小弟在DISCUSS 並無出文
你回應緊0既,都係一個有心引你派膠0既人,並非小弟。
若有人以為我係DISCUSS 出文引HATER, 是否太小學雞?
小朋友, 暑期放完好耐了. 好好努力上班吧...

2015年12月29日 星期二

了解我的初戀 八千里路雲和月

為免各位錯失左上一篇好文(至少係我咁多9UP入面叫有D 新意), 可按下LINK 追番







UM...呢篇又係想寫好耐,終於的起心肝 & 鼓起勇氣打埋出黎, 整理一下。

剛從惡劣細菌感染0既我死而復生(無咁誇),加上之前兩位朋友離世,真心講句,價值觀有點改變。正因生命有限,收租呢D陰質野,做左真係小心D老來出事。(阿大嬸,不用每個地方留言都提起吧!?咁睇得起我呀!)

呢個系列講女,此文必然有續集,因為,從身邊擦過的人,不止一個吧。

其實我已經好耐無聽新歌,呢首竟然常LOOP!佢咁簡單又無乜難度,直頭可以買支咪番黎自己唱番一個版本添呀!


感情0既事,真係要講唔知由邊度講起。女主人不要亂想,睇哂先講!

這個人人都有一個0既初戀,發生在大學時段,當然,係同學!

鐘意0既原因,我估無論我同佢而家諗番,都唔知點解。或許佢要一個人關心下,而我又想拍下拖。

如果要我VS佢,其實都幾唔同,但係又不是COMPLEMENTARY互補個種。

我,雞校;佢,名女校
我,公屋仔;佢,居屋0者
我,獨子;佢,上有家姐下有細佬
我,成績好多A;佢,只少我一個A!
我,好多野講;佢,好靜
我,脾氣外露;佢,收埋到有情緒病
我,唔希望讀乜做乜;佢,入得黎梗係做番本行。

唯一相同0既,可能係大家都好食得辣,同埋也鐘意貓。

讀書個陣,梗係番學放學見,成為習慣。我估同中學時代拍拖都係咁上下。(我中學集中打機打波睇漫讀書!)

分歧都係出現係畢業之後。

順理成章,因為我地一畢業就可以執業,佢做左佢0既專業人士。

我轉過下工,最後打左一份咩工?

我以前用茶記炒旦黎形容我工作(可按此我的藍海一: 我的生意像澳牛
),我一出黎,就好似走去做個待應咁。講比人聽,人地都覺得好普通(我無意眨低侍應,只係用黎比較有專業工作唔去做,做D大部份人都做到0既野)

比起而家炒旦,市場上真沒幾人,話唔埋獨步此區。(但有多士,牛扒,所以我唔係咁巴閉架咋)

當然,同樣都係佢同學又係我同學果班三姑六婆,梗係有野講,其實佢地唔明白,我都仲係度搵緊我想做D乜。佢D中學同學?哈哈。。。佢成績只係一般,佢D中學同學出路更好,無乜往來的。

之後,係我炒炒下旦0既一日,發現搵唔到佢,一個星期之後,佢同我講分手了。當日打擊梗係大啦,雖然未到天昏地暗,至少,我覺得佢未等到,亦未明白我想追尋什麼。

分手原因?

當時我分別係三個地方炒旦,加埋人工高過佢。。。BY THE WAY,唔一定係錢,一定唔係錢ONLY。當時可能諗埋一邊,包括我阿媽在內,以為嫌我窮,但現在人大了,明白多了,一定唔係錢ONLY。

這個領悟,卻用了足足十幾年時間(咁我又唔會不停去諗下話。。。)

不過,到呢一刻,我依然覺得分手係好事,因為走到果一段,真係唔係我同佢講,就係佢同我講。雖然大家原因未必一樣,至少了解分開好過繼續糜爛。

結果,我更加努力去炒旦。哈哈!為啖氣定係為錢?我記得半夜三更我仲預備緊炒旦的東西,明明客人好少,我炒足幾年份量。夜媽媽仲阻住我臨老做保安0既老豆訓覺。

結果,頭六七年工作,全靠呢D炒旦,令發圍後工作量大減,繼而當市場出現變化時,我幾乎係最早成功變陣。

之後,我去左讀PART-TIME,雖對炒旦無幫助,但付6地而家十分用得著某D東西!

