小弟在DISCUSS 並無出文
你回應緊0既,都係一個有心引你派膠0既人,並非小弟。
若有人以為我係DISCUSS 出文引HATER, 是否太小學雞?
小朋友, 暑期放完好耐了. 好好努力上班吧...

2017年7月19日 星期三

租樓無鬼用?

寫呢篇文個陣,我一路諗會否比人笑,哈哈!


呢個題目講左N年(起碼有十年),個個都識去計數,有人用買樓自住同租樓自住比,有D以投資角度睇收租同租樓(呢個超九唔搭八),又有人用首期投資同租樓開支計。之後各人會FF樓價升加按,樓價跌COVER到租金與否,無日無之傾落去。

計數又唔係人人識,不過又有好多人識,真理,係咪一定要用數計?

久唔久又有人用感情去講。不外乎個幾樣:

業主加租
被人迫遷
每一、兩年搬一次
月月交租比人供樓
租金不停升
安定感

小弟並無打算逐個擊破,反正100個有99個都係紙上談兵。

講個真人真事,小弟幾年前常常恥笑女主人有個朋友,連拖都未拍過,成日去指指點點男女主人之間0既感情事及對小朋友0既管教,其實佢都未試過,不曾在其中,又有咩資格講?

有幾多個BLOGGER長期都係租樓住?提出呢D論點0既,大部份有自住樓BLOGGER。或許佢地以前都短期租過樓,所以有其個人體驗。

小弟炒旦都識幾個,一路都租樓住0既極有錢人。不過講呢D真係SIDE氣,等同80後求死自己無料講自己識D乜乜前輩點樣勁一樣。

我個人意見呢,因為我都租左幾年樓,又搬過下,應該有資格講下。

加租迫遷搬屋呢D野,其實錢係可以解決。早幾年舉個例,8000蚊租加到9000,其實都係多12000一年,有本事咪續租,唔順氣就搬,無錢咪搵間平D。錢解決到0既問題根本唔係問題,意氣用事大過一切。

交租比人供樓,其實你出街食飯都係比錢人交租,供樓都有利息比銀行。使用服務必然有代價。明明一個公仔面早餐,自己煮同出去食係差好遠,出去食方便好多,抵比。

租樓一樣,煩少好多野,自由度極高,抵比。蝕本生意無人做,放得租唔通要蝕錢(如果係咁,就係樓價下跌之時了)。等價交換之下,隨時可以拍下屁股就走,可UPGRADE又可DOWNGRADE,比多少少錢都值得。

大前題,係要夠多租盤。

以下都係個人意見

如果無公屋,全家搵得兩三萬,當然合理價上車。不過,400萬樓,月供要萬五蚊(無左一半收入),壓測要三萬七。究竟係佢地活該,定係樓價太高?我無乜意見。我點解咁唔鐘意細價收租仔?或者上面呢個CASE有D啟示。

果班得三五七層細價樓收租仔,其實在財富中下階0既小弟黎講都唔係D乜,計下數,原來總資產都接近3000萬,不過同一般收租仔一樣,借左同借到幾多有冇借到盡?好心,講就講淨資產吧。

如果五萬以上,就真係人人情況唔同,有人係可以等樓價租金逆轉。收入越多,用錢解決0既感覺越強烈。

如果唔以對賭心態去執行(例如租住先等樓價跌),個人諗野會正面好多,跟本就無安定唔安定可言。例如小弟已經有能力可以任租全區任何租盤,不痛又不癢,又點會同收租老野去計較去計算?

當見到女主人諗下下次租咩單位,就似佢上淘寶購物一樣。我地幾時買會否買?其實都係睇樓價/資產比例。若然突然有好多錢,我地唔會考慮升跌就會買,同樣,女主人自己D錢而家都買到區內唔少單位,不過佢都無呢D衝動(所以女人有外在美0既,都可以有內在美,亦都可以有財商!不要睇太多TVB!)

最後,好多時買好過租呢D論點,都唔係長期租客舉出,是否片面之詞請自行考量。

同樣,正如年青就財自唔撈一樣,唔計有能力但唔想唔撈個堆(人數好多),真係做到又有幾人?相反不停評論或者不停講點樣去追求0既人,就好鬼多。

這亦正是小弟寫BLOG 0既原因。

近期好少寫文,我方針係定期有文,不論內容多少。但呢期同老婆仔女四打PS4 FAT PRINCESS,自己又開始番工作,有時比較懶而已。



寫完呢篇文個陣,我都仲係諗,會否比人笑,哈哈!

