2015年1月28日 星期三

香港教育系列 - BIG FISH LITTLE POND

(我儲左好多文都排唔切出....點算??)

男主人有半桶 EDU PSY 底, 雖然皮毛, 但希望同各位分享下.

原因? 皆因感覺教育一事, 同財務一事相近.

知道的人多, 明白的人少, 應用的人更少!!

學過呢D (多數係老師), 仲識得講番出黎0既更少....通常佢地都變哂財演, 為左自己利益著想.

小弟師承中大某副校長, 當年佢仲係一個PROFESSOR。

未見其人, 已有同學告知:

"佢講野STYLE同你一樣!"
"佢成日想做你個行!"(我個行LINK按此)
"佢好串!"
(佢係我18歲以後第三位啟蒙,遇到佢個陣我已經25、6歲了!)

結果,佔中期間,佢同校長(沈祖堯)兩個對佔中學生黑白分明0既COMMENT,校長乃熱情關愛,佢就真係以心理學解釋。當然後者比人鬧得好慘。。。講事實係會比人鬧,細細個已經明白。

粗俗D講句,真係"笑佢ON9又驚佢嬲",所以匿埋笑就夠了。

一見其真人,果真好似。到今日,佢都無入到我果行!佢的確好串,因為箇中理論部份的確難明,明就覺得好好玩。

咩係BIG FISH LITTLE POND




即係咁,不如講男主人成長經歷:

男主人自細記性好讀書都OK,只要肯讀就可以好好成績。

升中後,升左一間區內第二好0既中學,無出到區外讀超BAND1學校。

當然,D同學都有勁人,但我就從來未跌出過五名內,年年精英班。

係我前面,幾乎全部女仔,因為女仔早熟之餘,佢地亦較專心無乜野玩。

高中後,人大左,幾乎無敵手,第一無難度。

講番正題,係呢D鋪鋪第一0既環境下,不難明白點解男主人咁自信(自負)又咁串,係咪?當然,個人理念都係:"人生應該無乜難題,只要有問題,就會有解決方法!"

那個少男不溝女?最大難題就係溝女。。。書中自有顏魚肉(如玉!)係真0既!總有D師妹傻傻地傾慕下你。。。

好,升到大學,讀左某校神科(又唔係好神,中等難度啦)

入面好多成績考得一般(其實唔差,係佢D同學勁)0既名校生!男主人大開眼界了!!!

有人一個人借四本一樣0既書!(估下點解!?)有人會無啦啦害你,但平日好老友。。。

同時,男主人的初戀出現了,佢係某水手服名女校畢業,成績只少男主人一個A。

我唔係想講拍拖相處,只係想講,佢份人無乜自信,因為佢係校中成績唔算好個D,自然由細到大無乜人理佢,結果存在感低SELF-CONCEPT又唔好。。。

到今日睇番,呢班大學同學入面,好多都只係過得好平庸以金錢計,香港地係咁膚淺);真正搵到錢又發揮興趣個D,都係當年雞雞中學上黎個D!點解?因為我地信自己多過信份工。

即使唔睇結果,我地呢D"雞校勁人"0既讀書生涯係過得比"勁校雞人"開心好多。

即使大家其實成績差唔多,出黎對事物0既價觀都好唔同。

有睇過網誌0既都可能留意到,男主人打從一畢業就放棄自己專業,當年女朋友梗係唔鐘意,其他同學都背後講緊我0既工作可以有咩"前途",當時我認為:"有一件我鐘意0既工作,遠比咁快將自己定性重要"

最緊要,係對自己個份自信!千金難買,如你一生人從未嬴過一次,唔明白個種快感,你未必有咁大動力去做你想做0既事。

如只想每次不包尾,就只能成為日日怕老闆又期待快D打風0既一般打工仔。。。

又係個句,最安全0既選擇先係最危險最差0既選擇!



大學個陣,對付讀書勁0既同學,我真係無符,因為佢地真係勁!結果我靠咩拉GRADE? 哈哈。。。。

我由細到大,對一大班人演說有專長,毫不怯場仲控制全場氣氛,話知你十幾人定係成千人(我係唔識同陌生人單獨溝通),由YR1到YR3畢業,我全部有PRESENTATION0既科目都係A。。。哈哈哈哈~~~

所以,我個囡,簡單讀番普通學校就可以了,真係讀唔到咪出國,讀得到就係我0既福氣。至於學習是否需要愉快?英美等國家已經放棄左廿年前個D愉快學習啦,只係有香港家長仲傻傻地以為係潮流咋!點解?因為國民競爭力近十年大幅下降。。。

同樣大小的魚,放入LITTLE POND 好定係BIG POND 好?

你話呢?最好梗係做大缸最大個條魚,但係世事會唔會咁美好先?

<圖中係聖誕節影0既, 佢個姣妹好識擺POSE!>


P.S. 估唔到能夠咁好興致寫落去, 大家0既留言同訂閱, 就係小弟0既動力~~~!!

2015年1月25日 星期日

我可以唔撈嗎 7

又係個句, 寫到100 都未退休!

玩野之作,經典重溫!
我可以唔撈嗎 1
我可以唔撈嗎 2
我可以唔撈嗎 3
我可以唔撈嗎 4
我可以唔撈嗎 5
我可以唔撈嗎 6
*****

男主人嘗試每個星期五都退休預演 。

昨日星期四,深水步賣GAME個哥哥仔SEND黎話番左貨!! 番左咩?就係SONY PLAYSTATION 3D DISAPLY!!
<SPEC LINK 按此>

見過實物真係好靚!再加上男主人而家只係用電腦MON打機(家中大電視已被小朋友攻陷!),極需要個打機MON。

幾錢?真係好平!$1380!唔理佢係次貨定係老鼠貨啦(水貨就肯定),真係好抵!

番到去,即開黎打!戰國無雙4!


畫面真係好正,連打D好平常0既GAME都靚左好多。可能我之前係用電腦MON 打啦。

佢有兩個HDMI位,我索性電腦MON都唔要,用埋佢!

下圖係我書台,幾混亂!?



