小弟在DISCUSS 並無出文
你回應緊0既,都係一個有心引你派膠0既人,並非小弟。
若有人以為我係DISCUSS 出文引HATER, 是否太小學雞?
小朋友, 暑期放完好耐了. 好好努力上班吧...

2018年9月19日 星期三

為何我寫足十年文 心態決定境界23

打左半個月機,BABY-KINGDOM的IVY小姐提我要交文,才醒起打好的稿未SEND出。果邊有時要等一個星期至出到,而我係BK的文章係BLOGSPOT無的,獨家係BK先有,所以咁比心機都未見出文,都有D沮喪架。

另,WHATSAPP群組七十幾人,捐款數字已過15000!我代表東華/保良局/公益金多謝各位!!


本來打算翻新重寫一D有意思0既舊文,將以前D沙石執走佢(其實應該出書先做)。點知同女主人傾傾下,佢最鐘意我講別人,尤其係心態決定境界系列。。。

全文三千幾字,先甜後苦(水)。建議為免悶親,揀黎睇啦。。。睇哂我會好感動!

今次不如講自己

從小到大,因為小弟朋友唔算多(細個串咀,大個工作無同事),被人背後負評不少,真正朋友才能了解我係個咩人,或者咁講,明白我動機,先做到朋友。

中小學年代,打機打波都有朋友(絕對唔會係孤獨兒童啦),大家都係著同一件校服(女同學例外,佢地著裙!),讀同一本書,再加上公屋小學,大家都唔係咩富二代,有冇錢都唔太明顯。最多都係你靚仔D,又或者踢波叻D。

結果,小學打機打波叻就成為亮點,皮老闆小學成績一般,因為六年無聽過書無溫過書去考試,最後考到中間位,個成績都算見得人啦。

中學?有拖拍/成績好/打波叻都成為亮點。可惜自己中學並無拍拖(強調多次,我有人追架!唔止一個!哈哈。。。),成績後期發力還算不錯,對得住師長對得父母啦。只係我上堂都係唔聽書,閒時做下學校本書D練習就算。

當年有女同學問野,我都係HEA答佢地(就如各位FB私訊問投資一樣,要傾不如係WHATSAPP GROUP傾!),如果我有心機D答,話唔埋有女同學邀請我去佢屋企私人授業。哈哈!

最記得0既係,錯過左兩次良機!

1。中三時,我都算瘦,有個身材幾勁(但唔太肥)既女同學A話抱得起我,我無理佢!而家諗番,應該個陣挑佢機,等佢抱抱我啦!!








2。中五端午節,又有個安室奈美惠膚色,身材又係幾好0既日燒系女同學B,無啦啦相約我同佢兩個人去遊龍舟水!WTF!可惜,當年我未學識遊水。。。

女同學A而家變左肥師奶,有次係街見到佢,不過無相認啦;女同學B?聽聞嫁左比個韓仔。。。

(免誤會,上文講追我果D並非女同學A/B)

上文吹水,下文先係重點!

到左大學/出黎做野,無左件校服,同埋出左公屋範圍,人與人0既分別越黎越明顯。

小弟讀理工大學物理治療學系,2001年畢業(應該不是秘密了)!開始見到有入唔到醫科,次選入左黎(此乃當年理工大學神科,而家我唔知仲係唔係),自以為高人一等0既名校生,又有死讀書0既地方BAND1學生(見佢早幾年係TVB教人倒後行路,講野咁多年都仲係1999),更有為左慳幾毫子而唔搭冷氣巴士等熱狗0既窮苦學生。。。

話說小弟天生是個開班L,所有大學PRESENTATION環節都係全部A哂,不論你對手如何,GROUP PRESENT有我係度鋪排各人任務,即使豬隊友都可以李健和變李安納度!當然,古怪招數一定要用,唔按常理出牌也是必須。。。

結果,當然引起班內一D人不滿(全班一百四十幾人!),笑我無聊者當然有,最正係有D人開始講"車。。。"/"好叻咩,咪又係XXXX"

好彩全班人多,好難比人發現次次我都A。之但係交過一次手,見我咁樣完勝取A,條氣梗係唔順。因同學眾多,三年間再遇機會唔算多,所以無得抄無得學無仇報。

(題外話,我考筆試都OK,中上;只係實習好唔得,因為我都係唔溫書!)