60 則留言:

  1. D錢有其他用途就無咩必要一定要買樓啦, 租樓相比真係煩少好多野, 前提都係夠租盤

    回覆刪除
    回覆
    1. 買同租其實差唔幾,係而家D人先睇得咁重。

      刪除
  2. --交租比人供樓,其實你出街食飯都係比錢人交租,供樓都有利息比銀行。使用服務必然有代價。明明一個公仔面早餐
    係囉,咁抗拒交租,會唔會唔出街食呢?

    我都係之前賣左樓,而家靠被動收入去交租,就算佢加我二倍租都夠cover。 如果囉筆錢而家去買樓,除左冇左被動收入,仲要每月係人工扣筆錢出黎供樓,感覺壓力仲大。

    回覆刪除
    回覆
    1. 供同租洗費應該差唔多,供就有儲起部份,租又可以彈性同埋用左首期舊錢投資。
      無話邊樣至係皇道,不過非租樓人仕自然會BUY自己個套,若加上當事人無乜個人成就,就會笑人租樓抬高自己了。

      刪除
  3. 好心,講就講淨資產吧----重點所在.

    回覆刪除
    回覆
    1. 我老婆聽到我講,都反問番我邊有咁多。
      同佢一路係計淨資產,總資產吹大左唔少。

      刪除
    2. 有些博客自稱未夠30歲便管理3000萬資產,只是不知是姓「總」還是姓「浄」。

      刪除
    3. 仲有,管理0者,可以係父母老婆什至親戚加埋。
      不過佢個人正常,唔cap 水,都ok

      刪除
    4. 用屋企錢,講到好似自己賺咁,仲周圍教人買債,以為係投資老手,哈哈

      刪除
    5. 樓上講緊邊個? 應該不是我吧(我沒屋企錢用...)

      刪除
    6. 我估緊你地講果個咋,二十九歲話自己管理三千萬屋企錢又sell轉按果個嗎.

      緊係唔係話七十兄啦.

      刪除
  4. 安全感應該係建基係現金流,而唔係等於支出同負債既自住樓

    回覆刪除
    回覆
    1. 安全感來自唔會加租,
      同樣也可以來自投資回報0既.

      刪除
  5. 70後兄呢個「另類意見」應該比多D人睇下就啱

    回覆刪除
    回覆
    1. 呢十年, 資訊不平衡上, 港人根深蒂固左.
      能力上, 有唔少夏蟲不可語冰.
      純粹個人發洩.

      刪除
  6. 70兄, 睇返前文后理, 我估該BLOGGER想說的主要是「不要沽出已經擁有的自住樓」, 前題是你既然得一間樓就唔好貪樓價升而套現買股, 然后又走去租樓.

    回覆刪除
    回覆
    1. 我唔係刻意回應佢的.
      只是有感而發, 個個人係度計數, 又講安全感, 實際上係咪無安全感呢?
      我同果位BLOGGER 洗費唔一樣, 好難去評論吧.
      不過沽自住樓, 如果可以制造更高現金流的話, WHY NOT?

      刪除
  7. 個人覺得, 擁有物業會失去很大的投資機會成本。

    回覆刪除
    回覆
    1. 同意.
      反方會同你講, 股票十賭九輸, 唔知邊年買0既樓而家升左幾多幾多.

      刪除
  8. 極之同意, 只係大部分人都比上一輩同埋以見到嘅事實影響, 香港人對投資眼界太過狹窄。

    回覆刪除
    回覆
    1. 我極之同意你才是呢
      就係唔覺得人人都講就是對, 大家係度鼓吹唔好"企錯邊"
      反而無另一邊0既人出黎講野...

      刪除
  9. 本熊有樓又走去租樓,睇完兩個blogger 分享,變左兩面不是人
    其實資產分佈如健身,有啲人只練上身覺得好打得,有啲鍾意做鋼條認為跑得快,有啲專注練內功講精氣神。心態取向不同手段便有分別,其實只要最終目標是健康,練甚麼都可以成為高手

    回覆刪除
    回覆
    1. 唔係, 你係雙租族.
      有咩事可以住番自己層樓.
      你說得對, 各有各修為, 至怕有人符6跑出扮高手.

      刪除
  10. 其實講到尾都係一個問題,錢多錢少。
    無錢既人總系想一萬個理由去合理化自己行為,有錢既人成個思維根本唔一樣。食飯買野出門消費,簡單講坐飛機國泰同HK express 重點都係將個人帶去某個地方,價錢差得遠,但係有錢人根本唔至在。表,如果只係睇時間,一隻CASIO就搞掂,都會有好多唔係特別有錢既人買撈。資本多的人自然選擇多承受風險能力也比較多,資本少既人就會找一堆理由合理化自己行為,去希望自己無做錯選擇。

    回覆刪除
    回覆
    1. 是態度問題.
      自己無揀錯, 叫埋人地揀, 評擊唔揀果D蝕哂桌, 再推出一堆理由合理化, 再再去用過去成績証明.