講番退休預演,我打機打到兩點幾(呢排頭痛,否則想試通頂。。。)

之後帶個女上校巴,再過隔離屋村食個悠閒早餐!~~~ 我等唔切黎齊,己經食左個包一啖!








再去超市買貓糧。

之後全日係屋企HEA,打BLOG,計下數,直到女主人收檔就同佢出去食飯。(兩個小朋友番左我媽屋企渡假。。。哈!)

每次都POST下,一通排名。
同場加影其中一個股票戶口。。。真係FULL PAY 而家住緊間屋都有找。

雖然唔係好多,勝在無負債,如果要用現金,即時有股票現值 x 0.63 既貸款可用。即使要賣股,兩日就CASH IN HAND 啦。

這不是係吹水的,也不是晒命,而係希望各位朋友,要因應自己能力投資,每人承受風險能力不同。千萬不要死跟!同埋我想講,當成個組合太大個陣,想轉身/轉倉都唔容易,亦好驚青。。。所以我唔會成日買貨,亦唔會定期買貨。只能和大家吹下水,無投資建議可以提供架。

 

SORRY。。。忙記左講,仲有女主人D錢,佢搵佢洗。今個月係時候加佢家用!

2015年1月24日 星期六

期權定價老師 長空無二

初心者非常0岩睇。
呢位先生講左期權定價五個因素,個例子好生鬼。


為保留原文味道,同樣,個人意見係最底。

圖為男主人幼稚園時老豆所送之百獸王超合金(又叫金剛戰神),並非而家番出個隻,當年超鐘意。




“基本價值”即“現貨市價”與“約定價格”之正差(即有利於期權持有者之差)。價内期權是唯一具有“基本價值”的期權,到價期權和價外期權皆沒有“基本價值”。但在現實中,到價期權和價外期權皆有價值,這是什麽一回事?

本篇同場加映“彩色大銀幕懷舊巨大機械人動畫大回顧”,敬請期待。
(有關價外期權、到價期權和價内期權的介紹,請參看拙文“期權版孫子兵法:始計篇第二”)

“現貨市價”、“約定價格”、“時間價值”、“利息”和“波幅”是構成期權定價原理的元素。為方便論述,姑妄稱“現貨市價”和“約定價格”為第一範疇元素,稱“時間價值”、“利息”和“波幅”為第二範疇元素。

第一範疇元素決定了“基本價值”(有關“基本價值”的介紹,請參看拙文“期權版孫子兵法:始計篇第二”)。事實上,“基本價值”等於期權價值的情況只有在期權到期日或期權被持有者行使的情況下方會出現,總而言之,一天期權的生命沒有完結,一天期權的價值必然高於其“基本價值”。
那麽高於“基本價值”的部分是什麽?其構成元素是什麽?
高於“基本價值”的部分是“溢價”。到價期權和價外期權之價值全是“溢價”。“溢價”的組成元素主要是第二範疇元素。第二範疇元素的概念比第一範疇元素更抽象,聽起來很難懂,說起來也糊塗。
倒不如在此打住,先來點輕鬆的。各位觀衆,萬衆期待,同場加映“彩色大銀幕懷舊巨大機械人動畫大回顧”(請鼓掌)。

二、三十年前,日本動畫特別流行巨大機械人保衛地球,免受異類或外星侵略的故事,其中的表表者是鐵甲萬能俠。鐵甲萬能俠的殺手鐧——高熱火焰,相信有電視遊戲“超級機械人大戰”經驗的時下青少年也見識過。及後,觀衆不滿足於太簡單的機械設計,於是大批合體機械人在電視上登場。其中最爲香港(以前的)小朋友熟悉的肯定包括三一萬能俠和超力電磁俠。三一萬能俠是由三個傢伙拼拼合合,變成三種不同用途的巨大機械人,分別在天空、地下、海底戰鬥。後來,地下和海底作戰形態多不出現,總是變成天空專用的那個,臉上紅一塊藍一塊的,像奸角多於英雄。
至於超力電磁俠,它由五架小飛機合體而成。不像三一萬能俠,它只有一種形態,而且造型比較像傳統英雄,比三一萬能俠討好。超力電磁俠開啓了及後一系列五機合體巨大機械人的故事傳統框架,尤其是其五人戰隊的構成。

這類合體部隊一般有五名成員,駕駛一號機的是傳統熱血第一男主角,性格衝動頭腦發熱,對事情反應又快又激烈。

駕駛二號機的是典型第二男主角,冷靜、高傲和不羈的浪子型人物,對事情的反應是冷靜得有點麻木不仁。駕駛三、四、五號機的成員通常分不清其次序,但總有一個大胖子,木納寡言對白不多,不論片集多長,總沒有一集是與他有關的。他卻風雨不改的每集隨部隊出擊,既沒有貢獻,也不會犯錯。與大胖子一道出場的,通常是一個瘦弱的小個子或小孩子,一般比較多嘴,常弄些小笑話來逗逗觀衆。最後,必然有一個美少女,她是故事中唯一的女(主?)角(怪獸陣營中那些貌如無鹽或人鬼不分的女角不算),這個組合大體上一直被沿用至今。

回到本來的題目,靈光一閃,竟發現期權五項定價元素與五機合體的戰隊有可比附之處。試想想,第一元素“現貨市價”,豈不像駕駛一號機,急公好義的熱血男主角般,對市場消息特別敏感,經常上上落落沒有一刻停下來。再來是駕駛二號機的第二男主角,他對外界冷靜得近乎麻木不仁,豈不像第二元素“約定價格”,不論市況如何,必然如如不動。

大胖子則像第二範疇裏的“利息”。根據期權定價原理,“利息”指無風險利率(risk free rate)衍生的利息,無風險利率多指國債利率, 例如美國政府十年債券或香港金融管理局發行的外匯基金票據。在財經理論中,假定政府不會破產,因此認定國債是無風險的投資,其回報率則是無風險利率。(現實中,阿根廷早已示範過政府破產的可能性,國債也有可能是爛賬,但此非本文要旨。)無風險“利息”收益就像那大胖子,讓人納悶不已,卻無論如何不能缺了他。在期權定價原理裏,無風險利息代表了投機者的機會成本。無風險利息越高,投機者的機會成本越高,要求與機會成本相抵的“溢價”也越高,期權定價遂水漲船高。

