小弟在DISCUSS 並無出文
你回應緊0既,都係一個有心引你派膠0既人,並非小弟。
若有人以為我係DISCUSS 出文引HATER, 是否太小學雞?
小朋友, 暑期放完好耐了. 好好努力上班吧...

2017年12月3日 星期日

化療始動 我可以唔撈嗎 35

講家母

家母已出院,各位有心。

出得院,即係戰場已經轉移陣地,要正面同癌細胞作戰了。

都係果句,不用安慰了。正如我太太一樣,默默地在旁幫了好多。

有時一個人是容易生活一點,係某D位,都係要一個伴。(側面估計某前輩MARBO兄應蜜運中,呢半年講煮飯仔多過投資呢。)

想幫手?幫我捐錢吧。

上一筆GOGOLE AD SENSE已全數捐與保良局某學校,作為圖書館購書之用。一共八百元(咁樣捐就唔駛扣行政費!)。收據今天剛收到,待下一篇網誌才出吧。

又另一篇預告,請工人。係,得番外母一個幫手只會令外母健康變差,在此多謝風兄介紹佢請工人個AGENT比我,真係好多女(傭)揀,同埋其中一個員工係當地人,信心保証。正所謂,WHATSAPP谷(菊)中有愛。

只能講,外科病房同腫瘤科,真係兩個世界!無論環境、待遇同埋LINE OF THINKING,都好唔同!BY EXCLUSION,家母診斷為原生腹膜癌,算是比較少有0既個案。唔知因為人事關係定係個案罕見,有幸得該院副顧問醫生診斷。

好簡單,只係一個腹水問題,外科病房只係講無能為力,因為抽腹水有危險(法國醫院都抽過),上到腫瘤科,唔夠一日已經有陳醫生(我老豆覺得佢好巴辣,我反而覺得佢講野堅定喎),用手提照聲波睇下腹水位置同多少,決定量少唔痛唔駛抽,前後唔駛十分鐘。

最估唔到係,另一位蔡醫生(我無見佢真人,只係IN WARD CONSULTATION來過),同我電話講,腹水同腳腫好可能係唔夠蛋白質引起,我即時醒起我媽無胃口只食飯同菜。(一言驚醒!)

即日叫佢食左醫院0既蒸蛋白,第二日已經消左一半腫。

外科D4病房既醫護人員,撫心自問,係咪真係咁忙呢?一句說話有時已經幫到病人,唔識,咪問下人LAW!唔需要下下用程序來回應,尤其單嘉恩醫生,入院兩日,從未睇過我係私院帶過黎0既PET SCAN REPORT!如無記錯,家母入院三次,由好轉差,間接係佢一手愛理不理做成。

當年我無做,一黎唔鐘意,二黎無PASSION,如果你都無PASSION,不如唔好做!你不停同我講程序,講自己無做錯但又幫唔到手,究竟佢有冇任何愧疚?我唔係要追究,我只係覺得,因你而DELAY又兜左一大個圈,想有一個EARLY TREATMENT。(其實已經唔EARLY)

左手前臂瘀黑就係D4外科果邊抽血搵唔到血管造成。
真係出入咁多年咁多次醫院都未試過咁慘。。。真係咁忙?
(圖中已是腫瘤科病房了,環境好好多。)

首天化療,家母無任何感覺。不過聽聞副作用係兩三天後才出現。因多天無落過地,最大問題係行唔到幾多步,留係屋企就行得,出街就唔太安全了。

講工作

十二月我輕鬆中有忙碌,年年都係咁。今年感受比較深都係因為家母。不過,一早定左0既三星期長假不變,想同老婆去個旅行(長州也好),又睇下有冇機會。本來過往作風係十一月會準備好十二月0既野,不過今次因家事而臨急抱佛腳,暫時還頂得住。

女主人個唯一一個員工呢,開始放產假。當一般DISCUSS打工仔鬧老細0既時候,又有冇諗過你放產假特登較到放埋個農曆年,其實好影響公司?呢D少於五個員工0既公司,少一個人其實好大件事。請你番來幫輕一下,結果成日要就番佢。。。

出糧唔係大哂,不過你著數哂又係咪應份?

