小弟在DISCUSS 並無出文
你回應緊0既,都係一個有心引你派膠0既人,並非小弟。
若有人以為我係DISCUSS 出文引HATER, 是否太小學雞?
小朋友, 暑期放完好耐了. 好好努力上班吧...

2017年5月17日 星期三

唔成功0既人同你講成功 心態決定境界18

男主人好鬼開心,小弟0既一年前劣作(認真劣作,而家個D靚好X多),放左係我朋友0既模型店內!大家得閒去探下我。。。個模型啦!

睇唔到?紅圈佪隻呀!左腳好似有HK70S字樣!
都睇唔到?文末有放大圖!

UM...講黎講去都係果D野,其實係咪有點ON9?

唔少留言,EMAIL都係問我私銀,IB,債券,其實我好多都係亂咁黎左抄右抄,同埋我份人又無乜耐性,好多野上網GOOGLE到,你又伸手問我,我唔係好想答呢。

此BLOG一不為錢二不為名,我只在乎有冇人來睇(再一次感謝放LINK係DISCUSS同BABYKINGDOM0既讀者),點擊次數係我對自己貢獻0既量度。

所以,自覺無乜義務去好詳細咁答人問題,又無謂問問下我唔識答啦。

*****

係現實世界中,我估大家都有朋友工作得好開心,開心來自錢定成功感?我相信兩者皆是。

其實好難理解,例如打一份好普通0既政府工(例如渠務署低級文職),打到退休時,咁0岩又遇到樓市上升,搵到一個幾好0既被動收入剛好退休。

咁係咪成功例子?定係滿足到自己人生所求?

NO OFFENSE,我唔想影射收租佬阿叔,不過只係想舉個例比後生仲有青春去輸0既人睇睇。

成五十幾歲先財自,其實之前個五十年,係咪一路成功?讀書OK?事業OK?溝女OK?小朋友OK?

更加唔好講滿足對自己期望,更加唔好講對唔對得住父母師長等等大人物。。。

這些年讓步的,會否讓你夜半嘆息?

面對前途(錢途)定人生滿足度0既時候,你揀邊樣?

我會話,WHY NOT BOTH?只要自己鐘意做,就會做得好,做得好,錢就自然來。同大學揀科一樣,唔計專業類,揀搵到錢個D,其實只係開頭搵到錢,跑多幾年,都係追夢0既大學生人生滿足度高。

自己條命係自己的(至少未結婚前係啦),點解走去跟一D失敗左幾十年,近年先叫做"標個尾會"0既老人失敗之路?

點解寫呢D?睇到下面句野,想分享下0者:

If you follow your mind, you will be successful but may not be content. If you follow your heart, you will be content but may not be very successful.(隨智而行,你將會成功但或猶未能滿足;隨心而行,你將會感到很滿足雖則未必成功。)

咩來?某名校校長年青時收到某名校校長,對佢詢問人生決擇時0既金句。

人生在世,邊樣重要?SUCCESS還是CONTENT?

千里之行,此於足下。如果閣下還算年青,何不放下沉悶死路?歌仔都有得唱,要擁有必先憧失去怎接受!再者,錢0者,投資不止收租。。。仲有D咩?上網搵下啦!

*****

有樣同寫BLOG有關0既野想UP下,近日承蒙某出版社(唔知開唔開得名)厚愛,兩顧草盧搵小弟出書。我老婆聽到好開心,仲話幫我寫序。

佢就想!如我出書,佢起碼要幫我寫番三兩成篇幅,佢0既小生意比我0既有趣。

可惜,因我不想透露工作係乜,係未真正劈砲唔撈財務自由之前,都好難寫到D乜出黎。再者小弟都係口水出文多,不能似其他BLOGGER一樣節錄成書。

即係話,要寫就由頭到尾寫一本。。。

最後的大問題是,我無分析無數學乜都無,有咩咁好睇呢?