“時間”缺了“利息”則不成具像的定價因素,因瘦小子總是與大胖子一道登場,所以勉勉強強拿那瘦小子比附“時間價值”。期權定價原理裏的時間,指的是期權餘下的“生命”。現實中的期權期限一般是一個月至六個月不等,長於六個月的期權比較罕見。期限以後,期權不再發揮作用,所以一般限期較長的期權比期限較短的期權有較高的“溢價”。

最後,那美少女自然是“波幅”。“波幅”是整個期權定價原理中最難解釋的部分,它是最抽象的項目。俗語說:“女人心海底針”, “波幅”跟女人心一樣難以猜度明白。在期權定價原理中, “波幅”是勝負的關鍵。掌握了“波幅”的運動,期權就是最“性感”的投機工具。不明瞭“波幅”的本質,就無法預期期權的價值變動,其重要可知。

畢竟 …… 那美少女是片集裏唯一的女主角。

為保留原文味道,同樣,個人意見係最底。

即係五個定價因素
1。不停變動既股價
2。永不變動(供股派紅股除外) 既行使價
3。Risk free interest, 利率
4。時間值
5。波幅

其實仲有6 ,就係預計派息之後將除淨多少。。。

1同2 其實可視作一體,權金就係兩者之間既差價。

了解五個因素,不能令你戰無不勝,只能令你了解唔同時間同場合之下權金的變化。

股票期權,睇blog 好過睇書,我久唔久都。留意新書,大部份都千篇一律。

2015年1月23日 星期五

如果老婆質素同禮金成正比

題外話,女主人勸告,不要出真身。所以在此網誌不便誘露男主人小小藍海生意是什麼,不過係另一平行時空,好多紅海人出沒0既地方,男主人都曾經活躍過。

無奈大家都係執紙皮,佢地唔信可以執到一年有兩至三球收入...更差者有人靠收租(收租仔真係無處不在)黎同男主人現金流比,well,花無百日紅(男主人生意亦應如是),唔通我又同佢講我一個月股息三皮幾(唔駛交稅唔駛還息現兜兜到手)

"哼,乜三皮幾好多咩?我收租x皮一個月啦!(未計還款及開支)"

如買濕九細價樓,full pay要三四層,市值千幾個,有邊個會咁?如有借貸在身,可能要五六層或者更多。

十年前平價買0既,就梗係你叻仔!十年前我身家可能得十萬蚊,點陪你炒0者?哈哈。。。

如果你識我真身,不妨話我知,我都有比blog link 自己某d朋友。如你意外發現左我(我d小朋友樣易認),記得話我知。

講番正題,昨日幾乎唔小心露餡。

<為咗吹大個問題,可以去到幾盡?>


呢篇文幾正,佢成個聯營blog入面我只睇呢個。其他收租佬已自我洗哂腦,可以無視。

我唔係想講文中收入幾多可以買樓,幾成按揭先安全,個d官仔講0既貼近現實與否,都唔係我想講0既野,討論呢d無意思。

文中最值得睇0既節錄如下:

"現在$300萬可以買到乜樓?私樓大約15-30年內舊樓,10年內半新樓唔駛諗。 呎數一般300-400建築呎 (實呎210-280), 呢類單位買咗要你住一世,你接唔接受? 生小朋友又夠唔夠住?
唔好同我講之後upgrade 換樓,即使你買完樓價無再升,upgrade 換樓樓價每多一百萬你人工要加$9,430 先合乎按揭標準。 若果你買完樓一個唔好彩,再次發生樓劫樓價跌3成即係你即時負資產$60萬,如果樓價再次跌5成即係你即時負資產$120萬!
唔供樓要破產,跌5成死供等樓價升返上$300萬即係樓價要升一倍,咁你應該要住一世無得upgrade!"
100萬算唔算多錢?好多以為自己有好多"資產"0既人會話,一百萬好少,做唔到d乜。討論區仲有人講要二千萬先可以退休(早幾年仲講緊一千萬,乜通賬咁勁咩?)

計下,25k當你儲一半,都要6年多d。
我當你儲哂25k,要三年幾喎!

三百萬樓,未計利息,要十年!人生有幾多個十年?仲有,呢d樓多數在大西北,否則好細你十年內唔好生仔!換樓?你人工必升?你唔會比人炒?受氣0既時候,你連唔撈0既骨氣都無喎?!

講番我意見,打個比喻,如果老婆質素同禮金成正比。。。

本來正常有為青年/中年可食用老婆只係200萬,而家?變到600萬!

因為女性十分唔夠,大家唯有搶,又或者選擇去召妓。召妓都唔平,不過好過用大量金錢買斷。

又正因為女性唔夠,好多人拎d阿婆阿毛出黎賣,又老又殘。

明明正常買d18/22 妹妹仔,差少少都30歲丫,唔係要處女,只求ok。

點知而家d 50 60 70 歲阿婆都比人拎出黎賣,叫價300-400萬! 你話幾犀利!

無意冒犯老人家,只係打個比喻


又有人早上車(其實自己攬住個件都40歲)但又好自豪有幾個阿婆跑鐘。不過以投資黎講,亦無不可。

又係個句,安得廣廈千萬間,將心比己,你會否用300萬買個阿婆番黎對佢一世?

唔係會否升值,搵到錢就皇道0既問題,你買幾層幾十層,人地一生只買一兩層,點解要食阿婆?

值唔值得0既問題啊!!!

用好多人十年積蓄,買一件阿婆樓(又細又老又殘,更差就又遠番工),係唔係只因一個理由,而家唔買無機會買,就一頭衝埋去呢?

買股票都要講timing,買樓自往,次數可能少過你生仔/轉工,係唔係就似買菜咁呢?同阿婆閃婚再拿拿臨九成借錢比禮金,值得嗎?要知道,你自住升左值,都係阿婆黎架。坐架車出去,大把18/22妹妹仔,係得你番屋企食阿婆,你覺得點?安樂窩?真架咩?

