2017年1月31日 星期二

買入加拿大REITS 我可以唔撈嗎24

講工作

農曆年假,女主人休得特別早。由一月二十一路休到二月三日(年初八),足足休左兩個星期。用收租仔概念,佢有半個月白交鋪租,最好暫租比人散貨?哈哈哈。。。樣樣算死草,做人有何意思?難為細價收租樓加個三兩百好似好巴閉,食餐飯都無左。

係佢地太沉迷係個收租遊戲入面,就好似女主人笑我,打機個陣好鬼豪,不停用GAME錢買野,哈哈,現實生活又唔係咁。

男主人休得一個星期,做到年廿九,年初八開工。中途要番去日一餵魚。過往用自動餵魚機,都全員生還。今年唔記得SET,親自番去餵。

男主人工作,過往都係上半年輕鬆過下半年0既。應該而家呢個工作量,KEEP多一年就可以再放鬆D做。

講資產

貪玩買多另外兩隻優先股,極少量,每隻十股!(哈哈哈)

同埋買左100股加拿大REITS,試下佢係咪扣15%稅。

IB買TSE(加拿大交易所),至少呢隻REITS係扣15%稅。以佢10%息率計,得番8厘半,再扣借貨利息,得番七厘。值得與否見人見智。

另,IB轉港元已無問題好順利。戶口號碼要用佢ASSIGN果個,不過用錯號碼,都一樣轉到,但係會係IB個MANAGEMENT HOME比個ALERT MESSAGE話你用錯號碼。(轉數時間係唔會慢左)

IB戶口,希望二月可以一路維持係130萬美金負債。每月所得債息或股息,一係用黎買貨,一係DRAW番出黎自用。

二月份應該係債息同SGX REITS息。估計港紙四五萬左右吧。

講目標




女主人倉:股票21萬,現金311萬,總數332萬。

比上個月多左13萬,因為收番一D一路佢都無計算在內0既現金,直接入銀行。佢一月份糧都仲未入票,實際上應為338萬。(上月為319萬)

所以女主人呢D成日唔計下搵幾多又唔追數的話,久唔久D錢番番黎都幾驚喜。

男主人不再一窮二白,持有現金12萬。

預計八月建行股息55萬(人仔又升番),男主人跑數60萬,IB收息38萬。
女主人跑數49萬(7萬/月)。
預期主動被動收入為202萬

神秘戶口繼續為零(其實都有十幾萬,不過要虧空公款)

八月份總數為338+12+202+0=552萬

真係唔係咩錢,只係僅僅買到1000萬0既樓(包左首期佣金厘印),市區三房好少少都住唔到。哈哈。反而以債息交租,進可攻退可守。租到六十歲?我重有廿幾年先到,老婆仲有三十年,到時個女可能都嫁左人啦,個仔話唔埋都已出黎做野。

收租仔對未來租客供完達致FULL PAY咁有願景,其實時間是每人的敵人亦是每人的朋友,我對未來幸福自由更有願景,信心其一來自資產,其二來自流動性及可選擇性。

整個奀皮樣各位睇下!祝大家來年心想事成!
我個仔個名?意思係常常都好得閒自若。

HIT RATE終於都過六十萬,速度就係固固定定,開始得早,自然累積較多吧。

在此推介一下風中追風兄個BLOGhttp://laxinvest.blogspot.hk/),幾篇文已經講左好多你唔試過一味睇文件都睇唔到0既野,亦係小弟亂九黎樣樣衰衰都要寫BLOG分享0既原因。

因為我想小弟行過0既錯路別人唔好行,亦唔係老屎忽咁叫你走佢六十歲先開始有收成0既舊路。成功之路,人人唔同,最緊要自己所願,至少,不要辜負父母之恩吧!

