小弟在DISCUSS 並無出文
你回應緊0既,都係一個有心引你派膠0既人,並非小弟。
若有人以為我係DISCUSS 出文引HATER, 是否太小學雞?
小朋友, 暑期放完好耐了. 好好努力上班吧...

2018年12月29日 星期六

當年老豆教落...

本來想講下今個月嘅兩次深圳遊記(女主人開始替我更新FACEBOOK專頁,都係飲飲食食吧!)

為免個blog變咗窮L遊記(我同我老婆呢排成日睇0既YOUTUBE CHANNEL),都係講下第二啲!

其實好多題材都已經定好咗,不過硬係的唔起心肝去寫。

**********

小弟有個乜七都唔叻嘅老豆(無錯,我唔係算憎佢,只係覺得佢太廢。),喺我好細個嗰陣講過以下兩個觀點:

可能要講下佢背景,佢算係建築業入面,唔駛學歷,只要學師,要落地盤但又唔算要太多體力勞動0既工種。係澳門讀過下名校,讀到中二三就比人踢走左,肯定係操行問題。對住我個目不識丁0既阿媽,當然會有一種佢係知識分0既感覺。

一如維園讀新聞當真0既阿伯,佢講既野,又可以幾格物明德?

幾時講過?應該都有廿幾三十年。。。因為我應該上左中學已同佢無計傾。希望我自己小朋友唔會咁啦。

1)學好日文第日打工好有用

我估當年應該係198X年,日本經濟應該勁好。。。識日文可能可以做日資公司吧?可惜當年只係好想有一部任天堂紅白機同埋龍珠閃卡,從來無諗過去學日文(現在的我,反而想學下俄文泰文,不過以小弟語言天份,都係算吧啦。)

而家?學日文直頭係潮流啦,可以去旅行用!真係識日文0既,我生活中只認識兩位。其中一位係大學個陣學,現在工作根本從不相關。另一位?應該係大學畢業後學,現在生活?唔掂。。。

勉強叫做炒旦期間識得另一位,應該佢程度係可以教人,不過當年都係同我一齊炒埋D爛旦。

昔日強國日本,今日爛船都有三根釘!只不過,若然果陣起步去融合,現在只會愛得太遲,光陰錯配。

2)做白領好過做藍領(揸筆搵食好)

我唔否認可能佢番工辛苦,所以覺得做文職好。而家又點?我唔知而前做個船務文員,或者做間TRADING0既文員有幾高人工,同埋以前勞動力可能真係唔係咁值錢。

而家做地盤應該高人工過文員仔好多!一個係體力勞動,一個係腦力+光陰勞動,橙同蘋果好難比。若只比人工,文員仔真係唔得。

唔用地盤,用跟車?或者用一技之0既藍領,例如整水電工。。。應該都好過一般文職。再者,能創業機會更高。

原因?因為大家都想舒舒服服有人照呼,加上家事常識低,簡單如度下屋企有幾大,都可以假手於人,尤其係大多小弟一輩0既中年港豬,真係拎條頸出黎比人宰的。

點解我會咁記得?我都幾肯定佢同我講過好多次!當然呢D就係講道理,教緊仔。好彩我當年好早已經同佢無乜兩句,否則我而家唔會咁隨心所欲。

時移世易,咁而家呢啲觀點種啱唔啱呢?

易地而處,今日望住個幾歲0既仔,同佢講做乜最好,係咪真係有效?倒不如教佢做個好人,做事隨心而行,不要隨波逐流更好吧!(就如小弟吹水WHATSAPP GROUP所講:應該一堆讀書唔叻0既港媽會衝出黎,話佢開心就得,但另一邊就會去讀名校,谷考試,十八般武藝,晒自己FB。。。)

兩姐弟又打街機,下星期考試又有咩好驚?

當然,講就易,做就難。尤其係資訊不平衡但極流通0既香港,所謂:

"你不愛競爭?但競爭會找上你!"

知易行難!既然父母都做唔到,首要應該唔好迫仔女去做,父母自己真正自由,贖番自己條命,咁先有資格講。係咪?

好多人既指指點點,社會上太多0既聲音同意見,係咪真係有用?寫出自己意見0既人,係咪真係咁把炮?

有幾多人,真係可以隨心而行?還是只希望有一大堆守護0既理由,而留在大家所謂0既NORM?父母自己都做唔到,又點去以身作則教仔女去追夢?

************

或許女主人對退休唔撈有一點點憂慮,但個人認為,這應該是一個䦒始,而非終結!雖然我淡淡說句,最多咪慳D駛,其實我真係打算有咩事,就慳D駛,絕無任何後著。

難得取回選擇權,將一切學歷,職場優勢RESET一次,去體驗一D大部份人都唔會經歷0既階段,此刻應無價。也希望子女大過左也會明白,人生非單程路,只要想得出,就有機會走得到。

2018年12月22日 星期六

我也談談 買唔買樓好

近日得閒左好多,又開始放假啦,結果可以慢慢清文。

呢幾日都係鋪頭無所事事地渡過,好應該UPDATE下呢邊。

其實,要寫既文章真係有太多,我已經用GOOGLE NOTE一一記低,係呢個聖誕假可以慢慢打。

今日女主人有事煩,佢心情唔靚我都幾擔心,因為我同佢兩邊小生意盡量都唔干涉,所以我都無問太多。叫佢食番回頭草,佢話寧願執左佢!做小生意好處就係咁,想點就點,不用為五斗米折腰。

小弟生意仔,進入倒數階段,最後半年我就會退休了!

小生意的壞處?就係今日唔知聽日事,無得月月出糧,當然心態上好唔同。至少,我地唔會走去計每月收入同支出,就女主人而言,一時可以好好,一時又可以好差。佢今次出事係技術性問題,一係有得做,一係無得做。(當然,一定解決到,只是完美與否吧)

向好處看吧!

若我現在生意仔出了問題,我應該不會理會,等它慢慢死去吧!

所以,係九年前,我倆已經不喜歡太死板的路,尤其理財方面,希望維持高流動性。又因我倆生意唔大,但平均搵錢又多過一般打工仔,雖則不是三更窮五更富,不過流動性同埋隨時可以轉身,比一切重要。再者,小弟行兼業恐怕有年齡限制,盡快搵夠走人比較理想。

買唔買樓自住好,其實因應個人情況多於一切別人意見,投資則是另一故事!我的情況又同大部份人不同,資產雖然唔多,不過總算做到所謂租務自由。何謂租務自由?係自己個區想租邊度都OK,搬屋搵人攪吧!搬屋其實唔算太麻煩,當做大掃除而已,未搬過屋/不懂有效搬屋的人才會有這種感覺吧?加租?既然錢可以解決,為何一定要搬???


大量未試過在租金上升期租樓的人,他們或許只看到壞處!動之以錢,什麼幫人供樓云云;此路不通的話,動之以情,搬屋很煩。

對我來說,租金持續上升,同去電腦場買條RAM一樣,這個時期若價格上升,付錢便解決。

若然有一日生意失敗投資失敗,或股息不足以交租食飯,可以選擇搬到小一點的單位,再由日常開支著手。我現在的情況,未必人人相同,於我而言,進可攻退可守。一邊收股息債息等樓跌又可以,即使樓價一路升到上太空,我也不會太SUFFER(總有一半人以上比我更糟吧?),再者我又隨時可以拔營離開香港。。。

WHATSAPP GROUP中有人問及是否安全感不足?非也,只是大家價值不同玩法不同,以及生命所追求的不一樣吧。

此篇靈感來自90後BLOGGER TAMINV,以及小弟WHATSAPP GROUP中一些對話,年輕的不買,以及有點資產的不買,總有個原因。

你在想投資,我們在想生活,完全是不同世界呢。

2018年12月20日 星期四

港珠澳大燆實測 VS 坐船過澳門

小弟坐過兩次, 兩次都係白事.

(轉左WIN10 之後,無左全形符號、好唔習慣!唯有用倉頡!)

第一次,應該係開通之後第三四日。果日係星期日!

去時即上金巴,極快,回時點知大擠塞(主要香港人),等左一個鐘先上到。

當然果陣剛剛開,梗係不能作準啦。

今日係星期三!逝世已過一年,我終於可以去拜下我阿媽!!

*************

以下提供方法,肯定唔係最平選擇,不過可能係最快方法。

香港的士+金巴+澳門的士!

今日一早,9:30開始集合,大約9:35上左的士,我CALL一口價的士,雖未算最平,但肯定有車。



到左香港口岸,因為我帶住兩個細路,不能自助過關,要排櫃位,不過其實都好快!

留意,如果用自助售票機,一張八達通係買唔到小童同長者票(買到,但要用小童及長者八達通),所以我又係櫃位買,都係唔駛排!成人港紙hkd65,小童/長者33!



