小弟在DISCUSS 並無出文
你回應緊0既,都係一個有心引你派膠0既人,並非小弟。
若有人以為我係DISCUSS 出文引HATER, 是否太小學雞?
小朋友, 暑期放完好耐了. 好好努力上班吧...

2018年5月29日 星期二

十年後,男女主人的生意對手在哪?

呢篇主要講女主人0既,順手又講下自己啦。

男主人生意,幾乎從無對手。並唔係我勁,只係小小市場中,又做其中的小小部份,對手實在數量太少。係平行空間入面其他炒旦對手係有,但基本上做唔同0既客互不相干。

就好似一隻只食熊貓0既獅子,有幾多隻熊貓丫。幾隻偏食獅子又各住係互不相連0既草原,根本唔會互相影響。

唯一對手,只有乜都食0既獅子,但佢地唔偏食,結果唔會特登去獵熊貓!佢地大可以食河馬食山羊呢D量多量大就夠飽0既動物。

又正因為熊貓少有,若有新獅子加入,佢地好快會發現食熊貓唔夠飽,退而求其次食埋山羊同鹿同埋水牛,由偏食變番雜食。

十五年前,我以前拍檔係立志想成為雜食狼(狼數量好多,但食物相對亦多),點知佢實在太新仔,乜都食唔到。近瀕死邊緣下識左我,從而我教識佢偏食戰略。

咁,又邊個教我?就係我師傅,牛津碩士M LAM。

十五年後,師傅同拍檔去左邊?

師傳應該匿左去食比熊貓更旱有0既動物,正常人好難食到亦好難搵到(基本上係門檻來,能力上我都入唔到的)。我唔知佢有冇物業有冇投資,照計佢小朋友都大學畢業了。

而我拍檔呢?當年因為錢(其實每次同女主人講,都唔係主要錢,反而係拍檔當時個女人左右,同埋當時拍檔太強太氣焰,以為我會屈服)而拆伙,後來一拆伙我爆SEED收入升左兩三倍,從而走向財自之路。

上年發現,佢鋪已搬,去左一個當初我連睇都唔想睇0既位置。大概係貪平租,同時客源小左,講得明白一點,就是做唔住,要縮了。

是否需求少左?非也!我猜大約係能力問題,同埋當初我教佢個D方法已經好多人用緊!一路以來佢都無改進過/改進得唔好,自然會比人淘汰!

*****

此文重點,係講女主人。

話說佢現在伙記少左,反而收入好左,因為出少份糧之餘,自己SELL番成功機會又高D(女主人親和力唔錯的)。

但近期人事變動不止一單,上一篇

馬雲好介紹 我可以唔撈嗎

馬雲好介紹 我可以唔撈嗎
提及過,佢運輸上有變動。而近排UPDATE左我,似乎變動後的運輸自己都做唔掂,唔知捱到幾耐。。。女主人唔會用番舊運輸,雖然女主人有其他後備,但始終未合作過,唔知可靠否。

本來,伙記又好,運輸又好,我地都只係打算做到2019或2020就收檔。點知2018年被迫要變動。。。

言歸正傳,女主人有唔少生意對手。我分別叫佢做AC同MCM啦(好鬼扺死,我知佢地真名!)

十年前(2009)AC是個女人,早過女主人做呢D野,不過過往規模好細貨質好差,全部以平價取勝,即係客源係比唔起錢個D後生港豬。。。

自從女主人踩左一腳入黎,教識左佢去賣D高檔次野,利潤更高。

本應相安無事,但因為網絡力量唔夠女主人來(何來網絡力量?男主人炒旦以外另類技術),佢日9日係女主人鋪頭附近貼傳單,真係好醜怪。當時男主人唯有作反擊,例如親自去警告幫佢違規賣廣告0既店主,唔好再幫佢晒廣告係絛街度。

如是者,廣告攻擊平靜下來。

十年後昨日,運輸告知女主人,AC佢地生意唔係好掂,雖然未摺,但以大不如前。原因?文末再講。

另一對手MCM,是個男人,呢個正仆街,係女主人陀第二胎個陣(2012年尾),仲要揀係同一位置開,步行距離少於一百步(近過唔少OK同7-11)。點解開得咁近?唔駛估都知吧。。。枉佢仲係耶教教徒,做埋D咁低庄0既野。

