小弟在DISCUSS 並無出文
你回應緊0既,都係一個有心引你派膠0既人,並非小弟。
若有人以為我係DISCUSS 出文引HATER, 是否太小學雞?
小朋友, 暑期放完好耐了. 好好努力上班吧...

2018年12月29日 星期六

當年老豆教落...

本來想講下今個月嘅兩次深圳遊記(女主人開始替我更新FACEBOOK專頁,都係飲飲食食吧!)

為免個blog變咗窮L遊記(我同我老婆呢排成日睇0既YOUTUBE CHANNEL),都係講下第二啲!

其實好多題材都已經定好咗,不過硬係的唔起心肝去寫。

**********

小弟有個乜七都唔叻嘅老豆(無錯,我唔係算憎佢,只係覺得佢太廢。),喺我好細個嗰陣講過以下兩個觀點:

可能要講下佢背景,佢算係建築業入面,唔駛學歷,只要學師,要落地盤但又唔算要太多體力勞動0既工種。係澳門讀過下名校,讀到中二三就比人踢走左,肯定係操行問題。對住我個目不識丁0既阿媽,當然會有一種佢係知識分0既感覺。

一如維園讀新聞當真0既阿伯,佢講既野,又可以幾格物明德?

幾時講過?應該都有廿幾三十年。。。因為我應該上左中學已同佢無計傾。希望我自己小朋友唔會咁啦。

1)學好日文第日打工好有用

我估當年應該係198X年,日本經濟應該勁好。。。識日文可能可以做日資公司吧?可惜當年只係好想有一部任天堂紅白機同埋龍珠閃卡,從來無諗過去學日文(現在的我,反而想學下俄文泰文,不過以小弟語言天份,都係算吧啦。)

而家?學日文直頭係潮流啦,可以去旅行用!真係識日文0既,我生活中只認識兩位。其中一位係大學個陣學,現在工作根本從不相關。另一位?應該係大學畢業後學,現在生活?唔掂。。。

勉強叫做炒旦期間識得另一位,應該佢程度係可以教人,不過當年都係同我一齊炒埋D爛旦。

昔日強國日本,今日爛船都有三根釘!只不過,若然果陣起步去融合,現在只會愛得太遲,光陰錯配。

2)做白領好過做藍領(揸筆搵食好)

我唔否認可能佢番工辛苦,所以覺得做文職好。而家又點?我唔知而前做個船務文員,或者做間TRADING0既文員有幾高人工,同埋以前勞動力可能真係唔係咁值錢。

而家做地盤應該高人工過文員仔好多!一個係體力勞動,一個係腦力+光陰勞動,橙同蘋果好難比。若只比人工,文員仔真係唔得。

唔用地盤,用跟車?或者用一技之0既藍領,例如整水電工。。。應該都好過一般文職。再者,能創業機會更高。

原因?因為大家都想舒舒服服有人照呼,加上家事常識低,簡單如度下屋企有幾大,都可以假手於人,尤其係大多小弟一輩0既中年港豬,真係拎條頸出黎比人宰的。

點解我會咁記得?我都幾肯定佢同我講過好多次!當然呢D就係講道理,教緊仔。好彩我當年好早已經同佢無乜兩句,否則我而家唔會咁隨心所欲。

時移世易,咁而家呢啲觀點種啱唔啱呢?

易地而處,今日望住個幾歲0既仔,同佢講做乜最好,係咪真係有效?倒不如教佢做個好人,做事隨心而行,不要隨波逐流更好吧!(就如小弟吹水WHATSAPP GROUP所講:應該一堆讀書唔叻0既港媽會衝出黎,話佢開心就得,但另一邊就會去讀名校,谷考試,十八般武藝,晒自己FB。。。)

兩姐弟又打街機,下星期考試又有咩好驚?

當然,講就易,做就難。尤其係資訊不平衡但極流通0既香港,所謂:

"你不愛競爭?但競爭會找上你!"

知易行難!既然父母都做唔到,首要應該唔好迫仔女去做,父母自己真正自由,贖番自己條命,咁先有資格講。係咪?

好多人既指指點點,社會上太多0既聲音同意見,係咪真係有用?寫出自己意見0既人,係咪真係咁把炮?

有幾多人,真係可以隨心而行?還是只希望有一大堆守護0既理由,而留在大家所謂0既NORM?父母自己都做唔到,又點去以身作則教仔女去追夢?

************

或許女主人對退休唔撈有一點點憂慮,但個人認為,這應該是一個䦒始,而非終結!雖然我淡淡說句,最多咪慳D駛,其實我真係打算有咩事,就慳D駛,絕無任何後著。

難得取回選擇權,將一切學歷,職場優勢RESET一次,去體驗一D大部份人都唔會經歷0既階段,此刻應無價。也希望子女大過左也會明白,人生非單程路,只要想得出,就有機會走得到。

28 則留言:

  1. 外地好多四十左右退休既例子,同意呢個係開始(老闆打錯字,唔係䦒始),先預早恭喜!

