以下是本網誌一系列文章

心態決定境界:多是講人,用以投射一般膠人膠事,免各位中人生誤區。

我可以唔撈嗎:純粹以時間倒數紀錄自身情況,現在回看,得啖笑。

我的財富大道:被我太太喻為三幅被,不停重覆,多為資產與時間描述,亦有提及我的工作/生意如何煉成。

我的實習時代:就係小弟大學修物理治療時實習經歷

2017年10月30日 星期一

股市一個現象,三種演繹。

今日結算日,建行唔上唔落,都係7蚊咁上下。

究竟係結算日回歸月初指數?定大戶死頂一日就鬆手?定係謀定大升?

黎緊個市升定跌?我點知。。。我都只係旦散一名。


就好似上面絛片咁,明明係打劫槍擊案,三把聲音演繹三份稿,感覺可以好唔同。

留意,係感覺,同一件事黎。再加上三位有點點份量0既人講,BUFF效果加成。

女主人港股比例佔佢10%都無,IB收息類優先股BB BOND 反而有25%,佢今日又想賣左兩隻油股,我同佢講,賣左你可以買D乜?反正倉位唔多,等佢放下紙鳶無妨。

呢隻唔係叫紙鳶高達,呢隻係小弟重口味至愛之一
GUNDAM TURN A

可惜佢用CITIBANK買股票,否則可以SHORT CALL一下,等佢扮想沽貨又有權金。

學大前輩MARBO話齋,投資要有攻守備。唔知後市如何,咪又等下LAW。。。

小弟港股倉位總資產過半,而又有借貸,毫無再買貨餘地。只能讓子彈飛。時間越長,收息資產幫助RECOVERY之餘,重剩600天左右0既工作又帶來現金流。

呢D位,只能小量做股票期權濕下腳,聊勝於無,總好過之前股價低迷時。

至少,股票機未見老人團,亦未覺平時高位買貨0既朋友出手。

依稀記得,我自己2006 2007 開始接觸股票期權,貪勝不知輸,無幾耐就大升市來臨,再無幾耐匯控就由14X跌到4X!

今日,買股新手0既未見,但想學SHORT期權0既人增加中。。。今年係2017年。

現在感覺就似認叻收租老人一樣,我低位入,你而家買,有錢齊齊搵,跌左你捱價先。整幾條投資教條,無條件教精你投資,何樂而不為?

2017年10月28日 星期六

建行期權倉 (始動)

其實昨日本來已經想做,係IB第一次做港股期權。

以為要SUBSCRIBE DATA,點知風兄話唔駛的。

用"其他證券商軟件"報價, 再係IB用OPTION CHAIN 落盤。

唔好留言問我點做,因為我開頭唔知,買左DATA,只係港幤25蚊。

(呢條LINK係HKEX延遲報價,絕對唔準!)

昨日想做XCC NOV SC 7.5,落0.028,ASK PRICE0.026,點知庄家縮手。。。縮到0.022,咁我又唔做喇。

點知今日大升,一度迫近7蚊,我做左:

XCC NOV SC 7.75@0.022,收權金七千幾,小試牛刀。(阿Q點諗,當扣減貸款利息都好丫)

張數約所持建行18%,當然係FULL COVER啦。 

萬一建行大升,大不了轉倉加張數加行使價。

題外話,此BLOG應再重新定位,人人講財自,我講唔撈,實在太俗氣。

不過,若以"不用收租物業(尤其住宅),靠以外工具達至唔撈",寫BLOG者唔算多。

此事我非第一人,不過可以GOOGLE到0既,唔多吧。

唔理我係哂命定係ON9,比情況相似0既後來者做個借鑒/警剔都好丫。

2017年10月26日 星期四

兩個塘人回流BLOG聚

近日事忙,繼小兒入院,母親無故腹痛入院。

入左兩星期,咩都檢查過,搵唔到原因,令人擔心。估計有後文待續,始終最怕有家族遺傳的消化系統問題(佢細佬)。

塘人從美國番左黎,不過一眾BLOG 友比較難夾時間見到佢,結果上星期五AD HOC咁約左佢同狸貓兄出黎。

因為都幾夜了,佢地兩個都食左野,得我一個食。

去左黃絲CAFE TC2。

塘人比我想像中大舊,我以為佢係鋼條型口花花中佬。。。原來唔係~

可能佢少講中文同埋JET LAG關係,比起BLOG入面無咁多口水花。

當晚最經典場口

"如果打仗,我地第一時間去搶哂人地D 金條"

