2015年5月31日 星期日

期權現狀 十厘 高息投資機會

我終於的起心肝,開左fb 專頁,大家可否like 下,幫下忙儲30 like. 同埋like 左有訂閱作用,新文章又同步fb 作news feed。



為乜? 也算樣信念傳承吧。

又係個句,人人風險承受能力不同,現金流情況不同。切忌我做你又做,咁同果件求死隊長有咩分別? 每人利用自己長處及興趣生活,生命才有意義。

五月期權,有部份比人行使左,又有部份變廢紙全收權金。

現倉如下
六月 Sc xcc@7.5 550手
六月 Sc bcm@8.5 100手。星期五做,剛收權金九千。

繼續越升越加張數,直到全被行使。

留意下三月權倉報價,好多at the money short put 都有十厘息。

即如千萬現金回籠,做short put 即有十厘回報,當然有風險啦,如股價大跌,補足按金同低位接貴貨,不如等跌買實貨,係咪?

圖為 gp02 電鍍版,頂唔順佢太核突,手痕用油漆筆上色。

2015年5月30日 星期六

耀才又黎料,加按金

真係唔得佢死,2011年8月佢已經冼過期權班友一獲,市況波動大幅及借貸成本上升加按金。


今次又黎,不過唔係期權按金,係A股孖展。

利申,有戶口但幾乎無用過。息貴之餘,話加按金就即加,隨時無啦啦比佢斬首。

附上今日完成的 g-self! 第一次用噴鑵,超有滿足感。我美術差要求低。



2015年5月28日 星期四

心能決定境界3 - 論創業

估唔到有第三集,舊文重溫。

<心態決定境界>

<心態決定境界 2>

話說, 我有一位同學A, 讀書唔叻樣子一般勇氣又無乜, 中五去左讀TC (即係而家 IVE), 畢業成為左IT 人....係一間餓佢唔死0既誇國大公司做一個小小小小SUPPORT....

其實已經係十年前0既事, 當年我地都十年無見, 即係同而家比, 加埋成廿年....

見番佢原因係因為同另一同學B聚舊, 我個位同學B又係股票人, 結果當晚, 佢講技術分析, 我又講下期權.



言談間, 我提議同學A 咁鐘意影相, 不如幫人影下拍下結婚相啦, 當然, 佢都係講番一D 佢覺得佢做唔到0既理由.

1. 做生意, 風險大
2. 做生意, 初始成本大
3. 蝕左點算
4. 無人工
5. 已經好多人做緊 (其實個陣未有而家咁多)
6. 興趣還興趣

當然,佢最後無聽我講去影婚照搵錢,繼續做其IT SUPPORT。。。

再補一通股票倉


嘩, 呢D 白痴思維, 咁似個件80後求死隊長0既? 呢條友話自己80 後, 其實佢細我兩三年, 哈!

個日聚會完結, 呢位同學A 仲同同學B 講, 做乜我咁好死教佢地期權.....WELL

今天, 當然我已經對呢個同學敬而遠之, 而同學B 亦因工作錢銀問題同佢決裂左(同學A 錄同學B 音, 怕第日生意有咩犯法野要上身喎...)

再過幾年,係同學A FACEBOOK 睇到佢轉左行了!

咁同學A 而家係咪做緊IT? 非也, 佢去左同人影結婚相!!! 否則點養頭家! 如果佢肯早D 轉行, 可能佔有市場更多....

80後求死心態, 就決定左佢境界!

一個人,以為只係食同訓無憂,又可以有錢駛,咁就足夠?夢想呢?

香港,某D夢或者難以追尋,但依然有唔少夢想係可以達到。有好多夢,係唔會令你發達!

所以你睇下求死條友是多麼的膚淺,不過可能佢讀書少又窮又無人理佢,先想用呢D野黎獲得NOISE。相信同學聚會之間,佢除左有收租樓之外,根本無任何突出之處。

回應番上面創業一事:
1。打工,風險都唔細,機會成本,咁就一世。
2。初始成本,男主人女主人兩邊生意,成本少於十萬!男主人最初,幾乎零成本創業的!無人叫你一開頭就攪咁多野!!
3。蝕左咪蝕左,成本唔高。真係唔好意思,我未試過蝕錢。
4。人工係糖衣毒藥。自己做老闆,佢加租?你加番價,等佢老豆老母仔女親人全部SUFFER! 例如你做飲食,加價,佢地收租仔唔駛食?真係唔知邊個握住邊個春袋了!
5。男女主人生意都有好多人做緊,男主人已經係該區龍頭(某D方面),女主人應該係讓類產品龍頭了。只係我地唔開分店唔發大黎攪,搵夠就算。
6。呢個我無意見。

(歐陸色彩)

(又黎高達分享!男主人發左成隊天人番公司!)