(我唔係講收租投資,或者d仆街冚家剷等收購重建,唔好咁離地,香港仲有好多25-45歲0既人收入一般但其實對社會好有貢獻,咁樣陰、害佢地,於心何忍?

2015年1月21日 星期三

女主人心情 (爛尾文)

女主人爛尾文,幫佢publish, 無謂side, 圖為女主人好鐘意既裝飾之一。

******

趁師傅工作中, 我又未走得住, 又來打打日記。
眾人口中的我, 俗語點講, 應該係算白痴, 天真, 蠢同簡單。

通常我都會回應一句: 其實我一點都不蠢。正正因為我這種性格, 令我工作中遇到的人都係對我好好, 替我著想的。

想當年, 初初踏足這個行業, 人生路不熟, 對事情沒半點概念, 誤打誤撞下認識了合作多年的產品供應, 一直合作至今, 以兄妹相稱,

*******
女主人打到呢度就停左。
我加句,我既兇狠串咀性格好適合做我果行,只要IQ 不要EQ, 相反,女主人個行就係如佢所講先做到,雖入行門檻低,但女主人幾年間做到行業龍頭都唔係流的。

圖片取自google pic

2015年1月20日 星期二

租屋系列 -- 裙腳仔業主

其實首篇"租屋系列" 應為"如何對無賴業主以按代租", 已經達寫完階段, 但男主人實在怕有太多迴響, 亦唔想有任何扮識法律人士"叉撚住"我, 恕我押後出文日期.

講D 無咁刺激0既先啦, 不如講下我見過0既業主, 拿, 佢地未必係租比我, 可以係租比我識0既人, 咁0岩我又聽過故事.

你咪當如有類同, 實屬巧合.

話說某租客見到單位, 扑鎚簽約啦. 業主想見面, 租客一去到, 原來業主係黑黑實實細細粒, 貌似阿牛0既工程人士.


預計佢年紀同男主人差唔多, 駛唔駛落地盤做野就唔知喇, 不過怕怕醜醜咁, 點解? 因為第一次買樓, 仲要第一次收租呀!

講下呢位叻仔先, 佢係2009 年尾買入, 當時233 萬, 租緊約9500

睇番中原成交, 單位而家2014 年尾賣緊約450-500 萬. 現租金萬四左右. 樓價升得勁過租金好多. 分別係1.9 倍同埋1.4 倍!

重點來了, 呢位阿牛有咩值得比我講? 原因係, 簽約當日, 佢全家一齊黎簽, 包括佢老豆, 佢老母, 佢阿哥d 小朋友s...

原來, 層樓係媽媽出錢, 仔有冇份就唔知啦, 不過原來阿媽已經買左一層居屋比大仔, 呢個細仔就一層私樓! 咁佢兩老住邊? 住公屋!~~~

都話公屋多富戶架啦, 都無交過間公屋出黎喎!

個老母言下之意呢, 係買定比個仔, 等佢第日識到女朋友(即係而家未有), 之後結婚就可以住, 而家租住出去先咁話...

一年死約後, 加租, 租客走左去租第二度, 仲平左(因為層樓無咁新, 並非租金下降)

收樓之時, 又係帶哂老豆老母上黎check, 不停話呢度污糟果度污糟, 拿, 污糟唔係扣錢理由喎, 又話租比你個陣都唔係咁, 咪玩啦, 呢個世界有自然損耗, 你唔係以為租完會完全一樣係新樓咁卦, 再者, 層樓根本唔係新.

最後梗係按金全取, 如果唔即時給付按金, 租客絕對唔會比鎖匙佢.

業主持有至今, 究竟佢係放租, 定係已經識到女朋友? 咁就無從得之了, 除左全家驗樓, 比較裙腳之外, 佢都算係正常人黎0既.

2015年1月18日 星期日

與未成年少年談理財

網上搜下, 原來好多人都有同年青一輩講理財, 通常年青一輩都係大學生, 或者剛出黎做埋三五七年0既年青人.

你有冇試過同中學生講呢D?



老老實實, 我久唔久都有呢D 機會, 至於講唔講比佢地聽就好個人.

原因? 我認為人人都係一張白紙, 即使係我呢D 年紀(三十幾), 如果未用過男仕護膚品, 走去SALES COUNTER 都係一張白紙, 你話乜就乜啦.

男主人極強調FREE WILL, 皆因由細到大屋企都比好大自由度我, 先走得出一條唔係大路人會走0既路. 同樣地, 我都比番呢條路個囡...結果阿外母話個女(同我)一樣咁麻煩...哈哈.

我樂於見到佢三歲人仔係玩食訓有自己意見, 每晚自己揀衫著, 揀自己鐘意0既 YOUTUBE 節目睇 (佢好鐘意睇人地打機...).

我估佢都算係靚女一名0既


言歸正傳, 2014 年度, 適逢佔中運動, 呢班未夠18 但係又將成年0既年青人, 有人走到街上, 有人食花生, 有人話佢地攪攪陣. 

其實十幾歲人都有不同意見, 何況成年人? 其實班YOUNG MAN 唔一定係黃絲! 只係出黎做野個班太重怨氣, 覺得我地呢班藍絲可能上左位就唔理佢地...

有個好聰明0既同我講(我估佢16,17 歲左右), 佢想樓價跌, 所以支持佔中. 嘩,住屋0既威力已經比人吹到好勁....(其實男女主人身邊結左婚0既都無買樓需求了....真係風繼續吹吧)

見係佢, 我同呢位小朋友講, 你想樓價而家跌, 其實係大錯特錯!! 而家跌只會益左而家可以上車個班! 到佢地上左車, 就唔想樓價跌, 過多十年, 到你26歲拍拖想結婚個陣, 你認為佢會平賣比你??

你而家都無錢買, 即時0既下跌對你無幫助, 反而可能令父母收入變差....

佢好似領悟左....

