2016年6月30日 星期四

股票射倉有$2000回贈,中信射倉去中銀!

男主人又放大假,趁剛回港比較清閒,去附近銀行R著數。。。

BB戰士282號:天翔狩人摩亞屈!!砌後感在文末

為免各位錯過上一篇文果位偽長腿偽韓妹,上一篇文章按以下連結



講番正題,原來中銀射入股票50萬以上,有2000回贈!

去到無乜人,職員哥哥話要係中銀VIP理財客戶先有2000,一般個D得500/1000。

結果我要射足一球去中銀。為免股市下跌滿足唔到要求,我射左250000股建行。



先計下有冇著數,因為射倉要收費!由中信銀行射倉轉出股票,收費如下(幾蚊個D雞仔數唔計佢)

中信轉出股票收


250000X5。1(收市價計)X0.002% = $25.5

好抵!!

中銀轉入股票唔收錢

如果屎忽痕,轉番去中信又如何?

中銀轉出股票收


呢個好貴!一手十蚊!!!250手即係。。。

250X10=$2500

中信轉入股票唔收錢

重貴過回贈!

即係話呢,唔駛旨意轉走。。。只能賣。

真係捉蟲了!!!

翻查一下,七年前中銀只係$3.5一手!乜加左咁多?就係唔想比你轉走啊~

唔緊要啦。

無啦啦又做番中銀VIP理財客,話說原來我有好多彊屍戶口,包括兩個SAVING,兩個股票戶口,兩個支票戶口。

原因都係同供樓同埋OD有關,至少七年前了的事。。。有一個戶口仲係小學時留底,當年仲係叫做新華銀行。

有冇SO自己計下,我就算OK。反正無乜機會射走。

*********

呀!可能有人唔識射!(哈)

去銀行,同職員講想股票射倉,射入射出自己講。中信唔駛排,有人填FORM,中銀要排隊!股票行就有D可以網上攪(輝立WHATSAPP AGENT,一通網上按制),致富同耀才都要親身去。

最後送上近期作品,BB戰士282號:

天翔狩人摩亞屈!!

砌後感:分色好差!300號以下的BB戰士,唔貼貼紙的話好樣衰。上色一係痴膠紙做遮蓋做死,一係手油油死。。。當然,亦都因為我係低手業餘,但每次完成一隻都好開心,拎住佢自HIGH良久。


左為素組未上色,右為上左噴油未手油!

來個全家福!!我係得四隻BB戰士,這個係今年短期目標!上半年目標已達,就係上面隻百式及米加粒子砲(紀念亡友)!

有冇人知下一隻係乜?好易估啦下話~~~

各位留言是令我繼續九UP0既動力,必覆!
如有任何頭暈身慶,水土不服,或者約我去街HEHE一番
按此EMAIL 我啦!

心態決定境界8 - 短途旅行港人奇行種

舊文重溫

心態決定境界1 <運輸街車哥哥>

心態決定境界 2 <文員姐姐無手尾>


心能決定境界3 - 論創業 <叫朋友做影相佢當我點佢>


心態決定境界4 <四十幾五十歲個班西口西面女人>


心態決定境界 5 -- 淺淡同學妻


今次係釜山機場太悶開始打,上機後繼續吧。



此乃旅程 escort 韓妹,呀,其實係女主人黎既。。。同佢去三次韓國,都試過比人以為我地係日本人(LI康哥DES KA? 易耶!)。很肯定我個樣唔似日本仔!

酒店附近

釜山機場

海云台,可晒足半日,落去遊水會被淹沒,都幾大浪。

廣安海水浴場,其實都係沙灘

五六島,太大霧無去遊船

Busan gundam station。
價錢係香港一點五倍以上,睇下素組成品,唔順路的話不去也罷。

甘川洞文化村,懶係靚咁,又cross over 小王子。星期日去充斥好多真韓妹。

韓國海鮮非女主人想像中好食。不過一定抵過香港。

Line shop 正,買左唔少衫比男主人同仔女。


真正遊記有心機先打。留定個位先

<遊記按此>

老老實實,男主人唔太鐘意去旅行,語言不通又人生路不熟,不過女主人話要去就去啦。

麻煩奄尖0既男主人,去到邊都要彈一番,正所謂他鄉遇故知,見到(聽到)香港人特別興奮。

我尖酸地將佢地歸類,由後生到老餅。

1。港女青春系

呢班budget 有限,但食唔會慳。 常見既都係唔靚。點解?靚就同男朋友或者隻兵去旅行啦。一齊出遊都好醜,一肥一瘦又有,滿面瘡戴哂頭飾又有。最正係如果有奄尖女在內,另一半女仔就比佢當男朋友咁丙。。。抵你無人要既。