      潛移默化之下, 租樓租得好辛苦0既人, 又會上網講下自己好慘...

      執念煉成術.

      刪除
    2. 其實你寫甘多都唔係講租樓,想講唔好強加自己思想係人地度姐。一來不一定正確,二來每個人情況唔一樣,三來每一日情況都唔一樣。

      刪除
    3. 其中一個意思啦.
      大家都說之以數理, 動之以情感. 仲唔係租樓必敗?

      刪除
  11. 我人生租樓,擁有自住樓同收租樓, 無咩對錯, 不同時期不同需要!

    回覆刪除
  12. //有本事就續租,唔順氣便搬,無錢就搵間平啲

    其實呢個已經係「租務自由」境界。要知道,搬屋嘅成本(包括金錢上,logistic上和精神上),對某些人來說已經是頗大的負擔。

    //同樣,正如年青就財自唔撈一樣,唔計有能力但唔想唔撈個堆(人數好多),真係做到又有幾人?相反不停評論或者不停講點樣去追求0既人,少之又少。//

    相反喎,博界中有能力財自的人唔多(有能力唔撈但我選擇繼續工作是另一回事),大部分依然是「討論」中。

    回覆刪除
    回覆
    1. 負擔大,因收租仔下下MARK TO MARKET吸無咁有錢0既人既血吧。呢D等報應。
      有多少少錢0既,佢地精神力唔高,把持唔住。港豬有工人搬屋,請搬屋公司又得。唔想搬,咪比多少少續租。唔鐘意住係果度,咁加唔加租都會搬。

      有能力財自0既,應該點都有一成半成呀。剩番九成討論中,討論中個堆又有大部份唔會唔撈,即係唔知傾黎做乜。

      我都係打個比喻,未做過(長期租樓)走出黎教人指指點點,又有人信個下先勁。

      刪除
  13. 只係唔同階段的需要。池某畢業之後一直租樓,幾乎一年搬一次,越搬越大,越搬越平,平到自己都覺得業主好可憐,先買一間自住。
    心態上,小朋友讀小學之前鍾意租樓,想住邊區、住幾豪,選擇較多,買樓就要就住budget,冇咁自由。當個家庭大左,其他繁瑣事越來越多,就唔想再煩成日搬屋。

    回覆刪除
    回覆
    1. 池兄低位買自住, 羡慕死唔少80 90 後!
      唔想搬屋, 就續租.
      暫時都未算太繁瑣.

      刪除
    2. 70後兄,其實最主要都係能力問題!如果完全有能力駕馭租金的話,根本租樓就唔係一個問題,反而有樓會制約發展添😛

      刪除
    3. 所以心理問題大過金錢多少問題, 心理0既野, 呢十年不停講租奴租奴幫人交租, 自然催哂眠!

      刪除
  14. 身邊有啲朋友早年覺得樓太貴,轉而租樓,現手渣資金但又缺乏財商去生產現金流養租。佢地心中眼紅人地有樓,但自己又唔去睇樓做定功課,諗住單純靠儲下錢等市大跌執平貨,但實情係不斷比通脹蠶食咗佢資金。。

    回覆刪除
    回覆
    1. 也是, 因為現金無得坐順風車(資產跌個陣咪有用),而大部份認屎認屁0既都係咁0岩坐中左貪曾架順風車...

      刪除
  15. 其實租同買沒有錯與對,適合自己的就OK了。我自己的操作,都是隨意(亂Q來的)。

    回覆刪除
  16. 70兄,唔好意思我净係識睇呢句咋^^哈哈
    同樣,女主人自己D錢而家都買到區內唔少單位,不過佢都無呢D衝動(所以女人有外在美0既,都可以有內在美,亦都可以有財商!不要睇太多TVB!)

    呢句好掂! (女主人開心吧^^)

    魚兒

    回覆刪除
    回覆
    1. 佢無乜反應, 可能文章內容我平時都同佢咁講.
      樣靚有內在美又有錢大把, 同樣, 又肥又醜又唔叻心地唔好確實存在不少!