    回覆刪除
    回覆
    1. 係,不過佢地生活指數無咁高呢。
      香港既例子,好多都係口講退休,但又繼續搵錢。

      刪除
  2. //父母自己都做唔到,又點去以身作則教仔女去追夢?
    小弟絕對同意。一個家庭向上流的重點是父母自己長進‼ 如果有些微財務知識都知,自己現時長進的PV,比廿年後阿囝打生打死,讀埋碩士博士畢業後,再用多十年領悟如何創造價值後,創造出的FV高出極多。萬一阿囝領悟唔到,就要阿孫果代才能上流。但屆時已是大富翁遊戲N.0了。。。

    回覆刪除
    回覆
    1. Yes. 搏命催谷仔女,不如先問下自己能否靠現在努力扭轉命運。
      而非日復日勞動以支付生活支出,咁就當係養育。

      自己都未做到,又如何要迫子女成龍?

      刪除
  3. 教佢唔好complacent就得,大咗就自然搵到自己興趣!

    回覆刪除
  4. 「倒不如教佢做個好人,做事隨心而行,不要隨波逐流更好吧!」完全同意!
    自己攪得掂,等小朋友將來多啲選擇仲好!如果識咁諗,小朋友都唔會差得去邊。
    最難係要抵受得住周圍嘅目光,亦係一種做父母嘅能耐。

    回覆刪除
    回覆
    1. Yes. 香港地最難攪係人地目光。
      隨心而行往往最難,因為無指引,沒有地圖的旅行是最難走的。

      刪除
    2. //沒有地圖的旅行是最難走的。

      呢句講得好, 但做 research 自己研究條路應該點行, 墥咗板之後點樣糾正, 都係樂趣來的.

      刪除
    3. 又,好多時候感情戰勝logic,點研究都無用。
      想去就去馬,是另一種奢侈。

      刪除
  5. 以前聽唔少叫你讀好d書,做個白領,文員呀,藍領會捱死一世,俾人睇死呀,依家再冇人咁講了
    我d魚毛都可以唔撈,你又有乜好驚??
    兩公婆更加可以體驗,冇限既可能

    回覆刪除
    回覆
    1. 白領定義同人工range 都闊左好多。
      社會上唔識字既人好少,但無技能無天份既人大把。

      刪除
    2. //無技能

      好似大蕃薯叔叔咁, 出嚟做嘢咁多年, 就連簡單Excel好似sorting, filtering 都唔識, 咁呢種「無技能」真係佢自己的問題了.

      刪除
    3. 咁個人本身爭緊d, 去做咩工都會爭緊d.
      大蕃薯我唔知佢點差,佢彩佢係你同事,不是我伙記。萬幸。

      刪除
  6. 香港嘅家長最叻一邊口講傳統教育點唔好點唔好,自己又點樣唔會俾壓力仔女;另一邊就週圍問人邊間名校好,點樣可以入到去。精神分裂至此,俾佢地笑死。
    至於扮哂嘢教你做白領好過做藍領、學日文有助前途之類,通常就係在社會上撈到最霉嗰班。即係投資成績最差嗰個,教你點投資,又係笑話。

    回覆刪除
    回覆
    1. 是的。
      尤其小弟fb, 不少過左三十先生小朋友,港媽一堆。
      雖無過犯,但回想佢地本身都唔叻,卻不輪大小事盛讚個小朋友是有xx天份,其實直正戰場在十多年後呢。
      一入反叛期,誰也控制不了。
      一入青春期,天才爆發誰也戰不勝。

      刪除
  7. 倒不如教佢做個好人,做事隨心而行,不要隨波逐流更好吧!
    正!老闆句句金句!
    的確,小弟如一般人一樣,只贖回自己人生,已有點吃力,另外很對,父母做不到的,不要奇望仔女去做。
    而到小朋友大時,希望有能力讓他們自己追夢吧!

    回覆刪除
    回覆
    1. 太過獎了。
      贖回人生最要緊。
      不能全數贖回,也不要被金錢及物質太操控。
      最便宜的快樂,是最奢侈的。

      刪除
  8. 我細個又係有人一味叫我讀好啲書,讀唔成書要辛苦一世,不過嗰個係我阿媽。我亦都好聽話咁讀書,不過學你話齋,去到反叛期,誰也控制不了,結果成績都係普普通通。

    我老豆就成日話打工冇發達,一定要做生意。但佢自己做做下生意又掛住炒股票,結果兩邊都係輸到一棟都冇。

    好彩大個咗發現,讀書叻其實同生活好唔好關係一不大,同尋找人生意義更加可能係負關係。最緊要都係搵到一條啱自己的路,享受平淡是福。

    回覆刪除
    回覆
    1. 你長輩乃真冰火交融...
      我又爆番WHATSAPP GROUP 金句
      ***
      讀到書:發現讀書不是怎麼一回事
      搵到錢:發現錢不是怎麼一回事
      溝到女:發現有條女不是怎麼一回事
      ***

      重點係, 人生不停追ACHIEVEMENT, 亦同時放低(不是放棄)另一D野.
      有人執迷, 有人看得開.
      人生意義好個人...

      刪除
  9. 2019年應該係70s兄人生中挺有意義的一年, 可以真正踏出自由的一步, 踏入4張.

    祝新一年事事順利呢.

    回覆刪除
  10. 我今年18歲咋!
    不過財自就已經洗濕左個頭, 番唔到轉頭架喇...

    回覆刪除
  11. 請問仲可唔可以加入皮老闆嘅WhatsApp group ?

    回覆刪除

各位每個留言,係我繼續9UP動力,必覆。

Related Posts Plugin for WordPress, Blogger...