阿傻仔80後,你怕做怕失敗0既事,好心就唔好係BLOG教人唔好做啦。
你份人失敗0者,好多人創業成功,亦唔需要ANGEL FUND架!

我兩公婆只係好普通0既公屋仔,可能我讀書多你少少,女主人讀書不多,但又可能待人接物好你少少。


除左收租樓,你仲有D乜?



2015年5月22日 星期五

換馬再做權,低息股換高息股

今日操作背後理念係乜?都係個句,唔好問我點解,我零金融智識。




電鍍版 nu Gundam, 成八舊水。我只素組真係有d side 左佢。


話說昨日比人行使左少於一半交行股票。。。套現左近四球。

之後決定換馬,又試多次會否比人行使。

全數買入建行,買入價7。53
(呢一刻中午收市價7。57)

之後,再做SHORT CALL XCC@7。5,權金0。243(比起交行,成交量多0既期權,買賣差價都細D!!!)

佢派息人仔三毫子,計番HKD大約0。37

買入成本係7。3

即係話,如果升到7。87以上,我幾肯定會比人行使,只能齋收權金。

如果除淨後,價格低過7,我就賬面蝕左。如果係7。5至7。87之間又無被行使,咁我就最著數了!

例如,7。6又被行使,雖無股息,但除淨後股價變成7。23,我即時係市場買番會平左。變相收番部份股息。

現時倉位:

即月SC 100張BCM@8
即月SC 100張BCM@8。25
即月SC 100張BCM@8。5
即月SC 100張BCM@8。75
六月SC 550張XCC@7。5

交行派息後,現金已達七位數字。
六月工作收入,好似比往年少左。。。

下一集,講下香港地仲可以有夢想,只有個D本身條件唔好又讀書唔成做人失敗,但靠樓市順風車上左少少0既傻仔,先以為要為生活放棄夢想,放棄自我。

2015年5月21日 星期四

除淨前被行使 期權

今日係19/05/2015

交通銀行除淨日係20/05/2015

(GUNDAM 00 第二季0既天人組合,我砌埋呢隻就齊了)


一如各位BLOG  友所講, 除淨日前係有機會被行使....行使左乜?

413 手BCM@5.75, 呢個預左佢行使, 不過估唔到過唔到十二月~!
21 手BCM@6, 同上, 都係十二月到期.
200 手BCM@7.5, 呢個好奇怪, 因為除淨後只能打個和, 行使真係有SO?

或者, 意味住交行將會大升!

即時套現左四球現金! 另仲有五球貨係手, 加埋手上現金, 又變左千萬窮撚!


(戴亞斯HG同埋沙剎比MG,配左燈眼同光劍好開心喎!)

 本來滿倉股票, 而家無啦啦套左現, 變左可攻可守, 真係唔知係好定壞。當然兩手準備,又睇下有冇咩貨可以買啦。

Q:沽出認購股票期權(SHORT CALL)係除淨日前被行使,咁有冇股息?

A:當然無啦,如果係空頭CALL,仲要補番股息比交易對手TIM!

結果, 無啦啦少左一半股息....嗚!

都係個句,再升再沽,因為仲係大把貨。交行跟據AASTOCK資料,現價股息已跌到得番 4.3 厘!扣埋10%手續費,其實已少於四厘了

少過四厘,衰過買樓收租。

不如等待機會沽貨,又等待機會借錢買更多股票。

後記:第二日已經換左馬又做埋期權倉,明天再行文講下操作。

2015年5月19日 星期二

500 呎買起一個人

好耐無發文,因為太忙了。
有BLOG 友問張床邊度買,我係 TASTELIVING 買,番大陸買太多不快經歷,SALES好專業又幫到手執漏,順手幫佢賣個廣告 www.tasteliving.net

 

深水埗精品購入,間野就係叫精品! 

美心旦糕! 無人生日都可食,好開心架!