2017年1月24日 星期二

紀念日影婚照 人生成就解鎖

不知不覺咁就十年喇,為左慶祝拍拖十年及結婚六週年,今年男主人應承我一起去影左輯婚紗相。

男主人強調佢只係一個花球


趁仲後生仲未變肥C奶,留下倩影

女主人由20號就開始放新年假,到初八先開工,算係一年裡面最悠長假期。新年假係最有放假feel的,因為冇電話會打來,又唔使記掛工作上事情。試過瞓到自然醒,然後無聊地睇下電視....肚餓就食個杯麵。發覺到間中頹廢都係一件美好的事。

****
男主人後記:

比人問幾時big day, 其實結左幾年啦。

一如以往,當工作人員知道女主人生左兩個之後,依然覺得好驚訝。哈哈。

如果佢地知道我老婆仲有供樓作用(雖然無得比佢供),仲可以比埋軟飯我食,根據TVB 劇情,我地應該各自出軌。

咪住,魚與熊掌,當然可以兼得啦。識玩人生遊戲,唔駛好明白好了解,求求其其就得啦。

解鎖單一成就定解鎖全成就? 視乎後天選擇,當然也有先天條件,別人恨不到。


2017年1月19日 星期四

INTERACTIVE BROKERS 港元匯款 資料

真係從失敗中學習。。。哈哈。

原來IB唔同貨幣指定存入既戶口都唔同,而佢個戶口資料,原來一早係你登記入第一筆錢個陣比左你。咁岩我自己第一筆入0既係股票,所以完全無視左當時0既資料。

一月十號WIRE港元去CITIBANK NA NEWYORK,已經攪錯左。

結果,一月十七號晚先番番黎。

即晚(一月十七)再轉錢去CITIBANK NA (HK),第二日下午(一月十八)就見到。

即時一月十八再轉多一次,因CITIBANK轉賬上限港元40萬,我要轉一百萬。唔夠四粒鐘就收到。

其實好快LAW,只係我豬~
銀行做左匯款,記得係IB ACCOUNT MANAGEMENT個頁登記番個FUND TRANSFER 呀。

*********

港紙HKD匯以下戶口!

Citibank, N.A. (Hong Kong Branch)
9/F Two Harbourfront
22 Tak Fung Street Hunghom
Hong Kong

CHATS Code: 006/391
SWIFT BIC Code: CITIHK HX

Interactive Brokers LLC
Bank Account No. 17739993
For further credit to: [Insert All Account Holder Name(s)

*********

美金先至係匯以下戶口

Citibank, N.A. (New York Branch)
111 Wall Street, 19th Floor
New York, NY 10043
United States of America

ABA Number: 021000089
SWIFT BIC Code: CITIUS 33

Interactive Brokers LLC
Bank Account No. 40806826
For further credit to: [Insert All Account Holder Name(s)

********

因為我係CITIBANK 轉CITIBANK,所以無論彈番轉頭個次,定係成功左個兩次,都係無收CHARGE!

講左IB咁多篇,係時候停下,間接幫佢賣廣告幾篇。

我怕蝕匯,全部借美金,其實借歐羅更抵。拉埋年息只係1.57%!


2017年1月17日 星期二

工資奴隸值幾錢?心態決定境界14

呢個TOPIC 之前都打過,今次炒下冷飯,睇下有冇新發現。

正所謂,人望高處,水往低流。不過我自問就唔係好似"人",就似打機咁,完成左一個CHECK POINT 就夠,去玩下一個吧。

雖然小弟都係工資奴隸之一,但收入唔穩定,好難去計我一生可以搵幾錢。(我有計過,三至五千萬左右,不過都係亂估)

為左容易計算,不如用中學老師呢類CASE吧。



由POINT 15-POINT 33

2016教協網頁有寫,月入$28040-$68150

當佢唔升職,每年跳一個POINT,23歲入行(又咁岩轉左PERM位),42歲便到頂薪點。而又因每個POINT加幅唔係固定,求求其其拎個平圴計。

通漲?唔計,因即使唔跳POINT,每年POINT14個人工都係唔同,一路加上去,政府工都幾屈機。

(28040+68150)/2=平均月薪$48095

19年後,42歲呢位工資奴隸所得為48095*12*19=$10965660

48095大約係POINT26-27人工。

如果老師又係收租仔,資產淨值已有一千萬,其實可以唔撈,套現比自己每月出糧了。

一千萬淨資產,約等於六間自住樓,每間一萬租,一半現金流都係得$30000,真係要等供完先可以財自,太遲了吧?原因?租金回報太低。

或者沽哂D樓,一千萬買指數ETF,每月沽出適量單位作生活,其餘一路以息買回單位,其實已可以財自。

又或者,5厘回報的話,一千萬都可以出到每月$41600,無負債。如同收租樓一樣做五成按,月息即時過$80000,唔駛等,係即時!