到搵工,我唔搵番本行啦,三年間讀完0既野就咁就算,最大得著只能叫做拍過拖。

我唔知有幾多同學真係鐘意呢一科可以幫到人,而唔係因為錢

或者唔係因為佢0既成績配對"最有機會入到0既神科"係物理治療啦。。。唔通讀BIO/CHEM咩!

我自己就從來唔鐘意走正路,覺得應該等自己睇下鐘意做D乜,否則唔會搵到炒旦呢樣工作。我好記得當年係太子道見工,走上個條陰暗唐樓諗住掉頭走。。。

果度一做就一年多DD(已係我打工最長日子),當時初戀情人D同科同學仲問佢:"阿X唔係諗住一世都做YYY下話"

(而家?我估佢地會唔會諗住做一世PHYSIO,好讓自己供滿層樓呢?)

到後來炒旦生意好左,輾轉同現時女主人拍拖,以收入計應該女主人身邊女性朋友既一眾男友無人能及,當然又會聽到"車。。。"/"好勁咩,咪又係XXXX"

再後來,我開始網上找尋財自之路,想睇下有冇人分享年輕財自生活(唔係個D口講話打風流工但係唔番工又唔夠駛個堆呀!),發現係無既。

咁,唯有自己寫下。一寫就十年。

點解咁ON9?因為前人。

我學識玩期權,都係網上睇前輩留低0既文章,自己第一次打電話落盤都口窒窒(後期好簡單,月份張數,市價丫!)。當年仲係東尼話匯豐值400蚊0既年代,只會買貴唔會買錯!某一任EX個阿媽仲話自己有幾多幾多匯豐,唔知跌到33個陣佢咩心情啦。

當年?鬼唔知匯豐勁咩!明知阿媽係女人都人人講。而家?哈哈哈。。。

我不入地獄誰入地獄?我知我唔係投資叻/最叻個批,我自己輸左都重要出文咁ON99,你見有邊個輸左會出文?只見大部份人潛哂水咋!寫文0者,要威水真係咁重要?

若然批評人玩股玩債0既,真係咁叻玩樓(究竟係樓玩中你,定你玩中樓?),行文時其實無需左掩右避!定係馬後砲話一早估佢跌好過癮?網絡世界,大家唔識,做個好人行個善有幾難?就如一眾小型收租仔同租客對奕一樣,我無著數,你都唔好有。。。(唉,老野唔該唔好衝出黎七,夠喇下話,好X煩!)

上面發UP瘋,其實我個人好睇得開,否則2011年期權災難日由幾百萬變番百幾萬,點過日子?我只記得,好快又彈番上黎,過多幾年唔知攪過乜又上一千萬了。。。

開左WHATSAPP GROUP一個星期未夠,我發現原來都幾多人睇。即使無留過言,或許係人生某D位搵到我,意見相同與否不重要,至少多一個角度睇下其他人點生活也好。

拾人牙慧最容易,勝利者說話如BULL SHIT。。。鬼唔知邊樣野升得最快咩,新聞有講電視有講,你加多一句唔見算係咩真知卓見。

幾層收租/雙租/以息代租?各有各喜好。

只係大眾都講緊0既香港發達秘笈,你再行文講上千次,咪一樣係個堆野。倒不如風中追風兄/STARMAN講下一D少人講0既地方,更顯智慧,更造福人群,尤其後輩!

係無路可走0既年青人世界,
你叫佢努力儲錢,
最後可以買樓財自,
簡直難聽過粗口LAW。。。

人生/財自之路,就如同打機,一個好遊戲入面有唔同角色,有人用大路角色用大路技能可以輕鬆打爆。但卻有唔少人用偏門角色選埋D古怪技能都可以打爆,中港外國機迷都樂意分享點用奇招玩,才更有遊戲樂趣。(例如用醫務兵裝反彈攻擊裝甲,等敵人自傷,再補自己血。。。唔明由佢)

偏偏另類投資就無乜人講,定係無乜人識?剩係識樓當自己識哂?得我呢件成日輸0既爛碩卒成日出廢文。

打鋪機,不牽涉生命價值,所佔時間,日光過隙;
人生漫長,若能以有趣方法,同樣爆機,雖不正路,但同樣達標,豈不好玩?

