小弟在DISCUSS 並無出文
你回應緊0既,都係一個有心引你派膠0既人,並非小弟。
若有人以為我係DISCUSS 出文引HATER, 是否太小學雞?
小朋友, 暑期放完好耐了. 好好努力上班吧...

2017年8月1日 星期二

坐食山崩 我可以唔撈嗎31

呢個系列幾乎係每月必寫。

近兩個月出文少左,主要係打機,睇戲,懶。連模型都無砌過無噴過。

有部份原因,係準備九月份一個讀小學一個讀幼稚園0既接送日常練習。

本來兩個放中午,而家一個中午一個下午。仲有未知多唔多0既小一功課,雖然我地唔太理佢,不過也不能太樣衰吧。我唔支持愉快學習,但我支持維持係能力圈內做事能帶來動機及成功感。

HEA之餘,都只係講緊相對上HEA,並不是完全由得佢懶。兩回事黎。

開始要同家姐講,朝早我同佢行番學(仲有要準備大雨時點帶佢番),係學校食飯(零用錢比幾多我都未知),放學要番黎做定功課,食飯前要自己沖定涼等等。

結果呢期成日同佢心理練習,好令九月免生亂子。

我鐘意打呢個系列,非哂命(有其他文其他事可哂啦,錢0者!),鐘意0既原因係第日可以睇番。自從有紀錄之後,收入支出有個概念,以前我都係求其睇下個BALANCE就算,老婆更加唔理。

講工作

七月份工作量係正常0既四份一左右,錢唔多,輕鬆渡過,預計八月變番正常。無用個鋪頭黎噴高達模型硬係爭少少,不過今個月我鐘意睇自己個缸魚。。。都幾RELAXING。

開始唔太強求高生意額,係咪好事?再過多一個月先慢慢諗啦。

講投資

今個月建行派息58萬,全數買哂CAD STOCK。賬面係蝕0既。比多少少時間佢,睇下係咪賺息蝕價啦。

八月份開始,收到0既股息債息投放去邊?未諗!無乜IDEA的話就用黎減下槓桿吧。

講目標

錢方面,無乜目標!因為跟住條路走應無太大閃失!

目標反而係希望九月份成功過渡,因為接送放學都係我,要工作上配合到,要少少技巧,坐下的士在所難免了,唔係錢問題,係我鐘意係巴士訓下覺諗下野。(BED BATH BUS係三大思考時間!)

女主人D 地產AGENT又再UPDATE佢,1480萬,但其租值唔駛3萬。如果唔加租,樓價可以用黎租41年樓(現實少少,當用首期連稅連佣820萬買盈富,每月沽部份股票交租,都租到20年)!

細佬剛剛四歲了!美心呢個CAKE有兩架車仔送,好過糖膠車丫!
過多幾日輪到家姐,再過多半個月到我了!

我同女主人講,40年後,我個仔都變大叔重老過我,我個女已成為師奶。玩下手我同老婆重是否生存又一問題,住緊個度已舊到一個點了。。。三份一個世紀,股樓之間,總有機會各有千秋吧。

講資產

小弟只計CAD STOCK及現金

七月底一共152萬(上月95萬),57萬來自股息,其實CAD STOCK除淨及帶來賬面虧損之餘,今個月收入少得可憐。

做左十幾年野,都無走去計唔開工時有冇錢剩,今次計一計,原來係會會坐食山崩架!(其實賬面蝕0既多)。



老婆今個月無變,如下

七月底一共380萬(上月370萬),原因係三隻優先股賬面升左唔少

本月二人合共532萬(上月466萬)
(無聊UPDATE,小朋友利是基金,市值7萬,每季派息七百幾蚊左右)

因小弟並無任何物業,正宗無殼蝸牛死窮仔一條,唔少人0既物業總值都多過上面條數啦。

如果佢仲有個高顏值老婆,靚靚小朋友,健康0既父母高堂,我呢D咁0既家庭就真係被完敗了~~~

29 則留言:

  1. 70兄 有養開魚? 大學時我也很迷 :)

    回覆刪除
    回覆
    1. 公司放一缸, 唔知為乜個隻.

      得一條金青苔(兩條的話, 成日打交), 十條燈魚.

      有朋友話可以擋剎, 又信下LAW.

      刪除
  2. 而家小學未畢業又話買樓,出黎做左一、二年又話要買樓,而家唔買將來真係買唔到? 樓價真的只升不跌?

    將筆錢投資哂落層樓到二、三十年,變相同發展商打工,最大得益者都係發展商。

    回覆刪除
    回覆
    1. 二手樓上升, 都幫都一手伋展商散貨.