"如果真係打仗,我唔會用我D米換你D金條"

"鹽湖城餐館故事"及"塘人兄奮鬥史"

"而家好多股票都數碼化哂,打完仗無執笠的話,依然係你0既"BY狸貓兄

*****

本以為攪唔成大聚,因風中追風兄快要去台灣生活(都要年底),結果早幾日星期二又見多次塘人兄。

今次七人飯局,有 R兄半桶水兄Michael兄塘人醉心兄風中追風兄

小弟辨事不力,最後R兄BOOK 左小肥牛,仲帶左支酒出黎淺嘗(好野黎,不過對小弟黎講太勁了!)

撈緊舊魚果位係半桶水兄!

是日經典場口:

"學術型BLOGGER的FB中真身樣子"
"講下仔女經"

****

講真,約我,其實AD HOC 最方便,亦感謝各位肯就我地點,等我唔駛太遲出現。

2017年10月17日 星期二

香港討論區的不是我

首先,近呢幾個月有人偷左BLOG LOGO同我D CAPTION 去開左三個戶口,分別叫七十後男主人123,亂咁貼我D BLOG文,修改入面D字眼。

用意?一黎引HATER,二黎想利用網絡力量起下我底。

不過,真係好多真心膠回覆佢。我寫左咁多年網誌,何必要去DISCUSS R 點擊玩挑釁?同枱食飯各自修行,你有你講我有我講呢。

點擊係多左,但留言唔覺有。

同CHERRY兄上次一樣,不過我呢D忠實程度高好多。扮得我都幾似,我估唔少BLOG讀者都以為係我。

如咁得閒打字覆討論區,我不如出下BLOG文。用點擊做下善事好過啦。

老老實實,若起到,我會即時唔做,咁就真係"我可以唔撈嗎"最終章了。

每人身邊總有一個"律師朋友",若以此論據,係可以從民事起訴0既。

細仔都開始砌LEGO了!

*****

題外話,上面流傳左我老婆個樣,我同我個真*老婆笑左好耐。無啦啦我多左個創業老婆,聽聞此女係淘寶買貨番黎賣。FB好多呢D呢,如果搵到錢,都係一條兼職財路呢。

好想貼上來,不過始終果條女係最無辜,如有BLOGGER想睇就WHATSAPP我,SEND比你啦。

*****

因止凡兄加持(講笑),今日建行升穿七蚊了,星期五已經見建行遠期十蚊CALL升左唔少,其實都一半一半估到。同時,虛無又得啖笑0既個人資產淨值,已升穿1600萬大關,即總倉值減去貸款部份。

小弟投資又好,生意又好,生活又好,可能未必係全港最好個10%,亦未必係醒目仔決定,不過我能夠以文字記底一點一滴,好讓後來者可以參考一個無不動產0既人如何安身立命。

多個另類選擇,係好事定壞事?大家有自己0既做法分享嗎?

網上只會妒嫉0既假影子忠實粉絲,你又可以有咩成就,你父母見到你而家咁樣,會開心嗎?

2017年10月13日 星期五

心態決定境界20 人生里程碑錯配

本來想講下STARMAN 兄勸勉年青人一文我見,不過其實唔少人都講過,我都係留番下次。

有BLOGGER話我篇文提醒左佢,人生中不只財自,亦不只有錢(我知有錢可以買自由,打從一開始已知)。

不如數一數,由細到大有咩成就可以追?