一個遊戲,正路玩,要UNLOCK 正路ACHIEVEMENT只要爆機便可,大部份人可達到。

若然要昂首廷胸,走過人生路,UNLOCK稀有ACHIEVEMENT,會否諗下樓市以外其他路?即使你唔行,都唔應該負評行得過0既人。同時,年輕一輩已經未必跟得上,若有個傻仔同佢講,其實仲有另一條路可以行,即使佢唔跟,多個選擇係咪好D呢?

創業雖未必成功,
但未必比打死一份無得升0既工安全。

無磚頭雖然無得井噴式升值,但其他投資金額相對易就,其他金錢可以及早享樂,不用供完四五十歲人,都只係得一層阿婆樓。

有時一句"都叫做有蓋遮頭",
’斷送唔少青年大好人生,
白了不少頭,
熄滅不少少年火。

若然他日大家老去,六七十歲,同坐一起細說當年,會否係因為閣下非常有眼光,買左當時極其渴市而年輕人買唔到0既物業致小富,講出黎會否面紅耳赤?怕唔怕隔離經過一個五十幾歲剛供完物業已無剩錢0既男人過來打你

另一個ON99阿伯,笑說當年買左十皮野806惠理集團,蝕左超過一半蝕到自己唔記得買過,從而哈哈大笑?此時,呢件阿伯個女走過黎,問阿伯個阿媽(即係阿麻)留低個D匯豐,可否派息後比阿伯個孫女作零用?

呢個阿伯道別時仲講:"當年債都違約過幾次,不過整體都無事,反正我亂九揀/抄人,唔緊要啦,哈哈哈。。。"

文章稍長,後段比較沉重,亦是小弟多年來想講想做的東西,前半段少甜就當我厄你入黎睇吧。。。哈哈。

歡迎留言!
其實更重要係,SHARE比其他人!
例如身邊0既同學/師奶/朋友!
我發現連我身邊真實朋友,都唔睇BLOG的。。。只會去睇雞精文金句式財經書。
不如介紹多個平行世界比佢地丫!

是日無圖!最頂兩幅,心神意會吧。

63 則留言:

  1. 難得皮老闆講咁多心路歷程, 讚!

    回覆刪除
  2. 皮老闆,小弟要對號入座了!
    //我自己輸左都重要出文咁ON99,你見有邊個輸左會出文?
    小弟最鍾意輸左出文,因為成日輸,大把題材。琴日同前日又衝左入去!
    皮老闆,你不會寂寞的!艇要一齊坐先開心的!共坐之!

    //若然他日大家老去,六七十歲,同坐一起細說當年,會否係因為閣下非常有眼光,買左當時極其渴市而年輕人買唔到0既物業致小富,講出黎會否面紅耳赤?怕唔怕隔離經過一個五十幾歲剛供完物業已無剩錢0既男人過來打你?
    不會面紅耳赤,因為都係會同隔離個阿伯一樣剛剛供完。我地會一齊望住一早上岸的風兄同70兄相擁痛哭... 然後高呼終於供完,並一齊去等食茶記下午茶... 哈哈!(苦笑...)

    回覆刪除
    回覆
    1. 你真係識講笑.

      不過而家市況, 二十年後邊個可以笑到最後, 真係好難講.
      相信開始有人感覺到架喇, 我又唔會先落井下石笑9佢地咁衰....

      刪除
  3. 我睇晒~��
    皮老闆既思考方法好Gamifaction wo.
    想問下點解每次Highlight 既color 都好似唔一樣??

    回覆刪除
    回覆
    1. 人生如遊戲啊.

      HIGHLIGHT 有時隨機,有時分類, 我都係隨心.

      刪除
  4. 謝謝皮老闆,奇兵突出,人生如打機一樣,最緊要好玩。

    回覆刪除
    回覆
    1. 係, 日復日重覆而致勝, 贏左都已經老了...