對於只爭朝夕0既我黎講,收租加按等供完呢D慢慢坐真係唔0岩我!駛乜慢慢等租客代供而自己又要繼續捱?



好消息,原來得六隻!重有三隻未出。(難道只係第一彈?)

買起工資奴隸?繼續計!

不如計到六十歲,會再多1470萬,咁由畢業開始到退休,一共人工約為2500萬(1470+1096)。

即係話呢,平時你見到一個中學老師,其實大家係拎左2500萬黎供佢一生作育英才架。

如果兩公婆都係老師,咪成5000萬!

一間學校平均有五十個老師(未計高級個D),條數係12億!

難怪會有唔少樣醜女老師都搵到人要,果真一件好好0既供樓工具。

不過,佢地唔係唔駛食住玩0既。。。可儲起0既又係另一條數。

當佢一半儲起左,隨住年紀拍拖結婚生仔洗費一路多左,咁一個42歲有頭家0既人,月洗三萬四唔係咩出奇,23歲後生仔,每月洗一萬二就可能多少少,就當比佢去下旅行,比多D家用吧。

即19年(42歲)可儲五百萬,如果兩公婆加埋,就有一千萬了。
如做到退休,每人儲到1250萬,兩公婆加埋2500萬。

以果位乜SIR要一生三宅黎計,呢堆老師,如果做到退休,點止三宅?

究竟佢地係咪真係工資奴隸??我睇唔清。。。

又假設下,佢地洗費一路KEEP係人工頂薪一半,即34000左右,如投資定息5%產品,要816萬。如果用7%計,580萬就可以收皮!如果用SIR D債基方案,可以400萬之內就可以啦(我強調,唔駛用債基,用槓桿買野就得,好多野安全過債基!)。

我估,四十樓下0既老師,有兩層樓唔出奇,佢地賣左收租樓就攪掂,可以明天打定辭職信!唔駛又話壓力大又話辛苦又唔想面對TSA呢個殘酷現實啦~

正路D,計番5%唔用槓桿。一路儲,42歲都係得500萬,仲要做多七年,即49歲就可以夠816萬了。

咁樣計,人工高,但係只係比退休年齡提早十一年(60減49)而已。。。

AGAIN,究竟佢地係咪真係唔算工資奴隸??我睇唔清。。。



人魚呢,我最後YAHOO拍賣買左。$150,INS POINT要198!



睇人地,不如睇下自己

23歲0既你,有冇月入二萬八?

42歲0既,有冇月入六萬八?淨資產超過500萬未呢?

財務自由係咪真係咁難達到?非也,其實睇你駛幾多。

一層FULL PAY樓,無家室之下,可能一個月駛得個萬五蚊。5%回報之下,三百六十萬加層樓就夠。(呢個計法,係書局打書釘果陣,有書本不停教人咁計,其實無視左通漲呢。),超過左個部份0既資產,可以買名牌,識下或者購買下女仔,去外國SPEED DATING!不過唔退會好D,自己一個人生活之下,沒有工作,會連僅有存在感都會失去。。。

又舉下例,男主人計過,四大長老家用,兩公婆洗費,加埋租金(或供樓),要預八萬一個月(其實唔駛咁多,只係預留多點BUFFER),5%息之下要1920萬,唔用槓桿有排都未到。7%息要1370萬,現在勉強夠。10%息要960萬,男主人一個計而家已經夠!

但咁計都係無視左通漲,若預留部份組合作資產增值,會更穩陣吧。

以上條數好鬼多假設,漏洞,亂來,九UP。
此文目的只係為左刺激思考而已。

同個女觀課,變左做勞作。。。



****

2017年1月14日 星期六

投入一百萬,月收一萬 ON99非債基方案

呢一篇玩野之作,無需太認真。亦都講一句,小弟做野就似男人ALL尿,亂咁黎,只提供初哥資訊,如要絲毫不差0既解釋或原理,請自行GOOGLE。

亂九黎其實係男主人做人秘訣之一。。。你估係咪真係亂九黎?

