2017年2月15日 星期三

HKTVMALL體驗 - 擊敗老野系列

話說,男主人住0既屋苑唔近街市及超市,要行十分鐘左右。

每朝送完小朋友上校巴,就行去食早餐,有時中午才番公司(都算悠閒架)。

如果要買米,油或大量飲品(維他奶是每家必備吧,不過我無持股),要拎十分鐘路程,對我呢D書蟲港童黎講係好辛苦。

咁當然網上買,等佢送貨黎。

百佳惠康價錢各有平貴,唔同時段唔同野平,要格價真係要毒男無女朋友無朋友自己一個人日日對住四面牆先有咁好心機去睇。

以送貨時間,百佳跑嬴惠康成條街,所以上年都用百佳。

至於個別信用卡優惠,通常我無份。

自從2016年年尾女主人用過HKTVMALL,一用難忘

1。有MALL DOLLAR,即係回贈,可作下次使用。唔係卓頭,因貨價比兩大超市0既特價重平,加埋回贈其實已平唔少。

2。免費送貨金額少一半,只係250。不過百佳即時已從500調整至250。

3。送貨好快,今日落聽日送,同百佳一樣,惠康等兩三日。

4。種類好多,除左CC LEMON之外,應該全部買開用開0既佢都有。重有唔少平時大超市買唔到,例如紅圈牌沙甸魚,算大牌子吧,四川風味個隻,我只見HKTVMALL有。其他超市只得最普通兩隻味。連貓糧都唔只得喜躍同偉嘉,我兩隻貓而家食MIO餐餐清哂!



5。女主人至愛,因有小型家電家品買。例如近期好興用黎瘦面0既24K BEAUTY BAR黃金棒!只賣$768。(註,非日本製更平)仲有書,CD,LEGO賣!當然,有D係同其他商店取貨(鴻興玩具),送貨時間就耐DD。題外話,買高達好X貴,唔好去買,要買幫襯深水步玩具模型倉啦。



6。佢星期二有一蚊五蚊十蚊區,例如一蚊包薯片。(貪小便直而已,真正整體平唔多)

7。杯面薯片都平少少或同價,但扣番MALL DOLLAR就變左好抵。


 我有個大學同學,住JUNK BAY!佢話佢個頭係一個香港屠場,你買左樓入去住?雖然已經唔係開荒牛年代,不過入面只有一型商場,而大型超市變左唯一選擇之下,又要交唔平0既管理費。除左供樓,其實一路生活都係比地產商食哂佢D工資收入。

我同學當然唔係讀書唔成個D,所以就讀唔到史丹福大學喇!不過佢懸壺濟世,常常義診。

真正幫人者,必然不收分文;收得你錢,而你又唔係窮到要人幫,你估係咪有古怪?再者,幫人應用本身專業,無啦啦轉行真係好攪笑呢。

要擊敗上一代,或者上一代0既模式,必然係用一D佢地覺得新或者無可能0既野。

網購就係好例子,HKTVMALL開頭我都無留意,又係女主人用下用下又OK喎!

就正如當年淘寶,好多後生仔都怕大陸怕內地人,而家好多人識玩啦。直到今日,香港D大陸貨開始平過淘寶了,點解?點解0既?

你睇緊MYTVSUPER?其實我七年前已用緊ANDROID BOX。

資訊科技年代出世0既,你地最強而有力可以對抗上一代0既,至少有呢一樣。

唔係叫你做IT,就咁用都好開心丫。

好多上一輩用黎食住班後生0既方法,其實並非牢不可破!

35 則留言:

  1. 不能同意更多!!! 加上智能手機普及, 隨時隨地都可以購買生活所需, 又快又方便, 最重要係抵, 更乎合新一代的購物標準!!

    回覆刪除
    回覆
    1. 快, 方便, 同抵!
      有些店鋪其實可以不用存在.

      刪除
  2. //收得你錢,而你又唔係窮到要人幫,你估係咪有古怪?
    哈哈。呢句可圈可點。更奇怪的係,唔係窮到要人幫又唔係蠢到要人幫的,都鍾意比錢搵人幫。

    回覆刪除
    回覆
    1. 哈哈, 以為要有收獲先要有付出, 但又無留意付出時間同付出金錢實際又唔同, 再者, 睇準呢D "聰明人" 0既騙子四圍都係.