      刪除
  5. 請問你閱讀那位前輩嘅文章學期權㗎呢?謝謝

    回覆刪除
  6. 雖然追開你Blog都大致知你經歷,難得有系統地總結出來,支持!

    回覆刪除
    回覆
    1. 謝謝支持,我在追看你債券心得呢。

      刪除
  7. 後段雖然沉重,卻道出了今時今日香港年青人的苦況,實在可圈可點。

    生於香港,而不甘於被迫跟玩這個遊戲,在旁人看起來彷彿就是註定失敗一樣。即使成功,也會被看成是僥幸,反而投機致勝的才是叻仔,真令唏噓不已。

    小弟玩這遊戲七年餘,已感到厭倦。面對著一個根本不給年青人機會的地方,除了自保,或許只能選擇離開。

    說我敗走也可、說我嫌錢腥也可,是但啦。

    回覆刪除
    回覆
    1. “搵夠就走”
      我身邊好多黃絲朋友,講得出做不到。
      但你成功了!!!

      刪除
  8. 讀物理治療呢點大家睇開都估到。我識兩個讀埋上PhD,一個做Ass. Prof., 另一個自己開中心。穩穩陣陣的典型中產呢(不過當然困身同好大精神壓力)。

    會週圍睇人寫嘢就係想睇啲自己無接觸到,甚至諗都無諗過的生活模式。死慳首期借盡佢,然後樓一樓二樓三等供滿大概是本埠財自SOP。我同你差唔多年代畢業,一出黎就見到樓價跌七成,隔日就有燒碳新聞。所以而家理解唔到點解啲人對所謂「剛需」咁有信心,覺得自己一定供得起。或者咁講,我成日覺得將你一切title/專業拎走晒佢,你仲翻到身先算有安全感。

    又,香港年輕人大部份往上流的路都斷晒,連政府CA/ACO 都變成絕世好工實在令人有啲難過。

    回覆刪除
    回覆
    1. 如是同科,無幾多個做到/做番prof.
      好有機會係同我同屆。

      刪除
  9. 之前斷斷續續聽你講好多次,今次完整順序講,真係造福世人。人生好多條路,無話邊條最好,揀到一條適合自己,自己過得開心,心滿意足了。

    回覆刪除
  10. 一個行自己條路既人跌跌撞撞高低起伏過關重重既先會知咩叫今生無悔,不枉此生喔
    一個人云亦云既綿羊十下十下咁沿住條無間道咩咩咁行咪叫做香港人既一生囉~~

    回覆刪除
    回覆
    1. 行自己0既路, 仆街也開心.

      行別人0既路...

      刪除
  11. 我係護士, 做左4年
    好好彩睇到你個 Blog, 學識左財自個 concept
    我希望能係30歲前有5mil同娶個靚老婆

    回覆刪除
    回覆
    1. 男護高收入! 好快可以搵夠唔撈了~~~

      刪除
    2. 同你本科一樣姐

      不過靚老婆呢個goal就難.

      刪除
    3. 換下換下女朋友, 總有D靚0既!

      刪除
  12. 皮老闆~ 真情剖白, 一定要留番條腳毛係度~
    希望我到你咁的年紀都可以剖白一下, 回顧下自己走過的路~

    回覆刪除
    回覆
    1. 寫下寫下, 人就會老. 哈哈...
      千其唔好比海嘯淹沒啊~

      刪除
  13. 人生不按常理出牌~就算最唔到最大的贏家,起碼自己也有hyper過,感受特別深刻。

    有些人到臨終時,才發覺自己一生往未瘋狂過,真是很可惜呢!

    回覆刪除
    回覆
    1. 是的, 最怕到老個陣, 先黎講:"如果...."
      CHERRY 兄走的,也是與別不同的路, 所以投資人也與別人不同呢.

      刪除
  14. 皮老闆真誠分享過去,一定留個名先
    非常同意人生如戲,只希望老左之後回望番自己
    做到不枉此生就好

    回覆刪除
    回覆
    1. 對, 相信一生三宅並不會令自己不枉此生.

