小弟在DISCUSS 並無出文
你回應緊0既,都係一個有心引你派膠0既人,並非小弟。
若有人以為我係DISCUSS 出文引HATER, 是否太小學雞?
小朋友, 暑期放完好耐了. 好好努力上班吧...

2017年7月27日 星期四

2016 建行股息 少扣股息稅

其實呢件事發現左好耐,本住一知半解唔9理,等到真係派息。

2016年度建設銀行宣佈每股派RMB0.278, 亦鎖定埋匯率之後係HKD 0.31950351

即係呢,係花旗銀行入面0既建行應派,再扣減10%股息稅:

250000*0.31950351*0.9

扣埋0.5% 手續費,即係派

250000*0.31950351*0.9*0.995
= $71528

咁IB呢?

先看下圖。。。
(無視5364個項,因加埋CAD股票股息稅)

近56萬股息入面,只有其中41萬要扣10%股息稅!?
另外15萬變左"PAYMENT IN LIEU OF DIVIDEND",唔駛扣稅。

依小弟求其GOOGLE左五分鐘同某一兩位BLOG友理解係,IB借左部份股票比人,"真正股息"比左果條友而佢亦交左股息稅。但係,果條友要比番股息部份我,不過我睇哂全個STATEMENT都唔見有係第二度扣稅。

早月兄講,因香港同美國稅制不同(我也不深究),咁樣反而著數過收真正股息。

無端端慳左15000股息稅,老婆成日叫我送野比佢。。。

最後紀錄一下,2017年收到建行2016年股息共HKD589756,即平均每月有49146用,每日有1615蚊用。

相比上年,股息升幅係追唔到通漲0既!哈哈~~~

2015年度(2016)收到575701

食息過活 建設銀行 2015 年股息派發


2014年度交行建行股息HKD41萬,加埋權金12萬總數53萬
(故事一匹布,自己睇呢篇 2014 年交通銀行 派息日 收到股息

再上年收到2013年度交行股息HKD44萬
(連結按此2013 年股息派發

再再上年收到2012手度交行股息HKD278000
(連結按此2012 年 股息

2017年7月23日 星期日

我的財富大道(2017) 九十萬人次

打風唔開鋪,趁仲記得想打乜快D開始。

上年同之前個D,下面連結有

我的財富大道(2016) 四十五萬人次

呢篇留比自己睇,免第日無記性!

同時,真係樣衰,拉車邊勉強就黎成為百萬BLOGGER(難過搵一百萬。。。)!

應該係最後一次買"風水魚",
每次我都等到全軍覆沒先買,
估計應該可以捱到我唔撈之日。

近日有感,見兩個BLOGGER一個偶像都有寫過回顧過去,老婆又提下我,原來自己都就快40,預計40我應該無野撈游手好閒0既。

2001年四五月左右畢業,專業科目(每年要有個牌掛係鋪頭個種啦)我唔做,去左搵D文員呀,九唔搭八0既工。(呢個讚擇由我YR1暑假已決定,算係我第一個人生交叉點

要講出黎做野,要數到2001年8月,小弟第一份工係賣鞋0既跑街。當時人工八千,做左九日。

之後都係咩都做下。同年年底身家近乎零,即2002年我是"由零開始"的。

2002-2003走左去做侍應,算係炒旦0既前序,人工?最高時10000加炒散幾千。最高峰我估都係得17000。

2004去左讀書(POSTGRAD),不過炒散幾好搵,最高有二萬幾,最差都有一萬。

2005做左我的志願,九唔搭八,人工萬幾,當時同我拍檔炒旦,又係萬幾。加埋未夠三萬。如無記錯,第一個十萬係2005二三月左右達成。

當時好興奮。。。哈。2001-2005都係有錢就入去銀行,完全無投資。

2006 開始現股票,獲利少少就放左佢。買過利豐,超大現代(!!),及一眾藍籌!當時中人壽大約7蚊,匯控120左右。

同時,2006年中開始同拍擋一齊全職炒旦(放棄呢個我的志願,算係我人生第二個交叉點),當時收入一開始都三萬。直到2011年拆伙時,應該一個DOUBLE。

2007年頭識左女主人(感情上0既人生交叉點),年中淨資產過左100萬。亦都開始出黎住。

2006-2009去左讀碩士,也是九唔搭八的東西。

如果講樓,小弟住公屋,2007買入區內C級屋苑(分為ABCD)。
2009落車,改租B級屋苑向海靚裝,後尾租金大升,2010用更少租金租左D屋苑,2012用番2009同樣租金租左D屋苑全新裝!2014-2017搵到錢,轉租更靚0既屋苑B。(A屋苑租唔到,因為我有兩隻貓。)

2010年一刻資產達到400萬,同時我外婆過左身。所以特別記得。

2011年拆伙自立門戶(我人生第三個交叉點),首月已衝過十萬,樓升,老一輩錢多左又肯駛,基本上唔憂做,再加上我放低包袱全力谷,有幾年某D時候去到20萬。

2016年淨資產達一千萬,之後開始槓桿投資債券,優先股果堆野,收下息。

2017年資產近三千萬(留意無個淨字,小心!)。個人淨資產原來已超過左當年初玩期權覺得非常勁0既偶像了。

預計2019年年中,小弟退休之時,未夠40歲(有真實時間表啦,有早無遲,應該係我人生第四個交叉點?),家庭淨資產約2400萬,無自住樓!夠唔夠?唔理了!

