股經驗等;最後勸你不要炒孖展,改用現金戶口。
3. 錯誤觀念:年青人常有以下問題:「股票行為什麼要信我?為什麼借錢給我呢?」股票行借錢給股民可以收到利息,又可做更多生意,最重要是風險很小,因為股民的股票是放在股票行中,股票行又會要求股民存放一筆按金(由股值的20%至60%不等),又可以隨時暫倉,取回借出資金。所以股民的問題應是:「我為什麼要相信你(股票行),不是股票行為什麼要信我?」
4. 資金不足:如果你資金足夠,就無需要使用孖展戶口,開設孖展戶口亦不需要存入大筆資金,當你需要買股票前,才存入款項,以買一手《滙豐》計算,股價x股數x按金 = $140x400股x 25% =$14,000(各股票行可能按金不同),即只需存入約$15,000已可以得到入場卷…


若認定有使用孖展的必要,股民應該:
1. 收集及比較各銀行及股票行的孖展戶口資料(包括口碑),
2. 選定目標後,再找尋是否有親朋與該股票行相熟,要求介詔,
3. 最有效方法,股票行總有生意淡薄時候,這時經紀大多不會拒絶開戶要求。


炒股三步曲
要累積財富不是一件簡單事情,特別是對一些初出茅蘆,月入只是數千元的年青人,還有更多小股民是需要供樓、還咭數、養妻活兒、供養父母,若要他們有能力累積10萬股《滙豐》,單憑個人收入及優質股的增長能力是不足夠,最大可能是分三階段進行…待續
註 : 資料源自一位很受歡迎的投資Blog 客 : http://hk.myblog.yahoo.com/banking_mind

本來想寫下工作特質(我份小生意同澳X牛奶公司一樣, 可以好串咁做的...)

見前輩LISA 姐留言講單一股票加小量現金有D 危, 未必能完全退休, 剛好又有意見發表, 梗係寫左先.

我估當年睇呢篇野, 好多人情緒都好高漲. 10 萬股HKB, 果陣至少上千萬, 留意股息, 2006 年已經有58萬一年, 仲要06 年物價仲好平喎!!

先唔理通漲, 假設佢股價一跌, 又或者減派息, 已經好大獲.

上年HSBC 派USD 0.49, 即係十萬股共收近38萬, 無啦啦少左20 萬....當然人人退休0既洗費唔一樣, 不過放諸我自己就肯定唔係好夠, 除非我係單身寡佬.

如果我係單身, 呢一刻梗係買一層自住, 一層收租. 然後扮有財商又識投資又上進咁樣, 溝番條女先啦. (如果你有樓但又溝唔到女...SORRY, 我洩漏國家機密TIM! 乜溝女要用資產証明架咩??? 女主人現在都仲係靚女一名, 上過幾次TVB 架!!)

仲有, HSBC 當年供過股, 唔知邊度搵錢供了!! 如果當中仲涉及借貸, 咁就好大件事!

而家睇番, 當初我地D 熱情, 今日係咪得談笑呢?

不過, 有一樣野, 小閑兄有提到, 就係03-06 年, HSBC 真係有投資價值. 如果係07 年已經無負債, 持有到呢一刻, 雖則未番家鄉, 但其實收息都算OK.

至於借錢, 好睇時機. 果D 老千式有買貴無買錯, 認真講句, 真係佢ON9 你又跟佢? 用派息減去成本表達比讀者聽, 人人聽到流哂口水啦下話! 你又信佢個計法係0岩喎! 真係學野跟著個唔識亂九黎0既....

相反, 睇下小閑兄講, 係兩者利息之間, 而又有勝算先好去馬, 06 年佢以股市講出黎, 如果08 年你用係樓市上已經幾好收成!

又要講句, 放諸一切皆正確!! 近年好多人買內銀收息, 涉及借貸! 因股息高過貸息, 其本上有番1-2% 差額, 睇落都幾好. 朋友, 睇下小閑兄操作, 咩事會死?