後記,上機回港遇到一個大口醜樣紙紮公仔咁化粧0既港女,以為自己好正,一路行一路四圍望有冇人望佢(哈哈哈!),仲好大聲講話有四個韓仔望佢。WELL。。。

我同女主人講,如果我死左,燒D高達落黎,真係要燒妹仔,唔好揀呢D樣!

女主人話:"嘩,佢個袋幾萬蚊(定萬幾蚊?),我都唔捨得買"

男主人神回一句:"幾萬蚊買個袋,點知坐廉航!"我張HKEXPRESS機票好似幾舊水仲打左個八折。

2。年青情侶系

通常唔出聲,就好似我地咁。除非衣著太老土,否則估唔到佢係香港人。各有各食野睇景,又唔嘈到隔離,影相又影兩張不用等佢大合照,幾好!

咩叫衣著太老土?大商場短褲踢拖扮悠閒,又或者背囊側袋插支水。

3。幾個港嬸去旅行系

呢種最易認,因為內地大媽未識自己去旅行(要同老公仔女去),幾件無胸瘦底眼鏡龜,其中一兩個短髮sporty look 就好有幾會係港嬸。

特徵講野大聲,但黎黎去去都幾句:

香港呢d 都有。。。

計番幾錢港紙。。。

講日常生活既事。

雖然我都會計下邊度抵,但係唔會隔廿米向住你班同伴大叫law,煩膠到不得了~~~!

老公去左邊?唔工作搵錢又點比佢地去旅行呢!又或者,無謂去到做班阿太0既人肉地圖同埋運輸車,留係屋企睇波好過啦!

4。一家大細系

就係一家大細,通常個老公都好八卦四圍望。(唔好再望女主人!)小朋友視乎年紀,某個歲數,去旅行是被迫及無奈的。

最無破壞力係呢D,各有各玩,你唔出聲我唔知你係香港人,除非阿老公又係背囊側袋插支水啦~

5。幾條佬系

莫名其妙!可能一齊去工幹,否則咁0既年紀,我大概會估佢地係去尋找歡樂。。。男人要聚舊,求其KFC都得啦。好心,叫D食得落肚架啦!當然,唔排除真係有咁鐘意旅行0既男人幫,又或者佢地係HEHE。

男主人識得0既HEHE,久唔久會去台灣玩(玩咩?當地有人接應照顧啦總之!),佢地有佢地旅群。

6。老野花旦小生去旅行系

就係好靜好靜觀光0既伯伯婆婆。唔出聲未必認到,因為衣著可以好唔同。如果要捱到七老八十先去旅行,我會選擇而家洗哂D錢就算~~~!

拿,我見到都係好似我咁cheap cheap 地去韓國個班人咋。你去澳門咁短,歐洲咁長,又係另一個niche 族群。

女主人沿途影左好多景同懶有詩意0既相,佢話第日要自資出書,而家用黎整插圖!我話,其實咁多張,成本書都係圖,貴到無人買!除非男女主人合力出一本,前揭後揭一雞兩味,可能唔駛蝕本0既。

各位留言是令我繼續九UP0既動力,必覆!
如有任何頭暈身慶,水土不服,或者約我去街HEHE一番
按此EMAIL 我啦!

