2015年2月1日 星期日

我的財富累積大道(上)

哈哈, 我估BLOG 友之中, 最無秘密係我了!

除左我0既小生意唔講得之外, 基本上都無乜起唔起低.

近日開始埋首放部廣告機係我鋪頭, 但係用黎宣傳女主人鋪頭, 我終極目標係食軟飯, 唔知得唔得呢?

見止凡兄比人質問資金來源, 我又覺得, 加按層樓都係財技丫, 唔怕講喎!! 好過按完出黎繼續買個D 濕九細價樓收租丫, 至少唔會影響其他有需要住屋企市民先.

解開財富之路, 同時亦會透露自己資金來源

我記得, 我入U 個陣, 都有一萬幾千儲蓄0既, 不過係大學三年間同埋畢業又失業個一輪洗哂了...

<當年大學 LOCKER GH0286>


畢業之後(2001), 失業一輪, 做左半年野左右, 月光族....得個九千蚊, 比五千家用, 自己洗四千,仲要拍拖, 邊夠?

半年後(2002)去左打埋D 無謂工, 大約就好似賣翻版碟D 道友咁, 若遇上查牌, 就要出黎"頂罪", 只能夠算係搵唔到工做住先. 最記得間野貴為上市公司, 成日遲成個月至出糧, 農曆年得番50 蚊, 要捱4 蚊兩個包, 好少好10 蚊食個飯盒.

不過, 以打工黎講, 呢份野最開心有傾有講無壓力! 新年可以過萬, 以科網爆破期間計算係咁. 呢份野, 一早知道2002 年三月後會無得做, 已提早搵定工...

再之後, 我好好命去左呢D 藍海公司度打工...已有一萬, 當時可能因為失戀 (就係果個水手服名女校女生), 無咩好做咪搵下錢....

結果去左好多唔同0既紅海都做PART TIME....雖然只係一般公司, 因為我有特殊長處, 幾乎只要去IN 佢就必請...

做左一年幾, 我估平均每月都近二萬, 已經好過當年同期畢業同學了...因為藍海生意關係, 其後沙士對我無影響, 無失業...呢份亦都係我呢世人打得最耐0既工! 之後既日子已不再是打工仔了.

再之後番左去讀書(2004), 結果辭左工(我就係咁癲)! 日頭讀書期間, 放學番去朋友度打工搵錢(自僱再分錢), 當時佢個OFFICE 做唔掂, 我加入幫佢頂下租, 又指導下我朋友點做呢行...朋友? 其實係上兩份工賣翻版個陣識0既!

讀完書, 我去左做"我的志願"(2005-2006)! 整整一年! 呢D 機會可一不可再, 我覺得我命水最好就係自己想做0既工作, 係我畢業頭幾年就做到, 亦做過了....

同時, 係2005 年, 我儲到自己第一個十萬...真係靠儲! 如果你果陣已咁勁買樓1 樓2 收租, 我恭喜你! 無計, 果陣我仲好細...以搵錢計, 我已經完敗我所有專業人士同學, 如你同我同年, 你真係叻仔喎! (如你大過我...哈哈...)

2006, 玩過就算, 放棄"我的志願", 番番去賣老翻拍檔度做, 做大佢...咁0岩適逢政府政策改變, 連我拍檔都搵多左錢(一向我搵得多過佢, 雖然佢係OWNER...)

全職澳牛事業就係果陣開始, 不過我其實好HEA 做...如無記錯, 2006 果陣開頭大約三萬蚊一個月, 時多時少...

由十萬至一百萬, 用左幾多時間?

2007 年, 年頭識到女主人, 無幾耐就夠一百萬了. (同年的, 2007 年你有幾多資產?) 點解咁快? 因為搵錢多左, 而我由2005 年開始就買下股票, 短炒獲少利就走...雖然無搵過咩大錢, 我估有一兩成收入係股票帶黎0既...




2007 年中, 走去買樓! (2009 賣左, 因太殘唔想住, 如果而家先賣, 賬面獲利二百幾個...哈哈, 不過之後0既事邊個估到?) 聽我D 同學講, 我似乎係第一個做三成按又唔駛屋企幫手的...