當內銀盈利倒退, PE 即時上升, 派息亦可以下降! 凡事不要去得太盡. 蟹哂唔緊要, 千祈唔好蟹突, 心理狀態好緊要. 爭緊人錢仲要賬面蝕一浸, 個人好易亂! 仲唔敢亂買貨啦, 你話係咪?

當年十萬股HSBC收58萬, 今天可能要十五萬股了.

又講埋另一樣野, 樓按息同收租收入息差表面更勁! 但扣除雜費, 2013-2014年買, 可能重衰過買內銀! 除非樓升股唔升啦, 咁又係變左睇價問題而非息差套利動作了.

果個開BLOG 教人求死0既BLOGGER, 講到一定要有樓, 否則世世代代都要為奴咁. 又一個市場老千, 千得更勁!!! 呢個世界, 好多個藍海, 唔一定要紅海!!!

當年(真係我仲係精蟲祖先0既年代)買美孚, 而家可安居; 如果係買左深水步舊樓呢??? 放諸今天, 你仲叫D 年青人走去抬錢上會買一D 仲老過我, 過哂三十年樓齡0既舊樓, 一供十多年(當真係加人工可提早還), 唔係咁陰質下話??

放諸樓市, 好多人諗有一層自住, 幾層收租(我計過, 我要十層濕尻細價屋苑!!!), 可以退休. 咁同令大家好熱血0既 "10萬股HSBC" 呢個夢想, 又有咩分別呢? 

我出文唔係想話小閑兄呢位前輩, 佢見過風浪股海浮沉過! 佢列明風險的. 或者有人認為我中傷某D BLOGGER, 我只係想講, 當年又好, 今日又好, 亂九叫人買乜買物大條道理, 其實佢地可能低位買左, 安全水平好X高, 你唔知頭唔知路又跟, 咁咪死LAW!

我都持有內銀一大堆, 不過呢一刻無負債, 工作現金流算幾好, 突如其來0既股市變化可以承受到, 大家不要有樣學樣, 至少我捱過2008 同2011 兩次重擊存活下來的. 再者, 我D 內銀非低位買入, 平均買入價高過現時股價的, 亦不會以股息扣減成本扮低位入自欺欺人.

打到呢度, 似乎我可以寫BLOGGER 歷史學...N 個"當年今日"!

2014年9月10日 星期三

再次開始

自從YAHOO BLOG倒了後, 我好像都沒有持之以恆地再寫BLOG了。
又要上班, 又再照顧小朋友, 那來寫BLOG的時間。

最近, 男主人的網誌開始多人留意了, 在他"盛意權權" 的邀請下, 我嘗試再一次開始的我寫BLOG生涯。不過佢有佢寫, 我有我寫, 大家題材不同。我女人仔一個, 只懂記錄下生活的鎖碎事, 我屬於比較感性型, 我手我寫心。

踏入9月份, 算是我工作的淡季, 終於可以停一下。這2個月撐得太辛苦, 同事放產假, 搬屋, 小朋友開學, 工作的旺季, 還有伴隨而來工作上遇到麻煩事的挫敗,  一下子湧過來, 實在很辛苦。

過去一個星期, 真的感覺很失落, 男主人也不知道我曾經有偷偷哭過。我有曾想過放棄, 不過都過去了。當事情過去了, 回望也不覺什麼, 任何事情都是這樣, 不是嗎? 






2014年9月9日 星期二

2007 回顧, 你唔知市場老千係點, 又有樣學樣?

牛熊SITE 推介


http://www.analystz.hk/cbbc/cbbc-outstanding-quantity-analysis.php

要殺, 你話殺邊邊?

我又唔係短線操作, 不過有時估估下又幾過癮.

當人人當基本分析係皇道0既時候, 大家變哂市場先生.

人地80 蚊買HSBC 立於不敗之地, 一班傻仔覺得120 抵買, 有人話200 抵買, 全因價值. 呢個人由600 萬股票變到得番300 萬個陣, 唔知一眾散戶變成點?