2016年6月23日 星期四

男主人生意 - 被迫延長的租約

其實呢篇係唔知幾千呎高空上寫,係飛機上無網絡之下save 係電話度。

話說男主人東亞信用卡有hkexpress 機票優惠,所以今個假期揀左坐hkexpress 去釜山旅行。

之前坐國泰,我又唔覺得特別好。
如女主人所願,今次去左T2 非禁區環亞機場貴賓候機室。

早知入左閘去T1 果兩間,T2 無野食。
我都係典型港豬,信用卡入唔駛錢。
邊張信用卡可以免費用候機室?
我用中信銀行國際citicfirst白金卡,資產要求一球就夠。

女主人用匯豐信用卡(公司卡),唔知年費幾多,好似無資產要求,女主人次次打去waive年費。另外,竟然hsbc premier 唔得。

昨日,男

主人公司炒旦機器sales 約左傾續約。因為年尾就到期,而租約仲有一年半先完。

咁點好?唯有extend service。sales 梗係想sell 新機,可惜太貴唔值(速度不變有咩用?)
仲有,extend service 半年後開始,一簽就要兩年(大公司規矩),但男主人租約年半,即有一年浪費左,都浪費三四萬蚊。

如轉用新機,要簽三年,但因合約可即時生效,即續多兩年半,浪費年半。

如無意外,會轉用新機。租約到時再續多年半。
即係我仲有三年要做!

是否很不智?非也。

如資產升到離譜,即時唔做賠錢。咁鋪頭租約可唔續。

如維持現狀,到時最後一年,一星期番三日便可。估計每月都有至少三萬純利。視乎開係星期幾。

如經濟唔好,咪踩盡三年,預計衰極三年之間未計股息收入,工作入收帶來三百萬儲蓄。

真。退休之時,都未夠四十歲。

咁睇黎“我可以唔撈嗎” 系列,係會過一百集了。

其實,點都有少少唔捨得d 生意仔。一黎始終係老本行,二黎班客人食開有感情,到時可能同埋女主人一齊劈炮呢!?

題外話,男女主人都係孖展借抽ibond。為免有太多利息支出,已首日沽左。

女主人103.6,男主人103.5。

賺左幾多?男主人$594元。有圖為証。

下圖為 shf shampoo,亂馬1/2 入面的中國姑娘珊璞。非常可愛呢!係深水步福利買左$275。



2016年6月21日 星期二

心態決定境界 7 -- 壞男人AGENT

今次砌左下面個隻 SD BB 三國傳!孫尚香高達!



砌後感在文末

舊文重溫

心態決定境界1 <運輸街車哥哥>

心態決定境界 2 <文員姐姐無手尾>


心能決定境界3 - 論創業 <叫朋友做影相佢當我點佢>


心態決定境界4 <四十幾五十歲個班西口西面女人>


心態決定境界 5 -- 淺淡同學妻


(其實呢篇野打左成個月有多, 而家才PUBLISH 一黎自己爛尾,二黎肯定左男女主人立場先打啦。)

女主人話我有時太單純/一廂情願, 以為人地同你FRIEND 其實又唔係;同樣, 女主人成日同D 有金錢交往0既人成為朋友, 其實都幾危險。

AGENT 就係其中一個例子, 不論邊種AGENT,

有時, 佢地的確幫到手, 但係係咪FRIEND 到你可以縱容佢? 當然唔係.

樓盤AGENT 如是(阿大嬸其實幾好, 不過都係個句, 不能全信.)

保險AGENT 也是。

<文章較長,請必看人物介紹>

今集主角,是位保險男!
三個女仔,先後次序為



AGENT女,二十尾(現已結婚,有美滿家庭事業及一BB)

留學生女,二十尾。初戀,未婚比人攪大,無名份下分手

教琴女,三十中。已有家室及一患病兒。後自願拋棄家庭離婚及應承了男AGENT的求婚

先講明,免生混亂。

****

這位保險男,其實佢都幾得閒, 相信是一位食家, 佢上上一位女朋友(AGENT)雖然都係一腳兩船之下飛左男方, 不過都係因為男方曾偷偷溝公司另一同事....哈哈。

點解會講佢? 因為佢地都係女主人由金錢變朋友0既人!