講投資

女主人倉位無變,沽左中海油,剩番不肖子中石化!

男主人動作如下

SP GLD 十二月頭轉倉一月頭,收權金HKD4700。
BKR 8.25遇到FULL CALL,買入價104,CALL價100。其間15個月共收息10蚊多D。(計埋得5厘,減息後得3厘!)
SC 939 變廢紙,HKD7000權金全袋,佢唔升番上7蚊都唔會開倉0既。

BKR被贖會回後,好大機會買隻BB BOND。KEEP住貸款為1000萬港元。

最後,剛剛星期五債價回升唔少,估計同今日星期六美總統通過新一輪稅務措施有關。

講資產

女主人本月430萬(上月427萬,月中計,十二個月平均每月增長九萬幾)

受惠於債價回升,男主人無啦啦淨值高左!(其實上月小兒CT SCAN及家母私家都駛左八萬蚊,其實收下債息都抵消左筆數)
男主人本月234萬(上月217萬),其實點計?
(所有戶口總值-貸款-建行市值)
即係話,佢係我IB收息組合同手上現金0既淨值

現時家庭淨值過二千萬,唔撈之日,一年半後,應過2500萬。

家母曾是我努力認真的原動力(我就是喜歡日本動漫中求求其其又過關的主角)。
或許,人生中,有好多人守護不到,亦同時有好多人需要守護的。

好好彩,我揀左一樣可保障生活,又唔係捱騾仔0既工作,唔駛好似求死咁成日寫BLOG講D人努力打工ON9。(我覺得係存在感問題,你份工無成功感,只有收租樓比你自己覺得高人一等,咪鬼笑人地啦,其實最值得取笑係你求死吧?)

兩姐弟一齊打街機,估唔估到咩GAME?
美少女戰士呀!而家佢地可以雙打,我唔駛幫手。
不停入COIN直到打爆機!

最後,小女首次考試成績唔差,全歸功老婆同佢溫書!高處不勝寒,呢條路有排行。第幾?有機會再講。

9 則留言:

  1. 70兄唔使客氣,舉手之勞而已。但請工人呢樣嘢好講彩數,返咗工先知做嘢得唔得。
    公立醫院外科不嬲比專科差好遠,如果係瑪麗醫院嘅的外科病房環境仲差到誇張。至於醫生有無PASSION,唉,只能講千祈唔好有任何期望。作為病人家屬,一定要自己睇到實,樣樣跟足啲,自求多福!

    回覆刪除
    回覆
    1. Passion 呢樣野,漫畫入面就多,現實世界真係少之又少。70兄本身有醫療知識,已經比平常人好。

      刪除
  2. 70兄,家母健康應該為首耍大目標,投資應捨後
    在困難時候還和我們分享投資,實在難得
    望家母得到舒服的治療

    回覆刪除
  3. 客套話不說太多了. 不過我很同意現在很多打工仔真係好巴閉, 要老細就佢.

    回覆刪除
  4. 補充蛋白質可考慮這隻奶,家父第一次手術不順利,在醫院住了接近三個月,營養師介紹的:
    https://www.nestlehealthscience.com.hk/zh/brands/isocal/isocal-hn
    另,風兄曾在一篇文章提及你妻子五月份在瑪麗外科病房逗留過,那兩天可能與風兄擦身而過...

    回覆刪除
  5. 70兄,漫漫長路,堅持住!
    我好尊重醫生,但係有d醫生無心做,真係唔駛俾面!!!

    回覆刪除
    回覆
    1. 係,唔係醫德問題。
      有時真係能力問題。。。
      讀同一個學位,醒目與否,出黎個結果可以差好遠。

      刪除

各位每個留言,係我繼續9UP動力,必覆。

Related Posts Plugin for WordPress, Blogger...