當初我都有買HSBC, 仲要係買OPTION!! SHORT PUT 142.5, 又比人行使.

行使左點算? 即時賣番再沽PUT! 好彩當時只係四十幾萬貨仔, 我將佢加張數一倍再改使價為8X, 如是者, 竟然好彩全身而退無事.

可憐一班FANS 止蝕者有, 持有者又有.

唔係話基本分析唔好, 有時都要睇下分析果個人咩立場. 買入成本低就梗係TUM 埋你入局, 仲話有買貴無買錯啦/

技術分析其實都有用架, 至少入貨位唔會太差, 雖然我都係亂九黎.

又係個句, 放諸一切皆正確. 若然有人話你知佢間細價樓百幾萬買入, 而家值三四球, 叫你快D 買唔買走寶, 究竟輸左係咪佢比番你??

我年紀唔大唔細, 不過股票上落同金價上落同樓價上落, 週期長度好唔同喎! 唯一一樣, 就係必然有上有落. (金價千八蚊個陣, FB 幾Q多人話要買金??? 呢刻金價1256, 即使你撈左底, 都仲係底位徘徊咋. 金價可以十年唔變, 一變變天! 即係話, 要買唔駛好似股票咁急.)

若然個班相信市場先生0既人, 無買到HSBC, 留到4X 蚊個陣先買, 而家真係可以止賺不止蝕了!!! 你估佢真係股神咩???? 香港地又是否人人是樓神???
(總有D 人事後孔明, 又話一早減持買入其他, 你信唔信? 哈哈....)

P.S. 見到有BLOG 友放左我係佢追蹤LIST, 如想我加番你入LIST 請講我知, 我怕遺漏.
P.S. 我老婆見我寫得咁過癮, 佢會係近日又寫下呢個BLOG, 不過女人仔未必係講投資.
P.S. 市場先生當年收入高, 讀者唔知死跟就大獲! 我又講下, 我家庭年收入亦算高, 若唔用任何寬免, 基本上必然要交標準稅, 一切投資應切合自己需要及可承擔風險.

2014年9月8日 星期一

短評:鄧小閑BLOG 系列

新文章又同步fb 作news feed。



好文共賞 

應該四五年前消失左0既BLOG 友留下好文, 共賞
(為免影響原文味道, 個人意見係最底)

乜太,天水圍家庭主婦,年介四十,二十年前在國內與香港丈夫結婚,96年移居香港,與現職保安員的丈夫及兩名兒子居於公屋。
一家重擔全靠丈夫的收入68百大元,兩名兒子正在求學階段,乜太為了減輕丈夫負擔,平日兼職家務助理,月入23千元。
第一階段
乜家生活樸素,雖入息微薄,每月還有點餘錢。為了積殼防飢,乜太決定做點穏健投資,把每月兼職所得的2千元用於購買《滙豐》:
乜太由01年開始以月供形式買入股份,至02年尾,乜太發現她在02年買到比01年更多的股份

 
2001
2002
 
91.25
85.25
 
263
282
投入資金
$24000
$24000







同期她留意到02年的每股盈利及股息都比01年為多(參照下表A1)
乜太知道此時《滙豐》有更高的投資價值,而未來的一兩年她仍會繼續買入
A1

 
2000
2001
2002
2003
2004
2005
收巿價
115.5
91.25
85.25
122.5
133
124.5
派息
3.3843
3.7344
4.1234
4.668
5.1348
5.6794
息率(%)
2.93
4.09
4.84
3.81
3.86
4.56
EPS
5.835    
4.5124    
5.1348    
6.4574    
9.1026    
10.503    
P/E
19.78
20.22
16.60
18.97
14.611
11.85