我再講番我自己中七個陣, 真係不該, 見個股市係度跌, 我有種莫名快感! 其實而家諗番, 當年我都無錢買, 亦都唔識買, 佢跌又與我何干?

放諸股票皆正確!

結果, 幾年後自己畢業, 個環境差到不得了...根本搵份工都好難. 雖然我算半個專業人士, 但係都搵唔到本行工作(雖然無打算搵). 塞翁失馬, 如果唔係咁, 可能又走唔出藍海, 創一番小生意出黎0既.

對呢D 中學雞黎講, 樓價跌其實係壞事, 當再多一班人持貨自居而供應又唔增加的話, 佢地將來要置業0既成本更高. 要知道樓價個CYCLE 非常之長, 同貴金屬有得FIGHT. 除非希望別人走向絕路, 否則唔應該有此心態.

我對樓價係中性的, 因為佢點升都唔夠我自身財富積聚速度, 我只係不屑個D 初哥細價收租仔, 挾低層市民所需而吸血自肥, 以為自己財務半自由又其實仲要日日勞役. (而家買賣盤又好, 租盤又好, 都太少.當連選擇機會都無0既時候, 呢班人同打劫弱者/低收入群有咩分別?)

 放諸股票皆正確! X2! 2007 當年幾多人炒新股, 又分享買左咩股票只買不賣, 止蝕不止賺?? 哈哈~~~~!

君子好財, 取之有道. 
天理循環, 報應不爽.

未成年0既朋友, 其實諗得太多了, 現階段不如讀好D 書! 老土講句, 知識學左永遠都係自己0既, 有好多學習, 過左20 歲你點學都學唔番, 進修都無用.

書到用時方恨少, 呢句唔係嚇你, 只係到要用個陣, 你根本唔知.

男主人常常以讀書人自居, 讀書人一定悶旦? 讀書人一定無乜錢? 唔講比你知, 梗係有原因啦下話! (好多讀書叻0既人打機都叻, 只係你未見過0者...)

好, 朝早八點, 今日星期日, 番工去~~~~!

2015年1月16日 星期五

CY 政策, 其實你有冇用過???

事先聲明, 我係藍絲, 亦係各位口中五毛, 仲要係無錢收個隻。如覺得我偏頗,請移玉步睇下一篇。

好睇0既,訂閱我或者SHARE去你FACEBOOK啦!

圖中唔關事,為內地N年前股票一張,攝於廣州某博物館。


無聊睇番以前同女主人某次旅行,乜Q都唔BOOK,只係早少少係淘寶訂,真係好好玩。

男主人金句:"男仔手收都未拖過0既女人教人做愛,唔係下化??

此句出自身邊太多三姑六婆亂咁干預別人感情事, 明明自己拖都未拍過, 哈哈。

講番正題,我唔係太識分析今天施政報告,打從TVB六百萬人的故事,我已同女主人講,呢個CY狼子野心。

點知,佢後來做埋特首。睇股又唔見我咁準。

記唔記得佢一上任攪過乜?
1。限奶令
2。零雙非
3。特惠生果金
4。雙辣招

我估除左4,無乜人感受到有用,結果人人係度鬧CY!

限奶令

不如我講下我0既變化,果陣個女剛剛出世,開頭食最難買0既A+,真係好難買!!!藥房一定無,除非係地區藥房而佢又好心留比你;超市?哈。。。一定唔見有初生賣!萬寧個D有通常都有,不過貴D。如果跟美贊臣訂就一定有,不過貴D。

點解咁多人話買唔到?? 我唔知係咪我好運,我覺得只係比多20-30蚊去官方指定地方訂,好多時候都有,只係香港人硬係要睇平廿蚊,要去藥房買,咪買唔到!!

限奶令後,好多藥房都有得賣。直到而家,我個細仔買奶粉都勁易。。。無效?無可能啦。D廢青廢中坑無老婆無小朋友咪唔知頭唔知路話難買!仲睇蘋果日報??

零雙非

又講番個女,佢係公立出世,之前私家醫生做產檢,等預約等到仆街,飲埋茶番黎睇都仲得!差唔多七成內地客!公立覆診反而好D,因為都要比全費,佢地會去私家。再照結構超聲波(女主人太後生,公立無得照)就去荃灣港安,嘩,好似得我地係香港人咁。。。好難想像如果係私家私院生會點!!

公立生呢,最多係得新移民,其實好正常,無人大支野,但係都有大肚婆加AGENT,擺明一條龍取身份証。(後尾女主人用慳左個D錢去DERMES全身脫毛)

到阿細仔,都係公立,私家醫生覆診即時順暢好多,即入即睇。有內地客,不過已經唔係黎生仔,只係黎抽血睇下仔定女。。。大陸唔比預知嬰兒性別的!去到公立生,真係零雙飛。因為第二胎易生好多,快過打針,生完我仲夠時間去開工。

你又未係呢段時間生過仔,又點知?睇咁多蘋果日報有咩用?你身邊D偽中產朋友去私家生,梗係睇唔到呢D野啦。。。

又係搏奕論,你以為私家好?其實公立又平又寫意,完全避哂內地人!!

特惠生果金

你又睇蘋果日報呀?雖然資產審查比人嘈,最後都過到丫。我父母皆過七十歲(遲生我),每月生果金都係用黎賭下馬仔同飲下茶去下短程旅行,加多左生果金幫助唔大,但係對於其他老人家,由1100升到2200你話差幾遠??老細加你一千蚊,可能都算多啦!好過等個D要供樓0既仔女加家用啦下話,D仔女目標係儲錢買樓3,4,5,6。。。喎!