如果想睇小弟白話文筆,我係止凡兄(還是不要叫兄,免被個條講強積金數學聰明豆有話題講),止凡個本新書度寫左個序。5月24應該有得賣。

Gundam Double X (MG) + G Falcon Unit (1/100)
兩盒模型組成架!
如果而家重做,相信會靚好多。。。

2017年5月12日 星期五

年青時比人睇唔起 相煎何太急 心態決定境界17


各位年青時有冇試過比人睇唔起?
本文十分歡迎留言,來吧!


今晚係YOUTUBE 睇左唔少年青人創業同埋講樓市如何貴買唔起0既創意短片,少不了又睇到撚蛇教人九成出租等有錢時變番五成再用租金當入息再買樓呢D屎橋,又睇到D四十幾五十老人身為老師笑年青人大駛去旅行買唔到樓,講埋D我悶到想訓0既道理。。。

係人生入面,你點面對比人睇唔起(過去或現在)?

發奮圖強就必然架啦,當你成功絕地反擊之後,事過境遷,會唔會用番相信方法睇人唔起?

做人呢,要有同理心,相煎何太急?

先講我自己後生個陣。。。

睇死你畢業好做唔做走去炒旦?當年我真係有同學咁樣同我初戀情人講(對呢D三姑六婆我最憎!結果八婆一號條仔比我初變情人搶左,因果報應!),以為我一世做炒旦(又比佢UP中喎!)

走到呢一刻,當年0既同學,以錢計,最搵到唔係最讀得書最攻心計個班。反而係追夢果個。。。不過,大部份同學生活應該都唔錯,點都有三五七萬一個月呀!

如果我唔炒旦,行佢地條路,我估我都係得三四萬,但問題係我唔做意做呢一行呢!

正好常常留言有位係隔離個科,早日投資其實可以避免中年悶悶地唔想屈係政府,到時有錢出黎自己執業都大膽D啦!

上司放假休息時打比你追魂CALL?

話說炒旦前我都做兩個月文員仔(八九千個D,而家諗番,我個EX唔嘈我都算係咁),明明星期六放長短週,你老味次次短週晨咁早打黎屋企搵我講工事?最後梗係嘈佢啦。上司?其實我一D都唔驚佢,我又志不在此,當時只係想試下。

而家如果見番佢?其實我都想SEARCH下佢已經搵唔到,上司離鄉別井一個人,我最記得佢話日日食麥當勞,因為每一度麥當勞都係同一味道。

有時,同理心其實好重要。人地刻薄過你,掉番轉頭係咪一定要咁樣對番人?咁多年前,艱苦都變成有趣0既回憶啦。

被後生女同事睇少你係酸臭毒男?

被後生女同事睇少你毒男?唔好意思,雖然我真係打機砌模型玩電腦0既毒男,仲一D都唔靚仔(老婆都係咁講),之但係我講野都幾FUNNY,說話間帶點智慧(有時係串D),不論進修定工作,都引到下同年齡女同事(靚唔靚唔好計啦!),有人送高達比我做聖誕禮物TIM!

上面隻S GUNDAM 係重新噴過,其實已有十多年歷史。

對於年輕過我的人,其實我又覺得做人要有夢想,成日行人地條舊路或者最安全0既路,可能係死路!咩係死路?唔係餓死你0既路,係令你平凡地浪費左人生0既路。



日日番工放工食飯ALL屎到老,就只係咁樣?

窒你成日去旅行唔儲錢買樓?

要知道,而家坐飛機去旅行好普遍,以前D老野唔捨得去旅行,可能因為真係貴,而社會上物質又唔豐裕,錯左唔少美好人生。所以老左喇,退左休,咪去下旅行滿足下自己。如果果班老人家又睇死你成日去旅行唔儲錢?其實係GENERATION GAP來,現在去旅行,就好似以前拍拖睇場戲咁正常。你以前要捱,點解一定要後生個班都捱?

(好似奶奶蝦新抱咁,將以前受過0既苦都要新抱受多一次?)

