小弟在DISCUSS 並無出文
你回應緊0既,都係一個有心引你派膠0既人,並非小弟。
若有人以為我係DISCUSS 出文引HATER, 是否太小學雞?
小朋友, 暑期放完好耐了. 好好努力上班吧...

2017年4月27日 星期四

亂九黎收息系列 高息優先股當交租

以下是吹水內容,並不構成任何投資建議。

鋼彈BB戰士-BB[382] SAZABI 沙薩比
又一隻油貴過模型!噴電鍍紅,手油補色,水貼。
砌呢隻個原因?文末再講。


要學請先GOOGOLE一下或者問下三姑六婆,本人唔對任何言論負責!


我FB PAGE COMMENT 如下

由深水步搬去屯門不毛之地。。。真係著數左?先唔理佢個一球多點黎,做少少槓桿,收息可交到租啦。剩左本來用黎供樓0既錢,可比父母又可儲起。

不過,李生去左邊?

另外,長沙灣呢D價位應有唔少選擇,除非父母在屯門,否則唔駛去到屯門咁慘。。。每日坐多15分鐘車番工,一日兩公婆一共係工作上用多一個鐘,一個月唔見一日時間了。

上面例子,當佢借三球,年息兩厘,月供約11000 未計差餉地租管理費。當然,供完就係自己又另計。佢租金都係由8K升到9K咋!

*****

去到呢個位,唔少人FB問或者INBOX問點做到。真係貼LINK貼到手軟。


不過,有人覺得IB唔方便,咁用其他LAW,係D乜?我唔識。一向我都唔係開班授徒的財演,知就講,唔知我唔會做功課再答架喎!

又有人話,無財金知識(HIGH FIVE,我都無喎!),做槓桿危險。

咁,唔做槓桿,年息七厘,可以買到美國交易所0既,有好多好選擇。

至少,我求其睇都有兩間。

致富
網上,0.15%或最少USD15,股息唔收手續費
網上,0.18%或最少USD18,股息收2%手續費!!
http://www.poems.com.hk/zh-hk/customer-service/fees-and-charges/basic/
http://www.poems.com.hk/media/513451/fs-div-table-ch.pdf

100萬七厘的話,平均每月收息HKD5800,如果要做到交9000蚊租,要做槓桿或投入155萬。

咁兩年租約之下,慳到落黎0既租金(8000X24=$192000)又係一舊錢。

當然,你買樓供樓都儲都錢,開支就係利息,管理費,差餉同地租。再加上番工唔方便用多左0既時間。

如第三年又加1000?咁就要投入多17萬先可以以息養租了。

以上係唔做槓桿唔借錢。

有咩優先股選擇?CHERRY個BLOG好多野睇,好過我打出黎。當然,都係個句,網上免費資源,自己負責,衰左唔關我事。

我會唔會害到閣下一世上唔到車?喂,關我咩事?另外,大把人一世上唔到車,真係要上車?話唔埋你會移民呢!

<無樓又點>暫時有三集,上面條片要DESKTOP版本先睇到。可能你會覺得佢地講野好天真,不過佢地入世未深。還有夢想0既人,果D只靠收租老屎忽永遠唔會有同理心~~~

*****

Um...我個人好唔鐘意班細價樓收租仔。認為是不義之財。不過,樓價會否大跌我就唔知,不過人生苦短,如果要掠奪別人,掠二三十年才能自由,我寧願用其他愚蠢方法。
即使站錯邊,訓覺都訓得心安理得。

我都同女主人講過呢樣野,佢話,寧願KEEP現金好過,得閒炒下師奶股就算。
所以,得唔得同做唔做,係兩回事。而買收租樓又咁多人喜愛喎,借幾球都面不改容,當然有佢過人之處啦。

左邊靚D定右邊靚D?哈哈。。。我只想靚過福利模型門口果隻而已。

(現時每月收五六萬完息,計埋七月收建行息平均每月十萬),又唔駛點煩,安心自在好多。


2017年4月22日 星期六

三十歲人去讀PGDE? 心態決定境界16

老婆話近排無寫文,原因又係去左砌模,同埋炒旦有D忙。
日日早起身唔係好習慣,昨日又有少少病,狂訓之後好番好多!