(樣樣都升番唔少)

*******

以下例子,請自行將個銀碼放大縮細!

一百萬,買年息七厘產品,做兩倍槓桿,即借多一百萬。共二百萬貨。

一年可收息14萬(月收11670),
假設借貸成本係2%,每月利息$1670。

即係,100萬資金可以收到每月一萬。
年回報12%!

若將利息以還貨款,應該七年左右還完(利息越來越少),變成FULL PAY資產兩球,之後唔駛比利息。廿幾歲仔,供完都係三十幾,頭都未白喎!

未有一百萬?十萬每月有一千,一萬每月有一百,當交下上網費都好丫。


呢期又砌LEGO啦!差唔多唔駛我幫手了。

喂,邊度有七厘息咁好?

咁你一定要比錢上我D COURSE,或者買我就黎出個本書啦!!

哈哈,講笑。

其實優先股,債券,REITS,某D收息ETF都做到。(大把人講緊,唔駛上COURSE,GOOGLE下就有!)

比錢我就唔駛喇,留意小弟投資組合有D乜,或多或少有D有七厘。

邊度借到2%以下0既錢,樓按!不過要還本,或者有米D用私銀,再或者其他方法可以係小弟個BLOG度睇到。

當然,投資涉及風險,貸借又涉及風險,連出街都有風險。請自行衡量,任何睇完呢個BLOG甩頭髮,唔見錢,或不舉等問題,小弟一概不負責。。。如果明天世界未日,你有金都無用,不如CALL架UBER番老家,陪下屋企人吧。

送佛送到西,如果係用IB借錢,佢個MARGIN REQUIREMENT係30%,跌兩成就要補孖展。真係好危險,小心小心。(如果唔係30%呢?)

用其他行,又有其他計法。

拿,如果借少D,咪安全D LAW!

**********

點解我ON99咁計埋D傻仔數?又係女主人D朋友唔識計數,先唔理係咪租一世樓,短暫0既租金,尤其係而家租金回報低到咁,其實係可以用投資回報去交租。

我未識咁做之前,5厘息已經夠我交租,雖賬面升幅唔大,但計埋工作舊錢已夠我求求其其過埋下半世。(樓梗係要買,佢升佢跌都好,我都一路有資產增值架MA。。。)

當年我得180萬,心水單位650萬(清倉可上會,不過果陣應該唔敢飛甩個拍檔自立門戶了。)
今日我過1000萬,心水單位都係1100萬(唔駛清倉,仲未計女主人個份)

時間係最好0既朋友,如果我當初上左會,一路唔買第二個物業的話,最多都係加按多三百萬出黎0者。(仲有,拖地拖死人。。。)

時移世易,係租金回報低,又無乜(內地)人搶租之下,唔計樓宇升值,好多投資都好過買樓收租。不過如果仲有得幾何級數咁升,可能買物業會好D!但若升多一倍,你會個社會會點?

其實,升多一倍,我同女主人生意都會加番一倍價,收租仔日常開支一樣會升番一倍。

又計下數丫,如果租金是二萬,樓價六百萬走唔甩,若用二百萬本金已經可以月月以息代租,若用黎收租,當你唔犯規,要三球之餘仲有其他雜費。

(最後,今日打去IB問,原來要轉去CITIBANK NA HK, 唔係NEW YORK,哈哈!惟有等D錢彈番番黎再試一次吧。)

女主人又試晚裝,因為佢今年決定玩野式同我影次室內相,作為結婚週年紀念!
佢最後揀左白色婚紗,無揀呢件。我?一路只係陪襯品吧!

2017年1月13日 星期五

首次回答讀者提問 網上結緣 交友平台

首先,再強調一次,小弟並無財金知識。一向大部份行動都係吸星大法左抄右抄,但又孤九寒唔會比錢上COURSE。總之學又學唔足,最大長處係行動力高,想做就去做,死就死先。

不過咁多年都死唔去丫係咪?

QPOSKET白雪公主!有冇人知邊度買得番人魚??