睇死你亂洗錢一世買唔起樓?

喂,以前粵語長片個陣,人人都係窮到租樓架啦。我果個年代,童年時可能都係住木屋,臨屋,徙置區,慢慢先轉去公屋啦!(我出世個陣,好似係同親戚SHARE地買左一隻船,再申請公屋!)

儲唔起錢買樓,咪租樓LAW!


其實租樓進可攻退可守,有人會話,失業唔駛交租?HEY,失業可以搬細D,或者搬番同屋企人住!未來搵錢0既野,你又點估到?搵得到,又駛乜怕買唔到租唔到?

與其諗住收租,做苦行僧咁節衣縮食儲錢,不如諗下,廿幾三十幾歲人生最美好0既時光,應該點去用。三十歲買個三四百呎細單位,不如租個五六百呎。唔通等到四五十歲先換大D咩,到時個種享受0既喜悅又唔同了。

而家D樓越黎越細,第日更細?非也,男主人個邊,樓齡大過我0既樓,一樣好細!以我所知,二三十年前,有一期0既樓又細又縮水TIM!都係樓價政策帶黎0既產物,並非一個絕對趨勢!

租客係消費者,收租仔係投資者。加租?比錢咪得,搬屋?比錢咪得。何必諗得咁複雜邊個著數邊個唔著數?討論區個D租樓日日賺(曲線來的),咩鬼記得交租,其實都係廢UP,每月多幾千蚊現金流,其實求其一個大學畢業生,跑番兩三份補習都有啦,真係要節衣縮食為買收租樓先做到?

唔好講年輕人,講我呢D唔上唔落0既年紀,我自己住果度,買黎收租的話,每月都只能提供四五六千現金流(未計物業稅差餉管理費地租),如果以我家庭開支黎講,要十幾廿層先夠。。。

小弟2007置過業,如果果陣唔放,而家果間物業都係一個月帶來唔夠一萬現金流(月供已經好小,三四千,問題係雜費唔少),又係要十層八層。果陣我邊有咁多錢?

逐間逐間買上去的話,
除非你毒撚一條兩三萬夠洗
否則根本好難短時間財自。

如果要二三十年,咁刻下光陰是否被浪費了?

我呢個淨身家過兩球美金0既家庭,靠物業收租的話,有排都未可以唔撈。年輕人想開始第一間收租的話,如果幫補下收入還可以,要提早退休,應該真係要做到五六十!

睇死你一定留係香港?

我唔係講果D發悔氣話移民個班,其實覺得無前景,出走唔係一件壞事。我呢個年齡層都有唔少BLOGGER因其他原因離開香港。唔想同佢癲,離開好正常。講人工講政治講工作機會都係SIDE氣,人最緊要活得開心,活係自己最理想0既舞台入面。

大家小時候,我的志願係咪做有錢佬?係咪想財自?我估唔係卦。。。

班老野向現實低頭,年輕時選擇左逆來順受,為何現今年青一輩一定要同樣SUFFER?以前規則係已經死左入埋棺材個班定出黎,點解要跟?我唔係黃絲更加唔係熱狗,有咩唔公平,大家同樣有SAY,點解要跟老一輩0既規則?



做人呢,要有同理心,相煎何太急?AGAIN!

當年你或者ON99讀書日日讀書夜夜讀書,深信讀大學會出人頭地,書中自有顏魚肉。何惜果個年代無互聯網,無人同你講又無人可以比較,結果默默走左條死路浪費人生。本身奴性又重,比人鬧都敢怒不敢言,現在屈埋帶唔落棺材之餘,連刷自我存在感都要刷得如此可憐。人生有咁多可能性,奈何年紀越大可以選擇越少,何必眼紅年輕一輩能放浪不愛束縛呢?