      刪除
  3. 怕就怕在網購成行成市,搞到街舖執哂,所有sales (大部分為後生一輩)冇得撈。

    Teddy

    回覆刪除
    回覆
    1. 某D 工種, 某D SALES, 係要被淘汰.
      唔係年青人問題, 大把工可以做. 年輕又有彈性.

      刪除
  4. 啱啱先訂左15kg 金象米 x 2, 廁紙一大堆,方便快捷-)
    買過好幾次,送貨哥哥抵贊-)

    回覆刪除
    回覆
    1. 係, 米, 油, 飲品, 真係送貨好過.
      幫零售業慳番唔少鋪租.

      刪除
  5. 其實衣食住行都可以上網睇完訂好曬,睇樓買股票都online嘅時代,好多中介都可以淘汰

    回覆刪除
    回覆
    1. 連訂機票, BOOK 哂店都可以網上攪掂啦.
      有D 行業其實可以慳番唔少鋪租!

      刪除
  6. 網購無論大陸定台灣都普及過香港好多,這方面香港其實幾落後,例如淘寶送住宅要加三十蚊,但送Office就唔使(明明就係隔離),都唔明點解。

    回覆刪除
    回覆
    1. 點止, 你一講網上買野, 即時一大堆人出黎阻止你.
      說之以情動之以理, 上至品質下至誠信, 叫你唔好網上買野...
      總有人害怕新事物吧.
      不過, 香港人工貴, 即使網購, 中間員工都要出糧.
      所以淘寶其實至少平在人工上.

      刪除
    2. 好久以來,我都懷疑香港有一班龐大勢力有意阻止香港網購發展,因為網購一普及,高租金就會受影響,影響咗一大班既得利益者。例如屋苑保安唔肯幫住客收網購物品、送住宅要收附加費、網上付款保安唔用一次性戶口號碼(這種技術在台灣網購好普遍)等等,都係橫手!

      刪除
    3. 係, 重有久唔久有人走出黎講網上保安, 貨不對辦...
      "因為網購一普及,高租金就會受影響"

      租金唔受影響, 年青人如何睇到前路?

      刪除
  7. 我都想用呢啲服務好耐,人多唔想行,不過老婆話自己無得揀,怕超市塞啲爛橙入嚟。

    回覆刪除
    回覆
    1. 咁外國會唔會咁衰?
      香港應該唔敢咁做.
      同埋唔知有冇得買生果呢...

      刪除
  8. 我同學當然唔係讀書唔成個D,所以就讀唔到史丹福大學喇-----呢個logic我中意

    回覆刪除
    回覆
    1. 呢個LOGIC 我都係了解左唔夠兩個月, 真係好快學識~

      刪除
    2. 加埋變咗if and only if, hahaha

      刪除
  9. 高達模型我知邊間? 搭車回家會經過, 幾多人架!

    回覆刪除
    回覆
    1. 哈, 得閒入去睇下, 放老闆棄置左係角落個隻GUNDAM DX 係我噴...

      刪除
  10. "要擊敗上一代就要用啲佢地覺新或冇可能既野"
    咦 咁我地呢代可能會覺得有啲野太普通而忽略左wo,由呢個角度去諗一樣小生意應該係幾好既方法?

    回覆刪除
    回覆
    1. 係, 其實可能真係身邊你日日見日日用又好明白0既野, 偏偏就係上一代0既死穴.

      至少, 我兩公婆做0既, 都係上一代自己攪唔掂0既行業.

      我初初搬鋪, 管理公司D人仲笑我"乜呢行好好做架咩?"

      刪除
  11. 我家女主人成日網購, 我的職責有是係幫佢拎包裹 (因唔係咩都可以送上樓).
    成日唔知佢買左咩.

