小弟在DISCUSS 並無出文
你回應緊0既,都係一個有心引你派膠0既人,並非小弟。
若有人以為我係DISCUSS 出文引HATER, 是否太小學雞?
小朋友, 暑期放完好耐了. 好好努力上班吧...

2017年4月6日 星期四

Uber 司機,中年危機

呢篇想打左好耐。

首先,我唔係想講UBER好定的士好,對我黎講,各有各好,視乎場合時間啦。



話說呢幾個月成日坐的士或UBER回家,的士用APP CALL,如講價錢,UBER平少少,十蚊之內。不過時間可以易預少少,但講車速同效率,的士慳左起碼五分鐘。

上車時間又唔係繁忙時段,無加成,無論的士定UBER都好快CALL到,麻煩D係UBER有時好遠過來,等成七八分鐘。。。

係的士佬角度計,我呢程車算OK,唔長唔短,唔塞車加埋唔知有冇十支燈。目的地好多時都可以出番去或者去附近等長途客。所以我遇到態度唔好0既司機機會好低。

有朋友知我近期坐開UBER,問我係咪好抵或者好坐。原來佢番工時間常常有加成,結果覺得貴唔搭,只係用左最初個五十蚊介紹優惠。

我估,全職UBER司機唔會太多,唯一叫做全職就係做開接送個D順手撈埋卦。好多時都係PART TIME做番兩個鐘個D。

對我黎講,最正係唔駛比現金,信用卡扣數好方便,雖然,唔夠的士咁快CALL到,無錯,我非繁忙時段,的士一定接單快過UBER。

都係個句,各有各好啦。

呢三個月入面,坐UBER:的士比例係9:1,唔少UBER司機都會同你講兩句,大部份都係中年男(只試過一次大嬸司機,一次阿伯,一次死MK渣架比卡超車, 一次奇遇個司機帶埋老婆坐前座,好彩我都同女主人一齊坐)。

當班UBER司機判左罪又上訴之後,真係少左車,連司機都同你講下自己意見。又講UPDATE左0既UBER無得知道目的地係邊(無得揀客),分成又少(25%比UER公司),個SYSTEM鬼咁遠都叫佢去(無車丫MA!),咁佢地仲做0既?

咁當然唔係錢啦,果一百幾十,衰D港豬CALL個短程,50蚊分得三十幾真係食風咩。。。

大部份中年男,做UBER司機原因都不離兩個字:"解悶"

"收左工,又唔想番屋企住,咪渣兩個鐘UBER先番屋企"

"食完飯無野做。。。"

"係屋企食完飯,老婆仔女睇電視,玩手機又比老婆話。。。"

"貪得意"

我印象中就記得呢幾個,似乎解悶多過搵食。後生仔真係好少遇到,只會係星期六日同女主人搭個陣見到。

當你有老婆仔女,仔女又大個少少,開始唔同你講野,存在感下降之餘,工作上又已經無乜突破空間,漫無目標之下,搵番一樣半樣興趣解悶好正常。

到我遇到呢個危機個陣,點算好???

左邊個隻,雖然我無人地整得咁靚,但係都好想砌呀。。。
(GK改件來,不是BANDAI啦)


唔知有冇中年男未結婚自己一人,為免回家對住四面牆,錢又唔係煩惱,渣架UBER玩下?我估有架,只係佢地唔會講我知自己單身吧。

如果佢又鐘意渣車,又有錢補貼下油錢,UBER真係一個好0既解悶方法,既然係為興趣,自然就唔會有黑面乘客0既事了。

有冇影響的士生計?一定有,尢其係佢地非繁忙,四圍兜客果陣。至少,我呢個日日的士回家0既人,揀左唔幫趁佢地。

睇新聞,滴滴打車進軍香港,走專營的士路線,對本港個班的士牌友仔回報有冇影響?

係乘客角度而言,多競爭先有好服務,同時亦令個班打壓別人自肥0既車主,既得利益持份者一個重擊。

時代在變,下一代取代上一代是必然的,若然走老野個條舊路,是否中正老屎忽計謀?

23 則留言:

  1. 渣車係原因一。 第二可以有人同你吹水嘛。 十個客應該有一半會同你傾。

    回覆刪除
    回覆
    1. 唔止一半,尤其係拉左幾個司機後,話題更多。否則都唔知咁多寂寞的心啦。
      好事來,車數多左,才能威脅到的士,至少非繁忙時,佢地要兜多幾個點。

      刪除
  2. 我都好like Uber~周不時call師傅👍

    “收左工,又唔想番屋企住”
    咁又sad哋,上網見過有人分享,話屋企太细連喊的地方都冇,香港地真係好抑壓...

    回覆刪除
  3. 我搭UBer又少D同司機傾該喎,係試過一次個司機雞啄唔斷,煩死。
    聽講大陸人做Uber,主要係為咗溝女。

    回覆刪除
    回覆
    1. 大陸已變成滴滴打車, 即係白牌車...

      可能大家唔同時間搭, 遇到不同原因渣UBER的司機吧

      刪除
    2. //司機雞啄唔斷,煩死。
      所以池某係的士擁護者,職業司機識得睇客眉頭眼額,知趣D。

      刪除
  4. Google 廣告唔可以叫人篤架 仲有同一 ID 經常篤會被停牌 因佢會懷疑你做馬

    以上兩樣野請注意 Google 廣告我玩過 你咁做會玩死個戶口

    回覆刪除
    回覆
    1. 應該唔可以同一人不停CLICK 吧, 至少自己唔得.
      其他人應該OK.

      刪除
  5. 如果有家室, 但老婆仔女唔同自己傾計, 真係好淒涼...

    回覆刪除
    回覆
    1. 我估有八九成男人都係咁, 要搵出路架.

      你仲係單身你有所不知了.

      刪除
  6. 我諗香港地好多中年男人都冇乜存在感,特別係打份工收入唔高果啲,屋企嘢老婆話晒事,公司嘢又唔想理,朋友又各有各忙,倒不如得閒揸架車四圍去當遊車河......

    回覆刪除
  7. 我都登記左做司機,不過怕瀨野所以最後都唔敢試

    回覆刪除
  8. 其實好多人都想打發得一兩個鐘既工餘時間

    回覆刪除
    回覆
    1. 係, 但放工時間個陣又無乜司機, 食完飯會好D.

      星期六日又少番D, 因為要陪長輩吧...

      刪除
  9. 其實uber最大問題係保險方面,uber公司應該要有承擔,而唔係要司機冒險,話就話共享經濟,錢佢有份袋,風險司機揹,我覺得佢好狗。

    回覆刪除
    回覆
    1. 係, 不過我就唔擔心咁多.

      話說的士加價後, UBER 更貴, 我又坐番的士了.

      刪除
  10. 我而家情願返屋企訓覺好過, 鬼客好難服侍, 唔同佢地9up反而俾差Rating

    回覆刪除
    回覆
    1. 我最近先知。。。我搭左幾十次都五星好評。。。

      刪除
  11. 最近uber說有保險,唔知會否多人做番

    回覆刪除

各位每個留言,係我繼續9UP動力,必覆。

Related Posts Plugin for WordPress, Blogger...