MG 1/100 Crossbone Gundam X-1 ver.Ka

其他<心態決定境界>系列

話說,小弟有一師弟,資料如下

樣貌斯文靚仔
非大學畢業
學位係TOP UP DEGREE
做左幾年空中少爺
日常唔知有冇儲錢,同佢唔熟,只知佢D同學話佢讀書時代係狗公。
我對佢就中性,平時幾有禮貌咁。

點知,今日聽到消息,話佢想去讀教育文憑為人師表!

真係成三十歲人(點計都有廿八九),先走去讀書,又頭由入職人工開始,都幾怪!

老婆聽左,好天真咁講,空少唔好做咩?

當時人梗係話要教育人,要為人師表,又話係理想云云。

講到低都係人工作崇!相比空少,老師人工高一截!仲要有得跳POINT又有穩定(假象黎架)!

一問之下,原來佢打算修通識,OMG!

呢個人,非教育出身又唔知行情,加上連通識都未讀過,點教?

先唔理大學會否收佢入黎讀(有更多合適人選丫),大學為左搵錢,不停開教育廳學位收生,根本無理過實際教師人手是否足夠,再加上通識呢幾年越來越被淡化,唔少學科都唔睇重佢,大家都係HEA讀。

終有一日,呢科會瓜。

再者,通識呢,

讀個D讀完通通唔識
拎5**個D話你知佢都係死讀,唔駛要通識
教個D以為自己係識
結果,人人都想教通識,其實通識個範圍好狹義,比其他科目無論技巧定內容都更CONVERGE,絕非所謂通材或者平時大家樂阿伯式討論時事可以做到。

更何況,而家唔係表演自己有幾叻(唔少數學老師以為表演計數是教數),而係別人可以學到幾多。人人腦袋構做不同,要教佢地死讀書已經唔易,而家要教佢地思考"通識科評卷者如何思考"更加困難。

好似好多香港人,成日以為自己有思考有學識(其實咪又係七九六一條),最鐘意講道理玩立場。。。思辯?說到底,香港人你有幾多間收租樓?食過幾多件女?仔女生性否?

你乜都無?乖乖地做個齒輪仔,刷下存在感咪算LAW,唔番工連唯一身份都無埋,YOUARE NOTHING。

結果,呢十年間,唔少自以為好叻(其實乜X都唔識)0既人,又或者以為自己諗野好叻0既人,以為自己識教通識。

再加上,唔少校長面對選修科人數減少,過剩老師維有撥調去教通識(哈哈,大後備科亂搵人教),根本需求唔大,正因為人人可以教,其他科目老師都可以搭單教埋。

而阿師弟呢?

唔勁0既中學
唔勁0既中學成績
唔勁0既大專
唔知咩鬼TOP UP DEGREE
無關0既工作經驗

點入職?

最安全0既路,往往係最危險0既路。

女主人就有個PART TIME妹妹一樣,嶺大社工畢業,讀埋一年教育文憑,現在咪又係做TA,仲要感恩之前努力無白費咁,但係繼續唔係老師,咁為乜?

最慘係讀完,無工做,又賴政府點佢。

係小弟眼中,做老師,同考海關考入境處無分別,都係為左一個鐵飯碗而已。。。

其實阿師弟斯文靚仔正直樣,走去做SALES又好,去做地產AGENT又得,肯定成就(錢)會好好多。到時唔駛做狗公大把女YO啦。




砌就一早2016砌好左濆埋油,發現要好多補色,一直唔做。早幾日的起心肝一次過手油,滲線,上水貼。非專業成品,送都無人要。。。

如有一日太多放唔哂,賣左佢D錢捐左佢~ 300蚊有冇人要?(老婆話佢自己買番。。。)