過往都有唔少朋友FB MESSAGE或者EMAIL問問題(我建議用EMAIL,FB MESSAGER好鬼論盡。)

今次呢條問題,女主人聽左主動叫我答0既。

如果大家有咩想問,只要唔涉及我同女主人生意內容,而我又識得答下0既,我都好願意九UP一番。

男主人你好
在你的blog中知道你和女主人是通過網上結緣,能請教是甚麼一類的交友平台嗎?
小弟也想試試能否通過網上認識異性,謝謝你的幫助。
另外非常喜歡你的看法:)
敬祝
花生醬上

正所謂,溝同學溝同事不如上網識。

一黎個POOL大D,搵到好野機會高D,二來對於宅男/無乜外表0既人來說,文字交流免卻先入為主,HATE AT FIRST SIGHT問題。三黎衰左唔駛面左左。四黎飛左唔駛比人指指點點。

先唔講點識女主人,其實小弟第二三任女朋友都係上網識。

當年,好興ICQ!最有用係RANDOM SEARCH!

可以揀年齡,性別(當然!),教育程度,什至可以用住邊度做KEYWORD去SEARCH,最差係當年上網女性較少。

最緊要,一定要睇相!哈哈哈,一陣出到黎係恐龍點算!?拿,我一次都未試過遇到肥婆或極醜。。。

女主人?哈哈哈。差唔多十年前,YAHOO友緣人識0既!果陣仲講笑話SEND番張相比YAHOO,屈500蚊百佳現金卷。

GOOGLE一下,原來YAHOO友緣人都幾多古怪人,算女主人好彩識到我。

沒有我的基因,肯定呢兩件野無咁可愛!


我估唔同年代有唔同0既方法卦。

而家?我點知呢,應該係用APP,不過賤男多之餘,TUM人買基金做FACIAL0既女仲多。

呢個年代,不如SPEED DATING 啦,女主人個同事就係SPEED DATING 識左而家個老公。

以我所知,年輕一輩係可以用FB,INSTAGRAM,SNAPCHAT識男仔女仔0既。

係我生活圈子入面,最奇特果位係一個人去旅行,跟團,識左個老公!做義工,去興趣班,呢堆唔見人命中。反而番教會就有。

拿,我已經係OUTDATE左,不過如果我而家係單身又無女,一定首先執一執個樣(雖然我未到自暴自棄階段)!再買番層樓,買番架車,用APP溝女(如無意外APP最多啦,唯然騙案更多)。

咩APP?我點知呢。。。SEARCH下果D騙案係用咩APP咪得。唔多人用,佢都唔會係果度行騙啦!

另,CITIBANK 入番HKD去IB CITIBANK美國戶口,等左三日,乜咁耐架,早知寄票算啦。。。

2017年1月6日 星期五

一生中最明智決定 金錢?愛情?自由?

早兩日,有個熟客知我少少背景,問我揀左炒旦之路而非本身專業,係咪人生中一個最明智0既決定。

我諗左半秒,我答佢唔係。

其實唔炒旦,可能又有另一番作為呢,話唔埋我做左初代YOUTUBER,出名過達哥都未定呢。

我性格就係唔鐘意跟規矩,又唔鐘意聽人講。雖然唔係做左D咩大成就,但現在自由自主,工作又是自己鐘意個類野,重要唔駛理上司,唔駛管下屬,也算不錯吧。對於我呢D唔鐘意瞄準,只係想求求其中個靶0既人黎講,個個靶都中就得,得一個中,即使中紅心都無乜意思。



ALL尿唔一定下下中屎塔正中0既,中個塔咪得LAW!

無奈香港地太現實,搵唔搵到錢同成功與否扯上關係。大概生活迫人,大家處於唔想做又要做,想做又唔敢做之間。讀書時又怕爛GRADE低GPA,搵大學讀又要顧及就業前景,單身時又怕比唔上別人成就或職位,有家庭後責任更大更加唔敢亂黎。

要知道,每人有唔同專長領域,財經知識上,小弟可能只係最BOTTOM個20%,不過,求其中靶就得啦,若然唔中?噢,人生重有好多CHECK POINT 架MA!

做個平凡武將才是不平凡

我是個武將A
武力60智力60統率80魅力70運氣100,可能更開心!

