小弟在DISCUSS 並無出文
你回應緊0既,都係一個有心引你派膠0既人,並非小弟。
若有人以為我係DISCUSS 出文引HATER, 是否太小學雞?
小朋友, 暑期放完好耐了. 好好努力上班吧...

2018年12月22日 星期六

我也談談 買唔買樓好

近日得閒左好多,又開始放假啦,結果可以慢慢清文。

呢幾日都係鋪頭無所事事地渡過,好應該UPDATE下呢邊。

其實,要寫既文章真係有太多,我已經用GOOGLE NOTE一一記低,係呢個聖誕假可以慢慢打。

今日女主人有事煩,佢心情唔靚我都幾擔心,因為我同佢兩邊小生意盡量都唔干涉,所以我都無問太多。叫佢食番回頭草,佢話寧願執左佢!做小生意好處就係咁,想點就點,不用為五斗米折腰。

小弟生意仔,進入倒數階段,最後半年我就會退休了!

小生意的壞處?就係今日唔知聽日事,無得月月出糧,當然心態上好唔同。至少,我地唔會走去計每月收入同支出,就女主人而言,一時可以好好,一時又可以好差。佢今次出事係技術性問題,一係有得做,一係無得做。(當然,一定解決到,只是完美與否吧)

向好處看吧!

若我現在生意仔出了問題,我應該不會理會,等它慢慢死去吧!

所以,係九年前,我倆已經不喜歡太死板的路,尤其理財方面,希望維持高流動性。又因我倆生意唔大,但平均搵錢又多過一般打工仔,雖則不是三更窮五更富,不過流動性同埋隨時可以轉身,比一切重要。再者,小弟行兼業恐怕有年齡限制,盡快搵夠走人比較理想。

買唔買樓自住好,其實因應個人情況多於一切別人意見,投資則是另一故事!我的情況又同大部份人不同,資產雖然唔多,不過總算做到所謂租務自由。何謂租務自由?係自己個區想租邊度都OK,搬屋搵人攪吧!搬屋其實唔算太麻煩,當做大掃除而已,未搬過屋/不懂有效搬屋的人才會有這種感覺吧?加租?既然錢可以解決,為何一定要搬???


大量未試過在租金上升期租樓的人,他們或許只看到壞處!動之以錢,什麼幫人供樓云云;此路不通的話,動之以情,搬屋很煩。

對我來說,租金持續上升,同去電腦場買條RAM一樣,這個時期若價格上升,付錢便解決。

若然有一日生意失敗投資失敗,或股息不足以交租食飯,可以選擇搬到小一點的單位,再由日常開支著手。我現在的情況,未必人人相同,於我而言,進可攻退可守。一邊收股息債息等樓跌又可以,即使樓價一路升到上太空,我也不會太SUFFER(總有一半人以上比我更糟吧?),再者我又隨時可以拔營離開香港。。。

WHATSAPP GROUP中有人問及是否安全感不足?非也,只是大家價值不同玩法不同,以及生命所追求的不一樣吧。

此篇靈感來自90後BLOGGER TAMINV,以及小弟WHATSAPP GROUP中一些對話,年輕的不買,以及有點資產的不買,總有個原因。

你在想投資,我們在想生活,完全是不同世界呢。

20 則留言:

  1. 訓唔著,居然沙發了!
    投資取向決定,從來是個人選擇。甲之熊掌,乙之砒霜。儲好財商,那裡都能找到有一片天。
    BTW, 一起身,美股皇阿瑪AMZN又跌6%。幾個月前仲晌天堂,笑中國步熊,今天同告泥潭爭扎。世事難料也!
    順祝聖誕快樂!

    回覆刪除
    回覆
    1. 聖誕快樂。
      捱過最沉重的才會還以顏色,我見有人分段入貨了。

      刪除
  2. 好處看是 Brown 而壞處看是 Choco...? :D

    同意現在買樓就是買「安全感」而已... 當然安全感可以很值錢...

    回覆刪除
  3. 租屋真的問題不大;唯一不好是我無得玩裝修設計,手痕痕,用唔盡每一間屋特點及空間,我視為wastage!

    回覆刪除
    回覆
    1. 你住開大屋。。。
      裝修設計不了,打下機算吧。
      幾時再直播?

      刪除
  4. 買或不買樓相信是一個人人也會找到好或不好的命題!哈哈~

    回覆刪除
  5. //投資取向決定,從來是個人選擇。//
    非常認同呢!

    回覆刪除
  6. 將安全感繫在買樓上,是香港獨有的現象吧。
    //若然有一日生意失敗投資失敗,或股息不足以交租食飯,可以選擇搬到小一點的單位,再由日常開支著手。//
    皮老闆的資產已有很多Buffer,這種情況不會出現吧。

    回覆刪除
  7. 皮老闆聖誕快樂呀 ^▽^

    魚兒妹

    回覆刪除
  8. 回覆
    1. 無落腳點呢。
      等呢一天真係出現先算吧。

      刪除
  9. 「租樓日日蝕,一定要買樓」呢個應該係由我地呢代(70尾/80頭)開始先有的概念。雖然自己唔喜歡,但買樓當投資呢點我又唔會完全反對,始終有demand 有supply,無人投資的話,想租都好難租呢。

    未上車,但因為各式理由要搏盡上車呢個就應該反對的。今時今日買樓,就算自住都有好大部份的理由係投資,而任何單一投資佔身家咁大比例都應該反對。我唔理解啲人一方面話搬屋好煩,但另一方面又話死都要上左車先,等第日可以換樓,佢地唔覺得呢啲論點自相矛盾嗎?

    打打下先諗起。大家想法不同,是因為身處的位置不同。

    當一個家庭收入只有五萬(已經高過中位數好多),每個月又要用兩萬租樓時租金就佔收入四成。正常人都會諗點樣減低呢筆支出,而「唔好租,自己供」就變成其中一個解脫的魔咒。再加上朋輩壓力及過去幾十年的「民間智慧」,就出現左呢種點都要上到車的現像。

    弔詭的是,要打破這供樓脫貧魔咒的方法就是要脫貧(在這話題上,貧窮是相對的。真正貧窮那些根本不用考慮這問題)。租金佔收入四成會令你很痛苦,但如果租金只佔收入的零頭,你就會覺得這是一種消費。當問題不太切身,我們才能站遠一點好好考慮買樓是否一個好的投資。如果經過這一層的思考,無論買或不買都算是有令人信服的理由呢。

    回覆刪除
    回覆
    1. 非常到位呢。
      所以我常說,我並不是SUFFER的人,只是覺得收入不高不低的,卻勉強用盡力去上一些質素極差的物業,卻當了是一個安樂窩。
      三十歲,兩人收入共五萬,應該不值得住在大西北三十年樓齡,只有不300呎實用的單位內吧?
      董標金句:不勞而獲無道理﹐勞而不獲無天理。

      所以我才不屑收租仔所為。

      刪除

各位每個留言,係我繼續9UP動力,必覆。

Related Posts Plugin for WordPress, Blogger...