分手後如何? 男方當然不停識女仔(正常丫!), 最後溝左件未拍過拖0既女仔。樣非常一般, 可能只因為個女仔係一手車(唔明0既留言啦)...份人係點我唔知, 零溝通。

最後,呢位AGENT男攪大左人地個肚,話要結婚。

點知,最後好似話想用單親家庭輪公屋(男AGENT透露過都月入三萬幾,女方點都有萬幾,出國留學架喎!),結果無結婚。

生左出黎之後,繼續無結婚無名份。

其實,我認為呢位男士出於怨氣同報復。

上上位AGENT女朋友飛左佢之後,已經好幸福同小學同學結婚再生仔(非奉子成婚),過住幸福愉快生活二人世界不用同家人同住公屋

男方結果好似想鬥快咁,又好快識條女,攪大埋個肚,係唔結婚咁解0既。可能真係巧合啦,不過我主觀就認為係自卑心同報復心作崇。(留學生女友好慘,成犠性品。)

今年年初,我同女主人發現佢地FB唔係好對路,結果佢地分手了。男方因為有第三者啦,全世界都睇下佢FB親密照,拿,大家都係男人,條女係佢圈子內的朋友,你話分左手先識真係無人信。

新果條女仲要係教徒!噢,最UPDATE係男0既都番左教會。當然,前度(幫佢生埋個女後分手果個)係FB講一句,姣婆又要貞節排坊!正喎!

最慘係,果位初戀拍拖再懷孕0既真單親媽媽,只係得29歲。

男方原因話個準老婆同老爺奶奶相處唔到,又話睇唔起對方家長云云。其實我地唔知係點,不過男人老狗有點承擔得唔得?同一屋簷下梗係難相處,點解唔搬離間居屋租屋住?又唔係無錢。

邊條女靚D?真係不相伯仲。(我會揀未婚媽媽留學生,至少人地仔都同你生埋,又後生D)

第三者最新資料!原來條教琴女都有家室。結果又要攪離婚,人地又係有個仔(8-10歲啦),做乜維生?原來係教音樂,不過教得好HEA,一個月幾千蚊。講明白D,就係所有洗費老公出,唔夠錢洗問下老公拎。

睇呢位第三者FB,典型港女!其實結左婚,重見佢放D高抄照飲飲食食相,真係搏比人溝咁0既格。

佢無厘頭搵左阿女主人傾訴心事(其實佢地完全唔識架喎),原因係佢覺得個男人(AGENT)厄佢,當時兩段關係起碼重疊左半年。

佢覺得自己唔0岩?非也,其實,佢都係想搵個人認同佢咁做係迫於無奈。三十幾歲人仲戀愛大過天!女主人最唔鐘意最不屑0既係:

佢要求男方以後唔可以再見佢親生女兒!而男方亦親口應承左!

女主人已是EQ極高容忍度極高之人,我再提呢對男女之時,女主人都語帶怒氣講唔想提佢地!(當然,佢身為媽媽一定好憎呢D咁輕易話唔再見自己仔女0既人!)

留學生離開後,帶一句:"你以後娶唔到老婆!"結果呢?男AGENT對教琴女友不停求婚,最終女方應承左。會否最後又成為怨氣而報復的犧牲品?大家拭目以待。

大家唔好以為呢D男人好廢好唔討人鐘意!其實如果你係女,你初見佢會以為好有料!佢係個D得把口樣樣滿口道理的人,即係D女無論有咩煩惱,都會想問下佢意見,以為有個見識廣0既人幫手,其實,唔係LAW!

以為自己好有道理,但其實無乜料到0既人。通常D女都好BUY架喎!(隊長要學野喇,唔可以次次講自己有樓收租架

女主人評價:"無責任心,似熟賣熟"同埋佢同生左個女果位女友一齊果陣,都有攪上女主人其中一位舊同學!(非女主人介紹)

女主人其中一份基金單,因為斷供而被迫沽清蝕錢。當然女主人有萬分責任,但同時佢亦輕信AGENT一句:"到期我會拎黎比你交錢"

<心態決定境界>,相比佢前前任女友(AGENT),同為AGENT,成就差好遠。

人地買番自己間公屋,同新男友(中學同學)結埋婚,已生埋,幸福美滿。雖然我最初唔鐘意佢,不過原來條AGENT仔都唔係咩好人。

女主人話,可能男AGENT有睇你個BLOG,其實我又無乜所謂,佢咪當我呢D係世俗人眼光LAW。

男AGENT 都成3X歲,仲咁亂黎,可想而知佢工作真係好極有個譜。就係當初女主人乜都唔識跟佢買單。。。女主人唔知點解會有三份人壽保單。。。WELL!

如果未玩夠,就唔好去攪大人地個肚,如果只係報復或唔想輸,唔該唔好害到其他人丫!可能今次係為報復而去同人結婚,又為自己拆散自己家庭去拆散人地家庭!