      刪除
  15. 我開始明白, 原來皮老闆不按章法出牌係由打機開始煉成

    回覆刪除
  16. 很真誠, 仲來投資人都會有輸既時候, 分享失敗經驗可以提醒讀者小心...

    回覆刪除
    回覆
    1. 蝕緊0者, 唔駛無心機....
      升升跌跌好正常.

      刪除
  17. 公司 IT filter 左上唔倒 BK... 可惜可惜

    回覆刪除
    回覆
    1. 番屋企睇也可以, 佢一更新我就會係FB 放LINK.

      刪除
  18. 大家行出條路不盡相同,但又有好多共通點,所以都幾有共鳴。

    回覆刪除
    回覆
    1. 大家當年個TRAINING 一樣...
      見D同學都件件想法差唔多呢.

      刪除
    2. 我都係唔中意跟大隊行,個個friend都係上晒腦,開口就係講樓,半世人都跟貼羊群,腦麻痺,人生目標就係買樓收租,問要等到幾時先有cash flow,基本上全部人都冇諗......結果每次都係人地覺得我葡萄,我就十足對牛彈琴,冇人話佢on9就以為自己好_勁。

      刪除
    3. "人地覺得我葡萄" 同感, 又放長雙眼睇下點...

      刪除
  19. 多謝無私分享!
    行文風趣幽默搞笑 ,讀你嘅文章就好大得著,多謝.

    回覆刪除
    回覆
    1. 謝謝支持

      其實都係口水文, 講黎講去都係個D.

      刪除
  20. 多謝皮兄的分享,睇完3000字,諗起張家輝: 唔想熄燈的時候連一件值得記起的事都冇。 日覆日,年覆年,一直做緊一份自己唔喜歡的工作,睇完呢篇文,不至於即刻祼辭, 卻帶給我一點勇氣。

    回覆刪除
    回覆
    1. 係架, 當而家每星期都接下放學, 帶下佢地出街食飯回家做功課.

      過左小學呢幾年就無, 唔通中學去接佢放學咩!? 會比同學笑架...

      刪除
  21. 如果我要講晒自己的經歷, 當然不似70兄這樣精彩, 但應該也是大多數香港人不會見識過的, 不過我同時間唔想講太多私人野, 到有mood時一d一d講出來都ok.

    回覆刪除
    回覆
    1. 支持,應該內含大量阿拉伯美女,很期待!

      刪除
  22. 佩服有走自己路既勇氣
    仲係要專科都放棄

    回覆刪除
    回覆
    1. 外人係咁諗.

      本科同學覺得係異類係ON9....

      十幾年後, 真係唔知邊個ON9...

      刪除
  23. 這才是真正自己人生自己揀!犀利,皮老闆,連韓國人都嚟支持,佩服

    回覆刪除
    回覆
    1. 樓上果位韓妹係廣告黎....哈哈.
      已刪除.
      近排少上BLOG, 要追番你瑞士之行個篇先~

      刪除
  24. Dear Sir
    I think....I really think that I ought to have played a small part in your "road to lose in Stock option trading".

    回覆刪除
    回覆
    1. YES. ABSOULTELY!
      都唔係SMALL PART, 當年見你做得咁爽, 我又跟你一齊做...

      結果我中左匯豐, 你中左中移, 傷心事不要提吧.

      刪除
  25. 一直追皮老闆POST,最深印象係走小路找黃金個幾張圖

    回覆刪除
    回覆
    1. 果幾幅圖真係好正, 不過我都係抄人的. 哈哈哈~~~

      刪除
  26. 皮老闆POST 以經約七年,激勵小弟不少。年輕人要搵呢個年代向上游的方法,同以前一輩人,用樓撘火箭唔同。 努力唔一定有成果。但起碼無悔,得閒就要飲啖皮老闆用筆墨調製既雞湯。哈哈

    回覆刪除
    回覆
    1. 感謝長期支持. 七年前應寫緊期權.
      唔行樓呢條路, 可能最後乜都無

      不過又係咪真係乜都無呢? 最後先知了.

      刪除
  27. 條條大路通前路,多謝皮老闆。

    回覆刪除

各位每個留言,係我繼續9UP動力,必覆。

Related Posts Plugin for WordPress, Blogger...