    回覆刪除
  12. 睇完70S 寫幾篇打敗上一代文之後, 我不自覺咁走左去自修coding and programming XD

    回覆刪除
    回覆
    1. 重點係個概念。
      我d programme 已外半左比淘寶。。。

      刪除
    2. 我估你係做有實貨生意個類?
      我諗緊嘅係靠純IT去同上一代撼, 就好似gogoVAN咁

      呢類工作有概念只係第一步, 落手寫code同之後promo先係決勝關鍵
      唔知你又點睇?
      Acyl

      刪除
    3. 我成本極低,有冇實貨就不能相告。
      純靠IT,倒不如傳統加IT,秒殺上一輩。

      刪除
  13. 其實只係另一班老野贏左誠哥等chain sotre operator 老野(阿里、amazon,等嘅老野股東食左大部分利潤,網店主因競爭大,只有爭拃求存),programmer不需太多人,大部年輕人以後只係可以做搬運工了

    回覆刪除
    回覆
    1. 其實個班唔係老野。。。
      不同地方老野年齡不同。
      至於年青人做搬運? 咁年青人會上門主動殺左班老野了,匿名者,你好可憐。

      刪除
  14. 我指除左Mark Zuckerberg 同 Larry Page 幾個初創者,大IT公司啲stakeholder, 肯定係啲有錢老野佔大份,因為IT公司靠venture capital, 而呢啲capital又係老野啲capital, 好似李嘉誠都持有facebook. 網購請得最多嘅人就係送貨搬運工。IT嘅初衷就係要大量取代人力。

    回覆刪除
    回覆
    1. 你講呢D大粒其實無乜意思,小市民,打低上一輩小市民絕對唔難。
      識用電腦0既後生仔,同一工種,都可以打低乜都唔識0既老野,送佢番大陸退休。

      刪除
  15. 師兄﹐$250 送貨 <-- 原來你女主人都買到變 VIP 了(我家女主人都係咁 XDDD)

    柴米油鹽唔洗自己搬係絕對優勢﹐尤其對雙職家庭來說﹐放工仲要去超市搬厠紙﹐傻的嗎?

    LEGO 在 HKTV Mall 經常都會無貨﹐我建議你去旺角銀行中心二樓某 LEGO 直銷中心買(有 Facebook﹐你上 Google Search 吓 "LEGO 直銷中心" 就會搵到我講邊間)﹐貨齊又平。

    老實說﹐想當年科技泡沫爆破﹐沙士原年畢業﹐讀完 IT 出嚟做碼農﹐人工得 6K﹐完全無諗過現在 Coding 係可以咁吃香﹐人工起碼已是香港工仔收入頭 20%(HK01 報紙佬寫...)

    我認為主因是香港科技界人才出現了斷層(就好似建築工人咁)﹐像本人做了十幾年 Coding 主力開發﹐無升上管理層的人太少了(所以難怪好多老板想請外勞)﹐所以近年 Agent 瘋狂打嚟叫我轉工。

    我個人認為年青人(唉!其實我還很年青)要用科技擊倒老人﹐除了要破除老人社會強加在你身上嘅價值觀﹐還要認真思考和觀察社會的運作﹐通常成功的點子一定是理順了社會某一部份的運作從而得益的﹐其實身在 IT 這個行頭﹐經常發現﹐成功的 IT Project 有時唔一定係最新最 High Tech 嘅野(當然這一行係要不停更新自己的知識啦)﹐只是令使用者的效率提升了﹐你的 Product 就存在優勢﹐就算日後有更 High Tech 的方案﹐如果無法為使用者理順他們遇到的困難﹐又或者最重要的 Cost Down﹐也很難打入市場。(大家可以無視我這科技老人之廢話 XDDD)

    回覆刪除
    回覆
    1. 係, 自己搬最搵笨. 反正都係食金象米, 駛乜睇實物?
      LEGO我無玩, 只係小女玩具之一呢, 我只砌高達.
      我本身專業都係一畢業死哂, 而家就係咁請人. 好唔好PAY 我唔識講, 十幾年後自己都唔同左LEVEL了.
      打低上一輩0既, 除左IT, 仲有好多佢地唔敢接觸0既野, 例如大陸...

      刪除

各位每個留言,係我繼續9UP動力,必覆。

Related Posts Plugin for WordPress, Blogger...