在此勸告各女,係無任何實質成就之下,誤信一D大條道理0既男人從而拍拖,真係危險非常!

亦因為咁,當男主人當年2X歲生意初有小成之後,有女埋身(尤其係老師女!)都會十萬個小心!究竟佢係為飯票定什麼?當時(十年前)男主人仲二十頭二十中,仲以為因為某舊愛拜金而走(不過肯定是原因之一,只不過未必是主要原因吧,現在對方也離婚了。誰人做了對的選擇?)

*****

女主人睇第一張相,問我係咪矇面超人。。。。頂。
呢個係孫尚香高達!

手油金邊好X辛苦!粉紅色係GAIA銀溝MR HOBBY METALLIC PEACH。為左翻新我二十年前的BB戰士而作練習!

未手油前:


手油後完成品





各位0既留言係我繼續九UP0既動力!
小弟生活鎖事或股票期權小變動,會先係FACEBOOK分享,再行文。按此LIKE我FB PAGE

2016年6月17日 星期五

經濟變差了 (二) 女主人生意

先講模型,以下係國產 1/100 BTF ZZ GUNDAM



砌後感在文末

大家有冇抽IBOND? 輝立 IBOND 又出事,女主人無得抽,系統出錯。咁都得!? 拿,男主人無事,不過我少少地賭白頭片抽左三萬蚊0者。一手當食個飯。

講番女主人生意麻麻,其實都唔係今個月0既事.

今日佢番到屋企, 話好累. 其實估到佢又得閒左一日!

因為無野做坐係度,先係最悶!有事做的話,一日好快過,係咪?

都係個句,如果做唔住,都仲有我養。我客人好高端,除非去到谷底,無乜可能我會被人CUT BUDGET。(到時一定寫BLOG 叫定各位買股買樓)

如果真係要蝕,都係租金同人工,有限數,幾十萬。重要假設零生意喎!

男主人公司都係咁,生意一路爆哂錶,預計下年都係咁。。。直至租約完結。

如果女主人做唔掂,我咪又撈多兩年LAW,無乜野0既。當搵埋佢退休個份。

下星期男主人生財工具要續約,要換新機。真係千萬個不願意!

一黎張約又簽過,正常一簽就五年,我得番一年租約,點好?另外,換新機又要學過哂點用,我唔係好想學唔係好想理。

咁耐無UPDATE,當然我唔係死左,只係天口變熱,我D生意忙到七彩。等天氣熱定左,就好清閒了。(23-28會離港數天),七月頭又係輕鬆放假~

講番女主人,佢個生意由2009年年底到2016年,其實都有六年,花無百日紅,呢六年搵到0既錢都唔少,平手下,蝕下都可以接受。

可能我講得輕鬆,因為我自己生意好難蝕錢,成本唔高!只係最怕因年紀問題做唔到。我打從一入行已經知道,開頭以為只可以做十年,點知做下做下又可以繼續。當有新人加入呢行,佢D配套又唔夠我黎,不過今年已經唔覺得有人入行了,可能大家知道飽和左?

經濟肯定差左,眼見一D唔算太有錢(可能我有過佢)0既客想唔食但又要食;又見有新客食兩啖無理取閙走左(呢個好爆,走黎鬧我,十幾年可能佢係第一個)。中中產產0既都開始縮皮。

你睇下D普通地鐵商場人都少左就知啦。

有錢個D唔影響,但揹左筆數要供樓個D呢?

再艱難既年代我都經歷過,即使經濟下行咪慳D洗。

當人人都慳,你估租務市場會點?你估仲有冇咁多人借錢買樓?