所以,如果有邊個唔上進,比條女佢溝下再叫條女飛佢,可能激發到佢去努力去上進!

其實佢係咪激勵左我?非也,其實唔夠一個月,我已經有另一個女朋友(外傳1)。同埋,有個暗暗地戀左我幾年0既師妹好開心,當然我無接受佢(外傳2)。

其實,佢唔知我想點0者,而我0既脾氣同唔穩定0既情緒,都係令佢對生活不安以及能力0既質疑。無計,成年人世界,要成熟,要扮專業扮在行。

我實在做唔到!所以我先要去做單人匹馬都做到0既工作!有信念有熱誠,遠比扮成熟重要,人生就係要輕鬆簡單做番自己。

也講講,當年科網沙士開始炒旦,我有如此社交殘障都可以有如此小成(UP TO NOW 都叫做年入兩球0既。。。)其實只要年青一輩你有熱誠,創業係一件美事,衰左咪衰左,至少試過!後生龜縮留番老時馬後炮,同巴士阿伯有咩分別?

講番佢,當然而家大家都結左婚,佢應該唔生小朋友喇卦。我地已經完全無聯絡(當然!),對上一次已經係2005年食過一次飯,亦係分手後唯一一次見面。

言談間亦有講及當初分手理由,弦外之音,我足足花了十年才有少少頓悟!現在,只存一點感謝,感謝令我渡過非我所願0既大學專業訓練三年吧。

拍拖三年間,佢無令我改變(真係只有女主人先改到我少少,我固執亦很麻煩!),我亦無為佢努力過什麼。唯一只有,大家相處0既日子。

或許,連最基本互相支持都無,因為根本無機會,當時我只係窮,並無什麼難題,正因為窮才可以輸可以試!

有時,我什至會放棄想去支持我0既人(外傳3)。

如果要我只係要搵一個能夠幫我供樓有穩定職業0既人,真係大把(外傳4)。

現時為止,能令我覺得支持得正確的,就係我老婆。BLOG頂張圖D字各位有冇睇過?

其實,我只要三個字

"陪我癲"

你地找到這一位未?

註:外傳只是講笑,再寫會比人打!不過,如對某外傳有興趣,可留言。

2015年12月27日 星期日

租金樓價進入惡性循環

呢篇應該一個月前出,不過一黎卦住砌高達,二黎未算太肯定,唔敢亂出文。

今日完成左

HG 1/144 G-SELF REFLECTOR PACK
用左MR HOBBY 珍珠色 (XC01, XC02, XC03, XC04, XC05, XC06) 不過影相唔明顯!





收租者建議回避,因呢d 都係我個人意見,絕無討論餘地,亦無興趣去辯解。

時間証明一切,又睇下我係咪老千。如睇錯,我都係雜魚一名,你想我點?

以下全為男主人觀察所得,全部係中原網頁睇。係直係假盤唔太重要。
話說,某區屋苑分四個grade

A 地鐵上蓋,新新地
B 無咁新,但用料靚,地點一般算就腳
C 地點同B 差唔多,但舊d 同質素爭d, 勝左三房單位夠細。建築 6xx 有套廁
D 老過男主人,又細又殘,唯一好處係平。