男主人廿幾歲時誤打誤撞完成左我的志願,之後鬥氣想試下炒旦搵錢。誤墮塵網中,一去十幾年了。雖然我都唔係易相處0既人,不過一個人0既特質,並唔係單睇佢學識,講野,用字可以量度,都係個句,你睇唔到別人優點同埋點解成功,正因為你道行太少層次太低。

看不到現今年輕人思維想法,你永遠唔明白佢地有0既創意,以及這一刻0既無力感,亦同能力有關。

2017年5月8日 星期一

家庭開支與現金流 我可以唔撈嗎28

見塘人兄講左幾篇現金流例子,我又口痕UP下。。。

(另,感各位支持,GOOGLE ADSENSE已足夠第一次捐款!!真係好大鼓舞!再夠數再捐!謝謝各位。條數要下月先收到,到時立即捐左佢,放張收據上來,呢幾百蚊廣告費,仲難仲耐過小弟搵一百萬。。。)

昇輝模型代理 SD武者BB戰士深紅騎士樹脂模型GK改件
砌後感在文末

其實小弟現金流最主力都係工作,你話係工作又得,係生意又得。

正因親力親為,手停口停。

搵人做?我又唔想假手於人,炒旦同搓面一樣,比第二個去做,一定食得出唔同味道~~!

至於被動現金流,以前係股市獲利,期權金而已。

現在變左食息派,因小弟唔識買個股(唔好笑我),而早幾年收入升得勁,不如主力工作好過啦,又有成功感,又有存在感,又唔駛受氣,去邊度搵?

講番正題,有人計過某ECON書作者,每月比得八千蚊長輩。。。真係心酸。不過作者真係作者,都仲可以上報紙講財經叫人買乜買物。。。

男主人四大長老,以一年計,已經係佢四倍。(新年DOUBLE PAY)

男主人父母都到左生果金年紀,又得閒去下議員蛇齋餅種旅行,又玩下兩個孫,算係咁卦。睇醫生呢,老人家條隊唔知係咪快D,早幾年老豆標靶治療現已好番仲定期有檢血檢查。

真係要咁多錢去財自?怕老來無依?我睇唔透。可能我地呢一代,無公屋就要有一層自住而已,真正夠唔夠駛實在太多變數,而夠駛又未必幸福。

實數唔講啦,計個四捨五入,四大長老3萬蚊。
租金係兩萬內,不過女主人成日想換大D,兩萬五應幾夠。(一千萬樓,都係供萬八,連埋差管地都係25K)

小朋友,預佢每人四千。我地唔玩鬥讀書遊戲,得就得唔得就算,大不了一砲過出國讀,好過長期鬥爭。

女主人話,佢一個月駛15K已好夠。當住我都要15K啦。(我一個月都唔知用唔用到咁多。。。五百蚊一日)

即係話,一個月要93000,計埋有工人(其實無),齊頭十萬。

即係一年要有120萬股息先得。(其實我計過,如我兩公婆縮減少少自己開支,住屋維持現狀,年股息要80萬左右)

其實條數已經計得好鬆動。

******

又計下唔做野現金流。REITS,BONDS,優先股,建行(佔我一半倉),一共加埋可有年息126萬,未計女主人及男主人(CAD資產)合計410萬,呢筆錢可投資又可買樓(高追?其實主動收入快過樓價升幅呢。。。)

女主人生意條數上月破左歷年紀錄,不過今月似乎好多黑仔野。反而男主人就好固定,因為我揀客!

******

退唔退?儲多少少錢先算吧,反正我又鐘意我0既工作,鋪頭租約又未完(如果加鋪租,我每隻旦加少少價已經追番有突!因為旦數多又唔太影響食客,極其屈機。),相反女主人就難預料一點,不過都係個句,佢做到咪做,不用比壓力自己。

其實鋪租今年十二月就完,想繼續炒旦,除非有突發事故(例如建行升到十蚊八蚊,或者鋪租加一倍)。預計年底十二月兩公婆流動資產已達六百多萬,可以full pay住緊個度,收住息逍遙自在無難度。