我其待出現這個時代!時這個時代,才是年輕人發圍的時代。

下圖為國產翻模 BTF ZZ GUNDAM! 1/100。

人仔85蚊!如果比我揀多次,我唔會買同砌佢。
剪件已知唔對路,咁多無謂分件。
噴果陣仲衰。。。d 膠差。仲噴左好耐。
砌,大力金剛指伴粗口少不免。
滲線,我低技術人士玩下0者,連坑都無條。。。
上水貼,成九十張。感覺似砌rg...
最正係支砲,雙槍又得單槍又得。雙槍下手關節改改下可免不舉。
珍珠白配金屬色,傷眼莫怪。






雖然砌得好痛苦,不過砌完0既成功感係值得0既。

都係個句,唔專業有唔專業0既快樂。

今日交收高達,果阿姐問我咁大個人仲玩呢D野!哈哈!唔得架咩?問我係咪成屋都係,都唔算,因為放左唔少係公司。


各位0既留言係我繼續九UP0既動力!
小弟生活鎖事或股票期權小變動,會先係FACEBOOK分享,再行文。按此LIKE我FB PAGE

2016年6月8日 星期三

心態決定境界6 -網誌被舊同學發現!

呢個係列,要寫真係要等機會。衰人好人街上好多,但係要有題材不易。

之前尖酸刻薄左幾集,今集貼番地少少。

各有寫BLOG的BLOG友請務必睇文末最尾幾句。

舊作一POST,因為隻ZZ未上哂水貼。我估隻MK II 賣到400蚊卦。。。哈!

心態決定境界1 <運輸街車哥哥>

心態決定境界 2 <文員姐姐無手尾>


心能決定境界3 - 論創業 <叫朋友做影相佢當我點佢>


心態決定境界4 <四十幾五十歲個班西口西面女人>


話說, 今日約左幾位大學同學出黎食飯。杯野飲幾正,仲有短褲韓樣女待應,靚唔靚見人見智。幾個都扮唔識中文。。。


旺角瓊華中心15樓!上星期已經想同女主人去,點知佢話想食冷面。。。

男主人大學個科都算出名,當年量化寬鬆之下,一班有成百四人,但小弟的聚會只有四人,何解?

因為可以大部份同學都做番本行,非本行者溝通唔到。再加上男主人仇家多(某中同用字),對男主人來說,可以成為朋友的,絕對珍惜。

在此感謝各方朋友(新聞組的,中同,大同的,模型友的)一直以來對小弟亂UP的容忍。

咪住,跟本佢地唔知我有呢個BLOG!!!

點知,今日聚會之時,我隔離果位同我講,原來佢一早睇過!我問佢點知果個係我,以為佢認到我D仔女啦,點知原來係咁。。。

有日佢SEARCH"心態決定高度"SEARCH到我個BLOG,睇我講讀大學0既事,佢發現事件同語氣都似我,再加多兩隻高達就穿左煲

我即時心裏一涼,究竟我有冇講過佢D咩呢,應該就無喇,佢老婆重係靚女一名,結婚果陣成個張燊悅咁!

如果你係現實生活識得我,又知我呢個BLOG,可否私下告知,或者,你FACEBOOK LIKE 我個PAGE,咁我知係你。求求你!朋友不要躲在暗角看,好嗎?

噢!唔記得講,佢係一位醫師!機緣巧合有次我9UP叫佢用某D方法起個網頁,結果係開業初期帶左唔少生意,至少輕易捱過創業捱租果一段日子。其實於我而言,都係得把口,朋友都好有勇氣覺得我唔係老點佢。

相比起 <心能決定境界3 > 果位中同,如果佢肯信下我,而家唔止呢D境界。

我當得你係朋友,就唔會陰你。我係由細到大都行古怪路古怪思想0既古怪人,心中所想的雖未必一定0岩,但好多時你未必諗到!

阿朋友現在至少都十皮野一個月,仲義務唔派卡片式講TALK,義診!聽到佢講比我地知,感覺佢又升左LEVEL。(班收租仔連書都未讀好,唔好講呢D)

另一朋友,善良非常(身邊總係呢D好人),已成為女警長!一路以黎,從佢口中得知果班激進民主大叔,是如何記者鏡頭前一個樣,鏡頭後又另一個樣。以我所識0既剩女黎講,阿警長都幾優質,奈何佢比較深歸,到而家都未有著落。

再另一朋友,教書先生。仲要住同區,佢住係D盤。連佢都同意老師一輩鐘意講道理,講埋一D橫蠻無理0既道理!呢位同學上年買多左層樓(不是收租,是家人住,或許是巨變),一買就跌左一成。九成按。。。不過兩公婆都係老師,現金流穩定。

樓上兩位同學,唔好爆我個BLOG出去啊!

