小弟在DISCUSS 並無出文
你回應緊0既,都係一個有心引你派膠0既人,並非小弟。
若有人以為我係DISCUSS 出文引HATER, 是否太小學雞?
小朋友, 暑期放完好耐了. 好好努力上班吧...

2017年6月26日 星期一

平行時空之間 兩個BLOG聚飯局

這篇文特登攤到凍哂先黎寫0既。

有人問我咩係平行時空,不如講明白D,就係兩批BLOGGER吧。
(排名不分先後!不過止凡BLOG聚比另一BLOG聚早!)

以下係投資向BLOGGER,相對佢地,我真係乜都唔識得個聽字!
一共十三人,睇對面兩位坐得咁親密就知有幾熱鬧啦~~~


股壇老兵鍾記長勝之道 - blogger

取之有道- 止凡 - blogger

另最後一位應該是無BLOG的(如有請告知),也是叫REX。

恒指就快28000,巴黎兄笑言講過或許回來?
過左成個月,飛鳥兄介紹0既THE 100我都睇哂了。
另,原來STARMAN同R兄同我,都曾經或現在常常出現係荔枝角!
最好玩,梗係認下未見過0既BLOGGER,標竿弟弟好後生!
以風趣程度而言,我覺得藍冰兄其實好GAG(兩次見面,都覺得佢好幽默!),如佢開班我可能會掏腰包去聽。
窮家女,講野好似火雞姐咁快!(唔好打我!)
兩位REX都好多料爆,哈哈,我最鐘意聽呢D。。。
最後止凡首領,負責最少人做的,點菜。(好似都係佢埋單!)
仲有外援理財見習生,佢遲到,其實我想佢估哂我地咁多個。。。
最後,偷偷問下鐘記平時會做乜,認真,呢個係我寫BLOG 0既其中一個原因。


以下係吹水系(哈哈)BLOGGER,見面吹水多,講投資好小。




風兄以為自己最遲,實際唔係。真人係口水佬一名,實無悶場,講佢D生活呀,經歷呀(非投資),好過癮!
言弟同MICHAEL弟都好後生,一個有肌(肉),一個有斯文靚樣!今次點菜,係MICHAEL點。
森而最遲到,坐得太遠喇。。。不過聽聞佢自我財自左一個月!
CHERRY兄,都係個句,真人靚過相。著衫好斯文,唔知係咪因為BLOG聚定係平時番工都係咁?
狸貓兄似乎比上一份工作更加精神(是否死撐不知道),但感覺上佢轉左FIELD後,自己更加滿意吧。
R兄一路想知邊個飲左杯芫茜味啤哂,原來係我。我只覺得咸咸地。。。
拿,兩個平行時空之下,有一位BLOGGER重覆左(唔止係我呀!)。同佢實在太多相似的地方了,雖然佢型我好多!

每次BLOG聚番屋企,老婆都預左野食同我食,驚我食唔飽?哈哈哈~~~


2017年6月20日 星期二

父親節禮物2017

個人意見,父親節禮物呢,過左幼稚園呢三年,就唔會有。

所以,個女升小一之後,應該就無,最小唔會自發性咁送比我,一定係老婆提佢。

阿仔仲有兩年。

上年家姐已做過掛架,用黎掛籐條(哈!),今年果個唔知要黎掛乜好。


佢地都係無乜藝術細胞,求其完成到就已經好好啦。暫時兩姐弟0既強項都只係講野比較叻,算係男女主人的遺傳吧,至於似邊個講野(非常唔同STYLE),真係要大個先知。

家姐D幽默感已經開始出黎,有時我都覺得佢D笑位好正!

講番父親節!正常情況,男人老狗係唔會送野比老豆。(至少我都唔會)

講真,不如靜靜地同我打番一晚機仲開心啦~~~!可惜佢地太細,仲未係好識用個手制。。。

祝各位父親節快樂,未做父親0既,快D做!哈哈哈~~~

下一篇講下上星期出席左,係另一平行時空下的另一BLOG聚。

2017年6月12日 星期一

女主人100萬買優先股 亂九黎收息系列2

事綠係咁0既,女主人半年前食花旗銀行迎新優惠,加加埋埋七八千咁上下。

食髓知味,佢又諗住轉去食渣打銀行開戶優惠。

https://www.sc.com/hk/zh/promotion/priority/wealth/exclusive-offer-new-customers.html

其實都係100000MILES同埋五千幾蚊現金是但揀一邊。要定存半年喎!