之後基本上係直上金巴,好快就到左澳門口岸。

澳門的士,個邊係無人搭!但的士好多,因為齋出口岸都已經20蚊。



時間用左幾多?其實上面D圖都講左,對住新界人黎講,真係快過坐船!仲有,路程無咁顛簸!

我9:35出發,11:00或更早已經上左澳門的士。連埋過關,1小時25分鐘。
我很肯定的士到碼頭再坐船唔得!噴射飛航話船程60分鐘,我從來未試過60分鐘之內到,因為一黎要等埋發叔上船,二黎佢有時因應海上情況行得較慢,三黎大量不文明人爭住落船。。。仲未計過關同埋香港段的士時間(九龍成日塞,尤其廣東道一帶)。

貴嗎?我又計下

1人坐船
的士到尖沙咀(當你坐85的都要90),船飛170(去零頭,當你遇唔到幾蚊黃牛黨),唔計澳門的士(睇你去邊),要$260。

1人坐金巴經港珠澳
的士到港珠澳香港口岸200(睇你咩位,坐唔坐85),金巴66,唔計澳門的士(睇你去邊),要$266。

咁好睇你程的士去邊!
時間?其實好睇你船程夾唔夾(15分鑵一班都可以無位!),又或者金巴駛唔駛排!

今日我5人過澳門
5人坐船
的士,五人的到尖沙咀(當你坐85的都要90),船飛成人170X2,小童及長者150X3(去零頭,當你遇唔到幾蚊黃牛黨),唔計澳門的士(睇你去邊),要$880。

5人坐金巴經港珠澳
的士,五人的到港珠澳香港口岸200(睇你咩位,坐唔坐85),金巴成人66X2,小童及長者33X3,唔計澳門的士(睇你去邊),要$431。

真係差一個DOUBLE!但係又快左又舒服左呢(金巴VS噴射船)!都係個句,只要金巴有得即上,基本上係唔會慢過坐船,仲有今次我無用自助過關。。。

呢篇想寫好耐,雖然同投資無關,下個星期應該會多番D文架喇!

*********

以下心急人+避旅行團小心得

的士落車後,香港出境大堂自助E道係最右最右!自助過關之後,部自動售票機係最左(人手櫃位係中間邊左)!出番去用中右邊通道較近金巴上車處。

出左澳門口岸,的士站係最右!!右到肉眼都睇唔到。。。(今次去指示多左,應該易搵好多)

*******

重點真係要講多次,方法不是鬥平(我全的士),係鬥快成份多。所以個D咩欣澳轉車、長者優惠坐車、咩鬼又慢又等客0既中港直通巴就唔好計啦!

仲有,小弟新界西選區的,如果你自己住中上環,都係坐番船吧。剛開通時,我由太子坐的士去港珠澳,都仲係快過坐船的!即係如果你係長沙灣美孚荔枝角,港珠澳應該快過坐船,全的士仲平一截TIM!

最後,講錢呢,應該打和點係兩人或以上。一條友係貴過坐船的,若你有四五個人去,單程坐船已經等如大橋來回價了!

2018年12月3日 星期一

女主人收息組合換倉 我可以唔撈嗎 43

講投資

十一月尾開始,港股上番黎。




以上係三球倉,繼續蝕到HIHI!

只計今日大升,已經為整個組合帶來六十多萬脹面升幅(與上星期比),可惜有唔少都係2018年中買,蝕到HIHI。

相反,美股真心好慘。。。
ATVI被迫接貨,而且已經跌到50蚊邊,賬面虧損HKD三十萬!其實當時係想做SC點知做左SP,我又求X其唔理佢。。。哈哈。

為左維持貸款水平係一千萬港元內,我自願回左加元計0既EIT.UN,從此遠離此市場。

另外,現在只剩五隻債券,未能搵到適合月份0岩心水0既換貨。。。

再另外,因為女主人0既BCS.PRD 被贖回,入左DKT@24.8


因女主人個倉係我包底,賬面其實係蝕少少。。。

再另外,今日做左即月(十二月)建行SC@7.25,收番四千幾HKD。


講工作

十一月忙完一輪,十二月似乎都幾HONEY MOON。工作日數時數雙雙減少,幸好有小弟吹水WHATSAPP GROUP 提供飲食地圖,等每一日番工搵野食多好多選擇。

講完又講,踏入2019年,四天工作,將番工時間減至最低,番一番去又回家。所以,要增加行街睇玩具0既時數。

二月開始,要將鋪頭模型做個了斷,另外出售噴油箱同氣泵。。。

四月開始,要搵新地方噴油。

重有,六月走時,要洗走個魚缸,雖然只得番一條金青苔。。。

六月真係唔做,財政有否壓力?係呢個跌市時,我真係有諗過,不過解決方法都係個句,慳D駛咪得,再者太太重有工作(哈)!

十二月,女主人將一個PART TIME轉左做FULL TIME,希望個同事快D跟得上,等女主人可以得閒同男主人玩下深圳遊。。。

講生活

外母懷疑工人打斧頭!估計每日可能打十至廿蚊。。。當然,唔知真定假,佢個人正正常常又幾客氣,係有時可能懶懶地。其實我都OK,出聲就無謂,唯有係買送地點限制一下吧。

另想講下自己個女,今個學期後段已無跟佢D功課,見佢自己做又唔係太多錯,應該又可以放手由得佢自己做,今年只要過到乘數表,咁就應該OK了。第一次考試完左,佢考全級第八,雞校當中算係咁,我地以為佢今年會考十幾。



自己電腦換左KEYBOARD,CHERRY 青鈾PBT鍵,係幾爽,不過好嘈。。。哈哈!台灣牌子IROCKS,應該都係大陸製。


講資產

好耐無講過。簡單兩句。以下係淨資產計,已減貸款,真材實料絕無水份。

女主人連佢D股票554萬(對比上年438萬)

男主人不計建行倉233萬(八月高位351萬,上年比234萬),可見美股港股男主人皆蝕到入肉,工作帶來的現金流都幫唔到幾多!

唔計收息建行,兩人加埋都八球了,選擇?幾時都有。

不過,女主人的確後勁淩厲!軟飯王非我莫屬!

2018年11月13日 星期二

物理治療師弟也買樓

自從小弟有埋WHATSAPP GROUP 後,生活比以前更充實。至少,資訊都來得快一點,即使各有各聲音,有股有樓有仔女!

小弟已是十多年前畢業,執業日子長度數以日計(哈,只有四天)!他日財自唔再做炒蛋,應該都不可以做回一個物理治療師,因我早已把所學東西忘記了!

不過,一堆讀書高不成低不就0既人格就依然記得。以機會主義衡量,呢堆醫生助手ALLIED HEALTH 有兩特性。

<1>執輸行頭,慘過敗家
<2>怕死求穩陣,千祈唔好衰

同時基於讀乜做乜,大家一畢業應該都想做番本行,結果就好穩定咁做番本行。

照計我班同學入面百幾人,最成功又多曝光的,應該不是當年好成績的人。

做得好唔好,不是看成績吧?應看其熱誠看其人格。當然,要量化計算,收生只能以成績。大量醫你唔死等你自然復原的醫護人員自然出現。

以下新聞,當然係同學間FB內,屌哂鬼(我覺得呢三個字最適合)。說到底,其實也是飯碗問題。

上圖女同學好漂亮!不過,該位女教授,應該係我當年數一數二地垃圾。。。

我覺得,多個競爭,才有進步,無論治療師方面以及師資方面也一樣!說實在,當年教學的其實非常參差,多一間鬥,絕對是好事。物理治療亦非奢侈品,若人數上升,價格可以下降/變得更透明,亦是一件美事。

我講得肉酸!即使業者否認是飯碗問題,多年爭取DIRECT ACCESS(免醫生轉介),其實也是飯碗問題。說到底,也是校工(治療師)和老師(醫生),本質上的差異。

要麼不玩這個遊戲,去重讀個中醫或脊醫吧!

"去年RT靠父母的退休金,成功買下一個荃灣西新盤「上車」,首期約500萬元。RT說,當初父母本著「買磚頭最穩陣」的道理,令他「半逼半自願」地踏上業主路。"


其餘文章是這位小朋友的無病呻吟,可以忽略。我同太太一致認為此人很肯定有女朋友,只是會換,有些不承認是女朋友而已。

這個月,買樓一買即跌變成常態,半年後這位小朋友可能有更多苦水要吐。

夾錢投資增財力
80後港日兩地建物業王國


呢個CASE用圖講解較好,同朋友合資,可以無限資金。
不過,點解仲要做物理治療師?應該辭工四圍去睇樓吧,不停看才能找到好盤。。。奇怪。



比較得意,我個GROUP有職業治療師,有護士。但係竟然無物理治療師!哈哈。。。歡迎加入呢!