2007 年真多事, 年中, 比晴朗的一天出發訪問(可惜搵唔番錄音), 我亦無聽過內容係乜....只係我中學老師同我講聽到我把聲, 佢又知道我0既澳牛生意.

2007 年, 大約月入五六萬(我記得我係個訪問度講過)! 呢個數, 我估而家好多同年0既都未做到. 所以我幾不屑身邊朋友而家搵多幾個錢就講本土主義, 對任何事剪梯落石, 又或串D 後生仔唔上進0既人, 其實佢地以前都係咁! 講搵到錢0既感覺, 我早過佢地好多...何必自覺高人一等?

2009年三月, 匯控跌到33, 我身家都急跌, 期權CALL 按金, 戶幾乎唔夠錢. 淨資產得番五十幾萬左右! 哈哈!





當然好快就回氣, 好彩捱得過! 同時亦賣左樓改轉租樓.

2009 年年尾, 女主人係我0既鼓勵之下, 終於開始佢0既小生意. 唔駛三個月回本, 同時亦肯定唔駛買番樓, 因為殘0既唔想買, 新0既不如租! (資產上升速度驚人) 當然, 如果當日炒埋一份 (咪鬼收租咁ON9), 身家真係翻多幾翻. 網上哂命以為財務半自由個班收租初哥, 包括阿隊長, 都應該係係呢一刻重注, 因為2003 佢未出毛, 2007 身無分文...

2010 至2011 年, 我D 心機都係花係佢鋪頭, 我0既工作其實好穩定每月有七八萬咁上下...

2011 年, 我們結婚了!






之後, 係佢大住個肚期間, 不停比媒體訪問, 結果上親鏡都成個包咁...哈哈!!



同年五月, 我發燒發左一個月, 出院後更做錯投資決定(女主人有份出錢, 不過蝕就等我食啦!)

再之後, 就係惡夢0既開始....

TO BE CONTINUE...(悶死未?)

我的財富累積大道(下)

44 則留言:

  1. 回覆
    1. 哈哈,等我有心機下集plot graph, 都幾起伏架。。。

      刪除
  2. 引人入勝的故事。

    資金來源是加按與否都不是重點,但當然也是財技的一種,在合適的渠道討論吧。

    回覆刪除
    回覆
    1. 先要有樓, 升咗值才能加按, 不是嗎?

      刪除
    2. 沒有樓,就不能財務自由,這就是Lisa姐的概念嗎?可是這不是我的概念,其實方法多的是,不妨開放一點看待,不認同也無需太執著。

      刪除
    3. 呢十年, 有樓對財務自由幫助好大 !

      刪除
    4. 對,但好多收租初哥只係五年前持貨就扮專家。
      仲叫人而家繼續買。有人要焗買結果畢生積蓄買件又細又老阿婆樓住十幾年,呢種財富轉移,真係小心收尾個幾年。

      刪除
    5. 同意,買樓實在不急於一時,買了又細又殘的樓,會後悔不已的。

      刪除
    6. 非常同意。
      一個高位一個低位。邊樣值搏率高d ?

      刪除
    7. 銀行都話無問題肯借俾佢地的話, 當局者迷喎:)

      刪除
  3. 回覆
    1. 已寫好八九成。
      預計星期一半夜publish.

      我有儲文習慣,大把貨。哈哈

      刪除
  4. 過幾年你自己再睇返,會覺得好有趣。

    回覆刪除
    回覆
    1. 我有寫網誌習慣,睇番以前講小生意,真係得啖笑。

      刪除
  5. 申利, 我在香港無細價樓, 在大陸就有, 因為是自家鄉村樓, 會留俾仔女 !

    回覆刪除
    回覆
    1. Lisa 你是前輩,當然唔駛買呢d 表面本小利大既資產。
      若有一日樓或股價下跌,都係細價跌得勁好多。
      查下過往事件,股樓一樣。
      同樣,有錢人死唔去,得少少錢又借得盡個d, 先要死到要燒炭。

      刪除
  6. 用什麼方法也好,最緊要適合自己性格,多謝70兄分享,期待續集^^

    回覆刪除
    回覆
    1. 謝謝支持,不過覺得適合自己係咪又係適合自己? 若回報低,要鬥長命拉高回報既資產,係咪比短炒好? 其實又唔一定。

      刪除
    2. 係。這又是另一問題,我也尋找中^^

      刪除
  7. 女主人係咪有錢女?

