小弟在DISCUSS 並無出文
你回應緊0既,都係一個有心引你派膠0既人,並非小弟。
若有人以為我係DISCUSS 出文引HATER, 是否太小學雞?
小朋友, 暑期放完好耐了. 好好努力上班吧...

2017年4月22日 星期六

三十歲人去讀PGDE? 心態決定境界16

老婆話近排無寫文,原因又係去左砌模,同埋炒旦有D忙。
日日早起身唔係好習慣,昨日又有少少病,狂訓之後好番好多!

MG 1/100 Crossbone Gundam X-1 ver.Ka

其他<心態決定境界>系列

話說,小弟有一師弟,資料如下

樣貌斯文靚仔
非大學畢業
學位係TOP UP DEGREE
做左幾年空中少爺
日常唔知有冇儲錢,同佢唔熟,只知佢D同學話佢讀書時代係狗公。
我對佢就中性,平時幾有禮貌咁。

點知,今日聽到消息,話佢想去讀教育文憑為人師表!

真係成三十歲人(點計都有廿八九),先走去讀書,又頭由入職人工開始,都幾怪!

老婆聽左,好天真咁講,空少唔好做咩?

當時人梗係話要教育人,要為人師表,又話係理想云云。

講到低都係人工作崇!相比空少,老師人工高一截!仲要有得跳POINT又有穩定(假象黎架)!

一問之下,原來佢打算修通識,OMG!

呢個人,非教育出身又唔知行情,加上連通識都未讀過,點教?

先唔理大學會否收佢入黎讀(有更多合適人選丫),大學為左搵錢,不停開教育廳學位收生,根本無理過實際教師人手是否足夠,再加上通識呢幾年越來越被淡化,唔少學科都唔睇重佢,大家都係HEA讀。

終有一日,呢科會瓜。

再者,通識呢,

讀個D讀完通通唔識
拎5**個D話你知佢都係死讀,唔駛要通識
教個D以為自己係識
結果,人人都想教通識,其實通識個範圍好狹義,比其他科目無論技巧定內容都更CONVERGE,絕非所謂通材或者平時大家樂阿伯式討論時事可以做到。

更何況,而家唔係表演自己有幾叻(唔少數學老師以為表演計數是教數),而係別人可以學到幾多。人人腦袋構做不同,要教佢地死讀書已經唔易,而家要教佢地思考"通識科評卷者如何思考"更加困難。

好似好多香港人,成日以為自己有思考有學識(其實咪又係七九六一條),最鐘意講道理玩立場。。。思辯?說到底,香港人你有幾多間收租樓?食過幾多件女?仔女生性否?

你乜都無?乖乖地做個齒輪仔,刷下存在感咪算LAW,唔番工連唯一身份都無埋,YOUARE NOTHING。

結果,呢十年間,唔少自以為好叻(其實乜X都唔識)0既人,又或者以為自己諗野好叻0既人,以為自己識教通識。

再加上,唔少校長面對選修科人數減少,過剩老師維有撥調去教通識(哈哈,大後備科亂搵人教),根本需求唔大,正因為人人可以教,其他科目老師都可以搭單教埋。

而阿師弟呢?

唔勁0既中學
唔勁0既中學成績
唔勁0既大專
唔知咩鬼TOP UP DEGREE
無關0既工作經驗

點入職?

最安全0既路,往往係最危險0既路。

女主人就有個PART TIME妹妹一樣,嶺大社工畢業,讀埋一年教育文憑,現在咪又係做TA,仲要感恩之前努力無白費咁,但係繼續唔係老師,咁為乜?