當時都有點頭痕,因為鋪中無左女主人,當時伙記又唔算好熟練,怕我地做0既宣傳同口碑,一下子益左MCM。

後尾女主人坐完月,番番鋪頭,好彩一切正常。而MCM呢條仆街,成日係佢鋪頭數女主人鋪頭D貨質量唔好,仲要係主動咁講。

點解我地會知?因為D客講!一入到黎,我地鋪頭又靚D格調又高D,D貨?更加正過MCM啦。。。

MCM都有優勢,就係佢係男人,佢可以接一D我地接唔到0既生意。

後尾,我地租約完左,又搬大左。MCM未完約,無得做跟尾狗。

之後有冇跟來?無喎,我地果度好大,佢租唔起(唔敢租),再者,我地個邊好似無位比佢租了。

之後MCM搬去邊?搬左去AC個度!!(哈哈哈,所以我話MCM呢條男人真係仆街黎!),佢要依靠搬去同行附近生存。

運輸又話,MCM要摺了(仲衰過AC)。我又留意下佢,原來佢做緊三折賣貨尾!似乎真係要結業了。

以前三分天下,而家點解攪成咁?

女主人成日懷疑係消費模式變左,但男主人正宗毒L四圍SEARCH,都未見到網購成氣候,而年青港豬一班消費力亦未成新力軍。

我估絕大原因,係同市況轉變,形成行業大淡季為主。想當初女主人個鋪得個三兩百呎,可以同時有二十幾個客係入面,而家兩千呎可能唔止,同時最多都係十個以內。

就咁睇,女主人係行內都算幾成功,本以為三分天下(當然仲有其他對手),但市場一萎縮,良幣驅逐劣幣,剩番以質取勝既女主人。(真的,同一近以貨品,同行,尤其AC,個表面價都賣得較平)

男主人租約完結為:2018年6月30日
女主人租約完結為:2020年3月

男主人收入極易估計,已可PROJECT租約完結前依然有月入十萬左右,現約十五萬左右。
女主人收入難估,我同佢講,搵得一萬咪一萬。(上個月十萬,已好過一般打工仔打三個月工)

無圖可放,只有近期玩具一入!終於買到良牙!!


14 則留言:

  1. 霸到沙發位!
    雖然唔多明70後兄講乜,但搵到 NICHE MARKET 中的 NICHE MARKET,做得咁掂又無對手,即係會有好高利潤啦,即係好掂好掂啦!一個字:勁!

    回覆刪除
    回覆
    1. 其實現實又唔係真係勁.
      如在現實世界,呢行係比人看不起的...覺得搵朝唔得晚.
      但如果你上左紀, 就會發現無左佢會好頭痕...

      刪除
    2. 咁有趣。有日師兄真退休時候,記住開估俾我地知係乜來的啦!

      刪除
    3. 所以我同我太太都係食上一輩人0既錢多.

      亦唔鐘意吸班後生仔0既錢.

      刪除
    4. 70後兄做生意有原則,一讚!

      刪除
  2. “枉佢仲係耶教教徒,做埋D咁低庄0既野。”

    好多教徒只係得個榖,性格行為分分鐘仲衰過不少無神論者。可能你講呢件MCM,當年返教會只為識囡囡🤡

    回覆刪除
    回覆
    1. 咁就唔知啦。
      佢係創店初期,私隱洩漏左出黎,我才知佢是耶人。
      不過,幾年前我搵朋友放蛇去睇,佢一路用個cam pan 住我朋友,戒心都幾重。

      刪除
    2. 同意春花姐。好多教徒真係行禮如儀,衣冠禽獸。君不見教會、佛堂先係最多是非既地方。呢啲宗教組織好多時淪為某啲人搵真銀既地方。

      刪除
    3. 借宗教名義搵錢的太多.

      若自稱信徒而令人放下戒心者, 更可恨.

      刪除
  3. 我都好想食熊貓。但未揾到方向😥😥

    回覆刪除
    回覆
    1. 要有conviction.
      如打工,就比較難有突破,但亦可從投資達到。

      刪除
  4. Conviction? 求開新篇講講…又學嘢lu

    回覆刪除
    回覆
    1. 只係年青時堅定的信心和勇氣吧!

      我的大學同學, 讀書時個個話要開間診所, 最後十之著八變成工資奴.

      現今通漲咁勁, 薪金不停被侵蝕, 點都唔夠開診所班人搵得多.

      (我就無做番相關工作)

      刪除
  5. 我近排都不停反思自己生意问题
    得出結果,同七十兄相似
    大概是
    要賺錢先要找到自己的定位同對象
    之後就會找到優化既方向,形成優勢
    所以對手點抄,都是能抄表面既行為
    而找不到自己核心的競爭力

    回覆刪除

各位每個留言,係我繼續9UP動力,必覆。

Related Posts Plugin for WordPress, Blogger...