細細個,幾歲個陣,好簡單,有得玩有屋企人錫已經好好(又係唔駛用錢,只要不是太赤貧,開心可以好簡單)

開始讀書,都係玩,交朋友,可能有D人讀書比較叻或者比較"定性",讀書成績為父母及自己帶來若干成功感。而我又想講下,讀唔成書當然唔代表唔會成功,只係他日長大少左幾張入場券,少左部份機會。反之,讀得成書只係入場優勢,未必一定成功。

多口講句,某些恥笑讀書無用又標榜自己如何財務上成功的,其實有唔少光陰及經歷,係呢班笑人0既傻豬一世都體驗唔到。(舉個例,你阿媽以你成績自HIGH或暗爽,你而家比幾多家用都做唔番呢個效果的)

以上,幾個月前我個女連續三年操行獎及做司儀及代表學校上台領獎時,我都自HIGH左兩粒鐘,我知道,此生此世,此刻難忘。

中學?一係讀書一係打波一係識女仔啦。三樣一齊做0既勁人,就好比有錢有車有樓有靚老婆同乖仔女一樣0既人生嬴家。

只係中一樣0既,其實都唔差。三樣都做唔到,或許有點虛渡。(嘩,咁講即時得罪一大部份人,唔係個個都係咁精英架!就正如唔係人人都係創業家一樣,打份好工或安份守己,唔一定被眨為工資奴0既!由投資人變顧問,搵兩餐味道極濃呢。)

大學?點都識下女仔吧。。。或者去下EXCHANGE 或INTERN。

出黎做野定創業?定快快手搵個人嫁左佢?呢個真係人人唔同玩法,睇性格又睇際遇。強加我個套去你到又太苛刻,各有前因又唔好羨慕人。

小弟在自己小生意領域上有點天份,加上有點運,結果一開始就已經保障到自己生活又儲到錢,大富大貴又唔係,不過呢D雞仔數我搵得舒服又安落。我投資係廢廢地又無乜特長,不過我0既長處,你又未必見到,見到都學唔到,寶寶暗爽但寶寶不說(其實字裏行間已透露左啦,你FEEL唔到?)

我又見我唔少中同,簡簡單單老婆仔女三餐一宿都可以好快樂。

現實D講,20-40錢的確好重要,關乎家人生活質素關乎退休大計關乎工作喜惡取捨。或許有人覺得要比小朋友最好0既(物質上),不過諗番自己細個,果時既快樂唔係用錢買!

記得中,小時候0既我同我老豆相處得最深刻0既時光,就係拎住份唔知咩雜誌係度玩填字遊戲。唔係小朋友個D,所以好多我都唔識,當堂覺得做修理建築工地發電機0既老豆好勁。

相反,細過同家人去荔園玩0既回憶(應該以我家境算係貴貴地),其實又唔係太好,只記得好迫,同埋我唔鐘意食香口膠LAW!睇番D相都無乜印象。。。

細仔開始長大,開始可以同我無聊9UP,其實幾好玩。



我又唔會強加"組織家庭"去別人度,不過如果生怕孤獨,有個家庭的話,人生是否會較圓滿?

講左咁耐,我唔想哂命,不如講重點。
我想講里程碑錯配

讀書成就,其實盡量係年青時完成,個陣效果最大最好。如果三十幾歲人,同人講學歷有三四個碩士,男女都好,同性覺得你ON9,異性聽到一地水。。。我指滴哂汗!

溝女成就,最好中學大學或三十前完成佢。除非你以前曾經滄海,好似林敏聰謝賢咁,老而彌堅,咁就值得表掦。如果好似我拍檔咁,因女離左婚,但之後都只係識埋D阿嬋級內地女,真係會比人笑。

搵錢成就?越早越好。後生時,越有錢才越自由,才可做自己想做0既事。同時有父母仔女老婆0既,要碓保照顧到佢地係需要一定金錢。提早退休與否全是個人意願啦及個人按排啦。

老到五六十先黎哂錢哂身家哂經驗有L用咩。。。望下隔離個阿婆,佢有仔有孫虛寒問暖(例如我阿媽/我外母),此刻又係無價。呢個年紀要錢黎做乜?你小朋友如有本事,養埋你跟本唔會有太大問題,咁大個人仲要你出錢比佢買樓,是否你後生時卦住搵錢MISS左D咩野?