2018年11月6日 星期二

仲有半年時間退休 我可以唔撈嗎 42

上個月,個市跌到我脫期!哈哈。。。

其實我是去了打機,近來和兩個小朋友(7及5歲)打舊GAME SACRED3。

若STREAM GAME上市,我必定會入,實在太正了。。。

講投資

小弟持有ATVI,昨日美股大跌,APPLE跌穿200,ATVI都就跌到我家鄉了,見微蝕了!



加上我仲持有明年五月80 PUT(現價64.5),看來都兇多吉少。不過,還有半年,又看看未來市況如何吧,接貨金額只是HKD62萬,還可以的。

另外,債卷組合內(Xerium Technologies)XRM 9 1/2 08/15/21 已被全數贖回,回調78萬資金可以用來接貨吧。

只能夠說,收息組合波動相對較少,同時內銀倉成本低,以致整體組合還未爆孖展,嚴格來說,還有好一大段距離。

另一如山不動,就只有ETF金(GLD),佔百多萬港元,只是我太高位買入,用遠期期權收期權金而已。

講工作

近期對工作,感覺忽冷忽熱,時而不捨時而厭惡。個人認為,真係好睇對手,好睇客人。如無意外,最辛苦應該係今個月了,下個月十二月似乎上班日少於十五日,而2019年實行四天工作,每週少於15小時。

講生活

本月還是打機,休息日帶小朋友去飲飲食食而已。唯一較有趣,和太太完成另一高達頭,或許有機會開個YOUTUBE CHANNEL,講投資講打機講砌模型講時事也不一定,見到以下YOUTUBER咁求其咁1999都有人睇,我不會太差吧。。。



講退休

由本月起,少講資產,反正無人睇。跌市雖慘,但家庭淨資產不計物業依然有2000萬以上。

股票市場持續跌市,太太也問,如果不夠錢怎麼辦?其實,大不了省著用,控制開支,再做少少兼職,非常時期賣出資產頂著一年半載,也不算大問題。

沒什麼好擔心的,倒不如擔心一下兒子太依賴,女兒考試常錯不小心更令人擔心。(讀書考試我有另一番見解,不在此文詳述)

預計2019年六月退休,休後實在有太多東西可做,單是網上寫文拍片已比全職工作忙。還有研究同太太去玩,看小朋友成長及身教,即使現在工作非常清閒,還是不夠時間用的。

去了小弟whatsapp吹水群組其中一位朋友的店
柴犬好可愛呢!!(FB搜尋可可店吧!)


有日問女兒"如果他日工作,有一份搵錢的,有一份自己喜歡的,你選哪一份?"

女兒選了後者,加一句回應:"錢並非最有用的"

我自己心裏暗爽了幾下(不只一下),只能夠想,爸爸會照顧好自己,他日你長大不用擔心我,自己想做便做吧。

此文同時在BLOGSPOTFACEBOOK秒投APP發放。

2018年11月4日 星期日

股蟹行為看市 舉動觀察

小弟不喜基本面分析,講會計講分析,好多人比我還精,不如從行為上研究吧。

幾時買股?若時機一到,肯定人人都知道,問題是多少人會買,多少人夠膽買?多次股市周期,大家應該百般滋味。

如何覺得是市底?我也不知道,只知道反正有錢,可以等等等。

和太太談起,年紀越大,這種觸覺越靈敏。是次跌市,我無買貨,會否錯失大好時機?我不知道,反正時機常常出現,犯不著一時半刻衝動。

近日股市下跌,剛剛星期四五(十一月首個星期)大升,究竟是反彈還是死貓彈?我不知道。太多不確定性,而且倉中蟹貨太多,未敢貿然出手。反正股市周期夠短,今次走甩了,下次還有機會。




當然,正因周期夠短,機會老是常出現,不同人操作,結果是可以完全不同。有人說買股次次蝕,也是同一道理,高位買完低位止蝕,轉個頭又見高位再衝入市了。又或者,一次半次股市失利,結果以後遠離股市(噢!強積金呢?),可能蝕了十萬八萬,多個月人工,以後怕怕。

股市指標?若真要和別人溝通解釋,只有移動平均線及保力加通道,這些為詬病的老一套。反而觀察身邊事物作入市時機,更易掌握。

1人人遠離股市
2某些燈神朋友已沽清股票倉
3銀行股票機異常冷清
4有倉在手的自己,在騰騰震



至於財演每日演出,他們實在太隨機,看不看也一樣,倒不如看看財演身旁小花漂况亮與否吧!

至於小弟倉,由年初二千多萬淨值幾乎去掉了三份一,離爆煲還有很遠,根本未到騰騰震。

為下一篇留點伏筆,若然有隻股票,明知一買明天就跌,你還會買嗎?

2018年10月25日 星期四

一買即蟹你仲入市嗎

近來,不論網誌更新率同埋瀏覽數都下跌。

同股市一樣啦!

究竟跌市中,大家做緊乜?當然一如李+x所講,都係準時番工。我都唔例外,閒時放低仔女比工人,兩個出去二人世界。

唔好食!另,已叫女主人暫時不要入市。

(若然你在小弟私人whatsapp group,就知道其實我好得閒。。。)
此乃小弟飯堂!一個月都食番一兩次!

日日睇市?唔好啦。。。睇黎自己唔開心為乜?止蝕我又唔會,而且時機已過,容乜易左一巴右一巴?

升市就會日日睇,跌市不如無眼睇。

如大部份blogger所講,有現金流(工作/投資),其實無咩好怕。買股買債不會負資產,只會被自動平倉。

離自動平倉,我仲有一大段距離啊!

倒不如打下機砌下模型吧!

與其成日覺得molamola,不如做下其他野,訓下覺,訓訓下就熊變牛。

另,物業市場呢,聽人講(我真係唔睇),有唔少年頭買的,現在已經要蝕。新聞又賣,某些成交低過銀行估價一截。黃子華話齋,負資產時,你係要抬錢賣樓的。

我知道,大部份物業佔身家一半以上的,都係好早之前買落,有排都唔會有事。不過新加入呢個"逃生門"的,眼見一入即蟹,又會否好似以前咁踴躍?

應該開始有老人家問屋企個仔,話想買某某股了。

究竟幾時先係買入時機?我估個時你同我都知,不過敢唔敢買又另一回事了。

2018年10月10日 星期三

打工第一年已經要投資 親子王國改篇文章

BK原文連結如下:

https://www.baby-kingdom.com/家庭理財/投資策略/打工第一年已經要投資千里之行始於足下-37715

小弟並不會一文多用,親子王國篇篇文都不是網誌文章!

不過,若有值得再寫或翻炒翻熱的文章,作個修改再出並無不可。

以下文章與上述連結並不相同,不會變成重覆閱讀。

見到有保險朋友傳來網文,提及有人工作多年,毫無積蓄。萬一失業、結婚或退休時唔知點算。其實文中都是老生常談,叫人慳錢和及早投資。

有日同太太係小弟WHATSAPP 群組見到一條影片連結,呢位BLOGGER我未見過,但當然有聽過啦。BLOGGER間暗笑佢二百萬富翁,以同年紀計,我太太都勁過佢呢。。。唔好話我太太是小生意,其實開班教人搵錢才是大生意呢!

https://www.youtube.com/watch?v=HlMgRFOfBB0

如果你想SKIP,可以由第九分鐘開始。

以免以為我笑佢,我只係想講,我太太開頭睇到皺哂眉,睇睇下變為大笑!建議可以同你身邊另一半睇,相信有釋放壓力功用!

小弟一向唔建議苦行儲錢,同工作一樣,心力要花在有效用的地方!若然要記住每日駛左幾多錢(大數OK,若要準確至每毫子,我真係頂唔順。),再者,收入少未必要慳,反而係要開源(文中個位自由工作女孩都識講啦)。

即使唔做PART TIME,都應該利用時間空間睇下自己鐘意做D乜,例如創業或轉行,又或者網上搵下有冇野可以搵錢!(我D中學同學,貪抽獎貪COUPON其實都幾有效!)

小弟網誌吹水WHATSAPP GROUP中有人介紹呢間
份量較少,但個包底好好食呢!
深水埗唔記得左咩名,係福利模型隔一條街!

另一條片,講呢位BLOGGER同年,炒閃卡我都有,不過唔高調同埋自己都收藏埋一份。不過中學時期,補習搵錢居多。大學?試過做咸SITE又試過燒老翻(醫學教材光碟),不過都係一次性收入,不值一提。

反而,由喜好入手,對我人生收入影響更大。

回想小弟仲係打工(即畢業後頭兩年),頭半年真係唔夠錢駛,人工八千,比左一半屋企,自己駛一半。新界到上環番工,路途遠車費貴,加埋食飯拍拖(窮拍),每月真係無錢剩,最多剩500。

當然,下半年轉工,浮浮沉沉,好時過萬,差時六千。投乜鬼資?