淨資產里程碑?
2002   0
2005   100000  (達成原因:收入)
2007   1000000 (達成原因:收入加股票成果)
2016   10000000(達成原因:收入為主,收息成份不多)
2019   20000000(預計)

有人辭官歸故里,我選擇左唔去繼續小生意,當然有我考量。工作成功感已經充滿左好多年,本身我自己就係懶懶閒閒0既人,誤打誤撞變成勞碌命,之後會做D乜?秘密~

2017年7月19日 星期三

租樓無鬼用?

寫呢篇文個陣,我一路諗會否比人笑,哈哈!


呢個題目講左N年(起碼有十年),個個都識去計數,有人用買樓自住同租樓自住比,有D以投資角度睇收租同租樓(呢個超九唔搭八),又有人用首期投資同租樓開支計。之後各人會FF樓價升加按,樓價跌COVER到租金與否,無日無之傾落去。

計數又唔係人人識,不過又有好多人識,真理,係咪一定要用數計?

久唔久又有人用感情去講。不外乎個幾樣:

業主加租
被人迫遷
每一、兩年搬一次
月月交租比人供樓
租金不停升
安定感

小弟並無打算逐個擊破,反正100個有99個都係紙上談兵。

講個真人真事,小弟幾年前常常恥笑女主人有個朋友,連拖都未拍過,成日去指指點點男女主人之間0既感情事及對小朋友0既管教,其實佢都未試過,不曾在其中,又有咩資格講?

有幾多個BLOGGER長期都係租樓住?提出呢D論點0既,大部份有自住樓BLOGGER。或許佢地以前都短期租過樓,所以有其個人體驗。

小弟炒旦都識幾個,一路都租樓住0既極有錢人。不過講呢D真係SIDE氣,等同80後求死自己無料講自己識D乜乜前輩點樣勁一樣。

我個人意見呢,因為我都租左幾年樓,又搬過下,應該有資格講下。

加租迫遷搬屋呢D野,其實錢係可以解決。早幾年舉個例,8000蚊租加到9000,其實都係多12000一年,有本事咪續租,唔順氣就搬,無錢咪搵間平D。錢解決到0既問題根本唔係問題,意氣用事大過一切。

交租比人供樓,其實你出街食飯都係比錢人交租,供樓都有利息比銀行。使用服務必然有代價。明明一個公仔面早餐,自己煮同出去食係差好遠,出去食方便好多,抵比。

租樓一樣,煩少好多野,自由度極高,抵比。蝕本生意無人做,放得租唔通要蝕錢(如果係咁,就係樓價下跌之時了)。等價交換之下,隨時可以拍下屁股就走,可UPGRADE又可DOWNGRADE,比多少少錢都值得。

大前題,係要夠多租盤。

以下都係個人意見

如果無公屋,全家搵得兩三萬,當然合理價上車。不過,400萬樓,月供要萬五蚊(無左一半收入),壓測要三萬七。究竟係佢地活該,定係樓價太高?我無乜意見。我點解咁唔鐘意細價收租仔?或者上面呢個CASE有D啟示。

果班得三五七層細價樓收租仔,其實在財富中下階0既小弟黎講都唔係D乜,計下數,原來總資產都接近3000萬,不過同一般收租仔一樣,借左同借到幾多有冇借到盡?好心,講就講淨資產吧。

如果五萬以上,就真係人人情況唔同,有人係可以等樓價租金逆轉。收入越多,用錢解決0既感覺越強烈。

如果唔以對賭心態去執行(例如租住先等樓價跌),個人諗野會正面好多,跟本就無安定唔安定可言。例如小弟已經有能力可以任租全區任何租盤,不痛又不癢,又點會同收租老野去計較去計算?

當見到女主人諗下下次租咩單位,就似佢上淘寶購物一樣。我地幾時買會否買?其實都係睇樓價/資產比例。若然突然有好多錢,我地唔會考慮升跌就會買,同樣,女主人自己D錢而家都買到區內唔少單位,不過佢都無呢D衝動(所以女人有外在美0既,都可以有內在美,亦都可以有財商!不要睇太多TVB!)

最後,好多時買好過租呢D論點,都唔係長期租客舉出,是否片面之詞請自行考量。

同樣,正如年青就財自唔撈一樣,唔計有能力但唔想唔撈個堆(人數好多),真係做到又有幾人?相反不停評論或者不停講點樣去追求0既人,就好鬼多。

這亦正是小弟寫BLOG 0既原因。

近期好少寫文,我方針係定期有文,不論內容多少。但呢期同老婆仔女四打PS4 FAT PRINCESS,自己又開始番工作,有時比較懶而已。



寫完呢篇文個陣,我都仲係諗,會否比人笑,哈哈!