拿,好多人擔心第日退休無錢,其實係咪一定係咁?我知仔女未必能成大業,但小小心意家用應該唔難。與其左計右計第日老左有冇錢洗要幾多層收租樓,不如活在當下,先完成呢一刻應該完成0既成就吧。

如果要教人人生如何走或其他技能,應該係中年之前就要做(例如市場先生,鐘記),重要有成功紀錄。臨老先突個頭出黎教人,有冇諗過自己已經脫9哂節?幫人變害人?

明明年輕人個PLASTICITY好高,老人一野就話要教精你,將你困係框框內,是否好事?

呢班人未必常用FACEBOOK,我自己用FB已經覺得自己好OUTDATE,INSTAGRAM 已經係上一代產物,現在班細0既都玩SNAPCHAT啦。(可能都已經OUTDATE左。。。)

世界變得咁快,要追的話,我呢D三十幾0既都未覺得自己可以跟得上。

睇個D YAHOO 模擬老作家庭例子,好多目標都係XX歲前有Y層樓收租。幾時買樓收租變左成就?其實又係錢作怪!

小弟自覺成就之一,就係呢世人暫時都未需要用收租樓呢d東西去達到財自。你覺得我逆著風走好on9?不如你又試下,睇下你做唔做到丫?哈哈哈~~~

班烚旦友成日鄙視我炒旦,我又暗爽講句"不如你又試下,睇下你做唔做到丫?哈哈哈~~~

我唔相信計數,樣樣求鬼其,但係成日都好L好彩喎!不如你又試下,睇下你做唔做到丫?哈哈哈~~~

就好似lihkg 0既後生仔(呢班人都唔後生了),同埋文初講0既blogger想法一樣,如果呢班收租老人換轉現在才剛大學畢業,又能否只靠"捱"字去收租?不如佢地又試下一路捱落去,睇下做唔做到丫

2017年10月5日 星期四

我家小孩暴走 PS4捉鬼敢死隊拍片

先講一下背景,男主人有一大女一細仔。

也播番今日錄0既打機片:


PS4 GHOSTBUSTER COOP 四打GAME!
字幕中有講邊個打邊個架喇,同埋有我地把聲~~

大女連續三年操行獎得主,原因佢上堂唔講野同埋偶爾篤人背脊(無語。。。)

個仔就好唔同,非常反斗又鐘意駁咀,以為佢番學一定出事,點知又唔係喎。

上年九月,初上學幾天已經駁咀。係課室扮恐龍叫。當然比老師鬧,佢又藉口話課室有條恐龍公仔,老師話果隻野好安靜,個仔又駁咀話我驚你唔知恐龍點叫扮比你聽。

係樓下個公園,近期多左外國人搬入(印巴有一,東歐有一二,其他唔知),咁有一白人鬼佬生左五個,其中有一個細仔同我個仔相若。兩歲個陣,佢地試過用BB話炒一獲,先口角繼而動武追打個隻!結果係鬼仔怕死走人。。。(真係打應該唔夠人打啦)