唔夠半年再轉,我剛畢業無人理我JUMPY,反而專業人士資格令人覺得我騎牛搵馬。轉左另一間公司,人工一萬,再加上我秘撈三四千,總算有錢儲下。

之後半工讀左一年,人工好時二萬幾,差時都有一萬。

以下係我小小建議,尤其現在大跌市,買左可能即跌,少少地感覺下收住息0既波動吧!

回想當初,如果一開始打工便買入碎股,即使只有500元,當時可以買中電煤氣也好(買匯豐便慘了),或買盈富也好,三厘息計,每500元每月平均有利息1.2元!哈哈哈!

一年下來,每月利息只有15元,只能在常時食個下午茶。(中電有5厘,每月25元,可以食譚仔了!)

當然,一眾財經導師都係教你,及早投資以及複利效應!鬼唔知阿媽係女人咩!

30年後,儲左18萬,五厘計,每月終於有750現金流了!非常勵志!不過唔好話三十年,二十年後食個下午茶,個價錢都DOUBLE左啦!(中電股價都升左DOUBLE,股息都一樣0既。。。放心)

與其苦行憎咁慳錢儲,不如努力開下源!將秘撈/兼職收入用黎投資。到你結左婚仔都生埋,你就好多兼職都做唔到架喇。

A 知識分子,最易搵就係補習。市價100/小時計,一星期三個鐘(補習仲可以收工晚上做!星期六日又得),一個月都1200!教琴有更好效果!

B 老婆話,做台式兔仔奶茶店,請人都50蚊一個鐘!唔想太多體力勞動?佢鋪頭請個文職妹妹,都有55-65一個鐘。今個月佢個大專生番三日都7500,另一大專生番一日都1600(兩者時數有別!)

C 唔好問我請唔請人,GOOGLE一下,馬會都有$46/HOUR,內行人話一半時間係IDLE!

$1600儲一年,第二年5厘計,平均月息有80。至少可以交半個電話費/睇場戲。同時正職人工自己洗!如是者,不動用自己人工之下,三年間已可年年加自己人工。

若唔介意股息少,可以考慮你日常生活會接觸到0既公司,尤其藍籌!銀行(匯豐恒生中銀),交通購物(港鐵領展),住屋(長實新地),生活必需(中電港燈煤氣),衰極都有個譜丫。

畢業頭三四年,多數同屋企住,食屋企。如能把握最初三年,以正正常常現在畢業人工萬多元計,將正職及兼職收入儲起買收息類股票,雖提供現金流不多,但至少可以幫補一下駛費丫!

講左咁耐,其實都係叫及早投資以及開源比節流好!一來可以享受下微薄投資都有被動收入,二來如果要輸,後生輸好過人到中年先炒單勁!及早遇風浪,好過臨尾收山才來被大浪沖走呢!

2018年10月8日 星期一

尋找型噴油場 退休唔撈做準備 1

近排個市跌成咁,大家都無眼睇吧?

日子過下過下,連每月一結都無打到,就由佢吧。

因為小弟會係2019年後,每星期再休息多一日,要搵下細藝。(2019年年中會全面退出了)

現時,星期四多數會同仔出街/自己一個出;星期五呢,就會同女出街/自己一個出。

上星期五,我噴左呢隻!

CS骨架
SD Gundam Cross Silhouette Crossbone Gundam X1

終於集齋CROSSBONE 兩父子(左MG右SD)
女主人偏好話左邊靚,其實個人作品中我只覺一般,
反而右邊SD誤用藍色陰影,出黎個效果又唔錯喎!

剛剛星期四,我出左去旺角區搵噴油場,始終小弟太宅,黎黎去去興趣都係打機同埋砌模型。雖然上年開始幾乎停產,但今年年頭,因客人送左盒模型比我,又燃起我噴油慾望!

開頭目標好簡單,就係方便。價錢間間差唔幾,每月差一二百食餐飯都無左,如果係旺區,中午出去食飯有啖好食遠比屯門元朗又平又大噴油場更好!

目標有五間,只係睇左兩間,睇完兩間噴油場,發現考慮0既因素唔止咁少呢!

YM STUDIO (旺角中橋,即瓊華中心隔離。就係有女僕個間,不過我上去個日無)
https://www.facebook.com/ymstudio.hk/

MR MODELER (旺角廣華街,有客人去過介紹,少有地鋪加噴油!)
https://www.facebook.com/mr.modeler/

T-HOBBY WORKSHOP (旺角好景,應該係為興趣,志同道合場,正!)
https://www.facebook.com/T-Hobby-Workshop-363597247312274/

TM WORKSHOP (屯門區,我無去)
https://www.facebook.com/tmworkshoptmworkshop/

KOBO 噴塗工房-模型噴油工場 (元朗區,我無去)
https://www.facebook.com/kobo91393701/


以我所知,仲有一D係葵興/觀塘既,不過我唔考慮了,因為首要條件係方便/大!

去左YM STUDIO 同 MR MODELER望過下個SETTING,發現要考慮0既地方遠比想像多!!

1 地點方便

除左交通,仲有附近有冇食店,噴到一半去食個TEA都得!仲有買模型用品近否,雖然好多場都順手有得賣。皮老闆住新界西,真係去旺角快過去屯門/元朗呢。

觀塘同葵興,對我黎講唔湯唔水咁,唔考慮了。

2 地方空間

元朗同屯門(工廈),租金較平,地方大,空氣理論上亦較流通(同時亦受抽氣箱性能影響)。但個人噴塗空間亦要考慮,過往我係公司噴,噴完D件可以四圍擺,亂九擺,等佢乾。去到噴油場,應該每人空間有限吧。。。

如果旺區又要大,YM STUDIO應該贏哂!不過人地係用黎玩戰棋,唔知可唔可以咁用。最細,應該係T-HOBBY WORKSHOP,因為佢純志同道合噴油,無咩售賣區,我未上過去,唔知通風OK否。

3 開放時間

因為平時我係公司噴,一早九點早過番工開始,直到下午。原來唔係度度都開咁耐的,我實在太天真了!例如KOBO噴塗工房,星期一至五開6PM!我諗住一早噴應該就唔得了,可惜最大最靚仔係呢間。。。果位場主應該自己仲有一份工吧。

基本上除左KOBO,間間都可以中午一點開始噴(我更想早上送完放學可以噴!),要數最長開放時間呢,應該係T-HOBBY WORKSHOP,佢應該係有匙卡,可以24小時進出。

4 展覽櫃

呢個真係恍然大悟!例如YM STUDIO,MR MODELLER,TM 同KOBO,都有展示櫃可以比閣下"哂命",呢點好重要呢!我噴完都係拎番屋企,比小朋友/自己睇。試過放係女主人鋪頭,比佢話我D野同佢間鋪格格不入。。。

同樣地,有個展示櫃,寄賣左佢(如果佢比),又有得捐下錢,多麼有意義呢!

5 私穩性VS有計傾

呢個受多唔多零售街客影響,其實好睇個人感覺,例如T-HOBBY WORKSHOP 應該可以毒L式一個人去噴,但係就少左R水吹呢一點。。。

相對上,估計TM WORKSHOP同KOBO呢類主力噴油的,志同道合人多,應該幾好。

MR MODELER噴油位係店後,除非個客八卦,否則無人睇你(但感覺怪怪的)。YM STUDIO 人流應該最多,又有聚會,若然人地在戰棋你在噴油,都幾"頹然乎其中"架!

呢點好難預計,即使人多,都未必會同你吹水。前年試過入模型WHATSAPP GROUP,實在太多後生仔,普偏佢地都唔鐘意老野(我三十幾0者),部份可能更有仇視情況(唉!我無收租樓,無抬高樓價啊!亦無自住樓,唔會因升值而叫你好好打工儲錢買樓呢!!),所以人多未必好,人少又會好孤獨。

6 儲存空間

大部份都提供LOCKER!所以唔係咩大問題,目測T-HOBBY個LOCKER大到可以放個泵入去!相對上YM STUDIO個LOCKER就較細,其他無去過,唔知。

其實都係放模型油同工具,同埋未例好0既模型件。唔會用到好多位,若然月租唔包,咁就無咁抵了!