居屋村屋不計入內,租買成交都少,選擇亦少。

因A 類兩個屋苑都唔養貓狗,我未住過。但BCD 都住過。租樓好處之一,真係可睇送食飯,唔鐘意就搬。

以前,樓價上升軌賣家主導時,D 盤同C盤爭三千蚊,同B盤又再爭三兩千,同A盤又再爭多三四千。

即最高到最低爭成皮野。

如果收入中等家庭,例如搵六萬蚊,要再每月拎多5% 薪水出黎upgrade 可能難少少,結果焗住租D, C 盤,供求之下,當然令濕九細價樓,不論租定賣價節節上升。

上個月開始,變化出現了。

D 盤價好硬,可能做完大維修班傻仔以為增左值,其實天價大維修後變左舊居屋咁樣,只係比人過左一棟。

但C 盤有大量租盤湧現,而部份換樓人士亦唔介意平租,結果租盤一路減價,同D 盤相差一千。由三千spread 縮到一千。

重點,C 盤單位量係D 盤兩倍或以上,估計唔止。

B 盤量非常少,自住者眾,因交通一般,打工仔唔適合,但環境全區最好。結果久未見減價租/賣盤。

A 盤已經殺到落黎!租金差得番千幾二千蚊。

留意,A C 盤租金上有非常明顯跌幅。

即如果有多一千budget, 已可唔租D 去租C, 講明少少,如剛完一年死約,相同租金已可upgrade...

由C 去B , 仲有兩千幾差距。

B 去A? 千幾蚊,少於租金一成。不過正常唔會轉。

如手頭鬆動,又講到價,C 去A 都幾正。

D,變左賣剩蔗。。。賠了夫大又折兵。

最高同最低, 由之前一萬到而家爭六千!如人工不會變經濟不會差,只是樓價租金打回原形,會如何?之前樓價跑嬴人工,而家跑番番家鄉都好正常啊。咪天真到要人人陪你死至得架~~~!

男主人住B 盤,只要等待第一個減價盤便可以了,因交通不便,如差唔多價錢番工一族只會揀A住。B 一向少人問。

B 盤三房單位都係補多三四千,已有幾個放租,仲不停減緊無人理。即使full pay,管理費一個月都二千幾,差餉地租都未計。

這現象不是需求少左,只係當差價收窄,租戶或買家選擇多左,成為主導,一改之前焗買焗租的生態了。

其實,也應該多謝一下之前忍唔住手買左自住樓的人,令租屋需求下降。
同時,亦代上一輩多謝年青有為收租仔,無你地接佢地火棒幫佢套現的話,佢地即使租唔出,防守力都好強。

而家即使未跌到買入價,只要租約一完,現金流就會停。

刻下男女主人加埋cash only 已可full pay 屋苑D,買入屋苑B 亦毫無難度。

不過,樓市cycle 咁長,不用急於求死。

最後,近排去左OCEAN PARK,食野貴過入場,頂佢丫。



另一張,攝於九龍站。


女主人話,G Self Reflector Pack 好似中左毒, 其實係佢吸左敵人光束, 再放番出去攻擊敵人!



你估呢幾年先加入0既收租仔吸左0既租金可以頂幾耐? 同樣, 現在剩番未入市0既, 係時候可以係租金上討價了.

當刻下租金收入已經必然少過每月供款加洗費,當租金一跌,無人買黎收租,價又跌;無人租,租又跌。如你無租客,真係慢慢供完再大維修慢慢捱了。

2015年12月21日 星期一

我可以唔撈嗎 12

玩野之作,經典重溫!
我可以唔撈嗎 1
我可以唔撈嗎 2
我可以唔撈嗎 3
我可以唔撈嗎 4
我可以唔撈嗎 5
我可以唔撈嗎 6
我可以唔撈嗎 7
我可以唔撈嗎 8
我可以唔撈嗎 9
我可以唔撈嗎 10
我可以唔撈嗎 11

再唔UPDATE, 大家就走哂了!

朋友0既模型鋪, 係深水步黃竹街15號! 上圖係小弟砌同噴0既 rg 紅迷! 試下話你係呢件模型0既blog 友, 唔知有冇得平架!