自從家姐番左上小學之後,細佬自己一個坐校巴番學。開始比人投訴係車度叫嚷。

不過,又因為少左家姐呢個ROLE MODEL,細佬而家番到屋企會自己做功課!以學習黎計,細佬其實叻過家姐,除左無家姐同年個陣咁牙尖咀利。

期待可以一路進步落去,唔好再活係家姐榜樣之下。。。

早兩日,因老人家壓力,帶左個仔去睇政府急症。

一如所料,個問題又唔係影響生命,但可能影響外觀。

醫院建議照個全身MRI,叫我地排住再加出去搵。當然出去搵啦。

各位放心,唔係咩大事,只係少見。

講開又講,入院個日就係正正中秋節,急症室個仔直入,唔駛等。



去到病房,因個仔唔係發燒CASE,住係非發燒區,基本上係無乜人好靜。。。好明顯正過私家醫院普通病房!而又因個問題少見,一共六個醫生一齊睇(估計有一兩個實習),有經驗個D就教後生個D,後生個D教老個D點用網上影相系統。

我成日都係咁認為,除非知道咩事,否則去政府係好過私家。至少醫生經驗多D,同埋醫生多D。私家一入去就左CHECK右CHECK,CHECK完都可以唔知咩事0既。。。

之後細佬即晚出院,因為之後個日化驗部都無人開工,不如出院回家。



明天星期五又入過去。

2017年10月3日 星期二

小朋友能力圈 我可以唔撈嗎33

開學九月終於過去,相信我同女主人都過得唔容易。



因為我堅持帶升小一女兒番放學,結果作息時間大混亂。要習慣仲要一段時間,話哂十年八年習慣唔係一個月可以改變。

辛苦左?其實唔係,咪又係咁過,以不變應萬變。同時試下減少飲少D高糖飲料(你話我迷信又好乜都好,高糖飲料對我工作有點作用),改左飲茶,同時要工作時食番D野,否則又係會唔夠電。

無計,個人弱雞。

不過小學家長同幼稚園家長一樣,都有小學雞同自私精。莫名其妙地,老婆入唔到家姐個班0既WHATSAPP GROUP,結果可能少左D資訊。算吧。。。

反正入到小學,都變成鬥成績遊戲。自理與否,三歲定八十。

講到鬥成績,女主人開始發癲,玩做練習!我意見係,中文的確有難度,要練。其他科就由佢先,考試先算吧。

既然個女都話易,唔好同佢溫。




再者,從來成績好0既人都有自己讀書0既方法,一齊溫書個D嘍囉,通常成績都唔入流。

何必用自己0既方法去改一張白紙呢?只要遠遠望住佢就可以了。

講真,兩姐弟都係學得快0既人,細佬直頭超卓。只要係記憶力方面好好比佢地自己適應下,唔好攪咁多古怪野,其實未來成績唔會太差。

學校攪0既溫習班,我千萬個不願去。適量做下中文便可以,睇過本中文書同平時D工作紙,作句同埋閱讀的確有點難。

兩個小朋友0既能力都唔低,千祈唔好傷仲永。再者,你寧願佢將來有個可愛的人,定想佢搵到錢財自但孤獨一人(我有中同BIG4高層樣衰女人,好可憐。)

另外,呢期PS4 遊戲打捉鬼敢鬼隊,真係可以四打喇!雖然細佬戰士唔掂,家姐射極都唔準,不過個遊戲較易打又唔易GAME OVER,百幾蚊算係咁。有機會拍番條片由個女作旁述先!

講工作

以為改左作息時間會影響工作,結果竟然估唔到係咁好,個人相對電力充足好多。過埋呢三個月,再休息多一日。預計收入少左五萬左右。

女主人工作應該比較淡靜,而佢亦都為左個女對功課而早左一個鐘收工。另外,過幾日女主人鋪頭就會上電視了,相比以前0既採訪,今次其實無乜期待感覺。或者女主人唔出鏡,同時訪問內容同鋪頭好似唔太相符吧。

講投資

呢個月變動比較大,首先GLD高位又回落,結果我又係要轉倉。去到11月中,SP122/SC128,約為882美金,即大約1%"股息"。

另,我非常豬咁賣左TOY,因為佢上番我買入價,我以為會有ACCRUED INTEREST,原來係TRADING FLAT BOND係無0既。結果我蝕左一個月半息。勉強阿Q叫做平手走(但蝕借貸利息),買入XRM9。5。