      如果真係只升不跌, 我地非常有幸係呢個大時代中.

      刪除
  3. 如果佢仲有個高顏值老婆,靚靚小朋友,健康0既父母高堂,我呢D咁0既家庭就真係被完敗了~~~

    同意可以比較下小朋友. 但係...高顏值真係重要? 踏入50, 靚極有限啦, 仲點比較?

    應該講, 年齡愈大, 要比較的話, 小朋友呢part佔既比重愈重要. (以有家庭有仔女的人而言)

    回覆刪除
    回覆
    1. 應該寫埋高顏值的老公,不應男女歧視。

      刪除
    2. 哈哈, 男主人唔高顏值!
      我見唔少四十打上0既女性, 老公有D 錢個班, 唔少都仲KEEP 到個樣.

      當然小朋友佔比分更重, 但50十歲無變黃面婆無變肥師奶, 拎出街都威D. (唔好同後生女比.)

      刪除
    3. Agger👍人始終難免變老,但家人的外貌及性格,如比同輩們好,已值得自己暗地裏開心成晚了😃

      刪除
  4. 千幾萬樓得三萬蚊租? 實在好少
    咁講反而買樓好憨居XD

    回覆刪除
    回覆
    1. 係, 我呢度有.
      剛有BLOG 友話我知, 佢租0既果度都係咁.
      兩度不同區, 租金相若.

      細價樓就話焗租, 貴少少已經無乜人盲搶, 可以理性還價.

      刪除
  5. 恭喜寫到第31回~

    //開始要同家姐講,朝早我同佢行番學(仲有要準備大雨時點帶佢番)

    我記得小學時我老豆水浸送我上校車...成身濕晒...返到去當然係無人返...之後係學校hea左一日

    回覆刪除
    回覆
    1. 哈哈, 我都希望個女大個記得我帶佢番學0既日子.

      刪除
    2. 我相信小朋友會記得架,就係孩童時候既一些生活小片段,建構起成長期的性格

      刪除
  6. key words >>>>有個高顏值老婆,靚靚小朋友,健康0既父母高堂
    我最羨慕你有個可以陪你癲的老婆, 你睇女主人第一個留言, 身體力行支持你 ! 又靚又叻又有水, 真係抵你威威 !

    回覆刪除
    回覆
    1. 哈哈, 佢成日半夜起身睇我個BLOG.
      八卦大於一切啦...

      希望佢繼續搵到錢, 養我~~~

      刪除
  7. 打blog做下記錄,條數會清楚好多。

    回覆刪除
  8. 鍾意砌模型同親子,可以試下戰錘40k。個 game 係實體戰棋,我砌同油啲棋,之後同仔女打。個 game 易上手,我七歲個女都識玩,到佢地玩熟左可以慢慢加 advanced rules。個 game 好多 strategy,仲可以教 probability / decision making。外國網站有介紹。http://twoplustough.com/warhammer-40k-start/

    回覆刪除
    回覆
    1. WAR HAMMER 正呀!!! 太子始創有間咁0既野, 不過我手油差又無識得有人玩, 都係睇下算了.

      刪除
  9. 請問加拿大股票收息要報多少稅?我對加國銀行股有興趣但找不到相關稅率。

    回覆刪除
  10. 70後兄, 你太太的RBS PRF 俾人CALL?

    回覆刪除
    回覆
    1. 係, 蝕HKD一萬左右吧.
      佢笑左兩野, 投資總有風險, 一早同佢講左.

      刪除
  11. 租樓住最大問題是生活素質一般,就算租用是一手全新市區樓,所用的家具也只是宜家那一類,其實人生無幾多個十年,與其擁有大量流動資產而降低生活不如就拿300萬來犧牲下,買1K-1.2K萬樓估計最多賬面損失不過是300-400萬,換來的是生活安穩與生活質素的提高為何不做。

    回覆刪除
    回覆
    1. 買樓先可以有靚傢俬!靚傢俬就可以提高生活質素!有自住樓就係生活安穩!宜家係咪香港開埠初年呀?

      刪除
    2. 原來仲有人幾百萬買層樓用宜家....唔知我係夏蟲定係點喇.

      我由第一間開始, 租樓都係唔要傢俬. 一路我有自己傢俬請人裝拆, 至於電器, 其實通常都唔會太差因為CHEAP野易壞, 除非你遇到濕九收租仔啦.

      生活質素有否提高? 我見好多廢廢地搵得三五萬0既同學, 都只能住大西北...連留番係父母原區0既能力都無.

      親情何價?

      刪除

各位每個留言,係我繼續9UP動力,必覆。

Related Posts Plugin for WordPress, Blogger...