*****

最後,點解講咁多呢d野?都係blog友們啟發。

我十年前發現主動收入持續可以四十歲前唔駛撈,上網睇下有冇類似,竟然無,大部份都係未自由係度講,一係就老到一個點0既老人,完全無idea幫到我做預備。所以先寫呢個blog。

同樣,唔係哂身家,R兄話,有血有肉荷槍實彈最好睇。希望有能力相似或比例上相似0既人可以遇知音,我十年前搵唔到,希望十年後有人搵到我。

我又問過,有冇懷疑我係九UP老吹(早知吹我哈佛畢業,收幾個徒弟跟我學做生意啦!),原來BLOG友們都係懷疑D感情事係咪老作!哈哈哈哈~~~


洗件洗得唔乾淨。。。搣左膠紙連油排出。迫住手油好多地方。唉,失敗之作。。。

2017年5月2日 星期二

連居屋都買唔到 我可以唔撈嗎27

講工作

今個月男主人工作比較辛苦,成日好早起身。。。突然間下年客源問題一下子唔知點解解決左。估計係有人幫手暗地裏宣傳,食過翻尋味吧。

都係個句,小弟係炒旦核心,好難複製。有時我依然好鐘意去炒,不過好多時都想休息下。

上月腰患困擾,今個月好番d。

減少炒旦定真接退休?後者會更好。減少炒旦會嚴重影響營業額,呢行多者越多,越窮越見鬼。估計削一半工成量,反而生意會跌到得番四份一。

踏入呢d 月份,天氣關係,炒旦款式變得非常單一。
相對用既技術亦都少左,所以工作上係輕鬆左唔少,相信五月份過得更輕易。

HG 1/144 GUNDAM LEGILIS
左邊完成品(噴筆,手油補色,滲線,上水貼),右邊只係噴筆上色。
感想在文末


而女主人呢,似乎佢都怕新請個妹妹會辭工,先唔理工作得好唔好,教識左自然而家點都可以幫輕下,尤其係佢自己盤數計得更好。

佢鋪頭lunch time 其實係tea time,妹妹通常出去食消消氣,即使老闆請都唔留係公司既。

女主人話,佢肯做到一年幫輕下已經好好。

講投資

女主人持有中平安同埋中海油,佢打算$44.7賣左中平安但不成功,各位朋友,佢賣完可能中平安會大升!

本月男主人收息HSEA同BKR 8.25共八千美金,以及現金流港幣十萬左右。全數再買入CUF 同EIT各一千股。CUF除完淨又跌,開始蝕價。預計五月收加幣492元,即約港紙$2800。

五月份收息系列為SGX REITS,但A17U減派息太多,全數賣出,換馬RW0U。


另美債BKR有自願贖回,因小弟想換左呢隻YIELD相對較低0既債券,選擇以104.幾的價格贖回吧。換入AETINC 9.75。



講目標

今個月開始唔再貼女主人戶口,因為佢開始識計自己條數。

女主人現金加股票為357萬(上月為349萬)。

男主人現金加CAD資產(預左隨時套現),為53萬(上月為39萬)

本月結合共410萬(上月388萬),大約係幾多?只能買到870萬0既樓(連佣及厘印),即係我呢個窮家庭連居屋都買唔到!!!算得係乜?最勁梗係有磚頭啦~~~


女主人話,等租約完,搬大D好過同佢癲,錢唔係咁用0既。

四球野買五厘野都廿萬一年,何苦而家要倒貼去供?呢D價留番比覺得自己有好急切自住樓需要0既人吧。

圖中見到我兩公婆。。。哈!
第一次咁樣噴陰影,其實一路唔係唔識噴,係吾鐘意噴。
感覺高達只是卡通,玩具,非實物。合金或電鍍配色最正。
點知呢隻竟然會咁多好評。。。
不妨各位又留言比下意見!

呢隻係幾年前0既動畫,收視好低。敵方FINAL BOSS之一。無睇過又想知咩來? 下面條片有簡介。DESKTOP版本先睇到!




Related Posts Plugin for WordPress, Blogger...