雙辣招

樓市我唔敢講有冇用,個人認為救左唔少買樓初哥就真,否則果件求死隊長可能已經死撚左。

不過我有個炒鋪0既朋友即時收手,而男主人鋪頭個炒家坐左艇兩年,剛剛上個月先鬆綁賣出,否則摸下摸下,都唔知加租會加成點。

商鋪加租已經無住宅咁多,女主人越搬越大,但係呎租都無乜點加到架咋。

其他

三月財政報告:其實,仲有好多我認為做得好0既野,例如唔再寬免差餉地租,絕對有效打擊雞仔數收租初哥,成效好快見到。只要四月份取消埋稅務寬免,連埋物業稅,條數就好清楚。真係低息所以高回報?哈哈哈。。。

賣公屋,無方法中0既方法,安得廣廈千萬間,人人有屋住其實好基本,點解要玩剝削,點解班人要剪梯落石?有冇諗過月入兩萬至三萬家庭其實好慘?唔好同我講洗碗萬幾蚊兩個人儲五年錢呢D貓哭老鼠0既說話!!唔通我同你講六百萬0既樓我三年可以FULL PAY?

津貼內地遊學,真係一絕!!D人怕洗腦,其實日日比報紙洗腦都唔知,比股評洗腦又唔知。小朋友如果咁易洗腦,點解家長唔洗下佢地努力D讀書?內地有唔少好地方,既然有津貼,點解唔去?你怕洗腦,大可以唔比仔女去喎!

火燒圓明院,聽得多,睇過未?(2010七月)

杭州紅頂商人胡雪巖,睇戲睇得多,佢屋企你去過未?(2012二月)

南京大屠殺紀念館,六四死得人多定係二戰?(2012十二月)

原來,同女主人都番幾多大陸!

唔好樣樣野都挑骨頭,至少佢真係有做過野,上任貪曾話居屋居屋唔會起,真係厄你港人ON居居。。。佢一拖就兩年,你睇有幾多人SUFFER?

男仔手都未拖過0既女人教人做愛,咪同D人乜9都無試過經歷過就亂屌施政,同出一轍!

都係個句,各位留言係我動力,若唔介意,SHARE去FACEBOOK啦!

後後記, 原來前文"THE NEXT BIG THING IS TO BE FREE"打錯野 (係2010非2006!)
2010 年, 股市暢旺, 本來我都以為可以退下, 當時只係有五六球, 諗住股市會翻一翻, 之後? 哈哈哈...

2015年1月15日 星期四

女主人計算每月儲蓄方法

紀錄於15JAN2015

呢篇係"女主人的一球散紙" 0既續集

行文日期為九月四號


正所謂, 你不理財, 財不理你. 

女主人過往就將我比佢0既錢(小部份係家用, 大家部係男主人鋪頭洗費、男主人係女主人公司出果份糧、同埋住屋開支) 入落戶口。
再加埋佢自己出比自己個份糧,咁每月戶口有正收入。

年尾同供應商埋數,發現公司戶口無盈餘,出乎我意料之外!

個人戶口如下



根據女主人LOGIC,今日15/1/2015, 每日搵幾多係咁計

(1245395-1036369)/130 = $1607 PER DAY!
即係平均一個月得 $48210....

當然, 係人都知唔準,

第一, 因為公司戶口條數無計過, 唔知多定少!
第二, 因為收入同支出有時間差, 亦非月結, 所以每月唔同時間好難定一個點去計數. 可能呢一刻好多"未收賬目", 又或者好多"未付賬目"
第三, 第一幅圖唔係即時賬目黎, 我過左一排先寫的.


好明顯, 佢要得閒計下數, 先知究竟搵幾多!

男主人生意易計好多, 因為無人敢拖數, 而開支撥入女主人公司計, 家庭洗費又比較固定.

2015年1月11日 星期日

THE NEXT BIG THING IS TO BE FREE

男主人同女主人都鐘意趁坐飛機個陣睇戲.

今次, 來回都睇港產片, 原因係西片可以DOWNLOAD, 港片搵到都係國語...

睇左兩套, 分別係"失戀急讓", 同埋"男人唔可以窮"

睇既原因, 並唔係想睇D 咩心聲或睇咩明星, 只係想睇下, 而家香港人想睇D 乜, 又諗緊D 乜.

我日日見0既, 都唔係一般香港市民, 所以D 一眾市民點諗點睇一件事, 我只能夠睇下報紙, 或者睇下戲.

失戀急讓唔係講樓的, 只係講感情, 不過最尾有角色用賣左樓0既錢去旅行...

金句如下圖



THE NEXT BIG THING IS TO BE FREE

當然, 有錢係咪應該全部用哂去旅行? 我覺得戲中角色咁後生梗係OK! 難怪咁多人諗住炒下樓或者收下租可以TO BE FREE!

真係靠買樓收租自由左0既, 四十歲以下, 而又係2008 打後先入市0既, BLOG 界真係可能一個都無.

要不然你2003-2005 買落, 再不停加按; 又或者你已經一早有幾球, 否則你講乜唔駛做? 係咪真係唔撚駛做? 半自由, 打風流工, 都係要做呀!

另一套, 男人唔可以窮, 其實係講低收入男以為條女拜金, 失戀後去左學人賣倫敦金. 又係個D 糾纏不清感情戲!

其實如果低收入, 點解唔考慮轉下工? 仲好後生呀! 人0既問題多過機會問題. 如果真係能力問題, 點解唔欣然接受呢?

我有好多中學同學, 一樣係住公屋, 放工番屋企煮兩餐, 一樣過得好開心! 最緊要, 係搵到對的人!!!

THE NEXT BIG THING IS TO BE FREE

2010 年, 股市暢旺, 本來我都以為可以退下, 當時只係有五六球, 諗住股市會翻一翻, 之後? 哈哈哈...

放諸今日, 如果你覺得某D 資產可以每年升20% 或者10%, 從而退休, 不妨借鑒一下.

當年(2008), 我有客人8 蚊買中人壽, 相信係大量持有個種, 當時係39 蚊. 中年4-50 歲, 住好平0既荃灣海濱花園, 一般公務員, 我估佢都以為可以唔做. 最後, 個女0既好似患左精神病....我無再問落去.