又係個句,你估運氣真係運氣?可能有D野你一路睇唔到又唔能夠量化,偏偏呢D唔能夠量化0既野,就係影響人生滿足度,什至人類物競天擇0既條件呢。

我同女主人講笑,話佢係武將B
武力50智力40統率80魅力70運氣100
佢好大反應!乜魅力得70!?好啦,比夠你100好未?

我阿媽都運氣好,至少有個讀書期間唔駛佢擔心0既仔同時又令佢有得係D師奶面前自HIGH;同樣,我運氣好在有個任我做乜0既阿媽!否則比著第二個老母,佢實日煩夜煩叫我去做番我本科0既專業人士,一黎搵錢唔多,二黎我唔鐘意做。

到時真係工資奴隸,想走又唔得,走極都係轉番同一個FIELD,三十幾歲,呢個專業應該都平原左,人工同職位上,無乜上升空間了。(好似其他BLOGGER D 個案分析咁,去到四十幾五十歲才番轉頭諗下自己放低工作找興趣,係咪太遲?)

我唔係話打工唔好,只係打份自己唔鐘意又日日怨0既工(不論工作性質定人事關係),真係天下第一等苦人!最渴望財務自由0既,其實係呢班!X SIR買債基個班四十幾歲是也。

金錢誠可貴,愛情價更高;
若為自由故,兩者皆可棄!
計我話,WHY NOT BOTH?!

小弟未成家立室時,其實好清閒,係錢唔多(2007年,個陣月入六七八萬吧),再之前真係得閒到爆。當時炒旦仲要未算炒得好,求求其其(做人不用太認真呀,炒到水平以上沒難度),有夠錢就可。

當時同輩同學搵兩三皮,我呢個收入(仲有把口)真係引到兵,開始意識到,連條女都可以自己揀,輕鬆無難度。

點知唔夠一陣好快識到女主人,成左家又努力左(2010月入衝過六位數直至現在),幾年自由換金錢,金錢再換番自由吧。

當然,女主人創業亦都幫左我一把,幫0既並非金錢上,而係佢有佢自己可觀收入,變相我唔駛諗我無得撈會點,最終我都自起炒旦壚灶。

或者有D人,暫時一生中最明智決定係買左幾多層樓,收左幾多別人血汗的租金有幾多年。現在站在高地笑一班後生仔大洗,唔儲錢,無父幹,廢青,黃絲攪破壞等等,其實呢班人,最精彩時光已過,夜晚望下你枕邊人個樣,你有冇揀錯?定係為左做按揭過壓測?定係,根本你仲未有枕邊人,仲要算死草唔肯用錢買架靚車溝女,認為是消費,倒不如買多層收租樓或者車位?

為左下半生自由而委屈下半身!為左有樓收租提早財自而做多幾年推遲財自!

不怕神一般的對手,
只怕豬一樣的隊友/老婆。

揀一個可以同舟共濟0既靚人,遠比揀一個好0既投資好,更對人生滿足感加分吧。

金錢愛情自由WHY NOT BOTH?

有被動收入?租金我未收過,不過債息股息都收過,其實咪又係數字一堆,一日未唔撈,都感受唔到被動收入用黎消費有幾爽。相反,D仔女比人讚佢靚(我強調是雙方基因合併!),呢種暗爽,真係有錢都買唔到。

錢0者,稍有智慧,要搵夠唔算難(無人叫你做李+X)

自由,大部份後生時都有過,除非你好辛苦咁工作為供樓再加按,再要上埋門幫租客通渠啦(晚年自由?咁老有邊個唔自由?講黎無意思,到時倒又如仔女孝順常常問候好過啦係咪?)

愛情選擇,相信影響未來變數最大,斷估唔會有太多人結幾次婚咁勁卦。揀錯,佢日日煩你錢,煩你工作,何來自由?