      刪除
    2. 心裡暗暗爽左一下,呵呵~

      刪除
  17. 其實無論供定租,一樣當支出看待,計岩數就無問題,無話邊樣係絕對岩。

    回覆刪除
  18. 經過多年觀察所得,超過八成人屬於財商偏低,根本冇能力投資賺錢,哩類人只可以買樓自住當投資,起碼擁有一件實物,自我感覺良好。

    租樓多年,身邊好多買樓自住嘅人會主動飄埋嚟講下樓市,問下我租樓貴唔貴,打開話題後,十居八九都係自說自話,完全係單向溝通。哩種情況,我中意幫人地吹捧一下,自己又扮下慘,通常對家都好受落。

    回覆刪除
    回覆
    1. 下次有機會我都扮下慘先~~~~~~~
      等佢地開心D,第日番工都努力D

      刪除
    2. thx,每日比人問我租樓幾多錢,以及業主加我租未!

      刪除
  19. 我租了5年樓,日日比人講,煩唔煩,交租有屋住,唔知咩叫抵唔抵,首先我只係租5-6千蚊既樓,生活無憂,未來無咩擔心,不過係有樣野,業主個個都有病就真的

    回覆刪除
    回覆
    1. 住舊樓?
      不過租金佔收入比唔高的話,其實好抵。
      至少有自由度。

      業主呢,大部份個人名義持有的,個人都有若干問題。可能平日比老細X得多,當左租客係佢屋企個工人。。。

      刪除
    2. 最大問題是我真係無錢買樓WOR,唔租樓唔通訓街咩
      租樓加養車都要1皮野架,目前佔家庭收入25%,而我地每年必定加人工6-7%,加夠10年,先苦後甜果種
      D人又幫我計數,話1皮租市區都得啦,等等,但佢地忽略左QUALITY OF LIFE
      我1千呎屋要山有山要海有海,雖然是dirty海,但總之我就係無錢買樓,被人講風涼話(有樓人)講了足足5年,預計會持續到有樓為有止,
      我對唔同人有唔同應對方法,有些人會扮慘扮窮佢就好開心覺得自己高lv過我,有些人我會好firm佢就順應安慰我話唔一定要有樓
      有苦自己知,亦同時知香港人有幾無知

      刪除
    3. 所說的有點不同,七十兄是說有選擇下不買樓,無選擇去租樓無人會覺得奇怪的。

      Quality of life每人不同,旁人根本不可說三道四。

      最後租樓加養車只係一皮野忡有一千呎?村屋都抵啦。

      刪除
    4. 而家D人就係明知我地靠自己儲錢,由0開始,都仲要話我租樓幫人供呢,可能佢真係想講佢有樓,我無
      而我地一早做選擇左唔買樓呢條路,或唔係人買我又買果隻買樓,我覺得買樓最好在比較平果時買,留返D錢,錢搵錢會快D

      刪除
    5. 你可能無機會見到,而家有樓既人講野幾巴閉呢,就算只有一層自住~

      刪除
    6. 哈哈,討論區同埋BLOG特別多呢D 巴閉仔。
      選擇租樓未必係錯,只係咁0岩遇著樓市同租金一齊升0既時候,咪變左租金升幅唔著數。
      你每年人工加6%,追到租金。
      我租金佔收入實在太少,幾球首期我不如用黎收息/以備不時之需。

      刪除
  20. Search 某blog 的反擊傳送了入來...

    租樓定自住的確無分對錯GE, 小弟都有一間自住, 呢個係我的選擇我都明我放棄左拎舊錢去投資的機會, 我從來不會因為有自住樓而自我感覺良好WO, 在澳門這個租金極平(一千萬過千呎有會所新樓只租到15000 一個月)反而有時覺得可以用咁平的價錢租到貴樓係大大巴車落業主度

    不過講開又講, 世上又有幾多人可以有70兄的收入而做到租務自由的境界呢?

    回覆刪除
    回覆
    1. "大大巴車落業主度"
      咁又係租客同業主之間鬥爭...都幾無謂. 結果係香港租金較為"唔抵"之下, 好多收租仔都好大支野以為自己好巴閉.

      搵幾萬蚊的, 租務自由視乎心態, 無錢咪租細D.
      搵兩萬蚊以下的, 就報應在細價收租仔身上吧.

      刪除
    2. 70兄, 你在討論區有無貼文?
      我在yahoo找FAT PRINCESS 無意中見到此文章貼在討論區中

      刪除
    3. 果個人冒認我。
      討論區我有去,不過寫模型版。
      點會去地產版撩交,條友仲改埋我d字眼吸引更多傻仔hater.
      唔知為乜。

      刪除

各位每個留言,係我繼續9UP動力,必覆。

Related Posts Plugin for WordPress, Blogger...