又有, 當年(2006)個女朋友, 個阿媽, 第一個次見係醫院, 佢有急性 CERVICAL SPONDYLOSIS (佢又係一個井底之蛙, 叫我番去從事我0既醫療專業唔做做而家呢行, 真係笑佢ON9 驚佢嬲)

http://en.wikipedia.org/wiki/Spondylosis

離婚婦人, 靠贍養費生活, 從來未做過野! 又做下投資(星X銀行客仔), 條友真係好大口氣, 無厘頭同我講, 佢一次HKB 以股代息已經有唔知幾多股 (忘記了, 當時0既我覺得好多, 我當時一個月搵得五六萬之MA...)

佢仲半恥笑我話唔會掂中字頭個D 股....(我已持有一百手之內交通銀行)

到左2009, 我唔知呢位HI AUNTIE 見到HKB 得33蚊會點 , 當然3328 都唔會有咩好下場. 股要跌, 又有邊隻可以獨善其身? 放諸樓中其實一樣! 你覺得細價可以收租抗跌?

今天, 兩種資產, 一個天一個地.

我係一樓睇住你係二十樓, 同樣危坐圍欄, 真係未驚過.

屈指一算, 今個月收入已計好, 有數約十七萬. (打從2000 我得一萬, 2006 我得五萬, 跑贏大市好多啦)

以下為預計現金儲備 (我年年都計得好準, 有多無少的.)
2015 年六月, 會有淨現金104 萬
2015 年十二月, 加股息, 會有淨現金200 萬
2016 年六月, 250 萬
2016 年十二月, 加股息, 350萬
如果選擇退休, 就退
若做多半年, 總現金約400 萬. 未計該年股息.

就係呢兩年, 睇住個市黎打, 你唔插我咪又等下. 兩年幾, 交銀你夠勁咪升個十蚊黎睇下, 我即時有千幾萬....(仲要零負債)

仲有, 女主人條數都未計...

THE NEXT BIG THING IS TO BE FREE, 但係都要儲下彈藥先.

2015年1月10日 星期六

女主人係吳若希!?!?!

今日同個女去 CD WAREHOUSE

本來係買SAMMI 隻碟, 點知個女見到吳若希隻碟就拎起話要買....

哈哈, 若希BB?!

(片段中聲音經過處理)

video



2015年1月9日 星期五

我可以唔撈嗎 6

真係寫到100 集都未退到休??

上個星期, 男主人淨資產突然升過千萬, 已計價內期權被行使.

做左幾日千萬富翁, 今日打回原形, 哈. 自旅行回港後, 忙到不得了, 所以過左千萬都無乜留意.

如果計家庭資產, 咁而家都已過千萬...不過我同女主人財政係分開0既.

近日男主人忍唔住買左部新遊戲機! 為左玩一列"無雙", 爭扎買PS3 定PS4 好, 最後都係買左PS4.



究竟, 唔駛做0既時候做乜好? 我其中一個目標一定係天昏地暗去打機!! 哈哈...因為我係宅男一名呀! 我打機都好執著, 打哂所有成就先罷休. 自從全力做自己生意之後, 已經好耐無咁癲了....

舊XBOX 紀錄好多都唔見左...我真係打左唔少千分成就番黎架!!

部XBOX 係2009 年同女主人結婚第二日出去買的, 當年女主人真係肯同我癲, 陪我去買遊戲機, 你話呢D 老婆去邊度搵? 當年佢有份同我打唔少GAME. 不過自從女主人鋪頭忙左, 又有兩個小朋友之後, 我就得番自己打機...

唔緊要, 我已經鎖定要教識我個女打機!!!

總結番日本之旅, 其實我覺得最好玩係...去睇鹿. 我真係好鐘意動物, 今次無去動物園都OK.


如果可以, 搵機會再同女主人黎多次"無目的地"之旅...幾時? 我估要我自由之後先得了.

2015 年, 工作上我多左一日休息, 同時, 亦定下目標, 讓自己重回以前幫女主人鋪頭宣傳宣傳0既軌道上, 好似有兩年無插手佢鋪頭D 野了...

一通排名, 跌出一百了,



2015年1月8日 星期四

貸款精明眼 2

唔經唔覺又到續集

借錢,今次主要講私貸,無抵押個隻。

銀行標榜個低息,通常都係厄你,要年期短貸款多,仲要係鐵飯碗,唔係時時借到。

所以,WALK IN 入銀行借錢真係SIDE時間!!

例如,借二百萬,你點都無咁多人工去還,話就話最平去到1。X厘,實際問番出黎成六七厘。

至於稅貸,有D行貸款上限係月薪N倍,有D係稅N金倍!! 個數可以差好遠。



如果我年薪百萬,但屋企又有小朋友又有父母,左扣右扣,開埋間公司出糧比自己,可能只係交幾百蚊稅!(物業稅?除非你公司持有又或者你本身人工好奀,否則走唔甩)

結果,月薪計借到幾十萬,稅金計借到幾千架咋。

有人會沿住多銀行0既街,逐間問(我試過),其實唔太WORK!因為你一APPLY,銀行走會查你信貸評級(TU),如一個月內比人TU幾次(好似三次),信貸評級會降!!

又想借得多,又想平,可以點?

哈哈!!申請佢銀行信用卡!!再係入面借錢,銀碼唔駛多。只要你係有借有還上等人,過多一年兩年就會有電話打比你,問你借唔借錢了!

RATE係點?通常一次比一次好!通常都係話用CREDIT LIMIT 黎借錢,換言之,APPLY個陣,梗係CREDIT LIMIT越高越好!

邊D銀行有呢個可能?肯定唔係HKB,BOC 呢D 大野啦!個D萬應錢真係不知所謂地高息,SIDE氣~

曾幾何時,我會叫女主人KEEP起銀行寄黎個D借錢信,以備急用,不過從來未用過。

最好用0既,應該係有抵押貸款,例如按樓,又或者按股。有空再講。

2015年1月7日 星期三

日本遊記前傳 - 最安全最中庸選擇,往往是最壞選擇

(旅行番黎就好Q忙。。。)

女主人常常都選擇失誤,除左揀左我。哈哈~~~

日本之遊其實都係咁,相信好多人都去過。








今次日本之旅,其實都花唔少錢係機票同酒店,而呢D錢其實係可以慳的,無奈以為住好D,飛好D,點知就差到不能再差...