2017年4月6日 星期四

Uber 司機,中年危機

呢篇想打左好耐。

首先,我唔係想講UBER好定的士好,對我黎講,各有各好,視乎場合時間啦。



話說呢幾個月成日坐的士或UBER回家,的士用APP CALL,如講價錢,UBER平少少,十蚊之內。不過時間可以易預少少,但講車速同效率,的士慳左起碼五分鐘。

上車時間又唔係繁忙時段,無加成,無論的士定UBER都好快CALL到,麻煩D係UBER有時好遠過來,等成七八分鐘。。。

係的士佬角度計,我呢程車算OK,唔長唔短,唔塞車加埋唔知有冇十支燈。目的地好多時都可以出番去或者去附近等長途客。所以我遇到態度唔好0既司機機會好低。

有朋友知我近期坐開UBER,問我係咪好抵或者好坐。原來佢番工時間常常有加成,結果覺得貴唔搭,只係用左最初個五十蚊介紹優惠。

我估,全職UBER司機唔會太多,唯一叫做全職就係做開接送個D順手撈埋卦。好多時都係PART TIME做番兩個鐘個D。

對我黎講,最正係唔駛比現金,信用卡扣數好方便,雖然,唔夠的士咁快CALL到,無錯,我非繁忙時段,的士一定接單快過UBER。

都係個句,各有各好啦。

呢三個月入面,坐UBER:的士比例係9:1,唔少UBER司機都會同你講兩句,大部份都係中年男(只試過一次大嬸司機,一次阿伯,一次死MK渣架比卡超車, 一次奇遇個司機帶埋老婆坐前座,好彩我都同女主人一齊坐)。

當班UBER司機判左罪又上訴之後,真係少左車,連司機都同你講下自己意見。又講UPDATE左0既UBER無得知道目的地係邊(無得揀客),分成又少(25%比UER公司),個SYSTEM鬼咁遠都叫佢去(無車丫MA!),咁佢地仲做0既?

咁當然唔係錢啦,果一百幾十,衰D港豬CALL個短程,50蚊分得三十幾真係食風咩。。。

大部份中年男,做UBER司機原因都不離兩個字:"解悶"

"收左工,又唔想番屋企住,咪渣兩個鐘UBER先番屋企"

"食完飯無野做。。。"

"係屋企食完飯,老婆仔女睇電視,玩手機又比老婆話。。。"

"貪得意"

我印象中就記得呢幾個,似乎解悶多過搵食。後生仔真係好少遇到,只會係星期六日同女主人搭個陣見到。

當你有老婆仔女,仔女又大個少少,開始唔同你講野,存在感下降之餘,工作上又已經無乜突破空間,漫無目標之下,搵番一樣半樣興趣解悶好正常。

到我遇到呢個危機個陣,點算好???

左邊個隻,雖然我無人地整得咁靚,但係都好想砌呀。。。
(GK改件來,不是BANDAI啦)


唔知有冇中年男未結婚自己一人,為免回家對住四面牆,錢又唔係煩惱,渣架UBER玩下?我估有架,只係佢地唔會講我知自己單身吧。

如果佢又鐘意渣車,又有錢補貼下油錢,UBER真係一個好0既解悶方法,既然係為興趣,自然就唔會有黑面乘客0既事了。

有冇影響的士生計?一定有,尢其係佢地非繁忙,四圍兜客果陣。至少,我呢個日日的士回家0既人,揀左唔幫趁佢地。

睇新聞,滴滴打車進軍香港,走專營的士路線,對本港個班的士牌友仔回報有冇影響?

係乘客角度而言,多競爭先有好服務,同時亦令個班打壓別人自肥0既車主,既得利益持份者一個重擊。

時代在變,下一代取代上一代是必然的,若然走老野個條舊路,是否中正老屎忽計謀?

2017年4月1日 星期六

走得走唔走? 我可以唔撈嗎26

講工作

先講女主人,佢請左小肥妹妹白白淨番來做全職。直到現時為止都滿意佢做野,預計可以幫輕到佢,照計條數唔會咁亂。同埋多個人多雙手,當少個人番工時,唔會再咁忙亂。

現在新全職同PART TIME都係18-22妹妹仔,各有自己長處。

另,女主人話佢隔離間九唔搭八往日好好生意,呢兩個月仲早收工過佢,唔知係咪經濟差左。

女主人店就真係差左,三月同二月比,純利跌左三成!仲要二月已經頭幾日係新年休息喎!