雖然即使比人知,佢地越鬧,越鬧我懶叻無聊,我個人感覺就越爽!!!

女警長話齋,你讀書時候已經好鐘意寫BLOG!!

無錯,十幾年前我已經用HTML寫網頁寫BLOG!好多同學偷偷睇明明睇,睇下我有冇講佢地。百幾人講得幾多個?我重好無聊咁幫某D同學畫佢地個樣做埋角色比佢!

仇家多?未必無因!不過我覺得好好玩!騎尼行為同學,走綫同學,我都會寫。

以公務員職級計,原來已經有同學去到副校長人工!噢SORRY。。。我唔想講錢,不過我係佢0既DOUBLE。走綫又有何用?

其實阿走綫女同學走綫都算走得有道義,不得不提係,佢當年都算OK,仲約我單獨打波,帶來我無限FANTASY,不過我好快發現,原來。。。


佢想約我番教會而已。
哈哈哈哈哈~~~~~!好彩我也嗅到事情不太正常。

最後,有一個令我覺得好婉惜0既消息。

我的初戀情人,原來已經離左婚。原因不詳,同學話係唔夾,我估同學所知都不多。

我同佢分手於2002年,而咁巧合我同佢都係2011年同自己另一半結婚,斷估阿初戀情人同佢老公未結婚前,至少都拍左6-7年拖呀,何解會唔夾?令人費解。

雖然分左十幾年,聽到呢個消息有點兒心酸我不是多情種(女主人放心好了),佢老公都係我同學,就係個D倒模出黎一D特色一D性格都無果D用J諗野0既男仔。只是,如果因為對方的風流或對方的不理解而分,我心中總有點點忿恨!

就好似自己朋友被別人欺負一樣!

我與她?了解我的初戀 八千里路雲和月

坐的士回家期間,同女老師傾過下,我寧願我D 仔女做BIG FISH LITTLE POND <香港教育系列 - BIG FISH LITTLE POND>好過係名校度唔上唔落,因為我見過呢位初戀情人,同我讀書成績相若,但從小被人睇唔起被家人忽略而令自信無乜0既初戀情人,最後成病。

醫師同學話,見過初戀情人多次係旺角出現,好瘦,或許我明白原因。

最後,說來慚愧,我個女份人似乎同我一樣咁麻煩,挑剔,牙尖咀利,揀朋友奄尖。好彩0既係,佢個樣生得好睇受同輩喜愛,至少不用走人條沒人認同只有酸葡萄偷看的路。

建行真係唔知出左幾多日陽燭了!連帶身家又過千。

最後,希望各BLOG友原諒小弟唔識做,其實好多BLOGGER 都LINK左我個BLOG,如果你都想我LINK番你,不論流量我都好樂意。請留言附上BLOG LINK,好嗎?我後知後覺,失禮哂。

送上靚女兩個!

2016年6月5日 星期日

我可以唔撈嗎 17 (去蕪存菁;又上千萬)

今集好多圖!

剛訂下左下半年工作進度,影響深遠。其實一定互相影響,因炒旦生意有連續性。同時,亦估到之後兩三年0既生意額。現在咁鋪排,為退休前過渡工作留手準備,不用一刀切收檔,做人有交帶D好!

上回提要,入廠前呢隻野未上水貼,未手油背包飛機。用左兩晚(一晚手油,一晚上水貼),終於完成。

MG ROUGE STRIKE + IWSP
中文係嫣紅突擊高達,係女主角(?)回收再用男主角上一季0既廢棄機。係邊隻?

就係入廠果隻!

金屬粉紅溝左好耐先做到三隻分色!(我屎),對GUNDAM SEED係無愛,只係有日帶個女行過福利,佢話指住話鐘意粉紅色高達!砌好左。。。佢又無視!高達0既野,佢識條鐵咩!