複雜版

https://flyformiles.flyday.hk/4826

我通常都唔睇,信用卡簽帳我地好難預計到。

我又口痕同女主人講,100萬買優先股,可以有五六千一個月,係一個月唔係半年。

花左半粒鐘時間講下有贖回風險,價格風險同違約風險。

最後買左99萬,三隻優先股,盡量同男主人個D唔一樣。


三隻息率唔同,多除小補吧。年回報點都有七厘0既。

第一隻派息應為 RBS PRF六月中,之後C PRN七月尾,BCS PRD八月尾。

對我有咩好處,就係增加按倉值,同埋可能偶爾有三五十蚊多左出黎吧。

有咩唔好處?就係我唔會重覆買佢買左個D,分散才可以盡用按倉值呢。

同樣方法複製的話,三百萬,可用黎買六百萬0既樓(一倍槓桿),或者收每月18000息(不用槓桿,用番一倍槓桿就起碼30000一個月了)。

點知,唔夠幾日,佢又話係另一度拎一百萬去渣打。。。始終都阻止唔到佢食迎新的貪婪!


昨日食左平昌 Premium,係佐敦。
埋單兩人$480,無下次,因為太少野食了。。。
用佢個板燒蠔同凡立貝,有排都唔熟!

2017年6月8日 星期四

女主人自high 系列 生活廢UP

生活廢UP第二彈!

以下呢隻我又放左係我朋友度喇!只是自HIGH並非寄賣。
如真係有人買,收到D錢就捐左佢啦。
上次GOOGLE AD SENSE 0既捐款,仲等緊相關部門向上級問准。
預計捐款會用黎比慈善辨學團體買圖書比小朋友睇。


隻野放左係紅圈位置,得閒去探下佢啦。
地址?圖中右上角有!
D模型都算幾平,一定平過反斗城啦當然!
免有BLOG友誤會,講多次,間野唔係我的。。。

以下是女主人上星期遭遇。。。

"今日有個客,佢想幫個女整件中式長衫,我問佢個女幾大,佢話4歲半,我同佢講件衫可能用到幾個月就唔岩用。因為我個女今年六歲,整番差唔多既衫已經有少少包唔住,預留位置唔夠。仲有我個女唔算特別高,正常發展小朋友。"

以上平平無奇係女主人打比我既。

重點係佢口述個句

"個客即時好驚訝我有個六歲既女!"

哈哈哈,我成日笑佢d 客扮驚訝,其實係想R discount。

其實呢d 情況都唔係第一次,我又唔可以話佢凍齡,只能夠話佢生完無變肥師奶,而本身個樣又少少童顏。(當知道佢已有兩個小朋友後,更加吃驚!)

齋講呢d 美麗的誤會,已可出一本書。

(呀!不過如果我地真係開班開講座,我都係想請0靚模派NOTES,女主人還是搵其他野幫手吧!)

昨日一早去左老婆鋪頭走一轉,諗番09年佢初創果陣間細鋪,另有一番感想。

果陣,首次衝破十萬營業額已經好開心,佢仲即時MSN話我知。唔夠半個月,已經有一次成鋪都係客,當時得佢一個人做,無員工。

其實女主人都係傳統生意,不過當然同我一樣加入左創新元素。係D乜當然唔講得,不過好彩我同佢0既年紀剛剛趕得上呢班尾班車。叫做同年紀果D未識咁做。

當時唔夠半年,已經有人學到,2017年今日,附近0既同行都做埋同一樣野了。女主人依舊靠服務同EQ搭救,至少生存到今日都仲搵到兩餐0既。

男主人炒旦生意,天份成份好重,加上創新元素(仲要是無形的),同埋果一種熱誠,極難複製。所以唔好再問我收徒興否了。

2017年6月5日 星期一

炒旦先定烚旦先? 男主人工作

話說,男主人炒旦都近15年,咩都睇化哂啦。

以前無乜生意無乜口碑,用料又唔靚,唯有功夫搭夠,其實後生個陣,技術先最好,個人手腳靈活一點。就同打機一樣,一老左,好難夠D後生仔黎。

到後期,尤其係自立門戶以後,收入三倍升幅0既主要原因,就係多左自己個金漆招牌。就好似由"雲南米線"改左名做"三哥米線"一樣。

其實都幾諷刺,人老左,手腳無咁靈活,相反配套機器用料好過之前,反而又拉番均。

同女主人食牛陣,今次我唔爭比錢,600有找。
好難想像拎住一二百蚊入去一個人燒,食得D乜。。。
LUNCH可能有SET 0既。

更諷刺地,機器式炒旦,失敗機會低過全人手,技術幾好都無用。所以,此時此刻,不論技術定配套,係同一市場下,都好難有對手。(只係個餅咁大,我實食唔哂)

直到今年,都睇唔到有後浪可以推前浪,反正好快收山,都幾肯定2018年會休多一日息。

係另一個時空,除左炒旦仲有烚旦。

烚旦當然標榜無咁熱氣,好似武林中正派人士一樣。相反炒旦變得旁門左道,所以我成日講,我0既小生意不值一提,講出黎只有比人噓。。。。

睇唔明?好似涼茶鋪日日鬧人去食炸雞好熱氣一樣。

但係呢,以中國傳統用火0既時序黎計,歷史上,炒旦係早過烚旦好多!