為怕股價大升,乜太決定放棄月供股票的計劃,改以孖展代替
第二階段(Part I)
她以持有的545股《滙豐》為抵押品,向股票行借了$69,000萬,再買入800股,孖展比率為60%
她没有擔心利息的問題,因為當時孖展利息只是4.5%,而股息卻有4.84%
而且她有1345股《滙豐》收息,但只需為800股付借貸利息。
乜太繼續每月清還2千元給股票行,約三年時間(05年尾)她把所有債務償還
下表可見乜太改變方法後的效益:


簡單月供股票    
配合孖展(乜太所用)     
時間
資金
12
12
累積股數
1114
1345
 
無負債
無負債(最後清還所有債務)     









第二階段 (Part II)
05年尾乜太又發覺《滙豐》的股價落後於股值(見表A1),決定再以孖展買入1200股,借貸約為15萬,孖展比率是47%(借貸除資產x 100% = 15/ 2545x巿價 x 100%)
股票行提供的孖展額是75%,以乜太個案而言,《滙豐》跌破$80就要補孖展。
若真的跌破$80,乜太預備補充一些款額,或出售一手《滙豐》,但她相信這個機會很微。
乜太不準備再每月清還孖展借貸,她已供了5年,感到有點疲倦,
她希望利用股票的自然增長,以戰養戰,最後得到所有股份,
05年孖展的息率大升,由4.5%升至8%,但她並不擔心,因為
她對《滙豐》有信心,股息將會不斷增長,而孖展利率只是波動,非增長。
叧方面,乜太有2545股《滙豐》收息,只需為1200股付息,
所以乜太相信即使停止投放資金,資產也可自我增值及減債,最後乜太完全擁有所有股份
其間若有需要一些金錢,她還可以從孖展戶口中提取應急,而無逼切出售股票
待續註:為方便計算,股票價格只取年終巿價為參考,相信「粗略的正確比精確的錯誤重要」。註 : 資料源自一位很受歡迎的投資Blog http://hk.myblog.yahoo.com/banking_mind

*****************
拿, 放諸現在, 乜太應該好唔掂, 因2008 年滙豐曾見3X 蚊, 乜太孖展已死, 千年道行一朝喪, 應該呢一刻收埋息都未夠番家鄉.

當年見到呢篇文, 如獲至寶. 而家大左睇番, 原來都係果D 招.

1. 借貸買入資產.

2. 利用利息收入去支付貸款部份利息, 甚至貸款部份, 以戰養戰.

3. 若利率上升, 因本身持有資產非借貸部份, 可以拎埋出黎COVER 利息. 表面不敗

4. 若股價大跌, 可出售部份倉位減低貨款金額保命.

呢種方法, 可放諸好多產品, 不止股票市場.

呢幾年個班細價樓收租初哥, 咪做緊同一樣0既野!?

1. 借貸, 因價格上升, 按上按再買 (股票按五成, 最盡已可借一倍. 數學GS 的問題)

2. 利用租金收入去COVER 還款部份, 以戰養戰. 現金流可以自用, 又可以還貸款部份.

3. 若利率上升, 加租, 又或有人講加息好少

4. 若樓價大跌, 賣樓套現? 用人工死頂?

其實兩者方法相同, 睇唔到有大智慧0既地方, 最大分別係資產升跌.
所謂指數, 升得快定慢大家有眼睇, 食完一水又一水係股定樓做到? 唔知點解會有人見樓價指數升得一點多D 就熱烈地彈琴....唔係下話??

當你兩球買入而家升到三百五十萬, 一球貸款, 月租一萬, 唔還息唔交費, 都要100 個月先還完, 係唔係慢左D? (仲係由兩球收幾千蚊租開始計喎), 如果樓價繼續升到六球, 咁就梗係WIN 哂, 不過, 又係資產升值咋喎! 關收租咩事?

牛皮到咁, 二十年貸款(快極都要十年八年啦下話?), 安心持有? 是否自欺欺人??? 你唔記得乜太故事嗎? 銀行三十年貸款條數唔會死錯人0既....

其實我已經以戰養戰左好幾年...幾年就還哂, 不用交管理費差餉地租經紀佣...
Related Posts Plugin for WordPress, Blogger...