7 租約

呢個真係勁緊要,雖然租用者無合約,但係若然佢要搬,或者要執,你又要走鬼多一次。睇下佢地FB幾時成立,而租約兩年續一次,應該唔難估,你開口問佢都會答你的,例如-HOBBY 就剛剛續左約,可以安心地去噴。

8 抽油箱、氣泵性能

呢個無得試,我都唔好意思打攪人地,等真係定左用邊間,先叫場主開黎試下吧。

9 PLAN(S)

時租不考慮,我一噴就五六個鐘,貴過模型。同埋趕頭趕命無謂。。。
日租都不會,因為無LOCKER。
月租(都係400-600不等),人人都有,原來YM STUDIO仲有"長生位"PLAN(小弟改的,睬。。。),即係1000蚊一個月,佢有個梗位比左你,其他人唔用得,但就無LOCKER提供,要放上噴油櫃的上方了。

女主人按:長生位唔好,流動位正常都有人同你清潔一下喎!
皮老闆:又係喎!清潔程度又係考慮之一,雖然正常都唔會新0既一樣,但係油0既塵粒,一個月都應該掃一次吧。

總結

其實我未有定論!女主人話唔准去女僕個間,不過呢,傾多兩傾佢又比了!

如無意外,皮老闆應該會係2019年二月開始撒出自己鋪頭入面0既噴油工具。至少,模型油同輕便東西要搬走。至於氣泵同抽氣箱,睇下二手市能否賣出吧。

另外,若展示櫃可以寄賣用作捐錢,咁就最正!

最後,開放時間如果可以再早D,或者比我自己去開門(哈哈,要同個場主做左朋友至得啦),咁就一流了!

若有補充/修正,不妨留言告知!

若閣下也是模型友,不妨下年約埋一齊去噴油丫!哈哈哈!!

2018年10月3日 星期三

與炒旦行家對話 港紙轉美金

本來呢篇應該分為兩集,趁今日得閒,一次過講哂。

離退休日子還剩270日,扣除大時大節假期,應該重有200日唔夠。開始要諗下工作退下線之後要善後0既事情。

例如上次講,果堆噴好油0既高達可以點?二手賣出去如果有價都唔錯,當然一如以住,捐哂佢啦。

噴油工具?賣!有市場的。不用擔心。

上網合約、機器合約,唯有硬食賠償?

至於等緊炒旦0既訂單,呢個比較頭痕。

邏輯上,話走就走,可以唔理;道義/人情上,若要善後,似乎要搵個行家幫手。。。

先後搵左兩個行家。A及B。

A是年約29小伙子,算是小弟半個徒弟仔,呢行好少有師徒關係,慶幸我自己都叫做有個師傅。。。佢聽到我話唔撈,除左問我係咪真之外,佢話我知,已經係2010年聽過我講一次,果陣我未結婚未生仔MA!好彩果陣無退,否則今日都幾頭痕。。。

再見到佢,聚舊多過講善後。提下佢個鋪有好多位可以改,佢實在太多年無黎探我了,我都改善左唔少。有唔少炒旦行家科技上依舊慢我十年。。。

講到佢而家個拍檔其實係佢舊老細,聽番佢鋪頭D條件,其實佢老細對佢都幾好。原因?感覺似係泥菩薩過江。點都好啦,阿行家A只係起步階段,佢應該幫我唔到的。

聽佢講,收入應該大約3-5萬左右。話多唔多話少唔少。

同我當年一樣,佢阿媽成日哦佢叫佢搵番份工做,哈哈!最後,因為行家A開始供樓(邊個出首期?應該係屋企),佢阿媽至無說話比佢聽。

行家A屋企都算有D錢,不過,依舊租緊太平道一帶有LIFT舊樓多年,二萬幾蚊有八百至1000呎。業主老人家少加租。咁咪一樣可以供養兩個仔去外國讀大學!其實駛乜咁擔心。

A剛剛無左個女朋友,其實佢炒旦咁得閒,應該去識下女仔!

講完A講B,認識B只係因為有人客人穿針引線而認識。

直接去佢鋪頭似踢館,所以我一路都唔係好想過去,雖然只係一街之隔。。。

點知昨日食茶餐廳,竟然遇到佢!坐低講幾句啦。。。

發現佢間鋪租金都幾貴。。。係我0既1。5倍!不過新D又靚D就無得計。

問下問下,原來佢個鋪因場地大少限制,應該幫我唔到!但係佢提議左另一方法,又即管考慮下啦。

行家B今年35,佢聽到我話唔撈,好意外,重問左我兩次係咪真係咪真CONFIRM。佢問我有冇40歲,我梗係未有啦。。。哈哈!佢話無我咁識投資(佢有我FB,我自己FB講投資講撚蛇D投資組合,無人LIKE架,同專頁好唔同),我客氣同佢講,呢一行後期越做會越多錢,幾何級咁上,不用愁。

估計呢位行家,收入應該過六位數卦,唔過就唔會租呢D價位0既鋪頭。

另外,佢係少數科技追過我0既行家。不過要我轉佢個部機,我又唔會,始終炒0既野唔同,個鑊都唔同要求0既。

講多少少,行家A同B都唔係炒旦,佢地做炒飯!所以無乜衝突可言。

講下投資,小弟錯手按左SP 加SC 11月ATVI@83!按錯!不過算吧,等佢到期見步行步。

另外,港息實在太飄,跟HIBOR高見7厘(國慶假期呀)!我都係將欠債轉番美金。。。當時7.85轉過去HKD,而家7.826轉番USD,有SO丫!

今日都6.547%!應該一眾HIBOR按揭全部去哂頂度!


再另外,女主人低撈左碧貴園,大家睇路呀!!!

2018年9月19日 星期三

為何我寫足十年文 心態決定境界23

打左半個月機,BABY-KINGDOM的IVY小姐提我要交文,才醒起打好的稿未SEND出。果邊有時要等一個星期至出到,而我係BK的文章係BLOGSPOT無的,獨家係BK先有,所以咁比心機都未見出文,都有D沮喪架。

另,WHATSAPP群組七十幾人,捐款數字已過15000!我代表東華/保良局/公益金多謝各位!!


本來打算翻新重寫一D有意思0既舊文,將以前D沙石執走佢(其實應該出書先做)。點知同女主人傾傾下,佢最鐘意我講別人,尤其係心態決定境界系列。。。

全文三千幾字,先甜後苦(水)。建議為免悶親,揀黎睇啦。。。睇哂我會好感動!

今次不如講自己

從小到大,因為小弟朋友唔算多(細個串咀,大個工作無同事),被人背後負評不少,真正朋友才能了解我係個咩人,或者咁講,明白我動機,先做到朋友。

中小學年代,打機打波都有朋友(絕對唔會係孤獨兒童啦),大家都係著同一件校服(女同學例外,佢地著裙!),讀同一本書,再加上公屋小學,大家都唔係咩富二代,有冇錢都唔太明顯。最多都係你靚仔D,又或者踢波叻D。

結果,小學打機打波叻就成為亮點,皮老闆小學成績一般,因為六年無聽過書無溫過書去考試,最後考到中間位,個成績都算見得人啦。

中學?有拖拍/成績好/打波叻都成為亮點。可惜自己中學並無拍拖(強調多次,我有人追架!唔止一個!哈哈。。。),成績後期發力還算不錯,對得住師長對得父母啦。只係我上堂都係唔聽書,閒時做下學校本書D練習就算。

當年有女同學問野,我都係HEA答佢地(就如各位FB私訊問投資一樣,要傾不如係WHATSAPP GROUP傾!),如果我有心機D答,話唔埋有女同學邀請我去佢屋企私人授業。哈哈!

最記得0既係,錯過左兩次良機!

1。中三時,我都算瘦,有個身材幾勁(但唔太肥)既女同學A話抱得起我,我無理佢!而家諗番,應該個陣挑佢機,等佢抱抱我啦!!








2。中五端午節,又有個安室奈美惠膚色,身材又係幾好0既日燒系女同學B,無啦啦相約我同佢兩個人去遊龍舟水!WTF!可惜,當年我未學識遊水。。。

女同學A而家變左肥師奶,有次係街見到佢,不過無相認啦;女同學B?聽聞嫁左比個韓仔。。。

(免誤會,上文講追我果D並非女同學A/B)

上文吹水,下文先係重點!

到左大學/出黎做野,無左件校服,同埋出左公屋範圍,人與人0既分別越黎越明顯。

小弟讀理工大學物理治療學系,2001年畢業(應該不是秘密了)!開始見到有入唔到醫科,次選入左黎(此乃當年理工大學神科,而家我唔知仲係唔係),自以為高人一等0既名校生,又有死讀書0既地方BAND1學生(見佢早幾年係TVB教人倒後行路,講野咁多年都仲係1999),更有為左慳幾毫子而唔搭冷氣巴士等熱狗0既窮苦學生。。。

話說小弟天生是個開班L,所有大學PRESENTATION環節都係全部A哂,不論你對手如何,GROUP PRESENT有我係度鋪排各人任務,即使豬隊友都可以李健和變李安納度!當然,古怪招數一定要用,唔按常理出牌也是必須。。。

結果,當然引起班內一D人不滿(全班一百四十幾人!),笑我無聊者當然有,最正係有D人開始講"車。。。"/"好叻咩,咪又係XXXX"

好彩全班人多,好難比人發現次次我都A。之但係交過一次手,見我咁樣完勝取A,條氣梗係唔順。因同學眾多,三年間再遇機會唔算多,所以無得抄無得學無仇報。

(題外話,我考筆試都OK,中上;只係實習好唔得,因為我都係唔溫書!)