其實, 唔止一次係咁,而係我0既立場,我又唔出得聲,免得佢當我慳錢,結果只能硬食。

當然,坐飛機好多香港人都揀國泰,而機票都唔平。

有港女貪佢有雪糕食,SORRY,今次無。

正因為國泰收入唔掂,不停慳錢。

我最憎去T2上機,又或者要坐TRAIN轉車,行餐死。呢D位個成本平D。大拿拿國泰竟然來回都BOOK呢D位,不知所謂。

仲有,因香港太多貪小便宜0既人,結果好多人提早網上劃左位,我同女主人幾乎要分開坐。一向坐平D0既AIRLINE(大韓,馬來,國航等等),提早去登機就可以劃到WINDOW SEAT。

邊個話國泰最好?跟據搏奕論,揀最多"怕執輸"既香港人會搭0既國泰先係最差AIRLINE。

另外,酒店我地住左日航,HOTEL NIKKO。
話就話係四五星級,唔平架。但係佢只能比到SMOKING ROOM 我地!雖無煙味,但你試過去到酒店,無冷氣,焗到要五日開住風扇未?仲有,呢D星級酒店如果唔翻新,設施其實好舊!!簡直好似舊啟德機場,或者父咀星光行咁0既裝修。。。

女主人話,咁點揀?我話,跟本唔應該去日本。

唔係去旅行發牢騷,而真係好多時候以為最安全選擇就係最差選擇。

例如早排女主人要手術,佢本來想自己加錢住兩人房,點知無。

咁唯有住六百幾或者七百幾個D 啦,咁佢揀左七百幾。。。

點知呢,去到全院滿座咁滯,其實住六百幾反而無乜人!!

而家香港經濟好到咁,又咁多人靠保險住私家醫院,個個都住都盡啦!!

有時,真係要搏奕地諗,呢D咁安全0既決定,咁多人揀0既決定,係咪真係最好同埋最穩陣呢?

題外話,早幾日交銀升得好勁,男主人淨資產(唔係個D有負債0既資產)過左千萬大關。不過今日呢,又唔過一千萬了。哈哈。。。過眼雲煙。

2015年1月1日 星期四

假如我只一個

圖中為舊居一隻小花貓

如果我只一個人,錢銀上已財務自由。

日子會點過??我估就好似今日咁。。。

去下深水埗,食下野,咁又一日。

上星期, 買左隻512GB SSD 番去換電腦~~~


無錯, 我估我可能係一典型毒男...哈哈...

後記: 之後一日帶女主人去食, 其實兩個人食反而多多意見覺得唔好食, 不過係我而言, 過程比實質味道更重要.

其實, 我估唔少男人結左婚都重好享受一個人在途上個種滋味. (就好似唔少港女有男朋友或者結左婚都好享受有人追一樣.)

28/12 同老婆去左睇SAMMI 演唱會, 拿, 好明顯我係被迫....

上次去睇, 已經係睇黎明, 個陣好多大嬸, 點知今次....重多大嬸!!! 估唔到佢地都係歌迷....




當佢唱到<<放不低>>....鼻子一酸, 我諗起佢...

當年小伙子, 仲係讀緊書, 遊戲人間0既時候....佢離開左我. 或者咁講, 佢叫醒左我...
(因為, 當年我太遲帶佢去睇醫生, 亦無錢去醫佢)

"但求仍然維繫, 不惜一切, 我為你執迷"

一隻由小五養到大學畢業0既花貓, 我對佢許下0既承諾, 我永遠都記得, 亦都唔會放棄, 無論前路有多困難都好,, 十多年了, 你好嗎? 我很好!!

***
講得出就自然要做得到. 由細到大, 我都係要做到就必定要做到0既人, 不論用任方法任何手段.

我試過因為我唔想過穩定0既生活, 穩定0既工作, 而飛左以前一個女朋友...

直到遇到女主人, 我先至覺得, 佢或許會明白我, 或許可以由得我做自己認為對0既事, 或者可能我由始至終都做錯, 但至少, 三十幾年來, 我從沒後悔自己0既選擇.

由細到大0既執迷, 亦係我一路以黎鐘意單打獨鬥既原因, 一人計長, 十人計短. 我身邊0既朋友, 都明白我係咁, 所以先能夠成為朋友.

無論現在鋪頭工作幾辛苦都好, 病左都開工, 我都覺得值得. 亦不容許任何人阻止我繼續沉溺, 因為, 我對佢0既承諾依然未達到.

如果有另一個世界, 我會重遇呢隻貓, 而我又做唔到對自己0既要求, 我無面面對佢,

***

講番投資, 其實真係好個人, 通常跟大隊, 太多其他聲音, 未必有好結果.

男主人性格太執迷, 選股0既時候會好易碰壁, 相反, 個種唔怕死0既精神, 又能夠係人人唔敢買0既時候出手.

都係個句, "平坦的不一定是好, 最安全0既選擇往往係最差0既選擇."

一個人的性格, 七分天註定(我係我個囡身上亦都看到自己), 如果要去刻意改變, 至少其他良好特質都會唔見埋. 所以我0既脾氣, 固執, 係永遠都改不掉. 改掉左就唔係我.

否則, 係一片收租大哂0既氣氛之下, 又邊有人會出文鬧人細價樓收租好折墮呢? 買鋪買商廈實屬投資, 若利用民生所需來吸血, 雖不犯法, 但真係因住收尾個幾年啊.

2015 年, 我會再另行文講下...

A 點樣先唔會比人亂扣按金, 更重要係, 點對付個D 郁D 就話告你個無腦收租仔, 又話律師信又話要賠呢樣賠個樣.

討論區有好多呢D 人, 其實全無實戰經驗.

B. 點樣去用投資方法交租重有錢袋. 

C. 同時, 亦會分享一下過往業主種類, 有好有差, 主要集中講人格而非投資回報.

D. 又講下新居屋, 我無資格住,但的確幫到好多人!!!

各位0既留言同埋訂閱, 將成為我寫落去0既動力!!
Related Posts Plugin for WordPress, Blogger...