最慘係讀完,無工做,又賴政府點佢。

係小弟眼中,做老師,同考海關考入境處無分別,都係為左一個鐵飯碗而已。。。

其實阿師弟斯文靚仔正直樣,走去做SALES又好,去做地產AGENT又得,肯定成就(錢)會好好多。到時唔駛做狗公大把女YO啦。




砌就一早2016砌好左濆埋油,發現要好多補色,一直唔做。早幾日的起心肝一次過手油,滲線,上水貼。非專業成品,送都無人要。。。

如有一日太多放唔哂,賣左佢D錢捐左佢~ 300蚊有冇人要?(老婆話佢自己買番。。。)


36 則留言:

  1. 靚仔應該可以做補習天王。 再同d學生講下之前做空少d野。 d 女學生真係會雙眼發光

    回覆刪除
    回覆
    1. 你又說得對,唔知佢有冇咁TALK得呢?
      講樣同把口應該算中上。
      至於實力,都係一TEAM人做出來。

      刪除
  2. 做教書,特別在香港,真係好有心先好做。

    回覆刪除
    回覆
    1. 其實係供過於求問題。
      行行都有各自難處,以人工計,教書很肯定唔係辛苦個類。
      建議將入行門檻再提高,或只選本科成績好個班,實習成績好個d,再取消埋垹職及TA 呢類雞肋。
      等無料到新人知難而退。

      刪除
  3. 通識如果而家俾我考,我應該連大學都入唔到。
    可幸出世得早,仲係正常高考的年代出世。

    回覆刪除
    回覆
    1. 我無考過,不過同幾個考5**0既人傾過,大部份都係其他科一樣叻,識讀書識考試遊戲個D醒目仔黎。
      佢地不約而同話,呢科有PATTERN捉的。
      有考試,就有評卷參考,自然有拆解方法。

      刪除
    2. 可能我理科底,通識呢科俾我compare的只有當年會考的宗教⋯⋯
      當年我係mock考差唔多唔及格,最後出黎唔知點解又幾高grade喎。
      呢D文科類的科目太主觀,真係「真正」的醒目仔女先考得⋯⋯

      刪除
    3. 係,有路捉的。
      我都係理科人。
      不過無修宗教。

      刪除
  4. //唔少數學老師以為表演計數是教數
    哈哈。只需要表演計數咁簡單就好囉。一諗到點唔明牛皮燈籠都係自己的責任,池某不得不逃離數學老師的行列。

    回覆刪除
    回覆
    1. 池兄逃離得好。
      一個好老師,本科知識當然有用,但點樣去教先最重要。
      除左教,考核方法又係一個問題,唔叻個班,要DRIVE佢個MOTIVATION出黎又係功夫一堆。
      人人構造唔同,要做一碟大家樂式人人覺得OK水準0既加喱雞飯,一D都唔容易。

      刪除
  5. 唉...以為揾闊路,點知原來行咗條窄路。希望你師弟好自為之。

    回覆刪除
    回覆
    1. 佢去左INTERVIEW而已,可能最後唔收佢呢。
      窄路多人爭呀!

      刪除
  6. 我有朋友又係三十歲做做下IT轉咗去做中學教師(之後升做主任),另外以前讀中文系時班同學又有好多都做咗教師,有一個仲做埋校長(當年我讀讀下轉咗系,否則可能都入咗呢行),據我所知:
    1. 呢行其實都睇人事關係,你同校長熟,睇得你起,只要你有任何學位,佢都可以請你。
    2. 但只有非教育學位或只有教育文憑,就算校長請你都好難企得穩腳。所以入職後起碼要繼續讀個教育學位返來。
    3. 進修係必須的,有咗教育學位後,最好讀埋碩士才有升職機會。
    4. 讀愈多文憑愈好,週身刀可教任何科,可助鞏固地位。

    回覆刪除
    回覆
    1. 咁讀書的確有用0既,用來做升職或者去留準則都唔錯,至少可以量化丫。
      風兄你D同學搵教藉都幾易喎。

      刪除
    2. 班同學係講緊好多年前啦,個時唔同依家,係無乜人肯做教師架,我老婆當年有得做都唔做,哈哈。

      刪除
  7. ��聽聞理想達到, 溝到個靚女空姐, 所以轉行��

    回覆刪除
    回覆
    1. 噢, 似乎你識得呢個人, 咁你有機會都識得我呢.