到搵工,我唔搵番本行啦,三年間讀完0既野就咁就算,最大得著只能叫做拍過拖。

我唔知有幾多同學真係鐘意呢一科可以幫到人,而唔係因為錢

或者唔係因為佢0既成績配對"最有機會入到0既神科"係物理治療啦。。。唔通讀BIO/CHEM咩!

我自己就從來唔鐘意走正路,覺得應該等自己睇下鐘意做D乜,否則唔會搵到炒旦呢樣工作。我好記得當年係太子道見工,走上個條陰暗唐樓諗住掉頭走。。。

果度一做就一年多DD(已係我打工最長日子),當時初戀情人D同科同學仲問佢:"阿X唔係諗住一世都做YYY下話"

(而家?我估佢地會唔會諗住做一世PHYSIO,好讓自己供滿層樓呢?)

到後來炒旦生意好左,輾轉同現時女主人拍拖,以收入計應該女主人身邊女性朋友既一眾男友無人能及,當然又會聽到"車。。。"/"好勁咩,咪又係XXXX"

再後來,我開始網上找尋財自之路,想睇下有冇人分享年輕財自生活(唔係個D口講話打風流工但係唔番工又唔夠駛個堆呀!),發現係無既。

咁,唯有自己寫下。一寫就十年。

點解咁ON9?因為前人。

我學識玩期權,都係網上睇前輩留低0既文章,自己第一次打電話落盤都口窒窒(後期好簡單,月份張數,市價丫!)。當年仲係東尼話匯豐值400蚊0既年代,只會買貴唔會買錯!某一任EX個阿媽仲話自己有幾多幾多匯豐,唔知跌到33個陣佢咩心情啦。

當年?鬼唔知匯豐勁咩!明知阿媽係女人都人人講。而家?哈哈哈。。。

我不入地獄誰入地獄?我知我唔係投資叻/最叻個批,我自己輸左都重要出文咁ON99,你見有邊個輸左會出文?只見大部份人潛哂水咋!寫文0者,要威水真係咁重要?

若然批評人玩股玩債0既,真係咁叻玩樓(究竟係樓玩中你,定你玩中樓?),行文時其實無需左掩右避!定係馬後砲話一早估佢跌好過癮?網絡世界,大家唔識,做個好人行個善有幾難?就如一眾小型收租仔同租客對奕一樣,我無著數,你都唔好有。。。(唉,老野唔該唔好衝出黎七,夠喇下話,好X煩!)

上面發UP瘋,其實我個人好睇得開,否則2011年期權災難日由幾百萬變番百幾萬,點過日子?我只記得,好快又彈番上黎,過多幾年唔知攪過乜又上一千萬了。。。

開左WHATSAPP GROUP一個星期未夠,我發現原來都幾多人睇。即使無留過言,或許係人生某D位搵到我,意見相同與否不重要,至少多一個角度睇下其他人點生活也好。

拾人牙慧最容易,勝利者說話如BULL SHIT。。。鬼唔知邊樣野升得最快咩,新聞有講電視有講,你加多一句唔見算係咩真知卓見。

幾層收租/雙租/以息代租?各有各喜好。

只係大眾都講緊0既香港發達秘笈,你再行文講上千次,咪一樣係個堆野。倒不如風中追風兄/STARMAN講下一D少人講0既地方,更顯智慧,更造福人群,尤其後輩!

係無路可走0既年青人世界,
你叫佢努力儲錢,
最後可以買樓財自,
簡直難聽過粗口LAW。。。

人生/財自之路,就如同打機,一個好遊戲入面有唔同角色,有人用大路角色用大路技能可以輕鬆打爆。但卻有唔少人用偏門角色選埋D古怪技能都可以打爆,中港外國機迷都樂意分享點用奇招玩,才更有遊戲樂趣。(例如用醫務兵裝反彈攻擊裝甲,等敵人自傷,再補自己血。。。唔明由佢)

偏偏另類投資就無乜人講,定係無乜人識?剩係識樓當自己識哂?得我呢件成日輸0既爛碩卒成日出廢文。

打鋪機,不牽涉生命價值,所佔時間,日光過隙;
人生漫長,若能以有趣方法,同樣爆機,雖不正路,但同樣達標,豈不好玩?

一個遊戲,正路玩,要UNLOCK 正路ACHIEVEMENT只要爆機便可,大部份人可達到。

若然要昂首廷胸,走過人生路,UNLOCK稀有ACHIEVEMENT,會否諗下樓市以外其他路?即使你唔行,都唔應該負評行得過0既人。同時,年輕一輩已經未必跟得上,若有個傻仔同佢講,其實仲有另一條路可以行,即使佢唔跟,多個選擇係咪好D呢?

創業雖未必成功,
但未必比打死一份無得升0既工安全。

無磚頭雖然無得井噴式升值,但其他投資金額相對易就,其他金錢可以及早享樂,不用供完四五十歲人,都只係得一層阿婆樓。

有時一句"都叫做有蓋遮頭",
’斷送唔少青年大好人生,
白了不少頭,
熄滅不少少年火。

若然他日大家老去,六七十歲,同坐一起細說當年,會否係因為閣下非常有眼光,買左當時極其渴市而年輕人買唔到0既物業致小富,講出黎會否面紅耳赤?怕唔怕隔離經過一個五十幾歲剛供完物業已無剩錢0既男人過來打你

另一個ON99阿伯,笑說當年買左十皮野806惠理集團,蝕左超過一半蝕到自己唔記得買過,從而哈哈大笑?此時,呢件阿伯個女走過黎,問阿伯個阿媽(即係阿麻)留低個D匯豐,可否派息後比阿伯個孫女作零用?

呢個阿伯道別時仲講:"當年債都違約過幾次,不過整體都無事,反正我亂九揀/抄人,唔緊要啦,哈哈哈。。。"

文章稍長,後段比較沉重,亦是小弟多年來想講想做的東西,前半段少甜就當我厄你入黎睇吧。。。哈哈。

歡迎留言!
其實更重要係,SHARE比其他人!
例如身邊0既同學/師奶/朋友!
我發現連我身邊真實朋友,都唔睇BLOG的。。。只會去睇雞精文金句式財經書。
不如介紹多個平行世界比佢地丫!

是日無圖!最頂兩幅,心神意會吧。

2018年9月15日 星期六

小弟開了WHATSAPP吹水群組

趁打風,剛食完晚飯又未開始打機前寫番篇。

話說見好多BLOGGER(吸金或非吸金者)個班都有個WHATSAPP 群組,可能群組比上堂更值錢!就好似D人去讀MBA為左識人,去興趣班為左識男仔/女仔一樣。。。

小弟上個月忽發奇想,不如我悶悶地都攪番個。



一路我都覺得BLOGSPOT網誌以及FB讀者群不太一樣,正好測試下兩者反應。

FB群組早兩日公佈左,現已有三十幾人,捐款數字應該過左六千(因為真係有人二千,一千,五百咁捐!)。早知我唔駛等廣告費去捐等到頸都長。

承蒙各位支持,真係估唔到會咁多人加入,我最初仲話有十個人都偷笑!希望唔會有人覺得我厄佢去捐錢啦!



如果各位讀者有興趣,可跟據以下方法加入,講明先,都係大家SHARE KNOWLEDGE。如果問我跌市有咩計仔,我會叫你陪下屋企人,打下機休息下。。。

群組雖人少,免管理困難,設以下守則。
1 吹水為先,投資為後。
2 大部份生活事可分享,包括飲食,子女,玩具,投資,發牢騷感情問題都得。

入群需對指定慈善機構成出港幣100元以上募捐:
網上捐款快捷,連結如下。請完成後截圖電郵給我,我會回覆群組連結。

(記得CAP圖SEND比我,呢幾日我都回覆得好快!)

我絕對唔介意你捐多D架!

我唔係開班L,我係開GROUP L!
(題外話,聽聞股市低迷,理財班吹冷風!如果閣下係全職開班L,股跌班又無人讀,雙重打擊都幾係野!)

2018年9月7日 星期五

我要真改名!

此網誌男主人終於都整番個名比自己。

最自海綿寶寶卡通一角,皮老闆PLANKTON。見過面0既BLOGGER問,以後點叫我?乜都係一句啦。。。不過,過多幾個月就唔係老闆喇。係一條木板(PLANK)!