踏入五月,又開始為下一輪工作作準備。如無意外,下一輪又要繼續忙,生意額應該差唔多。

星期六忙左但係weekday 有一兩日早放。

仲有年半租約到時又睇下做唔做。

每月六皮野,五厘息的話,1400 萬淨資產已ok. 如股市不跌,幾乎係必然做到。

近日有一篇咁既文,可能大家睇過。


當人人,尤其係80後70 後個輩,叫人慳d 錢上車,300 呎住住先,第時換樓,有買貴無買錯。

相反呢位老人家講出重點所在。

大家一齊營造投資獲利氣氛,d 樓真係唔夠住? 買間300 呎點解唔租? 不過而家租金貴過供樓,真係可以講句,租樓者比供樓者更有實力。
當然,我無考慮到無首期被迫焗住租個班。

他日租金回調,如果真有呢一日,班租樓者轉身都快d。 如果無呢一日,或者香港已經無哂其他產業,全靠租樓者做服務供樓者日0既工作了。

想像下,日頭番工做侍應,服侍果個又係業主,出左糧,你辛苦既錢又係交番比佢地。如是者,香港不用創新不用繁榮,過著塘水滾塘魚既生活。

你覺得有冇可能? 如果有呢一日,你估租金仲會升? 社會仲會安寧? 我兩公婆仲會留係香港咁on9?

"長遠樓價會升",係咪大家既合理同理想期望? 

心腸壞者,可買入數間400 呎樓買斷別人青春。

2015年5月7日 星期四

我的理財方針 未來版量入為出

為免文章散亂,呢個系列都係有關理財0既。

都係個句,大家環境唔同,切忌我去你又跟!小弟年入2M,另加老婆生意仔,收入不穩但勝在夠多。

從來不會買樓收租,別生活所需絕不霸佔,以免有報應。

下列為之前寫過0既文章,前段有點雜亂。見笑了。
前車可鑑 牛二下之月供股票 2015
零售之我見!日本集運買高達模型
2015年三月高息股之選
貸款精明眼3 之借錢買股
未夠貨的話, 你想升定跌?
小朋友利是錢 (2015)
等待論: 股市鱷魚 樓市水魚
三百幾萬期權倉 轉倉雜記
貸款精明眼 2
貸款精明眼 1
復活價內期權三個方案
外母的投資 -- MPF (2012)
有借有還之 東亞又借錢比我!

今次講0既,其實都係同借錢有關,並非教人生活上量入為出。原因男女主人兩公婆都係亂洗錢的人,不過唔大洗。


(Z高達狂熱中!!我洗錢都係買呢D CHEAP野,已經好開心!)

女主人收入幾多連佢自己都唔知,只係CHECK下戶口有冇多到錢就當收入。我自己就好D,一路有計住自己個BALANCE幾個,係逐日計,以便計算應收賬目回籠速度,同埋睇下有冇數要追。哈哈。。。

入正題!

因自己收入比較易計,年年都係個D旺淡季,同時客人數目達飽和之一倍,即係生意做唔哂。只要計下付出多少工時,就知有幾多收入。

如是者,借錢個陣,每月還款就可以係條數度計番出黎。

再加上,如果有股息,就有額外還款能力了。

舉個例,如果每月能還八萬蚊,兩年可以借幾多?


一共係184萬左右。要比八萬利息!

如果再計上一年40萬股息,可借數目當然會更多!例如220萬(粗略估計比算死草省時)

如是者,如刻下買入生息資產年回報五厘,能得到一厘多息差!嘩,真係少得可憐!利用股票期權可以將回報推高,多少百份比視乎你進取度了,一般加多五厘不是難事。(下文用權金COVER利息,將股息當供款能力)

若加上手頭上現金一球,以及第二年股息40萬,可借額度達360萬。

咪住,點解唔一球現金直入?要去借?因為咁樣可以增加安全度,若比人CALL MARGIN, 都仲有D 錢可以頂住!

如果真係跌到HIHI,我仲有老婆可以借少少(估計佢有一兩球散紙的。)當然,股票上我亦有八位數字,跌一半都有五球。

非賣股救倉,而係用股票抵押貸款佢填數。

其實仲計少左一點,因為買入貨都有得派息,360萬五厘就係18萬,兩年就36萬。假設期權金完全COVER 利息支出,過往經驗,係足夠有突的。

即係話,兩年總能力借款係396 萬,當佢齊頭400萬,可以係24個月內還哂。

呢兩年,我唔係貪佢有現金流比錢我用,我跟本夠洗有突,而係可以係預定時間內儲夠貨。

最大風險,梗係股價急跌!