      刪除
  8. 三張幾先話重頭黎過, 咪話唔爽

    回覆刪除
    回覆
    1. 睇下三張去做D乜啦。

      去教書就真係窄窄地。。。
      去做保險又唔錯喎。

      刪除
  9. 雖然我會留意時事,但一直唔太鍾意通識科呢科,咩都教d但又唔深入。有時同朋友討論將來可以做咩,成日講笑話讀唔惦就去做中學老師,人工高。不過講真老師呢個職業真係唔好搞我......教得就唔想hea教,但係唔hea認真過頭就會俾班學生激死。

    回覆刪除
    回覆
    1. 激死係人工包埋架。
      另外,有心有力個D,會有學生尊重,唔會激死。
      WANDERER弟弟,讀完本科都未必有得教架。

      刪除
  10. 靚仔+前空少身份,遇到d寂寞女校長要拎到一席位都未必唔得既,始終港人對空少空姐有相當幻想空間。

    回覆刪除
    回覆
    1. 咁靚仔又有好多選擇。
      揀過做野又好學歷既好過啦。

      刪除
  11. 先唔講前 (錢) 途問題, 真心佩服過咗 30 歲先黎轉職o既在職人士, 要面對o既風險其實唔細 ... 當然, 心中個劇本得佢自己知。但家下做教師, 真係唔容易 (我識嗰啲個個都勁辛苦) ...

    砌模型, 最大樂趣唔係自己砌咩? 真係會有人買完成品?

    70後咸魚A

    回覆刪除
    回覆
    1. 三十歲轉職,都要睇轉乜。
      例如轉做pc差人由頭學起就唔好喇。

      太多模型無地方處置,有人要就賣law.
      唔係個個會上色呀。

      刪除
    2. 其實過 30 歲要轉職真係要有一定決心! 冇話好唔好, 子非魚 ...

      咁試吓放上個 BLOG 度慈善義賣, 可能賣到好價呢! 我重有 N 盒未砌, 呵呵~~ (模型都冇時間砌, 同條咸魚有咩分別!?)

      70後咸魚A

      刪除
    3. 一向都只係打算義賣. 哈哈哈~~~~~
      第時都黎幫襯下啦~

      刪除
  12. 回覆
    1. 供求問題,應該咁講,唔係最有料又最TOP個班,唔好博大霧入行。
      搵唔到工唔好怨,預左的。

      刪除
  13. 三十歲做教師同送死有咩分別,本人做QS一行,成日見外行人(特別自稱做會計)起discuss高登連登出post問轉做有咩路,我心諗QS有咩好做,你地咪衝去自殺啦!

    回覆刪除
  14. 而家啲靚仔 唔讀書同最低工資有小小關係
    case 1. 放學返餐廳,唔知係係貪佢地後生,出到8至90蚊一小時,佢地日日放學18點返工,做到25至26點(我知一日有24小時only),星期日仲double count。班大爺話佢地都搵到萬幾一個月,仲讀咩書。唉
    case 2. 父母不工作,r老綜,加埋啲雙糧,補貼,全額sponsor,清貧學生支援。佢地家庭收入,一定高過ta,個仔望見 父母咁成功,點解讀書。
    老師而家好難做,上面比壓力,學生愛搵食。

    回覆刪除
    回覆
    1. 上面例子應該佔一成學生唔到。
      未必係咁0既。
      又可能同教學方式有關,又同資訊比以前流通呢。

      刪除
    2. 可能我黑仔,做左幾年,年年都幾個。感覺似做社工多過教書

      刪除
  15. https://www.transunion.hk/zh

    70後兄,借你的blog問下,有無其他人被環聯公司所謂的7日免費信貸評級服務為誘餌,從而被騙取每月280元月費的事情中受害呢 ?

    回覆刪除

各位每個留言,係我繼續9UP動力,必覆。

Related Posts Plugin for WordPress, Blogger...