2017年7月7日 星期五

人老反應慢 GUNDAM VERSUS玩唔掂

昨日終於忍唔住,網上買左呢隻GAME。



自問本身打第一身呢D遊戲好屎,加上人大左反應慢學習又慢,對戰只有捱打(唔好咁快死已算大幫忙)。

暫時放埋一邊先,今日休息下,好快又要開鋪了。

近期除左GUNDAM VERSUS又打伊蘇國8,其實我只係為左童年回憶。



伊蘇國8呢D ARPG我都OK,當然惡魔城/GOD OF WAR/DEVIL MAY CRY 呢D 應該更好玩。

好彩,成個GAME收集味道唔重,應該重有20%就爆機,挑唔挑難度同全白金?應該唔會了。有時間我寧願玩其他GAME,或者同老婆打無雙大蛇好過啦。

頹左兩星期,感覺一D都唔差。

SMILE矯視都剛剛兩星期,眼乾令眼模糊都幾勁,尤其朝早。希望一個月後可以真係OK。暫時黎講個效果比我想像中差0既。

個女明天畢業禮,眨下眼又六歲。。。

2018,鐵定一星期工作二十多小時!

預計2019再縮,一係執左佢,一係番兩日算,叫做好頭好尾。

放五日假的話,可以實現同老婆想起就可以四圍去啦。

2017年7月1日 星期六

一日湊仔公 我可以唔撈嗎30

流感肆虐,家庭中三大長老中哂招。個仔兩日無番學,小弟都有兩聲咳。

因為我家無請工人(靠三大長老幫手),結果今日蜀中無大將之下,我擔當左一日湊仔公!

難得,上年止凡七月BLOG聚我又關門一個月,今年六月就關門,做下平時想做0既事。

我做左SMILE矯視,另文再講,仲係度休養中。

另,發現成日想番公司喂下魚,比個藉口出下街唔留係屋企咁悶!(睇黎遲D三大長老再老D,真係要請番一兩個工人。)

講工作

忙碌一輪現在休假中,收租仔口中,我就真係蝕緊鋪租了。不如借個場比人散貨?痴線架咩。。。

發現雖然唔駛番鋪,但係有時都想番去坐下,行下附近D GAME鋪模型鋪。真係唔撈之時,似乎都係要係附近搵D細藝!

老婆六月份爆數,繼續再創新高。同事出佣多過老底!問下佢原因,佢又話唔知,可能佢今日PMS。哈哈哈~~~

小弟預計自己炒旦,十二月前都繼續好好。2018年一月開始實行五天工作就唔知喇。

開始減工作量,肯定錢同生意都會少。呢行貧者越貧富者越富0既。

講投資

今個月繼續買左兩隻加拿大股票,其中一隻蝕緊三皮野港紙了。慘慘豬。

下個月建行股息,會繼續用黎買佢,亦都係最後一注。

之後儲到0既錢,再作其他投資。

另外,女主人投入左99萬買三隻優先股,今個月底派息比佢。

總借貸部份大約係140萬美金,一路KEEP住呢個數唔多唔少,收到股息再投資。



講目標

次次用買樓黎講有點悶。

不如計下數。

假設兩公婆各洗一萬,即兩萬。
小朋友五千,生夠四個(講笑,現在得兩個)又兩萬。
四大長老,三萬。
工人,五千一個!(仔大女大,想同老婆有時黎個SHORT TRIP都唔駛太煩。)

即係要75000一個月,未計住屋。
我呢邊基本三房,預供要二萬幾,租都係咁上下。

十皮一個月,計埋建行股息就OK。又或者,計埋老婆個份都OK。

現在總叫好少少,有唔撈0既實力,但未有唔撈0既膽量。

上面條數估大左好多,小朋友我得兩個,我一個月未必洗到一皮野,反而追通漲就難攪少少。不過既然有人緊緊夠都可以夠彊財自遞信,小弟BUFFER更多之下是否更應及早離開?

點解咁諗?

每次我媽唔舒服,我都有呢個念頭;同時,留番小朋友學業比我,如佢受教,遠好過比人教。

真係不得不承認,真係人到中年,上有高堂擔憂,下有兒女煩惱。錢?又算係咩一回事?

講資產

女主人資產
港股中石油中海油
美股優先股三隻
現金
六月底一共370萬(上月365萬)
比上月增長少,一黎股價跌,二黎佢有卡數找左!(放心,佢公司D利潤無回撥比自己而已)

男主人資產
現金+加拿大股票
95萬(上月為66萬)
大増29萬原因?因為沽左債券,SGX REITS等利潤買入左加拿大股票,總之,唯持負債係140萬美金內,其餘錢都買貨。

本月合共466萬(上月430萬),突然多左好多。下月建行股息入賬,會突然又多左55萬。
Related Posts Plugin for WordPress, Blogger...