用此角色,多重意義。

最主要係佢個角色夠廢!同我生意一樣,唔講出黎就無限幻想,一講就係廢野一碟。行內參差不齊,由每月搵幾千至每月搵幾球0既我估都有!只係我地信唔信有呢個可能。如果要出書講創業路,相信只會有同行,又或者對家做烚旦個D人會想睇。

仲有,皮老闆個樣都幾得意!



我一講,兩個小朋友就知係皮老闆!(個人認為SANDY更過癮,可惜佢係女角!)

其他特徵,例如鐘意抄人秘方,就同我0既投資一樣,抄D又唔抄D,成日奶野。

唔講你唔知(無乜人睇),皮老闆有部電腦老婆叫做KAREN,佢發老婆脾氣,呢個同我都一樣喎!不過佢試過熄佢老婆電掣,我就唔會啦,你估我係大學教授咩!?

本身無乜技能等等,亦都好正!

另外,佢對蟹老闆呢條貪錢怪不屑亦是一絕!同樣地,我都好唔鐘意D人計得咁盡,人生有更多值得花心機0既地方,例如打機!哈哈。。。

最後,劇中生意仲係要蝕錢,佢整0既漢堡有腐蝕性結果無人幫襯!呢樣我就同佢唔同,蝕本生意邊有人做丫。

再講,對於中學讀BIO出身0既我,第一次睇英文版已經覺得呢隻野好怪,原來叫PLANKTON!浮游生物都畫到咁大!其實呢堆微細到要顯微鏡先睇到0既生物,養活唔少食物鏈上游0既生物架。

先生,請問點稱呼你呢?我叫70S。。。唔係,不如你叫我PLANKTON啦!哈哈哈!

2018年9月4日 星期二

免費 WHATSAPP GROUP 廣告費應用

小朋友終於放完暑假!時間突然好用好多,可以打下blog。


係八月最尾個日,終於去左朝聖!時代廣場沙煞比(非1比1)!其實今年同幾年前個次,好明顯hea左好多,上次都有唔少影相位,今次?得呢度law。。。

模型就無乜心水,網上群組大部份人買彩色透明版沙煞比(左邊紅色果隻),小弟砌過覺得麻麻(太複雜,上色更加煩),見電鍍+透明版00 diver反而有興趣。不過睇死佢貨量大又無人會買(呢個系列老人家唔睇,小朋友唔會買特別版),再加上我又砌唔切,不如放住係佢度,遲d模型鋪有平貨番先去買。

面對仲有八個月就永遠失業,決定逐步改變此BLOG,以及要為餘下工作埋尾及公司物資變賣/儲存。

想重溫馬沙之反擊?可以睇以下官方YOUTUBE完整繁中版!


改網誌名稱

呢個名係一眾BLOGGER都未用數字稱呼自己之前已用,後尾發現實在極奇論盡!我要真筆名!其實我心中都諗好左,等女主人批核就可以了。

近日止凡兄被喻為投資界阿寶!我都想做個駕駛員啊!

捐款事宜

不知不覺,google adsense 已累積左三千蚊,因事忙同想捐去第二度而未捐出。預計九月份應該會捐出啦!有一刻諗過,利用ADSENSE0既黎賣番點擊廣告,煮豆燃頭箕,會否令捐款速度加快。各位比下意見丫!

免費群組

最後,呢期多人講有BLOGGER/財演開班,我咁0岩又去多左圖書館,成日睇IMONEY/經濟一周呢類書,原來除左上堂之外,仲有筆記,又有機會贈書。不過我估最吸引0既係,師生WHATSAPP群組!我估呢個就似D人去讀MBA廣交朋友一樣,最吸引你上堂之處了!

呢個勁呀,等我都開番個群組,吹水也好生仔也好,我唔收錢啦,不如要一張指定團體捐款收據?

最後,恭喜另一BLOGGER十仔踏入財自之路!

最後,近日又再夢見家母,一連串夢境,一連串可能性。不知是否自我安慰定係點,每發完一個故事,又釋一點懷。

近日買回N年前原價2蚊0既黃金戰士,當年係我阿媽係地攤買比我0既。而家搵番,好開心,簡直係今年最正0既玩具




最後講下投資,就係乜都無做。見呢排網誌流量少左,同一眾BLOGGER流量有關, 股市低迷,自然無乜人有心機去睇,去寫0既都少左。打趣講句,呢個浪,又會令多少BLOGGER 消失呢?

2018年8月31日 星期五

即時唔撈好嗎? 我可以唔撈嗎 42

講生活

小弟八月生日獅子座(止凡兄同月但遲我一星期左右)

揀左食1881王子飯店,可惜今次兩條港女太嘈,上次體驗好好多。
小弟鐘意靜靜地食野,食乜其實無乜所謂。

近來依舊半退休MODE,閒時番下公司做幾粒鐘。

其實都唔算好得閒,晚上同太太睇劇睇戲都睇到兩三點,第二朝十一點先起身。食完午飯諗下同小朋友出唔出街,中間又打下機。食完晚飯一家四口繼續打機。。。

真係好鬼忙,我自己D GAME 都未打完,又要同佢地打。呢個暑假完成左兩隻LOCAL同機四打GAME!

DIABLO 3 (NORMAL MODE ONLY,用手制打真係非常驚喜,好過用KEYBOARD好多好多,玩家體驗一流!)

CASTLE CRUSHER(見人人話好玩,我就覺得麻麻)

下個目標,我估係盜幕者!


呢個暑假,見佢地成日睇卡通片,教佢地睇左三套老餅港產片!

十萬火急(個仔成日鐘意消防車,等佢睇下消防員幾危險)
西遊記之月光寶盒(家姐睇到發哂姣,另佢會同女主人睇新拍的流星花園!)
破壞之王

其實我唔太好周星馳,只係呢D唔駛用腦笑位,有時好睇過卡通,尤其係唔大唔細,得7歲0既女。

有睇我FB都知,我去左尖咀睇美少女戰士,飲茶個間"點心代表"認真垃圾



睇黎今年無緣去老銅睇高達了。。。成日落雨。

講工作

正常呢個時候,都定哂黎緊半年工作,舊年預計得番10萬左右,點知計計下都唔差,有成15萬喎。點知上星期,有人訂左枱又唔黎,打亂哂我個安排!少左五六千!有時做好人,未必有好報,如果一開始唔做佢地生意,可能成個故事又唔係咁,有少少覺得係小弟榮休前既一個污點呢。

又再一次閃過,不如即時唔鬼做啦,反正得番10個月貨仔,只係令我資產多七十至一百萬左右,又如何呢?!

離退休之日(鋪頭租約完結),仲有303日,已約定好友們上黎切燒豬食西餅拍照留念。有大學同學話我最快退休果個,我又唔係好信!係人人都識投資、個個半退休打風流工0既年代,我呢D窮退,又算得係乜?

講投資

本月真係乜倉都無做,一黎無乜彈藥,二黎跌市又怕要預留按倉值。連期權都無做。

反而同女主人計過下,一個月家庭開支都近八萬(連長老家用),若齋靠小弟個份息,就每月剩番唔多。當然女主人都有佢投資,若將現金轉為投資物,佢應該可以養番佢自己有突。

港股跌,其實又唔係好大獲,因為我建行倉大但平價入。而另一三球倉雖然跌得好甘,但係都係有限數。不過負面氣氛影響自己,不如打下機把啦。反而WIN CORP 債又再跌,已經唔見左三份一,我怕捱唔到2012到期日就已經違約!(大吉利是!)

另,金價又跌定左,GLD現在113,比我預計跌到110為好。

講資產

男主人351萬(上月345萬),升得個六萬主要因為港股下跌,同時上個月唔開鋪結果無乜收入,坐食山崩算係咁啦。

女主人508萬(上月494萬),多左14萬原因,係因為我好遲至找我筆數比佢。。。哈哈哈。上月都有提過。

開始覺得,上面個段講唔講都罷,反正心意已決,無話夠唔夠,反正唔會太過唔夠。每月資產差果少少影響不大。無理由因為資產少左而將人生決定推遲卦?股市無常,話唔埋兩三年後又癲過,個個又再一次紙上富貴(2015 2018都出現過),至少BLOGGER中,無人被淹沒,亦唔覺有人可以大賺到即退丫。

2018年8月23日 星期四

退休活動之打機家庭樂

近期發現新大陸,STEAM GAME!(投資?文末再講)

STEAM GAME 不是新奇事,但我想做到以下幾點
1四打
2唔睇MON,用電視打
3四個成員都用無線手制
4比CONSOLE更多四打LOCAL COOP GAMES!