同時,SPN CORP被CALL,賺息賺價之下,換左貨SVU7。75。

早前手痕買入WIN7。5,依然係跌。我呢D零分析亂九買跟大隊0既人,太過BELOW PAR 真係買唔過。雖然早兩日升番上74,依然係蝕0既。

女主人個兩桶油,一升(中海油)一跌(中石化)。佢本來諗住一齊沽左佢當賺少少,比我阻止左。既然又未知買乜好,銀碼又唔大,不如讓子彈飛一下。出文今日,一桶唔郁一桶再升。如果計埋之前股息,其實另一隻唔係蝕0既。

我比女主人既策略係,小注執死雞,尤其唔少有料BLOGGER都有推介下,唔係叫佢跟,只要尾行呢D推介,合適時小注買入便可以。

九月份女主人扭計話唔做,叫我比個目標佢。我都好有心機地J哂風兄所有投資相關文章,同佢計過下,有得必有失,由奢入儉難。每月得萬幾蚊其實唔係好好駛!

同時幸得風兄一眾BLOG友提醒,追通漲個部份我計錯左數,實際上唔駛咁多。

結果,女主人有目標可追之下,係公司提左15萬出黎自己戶口充數。。。哈~

講資產

女主人九月底止,有414萬(上月393萬),女主人目標為650萬。

男主人買買賣賣,唔X識計,唯有用淨資產減去港股淨值(因餘款來自債息股息及其市值,再加自己現金儲蓄),咁樣港股部份升跌我都唔理佢。

男主人九月底止為208萬(七月為152萬,計法不同,比較黎無謂)。男主人目標為淨資產2000萬,或時間過去635日之後。

2017年10月1日 星期日

人生的價值

小和尚賣石頭(轉載)

尋找了一輩子,終究有多少人真正認識到人生的價值? “人生的價值究竟為何?”身而為人,大半都會有這樣的疑問。


我們活著,每天朝九晚五辛勤工作、求學,與人往來交際,成家立業,旅遊各地,做慈善……通過不同的生活方式和目標去尋求答案,找到動力。尋找了一輩子,終究有多少人真正認識到人生的價值?

其實,人生的價值無法估計,更沒有一個定論,怎麼說呢?有一個故事可以說明。



一個弟子問他的師父:“人生的價值是什麼?”師父不直接回答,只是叫他拿一塊石頭到集市去,並交待他讓人出價就好,無論出價多少都不要賣出去。弟子聽從師父的吩咐到集市上。一塊石頭,有人出價兩塊錢,有人出價五塊錢……一群人七言八語往往來來,最高也只是出價到十塊錢。

弟子回到寺院後,把在集市上的情況一五一十告訴師父,師父笑說:“很好!你現在再到黃金市場去,還是一樣只讓人出價就好。”弟子帶著石頭又跑到黃金市場。原來在集市上出價到十塊錢的石頭,這會兒竟然出價到一千塊,一萬塊,甚至有人出價對歡喜雀躍的弟子,師父還是說:“你再把它拿到珠寶市場去,記得只估不賣。”



興奮不已的弟子心情高昂地到珠寶市場估價,這次更是讓他意外了,市場上的顧客一開口就是二十萬,五十萬,但不論價格如何飆高他就是不賣,結果竟有人出價一千萬要他賣,他也只能無奈回答:“我師父說不許賣的。”回到寺院,他對師父說:“珠寶市場上竟然有人出價到一千萬呢。”

師父這才拿起石頭說:“同樣的石頭之所以在集市、黃金市場、珠寶市場會有不同的估價,是因為人的眼光不同,水準不同。你問我人生的價值是什麼,我無法告訴你,因為那取決於你用何等的眼光看待自己的人生。”

人生的價值究竟為何?那得看我們要把自己的“人生”放在集市,放在黃金市場,還是放在珠寶市場上去“估價”了。


Related Posts Plugin for WordPress, Blogger...