玩野之作,經典重溫!
我可以唔撈嗎 1
我可以唔撈嗎 2
我可以唔撈嗎 3 (減父母家用至自由咁仆街?)
我可以唔撈嗎 4 (葵花寶典)
我可以唔撈嗎 5 (你真係信做埋唔夠交租?)
我可以唔撈嗎 6 (幾日千萬富翁)
我可以唔撈嗎 7
我可以唔撈嗎 8 (我係溫室小花,你做唔做得起?)
我可以唔撈嗎 9 (性格是遺傳)
我可以唔撈嗎 10 (唔同年紀, 目標不一. 六十歲仲講有收租樓?)
我可以唔撈嗎 11 (讀書真係無用?)
我可以唔撈嗎 12 (深水埗玩具模型倉有我整0既模型)
我可以唔撈嗎 13 (買夠貨)
我可以唔撈嗎 14 (千金難買少年窮)

我可以唔撈嗎15 (建行減派息 成功財務自由)
我可以唔撈嗎 16 (入廠維修


<檢視唔撈指數>

<講工作>

其實每日番幾粒鐘好輕鬆,不過真係有點點悶,同埋個人唔係好激得。將一D唔好0既客慢慢轉走吧,或者咁講,佢好我就對佢好D,唔好0既,盡量都係唔好憐憫吧。對自己殘忍,一黎令自己更早萌生去意,結果其他客都無得食;二黎亦減少對家人影響,至少我活得健康D。

去蕪存菁,可以令自己工作上更加開心(不嬲都無壓力),去到呢個境界,已經奢侈到係自己ENJOY與否。

講健康,比模型WHATSAPP GROUP 谷友嚇一嚇,我買左呢樣野噴油,感覺好大陣象。



本來我有個八吋DIY抽氣箱已經無乜味,用左佢係咪好D?唔覺,至少噴左兩隻高達都未見舊棉變色(D人講到好誇張)

幾錢?3M淘寶90人仔。香港當然租貴唔止呢個價錢啦。

工作上唯一令我堅持的,可能就係砌模,或者如果可能女主人生意要執,我繼續做0既動力會大好多。擔起頭家,無奈我老婆雖搵得少過我,但已可以請我食軟飯!(SORRY,我食股息已OK)

<講資產>

物業:無。不過若住緊B2盤跌到6球以下(上個月成交剛剛穿左七球),可以考慮買住個三房先(本來想買四房),大半年前有人八球幾買入。呢百幾萬買忍一忍就得,否則夠租十年八年樓了。

強積金:依舊,少得不值一提,到65歲唔知夠唔夠買個骨灰位比自己!

保險:剛睇左四皮幾醫生,CLAIM番幾多?如下圖,我係宏利PLAN C(第二最平個隻)



股票:噢,個市又升番,個倉又變左千萬倉。本月除淨,小弟玩無限加時鬥長命,買入數目有嬴有輸。正因為價低,先買到咁多。股息預計57萬,除番$47K一個月咁上下。夠養長輩兒女交租自用仲有得儲。養埋女主人都得,慳D就可以。(搬去租平D又得~)

現金:因為部份資金係女主人借出(息口兩至三厘咁上下),為左還呢條LOAN,現金當零!預計下年年初還哂。

負債:東亞P LOAN最後一期還埋今個就完(APR2。X,抵架!),不過應該唔駛再借。

粗粗地估計,家庭資產1200萬左右,不過無樓,本家庭正失敗者,讀咁多書都無鬼用一群吧。

講其他

六月尾會去釡山旅行六晚,我同佢都鐘意去韓國。未拍拖前去過濟州,好RELAX。一兩年前去過首爾(感覺唔好,我同佢唔鐘意鬧市唔鐘意SHOPPING)。如有釡山好玩野介紹下。

再另,女主人走去讀電腦,話係工作需要。希望佢記性變好,真係記得學過D乜而又用得番啦。以前,佢仲後生,走去讀書都會有人溝,今次太多小朋友,同埋一人一機,佢無機會比人溝了!(男主人七頭一條,讀碩士果陣都有中女APPROACH。。。讀書就讀書啦,做乜亂攪男女關係!?)

補多兩張嫣紅突擊高達0既相!留意後面個兩隻,就係剛剛星期五噴的。




其中一部,是小弟某朋友愛機,亦係點解近呢半年係咁噴油砌高達0既原因。。。講比人聽,人地話個原因好沉重。我又覺得這才是人生!

咩原因?砌好先講,請看下回分解!唔好打我。

各位0既留言係我繼續九UP0既動力!
小弟生活鎖事或股票期權小變動,會先係FACEBOOK分享,再行文。按此LIKE我FB PAGE
Related Posts Plugin for WordPress, Blogger...