回應番最頂,比人問到我一生中最重要決定係乜,我諗都唔駛諗,我講比佢知,娶左而家呢個老婆。哈哈哈,個客打左個突,因為佢知我唔會工作時放閃。

不知不覺,原來重有十日左右就係相識十週年,仲有廿幾日就係結婚紀念。

容許我係度放個閃。就像哂模型一樣,要講番句,傷眼莫怪。


2017年1月5日 星期四

女主人買中國恒大 IB孖展提款 我可以唔撈嗎23

原來男主人個倉,都有10%利息回報喎!我得22%債券同埋14%優先股,咁拉埋都有10%算係咁喇卦。。。唔駛買債基咁盡0既。(55%內銀,3%ETF金,6%REITS)

講講女主人股票倉變動,佢買左中國恒大,買入價4.9咁上下。以為佢係燈神,點知佢補時左幾日又升番上黎喎!

買入原因?都係我唔好,教乜鬼佢睇保力加通道呢。。。

另,佢又打算CITIBANK優惠用盡後轉去其他銀行,不過點計都要半年後。

(佢用CITIBANK買中國恒大,輝立無SHOW,
另佢篤手指買左兩萬貨又唔轉番錢,白扣息。)


講工作

踏入2017,女主人應該比較得閒,因為農曆年到了,有生意都唔敢做住。意味著佢收入會少左。剛剛聖誕放完無耐又新年,影響家庭現金流~

同樣,男主人係上年狗衝式炒左一輪旦之後,今年2017上半年應該要平衡一下,留番2017下半年發力。粗略估計上半年每月只有17-18萬收入。依然可以月儲十萬。

十二月份,我放左近十五日假,唔計一星期休息果一日,原來我一年都有40日左右假期(單一日公眾假期我都係會開工的),計落比五天工作的"工資奴隸"更少假,我才是真正工資奴隸呢。

本來呢篇文應該月頭第一日就出左,不過已經忙左幾晚,而家先得閒紀錄。

又係時候諗下應該為責任而減產,咁2018同2019收入可能跌到10萬同7萬。

今年炒旦條隊排得無上年咁長,唔知咩原因,市道問題定有同行識得炒?

講資產

上個月賣走左兩隻BOND,又入番兩隻,獲利少少。

究竟BKR 會否被CALL?
佢好阻住個MARGIN RATIO。。。
其他債只要30%,佢要50%

除此之外,我仲係IB 戶口直接提款,拎左145萬港元去CITIBANK度搵著數。點知美國加息,計過無著數。班師回IB!

IB過數可以點?IB轉出完來可以去番HK CITIBANK無CHARGE!我估轉入都無CHARGE(CITIBANK可以用GLOBAL TRANSFER),等我下星期試下。

而IB個PORTFOLIO MARGIN戶口係很肯定可以DRAW錢出來的,不過因為唔係買貨,白白提款會令個戶口更易因跌市比人CALL MARGIN。

幾時CALL MARGIN?
總資產 - 欠款 - 維持保証金 <0

跌幾多成?

1- (維持保證金/淨資產)

家庭淨資產繼續係1200-1400萬左右視乎男主人組合升跌。

總資產?全倉流動資產之下,按個制就會大升。。。(現在二千萬以上,不過無乜用,借錢買貨要還架MA!)

預計2017年收息107萬左右卦(扣左利息支出後,年息1.47%),年回報10%多少少。

買左幾千蚊加拿大REITS玩下,睇下佢點收稅。

講目標

又黎幫女主人計下數


HSBC 102萬
輝立 19萬
CITIBANK 158萬(連埋上面兩間D零頭)
男主人已還佢40萬(欠IB好過欠佢,條數好計好多!)
總數319萬

比上月多左八萬,因為佢出多左糧比自己。

男主人現在一窮二白,淨現金為負。

預計八月男主人跑數70萬(比上月預計少),建行股息54萬(若人仔不跌太多),加上IB組合利息共43萬(每月派約7000美金利息),共有167萬

亦預計女主人能於八個月內56萬(月儲七萬),神秘戶口假設為零。

即八月份會有319+167+56=542萬。

離550萬仲爭少少,點算?儲多一個月咪得LAW。哈哈。。。

最後,真係好耐無砌新模型,來個2017模型年結?真係砌左好多BB戰士,其他HG MG 唔放了。



來個大合照!最新果隻?執埋騎士高達3(其實佢叫全能騎士),又幾靚仔喎!


Related Posts Plugin for WordPress, Blogger...