第二大風險,梗係股價大升但比期權套住左賣出價,不能享受股價上升而獲利!(咁就同點樣開期權倉有關了)

各位將個SCALE 放大縮小一下,其實都計到自己借錢可以借幾多。

(400萬樓分兩年還,我肯定過唔到壓測!哈哈。。。)

十萬大關突破,多謝各位支持。

終於過左十萬大關!

(冒險樂園都可以好開心,勞動節,每位90任玩都好冷清。)

哈哈,搬左黎BLOGSPOT 一年,唔經唔覺就十萬個hit,比我預期慢左,因為卦住砌模型又唔想講黎。講去都係果d, 係度多謝各位支持,我會繼續9up,都係個句,走一條不同的路,往往開心過走大圍覺得安全既路。

亦都多謝各blog 友放左我網誌入你地個blog 度,如果我加漏左你地,留言話我知丫。

今日個市回番D,有朋友留言問我D貨有冇比人行使CALL 走,幸好未有。

過埋除剩日,應該會部新做0既都變廢紙,剩底舊有好價內0既12月期權。

派息前,應可以累積一球現金。

阿求死又係高地講樓價唔會跌,喂,有錢一定買樓?如果真係高收入,又駛乜比個D 壓測阻住而買唔到新收租樓?拿,租金都當埋收入之下,如你年薪一球,供六七八間,總動員,絕不是難度。

我只玩股,現水平,未可入貨。現金及信貸繼續待命。

唔係話咩價投定短炒,乜都好,買入時機最重要。

2015年5月2日 星期六

前車可鑑 牛二下之月供股票 2015

我估,好快又有好多人,或者係財演,叫人月供股票了。

其實而家係牛市二期定三期,重要嗎?
(圖為ZETA系列 AEUG GUNDAM MK II MG 2.0 HD COLOR版,分別就係多左分色,同埋有金屬色水貼)



即係咁,借錢買樓,而家好人多教,點解?因為貴到你買唔到,或者唔能夠大手買入, 咪教你買細價D, 慢慢一步一步買LAW!買入時機?教你果個一早入左貨,不輪多定少。

同樣, 男主人經歷過上一次牛一二三至熊一二三,上次牛三個陣,我仲係無聊進修緊個MASTER DEGREE,仲記得每日上午上完堂,出黎睇睇報價已經賺左兩年全期學費。

如是者,無啦啦亂咁買都可以迅速賬面獲利。

現在個市,都未到亂買可以獲利,只係之前買左0既人,個個紙上富貴。

同時,升市幅度太慢,跌幅又唔多,個人亂估經驗,還是牛二。離牛三還有一段日子。

不過,當好多人財富比層未套現又加按唔到0既樓套住,手頭現金唔多,唔能夠迅速享受股市0既順風車。

唔靠大夠錢,只靠每月唔算太多0既收入(例如某話自己半退休BLOGGER,月入兩皮多DD,收租得兩三層,現金又要交管理費供樓等等,可能每月節衣縮食得一兩皮儲得到

拿,兩皮野買得D咩?一手匯控都兩皮幾啦!所以,月供股票幫到你!

個人認為,買入時機更重要。不過時機已過,月供亦OK!不過,不要執迷,如已獲利什豐(例如供左兩年,賬面多左30%),可以走貨獲利。

若遇連續跌市,好多人會覺得買平貨,又有溝貨機會。其實,倒不如儲錢等跌得深D才買多D啦,係咪?

至少,我由2006開始月供,到最後,都只能平手收場,可見時機0既重要性。

至於月供邊隻,我無意見,有息無息其實都係咁(你未必持有咁耐),反而一D龍頭股會安心得多。月供盈富亦未嘗不可。

邊間供?梗係證券行啦,錢唔多,銀行收存倉都蝕唔少。致富,一通,耀財,總有一間係左近卦?

(時機要緊,又何妨踎多一陣?)


淘寶CG格納庫合照一下

黎緊會砌幾隻ZETA GUNDAM SERIES,補充番當年唔得閒玩。。。
Related Posts Plugin for WordPress, Blogger...