不知不覺已經12 集, 之前仲講笑話100 集都未退休, 其實計番每個幾月先一篇0既速度, 應該四十集內就會完結.

先update 下近況, 呢排收入少左, 係季度正常現像, 現金水約156萬, 老婆個邊應該有兩球卦.

我工作就已經半停狀態, 可以同小朋友去玩下.

晨早去冒險樂園玩, 真係包左場!

老婆生意比上年差, 不過都還可以. 近排有明星幫襯!

另, 老婆愛上藍寶石, 又戒子又手鍊, 再係咁當然唔得...太燒錢了吧!

近期財經最大單新聞, 梗係加息! 對股市好定壞都未知, 不過我借錢都會卻步LAW...我借已經係1.88% (分一年還), 借幾十年個D 又敢唔敢入市?

不論價定租, 都已進入下跌軌, 都係果句, 前輩話齋, 來自供求關係. 有能力自住0既已經買左, 什至高追左; 無能力0既又等得. 投資收租? 2000 年買藍灣半島, 而家收租都係得六厘! (睇新聞, 唔Q知佢點計)

股市? 哈哈, 好古怪, 早幾日有跌到射程, 加完息又上番去射程外了....

反正, 股市CYCLE 好短, 時時都會有機會.

樓市, CYCLE 咁長, 下降軌有排都未完....

其實, 我爭三百二十萬至三百五十萬就可以財務自由, 心水清0既你, 老婆比哂佢份身家我, 咁就攪掂了.

不過唔會咁心急, 手持現金, 股樓市之間都可有準備.

你有高槓桿的話, 而家等同比人綁住打. 當你要自己出錢還貸款就知味道了.

右邊原是綠色, 我改左做卡碧尼配色! 都算ok 卦.

呼籲一下, 小弟用17APP 直播, USERNAME 同blog 一樣, hk70s, 歡迎直播期間吹水. 其實我係直播砌模型而已.

另, 近日去過d 小朋友模型聚會, 真係好耐無咁毒過. 不過有人利用砌模搵食就幾好笑0既, 有機會分享下. 以下係我聚會作品.

hg g-self assault pack


各位0既留言係我繼續九UP0既動力!
小弟生活鎖事或股票期權小變動,會先係FACEBOOK分享,再行文。按此LIKE我FB PAGE


2015年12月14日 星期一

女主人入市!朋友模型鋪開張!

有日半夢半醒,女主人同我講,我好耐無UPDATE 過網誌。

右邊高達神物(JUMBO GRADE ZETA GUNDAM MSZ-006),$2500買到,仲好鬼新淨,唔捨得拆。左邊老翻RX78,女主人送。



哈哈,真係砌到天昏地暗。。。

近排做乜?將以前齋砌無上油0既模型再上油!下圖左邊翻新,下次到右邊。(GN-007 GN-008)


新個D? 慢慢砌。

呢期都係每朝同晚睇一次股價,慢慢跌,好有秩序喎!!

女主人朝朝SET 價都買唔到。。。其實佢SET 低少少,但成日都唔到價。 即係點? 每日股價係固定水平游走,第二日先跌。。。日復日再一輪。

好耐(兩年)無食過牛陣,佢改左食法喎!

今日佢買到喎!即係即日插得深左。其後又上番去。。。

因為股價已完全進入射程範圍,促使我又睇下,策略有三

1借錢全買,三百幾萬貨 (1A 為分一年還,每期二十九萬;1B為分兩年還,每期十五萬)

2部份實貨,借二百萬左右(2A 一年還每期十六七萬;1B兩年還每年八萬幾)

3先做OUT OF MONEY OPTION,袋權金,若再跌接貨,升左我就錯失機會了。(接貨用0既錢,在PLAN 1及2再選)

女主人話,做即月!哈哈,得幾萬蚊承受現在風險,實屬不智。

今個星期二三有議息結果,到時再算。

適當時候,我就會蒲頭講股票。我真係唔係財經BLOG啊!