人人都要食飯,烚旦又唔係特別高尚,久唔久隔幾年我就遇到烚旦攻擊,雖然無實質行動,不過比佢亂咁UP,心裏總不舒服。

"你咁叻,不如你黎做丫"
呢個係我心裏存在左十幾年0既回覆。

烚旦幾乎人人都識,剝出黎一模一樣,最多分別在熟唔熟,炒旦你去間間餐廳食,味道都唔同。加鮮奶已經可以好唔同口感啦。

同埋炒旦需要更大資本,班烚旦人跟本唔敢做,但心裏又要鬧又要葡萄。

大家目標都係整旦,點解唔諗下互補,而係要去咒罵對方?如果真係咁唔鐘意,好應該做好自己,人人食烚旦,無人食炒旦下話?

再再者,炒旦唔止我一間,只係同一市場內,我特別出名,咁大個人就唔好咁無聊。。。

廢文一篇,純粹發洩。

女主人買衫,我ON99食住雪糕等佢。。。痴漢偷拍咁樣。

今個星期無砌高達,一黎想休息,二黎追緊飛鳥兄介紹0既NETFLIX 電影 THE 100

最後,我也來SHOW下我0既貓咪!


2017年6月1日 星期四

換債又換股 我可以唔撈嗎29

講工作



五月份工作又輕鬆過四月,哈哈。。。係困身0者。

如無意外,六月份炒旦一係得閒死一係忙死。生意的確係可以估計,而且年年都估得好準。

今年的確無上年咁受氣,女主人講0既,"做得唔開心唔好做"。係LAW!反正唔係無錢唔係等錢駛,何必谷到咁盡?

計埋建行利息,唔再投資的話,扣埋借貨成本,一個月九萬蚊息,即使唔撈都唔駛擔心。

另外,男主人鋪頭法團話要攪翻新工程,要每戶分擔費用。睇下張通告,都唔少,約係兩個月租金。

阿業主買左番來收租唔知夠兩年未(我真係唔記得,我個鋪應該係易手最密的!),無啦啦比人扣番兩個月租。

肯定今年年底加我租,我估我加4%就可以抵銷佢加我25%。而呢個亦係我預計0既最大值。

年底,簽多18個月,過埋佢就收山!

講投資

賣左兩支債,換入另外同月份兩支。

PBFENE被贖回,贖回價平過市場價,賣左佢,換入TOY(希望佢唔執啦!)
KND見有6蚊利潤,換入另一BELOW PAR 債HTZ(希望佢唔執啦!X2)

截圖如下:

另外,又賣左SGX REITS,持有半年,連三次股息及股價升幅(有一隻蝕0既,P40U!),獲利10%

原因?我發現C-PRN 都做到係我想派息0既月份派息,而且浮息,買入價時股息有7%,比HSEA HSEB 低,結果買多少少啦。


反而最新不肖子係CUF.UN!蝕緊四千幾加紙。。。睇下溝淡佢好唔好吧。

截止五月三十一,資產分佈如下


建行輕微上升,升到八蚊我唔續鋪租啦~~~!

講目標

女主人本月資產(得番一隻中海油,其餘現金)365萬(上月357萬)

男主人現金連CAD資產為66萬(上月為53萬)

本月合共432萬(上月為410萬)

香港人最鐘意講樓,
我呢D無殼蝸牛死窮L,
只能買到890萬0既樓!

唔係我謙虛!!!
我住緊個度0既三房叫價都900萬啦,仲要唔係你想睇就睇,要比睇樓費架!幾錢?AGENT SEND過來的,如下圖!


女主人話,貴成咁唔會買,租把啦。係喎!432萬做少量槓桿,7-8厘一定有,仲慳左其他洗費!你唔跌又唔係問題,我其他資產一路跟住升。

可憐香港班後生,一係窮一生精力上車買間阿婆舊樓自覺威威,而懵然不知正被老人家用樓透支佢地青春。。。

唔買樓,又有幾多人講得出做得到?

最後,上兩個星期0既實驗品!
MOLOTOW LIQUID CHROME 上色!
Wing Gundam EW (SD)
用GAIA T09溝稀1:1,噴完放番三五日唔好摸,
等佢乾左就唔怕有指紋了!再係上面上色也OK!



Related Posts Plugin for WordPress, Blogger...