    另外,我好鐘意睇人地成功背後奮鬥史
    好有趣

    回覆刪除
    回覆
    1. 女主人係劏房同埋公屋長大, 識我個陣零資產, 仲有兩萬幾蚊卡數....
      男主人就同好多人一樣, 公屋長大, 去機鋪, 玩四驅車, 打超任, 煲蠟....

      仲有樓下女主人應該係覆你的, 佢人豬覆錯位.

      刪除
  8. 哈哈,我只係公屋長大普通女仔一個。

    回覆刪除
  9. haha, blog主邊間大學 ??

    回覆刪除
    回覆
    1. 我讀過三間大學(讀完又讀, 否則藍海生意額更多)
      你估下邊間?

      刪除
  10. 好想詳細知道07年點樣快速由十萬升上一百萬
    最仲意睇成功故事:)

    回覆刪除
    回覆
    1. 個九十萬, 我估當時收入都五六萬一個月, 無負擔下儲唔少.
      仲有我有買當時內銀, 中人壽, 中國遠洋, 中信泰富, 利豐.....(如持有到而家, 好多都死哂.)

      刪除
  11. 睇男主人的分享,賺錢的方法各式各樣,最重要是找到適合自己的,同埋知道自己做緊咩,同最緊要計過條數。

    期待看下一集,多謝男主人的分享,很少看到有記錄文章跨越這麼長的時間。希望有機會我都可以寫番篇,但願到時唔係寫 "我的財富敗家大道",哈哈。

    回覆刪除
    回覆
    1. 你唔會敗家啦.
      年紀大. 條路咪長, 哈哈. 你後生!

      刪除
  12. 好好睇,忍唔住比個贊你。每個人背後都有個精彩故事,但有一樣野就極相同,包括我也一樣,
    就係遇到及成功娶到個好老婆後,成就更高。

    回覆刪除
    回覆
    1. 唔怪得我成就咁低la

      刪除
    2. 對, 有另一半支持, 會順利D, 同埋有動力D.
      相反, 一條佬, 做事又無後顧之憂, 各有各好.

      刪除
  13. 難得少年窮係唔錯既經歷,先可以有今天既你
    好似今天父母俾首期幫子女買樓,完全無經歷自己儲首期既努力部署,它日好易俾樓市一招KO
    期待下集

    回覆刪除
    回覆
    1. 下集已七七八八. 謝謝支持.
      要數窮, 真係個個BLOG 友都有自己0既窮法`~~

      刪除
  14. 多謝分享,我好鐘意看"歷史",可以從中學到好多野。

    回覆刪除
  15. 精彩!多謝分享,期待下集!
    我也很喜歡看成功人士的奮鬥史!總帶來一種正面激勵。
    雖說要成功,除了人和,還需要天時地利,但從男主人的分享中,看到未雨綢繆的重要性。
    不禁問自己一句「當機會來臨時,我有能力把握嗎?」

    回覆刪除
    回覆
    1. 我唔係成功人士, 係下集會提到點解要寫呢D 野. 你睇我身家上上落落, 呢D 就係股票人0既頓悟.
      無機會, 咪創造機會....

      刪除
  16. 我都係GH core做大本營既同學,莫非我們是同行?哈哈

    回覆刪除
    回覆
    1. 放心, 肯定唔係.
      GH core 只能餓你唔死...同埋你太年輕了. 應該在任何時空我地都無相遇過.
      哈哈.

      刪除
    2. 哈哈…等我重睇返你的文會唔會搵到珠絲馬跡。whatever,睇左你d blog 好認同你的價值觀,希望日後有機會可以跟你學到更多。

      刪除
    3. 唔好咁講,我只求別人不要踩我踩過的屎,已經好好了。
      我都聽過GABRIEL講野0既,當年佢應該算係小薯仔,現在長大了。

      刪除

各位每個留言,係我繼續9UP動力,必覆。

Related Posts Plugin for WordPress, Blogger...