以下係小弟模型友開0既模型鋪,價錢堅係抵,嚇到深水步精品同福利都減價迎戰!話唔埋,下星期會見到小弟作品係度。


我估好多人小時候夢想, 都係想開GAME 鋪, 卡鋪, 模型鋪. 人生去到某D 位, 自然會不求太多錢銀東西, 結果價格還算可以. 其實別家減價, 人人受惠!



下一隻,將佢改做卡碧尼配色!

2015年12月4日 星期五

2015年12月1日 星期二

人生遊戲二 魚與熊掌

又無寫網好耐, 原因有二

1. 又係砌高達, 因相繼兩位朋友離開左, 我唔想我砌唔哂就留低遺憾, 所以趕工完成, 亦都半正式完成左!

題外話, 好多高達模型迷都儲埋一盒盒未砌0既模型, 我認為未砌都唔係自己0既! 佢地話, 細個無錢有時間, 大個有錢無時間. 我認為, 事在人為. 有問題就試下克服佢!! 小朋友怕天拿水味, 可用水性AV油! 或者好似我咁, 番公司噴!


2. 呢排租金變化好得意, 想寫一篇, 無奈構思完發現好長篇, 半夜三更已經好眼訓唔想寫, 就咁日復日過去左.

最後, 我唔想荒廢左呢度, 雖然唔係多人睇, 但學收租仔話齋, 救得一個得一個.

本人持倉內銀, 等跌到PK 再入市, 現價 $5.38, 真係未到價....

好多內地銀粉重倉內銀, 真係十分危險!! 就似匯豐, 中移, 中人壽都曾幾何時比人追一樣!

點解十分危險? 因為多人跟先有肥肉可食, 其實未必同內銀風險有關, 到時股價要跌, 欲加之罪, 何患無詞?

好喇, 再強調一下, 本人BLOG 並非投資BLOG...不要問我股票...我寫係度都係分享一下感受

生活小事, 今次其實唔係小事.
1. 女主人加鋪租, 加左10%, 預計之內, 反正唔想搬鋪, 又留下係度啦.
2. 男主人商業寬頻由2XX加到千幾蚊. 當然唔會比佢強搶, 轉PCCW! 咪又係二百幾, 仲由2M 升到100M! 咪以為要硬食!
3. 男主人好似比人攪...不過應該好小事. 若真係好嚴重, 提早退休, YEAH~ 計埋股息, 我都係爭幾十萬就退得. 提早退就慳D. (其實係減產, 由一個月二十萬變做一個月十二萬.)

最後, 附圖:



有錢女想要愛, 無錢女想要錢....你睇我好我睇你好0者?

外國人都鐘意睇TVB 喎! 一定要等價交換? 一定係魚與熊掌不可兩得?

其實有好多事情, 係兩樣都可得! D 人其中一樣失敗, 咪用呢幅圖黎安慰自己打下飛機.

又有錢又有愛, 真係大把人在.

有錢, 變得有時間, 可以更留意到身邊0既人!

有愛, 對事業一樣可以有熱情, 就會做得好, 收入自然高! 升職都竹升你先!

只能夠咁講, 好多人有左錢, 個價值觀變左, 個人自大左, 結果唔記得當初點樣由無變有...

盡快自由, 最大目的係希望可以陪下小朋友, 教下佢地. 同時又睇下自己鐘意做D 乜.



係度問下各位, 有冇LIVE STREAM APP 推介? DOWNLOAD 過17 APP, 發現實在唔係女無人入黎睇....哈哈哈!

STREAM 乜? 可能砌下模型卦!


三人組 PLAYGROUP!!! 紙高達頭未砌對角上去, 係咪好得呢?

後記...呢排食完飯成日食埋佢. 簡直係邪惡0既根源!


如果有D 咩想睇想聽, 不妨留言丫!
Related Posts Plugin for WordPress, Blogger...