小朋友長大了,一個7歲一個5歲,已經可以一齊打機!但CONSOLE (PS4 XBOX 等),大多數GAME都實在太親子,一黎可愛向,二黎解迷向,唔係個個大人/小朋友都識玩/0岩玩!

圖中係我個仔自己係WIN10個APP STORE DOWNLOAD 試版GAME 打。。。無人教過佢!!!


STEAM GAME呢樣野出現左好耐,上次用黎打DEVIL MAY CRY 已經係四五年前0既事,不過原來仲有好多正GAME同舊GAME可以打番!

之後發現官方賣GAME都貴,見人開俄IP買扮俄仔買平GAME(內容一樣,只是售賣地區不同),發現都幾麻煩。最後,去 www.G2A.com 買就算,又平!

淘寶信唔過!極不建議!

有咩0岩玩? (睇下下面D圖,又有否勾起閣下回憶?)

YS 1&2 CHRONICLES 伊蘇國1&2 合集, 畫面再重制!!!


CIVILIZATION 2 3 4 5 系列!
ROMANCING SAGA 2
DRAGON AND DUNGEON (街機回憶!)

上面個D,我都未買。因為我目的唔係呢個!!

其實我係用黎打四打GAME!可以同一畫面四個人打,可以SEARCH KEYWORD "LOCAL COOP"

或者上 https://www.co-optimus.com/ 上面睇下!

因為PS4 成日要拎出黎插線開我覺得好煩,而已經同7歲女5歲仔打爆左DIABLO III 連一EXPANSION (NORMAL MODE 好易打, 教佢地出技能便成),不用老婆加入,三人已可以完成!

STEAM 要用PC打,好彩佢有個APP 叫 STEAM LINK , 可以同步投放係ANDROID DEVICE。小弟用緊舊款SONY BRAVIA 電視,好彩都係ANDROID系統(好重要!),只要兩者都係用LAN線連接,基本上係唔會有太大延遲。

有咩GAME?真係多到。。。

OVERCOOK 1 & 2 (2 呢, 平過買CONSOLE GAME! 我唔鐘意同仔女打呢類....佢地能力未到)
CASTLE CRASHER (小弟誠意推介!)

TESLA AND LOVECRAFT


雙打經典野都有
LEGO MARVEL (好平! 幾十蚊)
DEATHSPANK 系列全三款, 我同女主人至愛! 如有時間睇埋D對白,其實好抵死...


係電視打PC GAME 唔係新鮮事,要坐埋係梳化無線打先爽!

如果用四個PS4手制,咁就要4個USB ADAPTER。 咁痴線?如果有其他方法請留言。

不過我已搵到解決方法,就係用FADE OUT 左0既XBOX360手制!

只有XBOX360 有USB WIRELESS ADAPTER,可以一連四!!解決哂所有問題!(如果其他方法,留言教下我丫)

我屋企有兩個XBOX手制,四個PS4 手制,結果要分兩TEAM人,兩個係梳化用XBOX無線打,兩個用PS4 連USB 線係電腦前打。

昨日,旋轉拍賣買左兩個二手制番來(全新400蚊一隻,二手100),最後實現以下目的!

用PC打STEAM GAME,投放出廳中電視。
無線之下,用四個手制同時打機!

其實毒L一個更開心?如果你係單身平價財自人(即係每月收息一兩萬退休唔做的),我真心介紹你匿係屋企打機!平得黎又正版!

講投資?小弟持有GAMESTOP債卷(NYSE: GME),STEAM GAME 應該係一大打擊。。。等佢到期贖回就算。前景真係唔樂觀呀!

2018年8月10日 星期五

2017 建行股息 以為仲少過上年

呢期又同女主人睇電影,一路都無打BLOG。

今次講2017年度建行派息,前五年0既文章係最後有連結。

睇番HUNGER GAMES!除左第一二集,其他都係垃圾!睇番網評話書仲差過電影。。。簡直係少女小說,比台愛情劇更差。萬千寵愛之餘,仲要有兵收。。。

早兩日收到建行(939)股息,不如講下IB同CITIBANK收股息手續費如何。

建行派息人民幣 0.291,七月公佈左兌換比率,因人仔急跌,得番0.34515479!

再扣埋10%股息稅,即係得番0.31064211


小弟有部份建行係CITIBANK花旗銀行,佢收股息就係0.5%,無其他收費。(其實都係幾百蚊)

另外IB唔收手續費,而且,因為有部份係DIVIDEND IN LIEU(咩黎?睇番下面條LINK講咁多年股息有幾多!),反而多左幾千蚊!

講多無謂,2018年收到建行2017年度股息$625564。


如果佢早D淨,人仔仲未跌,其實股息會更多。

除番開每月5萬蚊多D,其實真係僅僅夠駛仲要老婆食自己。當然,佢都有佢0既股息部份,各有各食就剛剛好。

所以,建行以外0既組合就用黎提供額外金錢,暫計約每月四萬左右,同埋有機會的話資本再增值。期權金收入,只能作為抵銷利息開支,相對定息產品同埋建行,是九牛一毛。

另,近期打緊呢隻低B GAME。。。屋企兩姐弟係NETFLIX搵番D角色出來。


************

2016年度(2017)收到589756

2016 建行股息 少扣股息稅


2015年度(2016)收到575701

食息過活 建設銀行 2015 年股息派發


2014年度交行建行股息HKD41萬,加埋權金12萬總數53萬
(故事一匹布,自己睇呢篇 2014 年交通銀行 派息日 收到股息

再上年收到2013年度交行股息HKD44萬
(連結按此2013 年股息派發

再再上年收到2012手度交行股息HKD278000
(連結按此2012 年 股息

2018年8月3日 星期五

隻艇有排坐 我可以唔撈嗎 41

離榮休之日仲有331日。
我可以唔撈嗎系列應該唔會過一百了!

講生活

病足成個月,終於都好番!!

食ZITHROMAX唔好但竟然食AMOXICILIN好番!可能DOSAGE唔夠啦。。。真係奇遇記。。。

昨日好番,即時夜晚同小朋友去會所泳池,上第二課游泳班,進度梗係好慢,因為我教。玩下水算啦。

睇左超人特工隊2,連埋工人同一家四口,爆谷小食,要五舊幾水埋單。不過此刻無價啦!好唔好睇?我覺得第一集好睇D!

另外,買左DREAMWORKS 美版百獸王,成隻係膠,不過玩味好重!合體每一隻都有獨立聲效!不過隻野都唔細,搵個咁高0既櫃放真心有難度!入手價$745。

當年日版動畫舊到無人想睇,美版動畫呢,NETFLIX好唔公平,外國有香港無!唯有睇嗶哩嗶哩!連結如下!

https://www.bilibili.com/video/av15645875/










踏入七月尾,細佬生日!之後到家姐,然後到我!三個都係獅子座!



講工作

本月工作極清閒,一個星期都唔知有冇15個鐘,好多時係鋪度HEA。。。

同時,亦要為最後十個月工作打算一下。預計黎緊四個月,平均都有15萬以上。之後個六個月都有12萬以上,應該估到工作收入了。

病緊個期,極度HEA做,現在好番,反而覺得最後一擊,盡量做好D吧。

仲有,連續幾年拎到0既米芝連獎,今年一如所料係落空0既!無得間接免費宣傳添!

我開始煩惱鋪頭個D高達模型點算。。。賣又無人會要,放番屋企又無咁多位!(一共四五十隻閒閒地,屋企現有都差唔多呢個數)

相信過多幾個月,會煩點樣清場交吉,雖然都係錢解決到0既問題。仲有,機器合約好似未完,應該仲有半年,唔知點解決,最多比錢。

有諗過去人地鋪度炒旦過日晨,不過咁又好無謂,錢又唔多何必咁做?我做多一個月炒旦,可能已經係做人隻馬0既兩年收入!

講投資

病左,無做任何倉。睇住個三百萬組合日日跌,今日已經跌左六十三萬,好彩有三十萬權金落袋,相對上無咁傷。點攪?我從來都係傻散一名,由得佢再坐一回吧。

建行8月6日派息,為呢期無收入同資下跌0既我提供現金!

講資產

男主人345萬(上月319萬),因為IB加上了未收到的建行股息,其實好明顯係少左唔少錢。。。我又未找女主人條數兩個月。其實條數我估28X萬左右。即係少左30萬!

女主人494萬(上月493萬),因為我未找數比佢,實質佢應該已過5球,唯有下月執番條數反映番。留意,佢D港股都跌左,即係話,佢工作收入比上個月多。。。

仲以為退休之日我會追過佢,睇黎無咩可能。

明年今日,應該已成為一個無業中佬,行文應該講收到股息點樣再投資,從而令收息追得上通漲,達至食息財自。

正定反面教材?至少我搵唔到類似網誌可以參考。。。
Related Posts Plugin for WordPress, Blogger...