男主人工作依舊,基本上經濟影響唔太大,另外有一定商譽,學一眾財經人士話齋,跟本係一條護城河。只要上產品質素無差到,基本上係確保到每月一定利潤。

問題係,退出之時退出之路如何走。2018年應該再休多一日。

見一眾BLOGGER講開HEA富學,恥笑其先忙到PK再富先再可以HEA,極其誤導。

真正HEA富是否小弟?不收租吸香港人血之下,每天工作時數亦比一般人短,只是富不富就睇你點比啦。

最終極,只開星期六同星期日!

又有BLOG友告知,另有BLOG友懷疑我做乜仲唔退休,其實10M唔係好多錢,齋收息真係OK,不過長遠會蝕比通漲,同時亦預留一部份作BUFFER以抵抗任何金融動盪吧。

有日我都同我老婆講,退休後,我佢兩邊長老各$15000,共六萬。加埋租屋25K,即一共$85000。老婆又同意喎,謂佢一個月洗唔哂!佢問我,計左佢舊錢未,梗係未啦。。。每月利息收入,而家只計我自己都唔止呢個數啦。

順帶一提,小弟收息資產有一半為港股,另外美國公司債券,優先股,以及新加坡REITS及加拿大REITS+加拿大INCOME FUND。



UM。。。我家隻小惡女上左泳兒個一隻小豬MV做大配角。。。由2分40秒睇吧。不是背面就係遠景。哈哈~~~!



2分40秒開始,最高個件妹妹

講投資

先講女主人,佢二月已沽出大部份股票,現在只持有883中國海洋石油及2318中國平安。現時賬面都有幾至十幾巴仙升幅。(中國恒大沽出後狂升,大家小心此女燈神。)

男主人動作較多。

1。用美元買番新加坡紙,實行以夷制夷,以免SGX/USD匯率風險(蝕左1%左右。。。)

2。買入約廿多萬等值加拿大股票,以加元借入,港元換做美元抵消美元資款部份,以停泊現金,扣除加拿大股息稅15%,四月份應有約千五元利息。

3。本月優先股HSEB及美債券NE CORP 7.5 帶來USD7350全數買入(2同上)

4。GLD OPTION再次轉倉,平左三月CALL/PUT:125/124轉去六月同價位,收權金七百美元。少得可憐等佢反彈吧。

5。SGX REITS終於整體番家鄉有突(無計之前收0既息,非自欺)。

6。建行公佈業績!2016年度派RMB0.278,如人仔唔跌落去,即小弟會收到約五十五萬多港元利息。預計短期升上八蚊或任何時間升上十蚊,即時沽左佢。(現價6.25)

7。繼續KEEP住130萬美元負債。

講目標

自從有左每月清算,女主人條數真係好計好多。。。


輝立佢已清倉,兩戶口現金加股票,現為約349萬(上月為342萬),預計以後每月都係咁上下收入吧。下月開始,唔SHOW佢戶口尾數啦,女主人暴走亂計數程度已可控。

比上月少左增長,佢竟然歸咎佢買多左HKTV MALL!!哈哈!!有冇咁誇?

男主人港元現金連現價CAD資產為39萬(上月為22萬)

一共388萬(上月364萬),可以買咩樓?約845萬等值連佣金,稅,及律司費。

預計八月份約有550萬左右,住緊果度到2018年才完約,真係唔急喎。到八月份,我CAD收0既息都COVER到大部份租金了。。。(其實一支建行收0既息已COVER到)

財自後,話唔埋將油尖旺太深一帶茶記食一次。。。今次係大埔道一間叫元朗冰室

豬扒好厚,用料好!辛辣面好蝦人煮,食咁多間,水準以上!
(有邊間好野推介下的,不妨EMAIL/FB MESSAGE我!)
Related Posts Plugin for WordPress, Blogger...