以下是本網誌一系列文章

心態決定境界:多是講人,用以投射一般膠人膠事,免各位中人生誤區。

我可以唔撈嗎:純粹以時間倒數紀錄自身情況,現在回看,得啖笑。

我的財富大道:被我太太喻為三幅被,不停重覆,多為資產與時間描述,亦有提及我的工作/生意如何煉成。

我的實習時代:就係小弟大學修物理治療時實習經歷

2019年6月17日 星期一

虛擬與現實世界的我 心態決定境界26

一晚出左兩篇,上一篇講出水豆,要CLICK入去才看到。

難得今日同女主人一齊收工,坐的士順手車埋佢(平時分開坐,浪費金錢呢!)

有唔少野,係屋企時好少講,一黎唔想長輩知(錢銀又好,人生去向也好),二黎又唔想會搭咀0既小朋友八卦。(若小朋友想了解多D爸爸,到我死左,睇我個BLOG就知了。)

小弟的父親節禮物!
(阿囡越黎越靚,開始有種仙氣。。。)

的士上,好多時會講下自己野,老婆話,講錢怕的士佬老笠(哈!)

近日遊行反惡法一事,我支持年輕人去追自己想要的東西,背後會否有大人/人大陰謀,我就唔知了。

這不是重點,而是多得whatsapp吹水group一眾谷友都好克制,至少都好比面小弟,無乜亂子出現,罵戰當然無,連post link迫人睇都唔多。

這也不是重點(不要打頭),我同太太講,在虛擬世界裏,大家都好客氣好比面,現實生活裏,大家都以為我on9的(或者咁講,驚死我害佢/覺得我吹水)。箇中原因,女主人一矢中的:

"佢地唔知你做d乜,咪覺得你好似好勁law!現實生活d人會覺得:車,你好巴閉咩?!"

所以,佢再一次千叮萬囑,要我繼續保持神秘感(哈)!同樣地,我一向都話我0既小生意係一d好低微好不值一提,一d都無謙虛成份

不過,blog文中的事情的確真實,收入是真的,資產是真的,唔駛受氣也是真的,非常想點就點也是真的!最引以為傲的,是我不吸年青一輩錢,全是上一輩港人資金貢獻上。

好比水電工一樣,你唔整?你識唔識整丫?shut up and give the money 啦!

另,我唔會(亦無需要)特別提我公屋出身,父母親基層,仲加個廢柴爛賭父親,憑著自己點努力點奮鬥達到今日財自!咪玩啦。如果我要厄人,話我係神秘ANGEL FUND 咪得LAW!係咪?(上到鏡頭,支支吾吾扮專家攪掂啦!)


現實世界,有冇人信我D屎橋最後掂左?梗係有啦!我老婆咪係其一,當然仲有舊同學,講得出來,有時雖然ON9無道理,但這些奇兵方法,正常人只有保守正常思維,又點會比到你?

若然你網上睇到我,覺得我好攪笑又另類,恭喜你,你搵到一片ON9新大陸,錢就唔會多左,不過人生不只一條路,講都講到我口爛了。(記得BOOKMARK啊!)

相反,現實生活中,常被人誤解,年紀越大0既,佢地個框框越細,越比人當你老點!

上星期本熊兄福䘵壽兄及一眾吹水谷一圍十一人的聚會,食左餐飯,其實席間我都係好怕講錯野,如有無心得罪,你就當係我細路仔/傻仔吧。(當天細節,我唔記得哂啦,過程可以另文再述)

女主人又再次講得好好:財自後,唔應該搵疏遠了的舊朋友,應該去識D新朋友。

人生另一階段,不用再抱殘守缺,既然以前你睇唔透我+我又點唔明你,不如今生就此作罷。

****

最後,先不論小生意係咪真係咁低下,我對我自已就有以下意見:

要估一個壞人幾時做壞事係好易,要估佢幾時做好事就極難;同樣,要估明哥幾時派飯好易,要估葉繼歡幾時會扶阿婆過馬路就好難!

結果,往績唔好0既(以訛傳訛也可以,並非真實往績,真實世界中有人鐘意安安份份,請你別另類,OK?),或者好似我咁有個句就講出0既,一定比人定左型。

講多次,"要估一個壞人幾時做壞事係好易,要估佢幾時做好事就極難"

政局有時也如是;股市有時也如是。

出水豆!忙過番工! 我可以唔撈嗎50

我成日想更新呢度架。。。

話說五月中,我個女出水豆!

家中未出過0既人:女主人、阿仔

家中出過0既人:工人、外母(佢偶爾過來)

我?我印象中無出過,但唯人可以知我出過未0既阿媽已經不在人世,無得問要等報夢,我老豆係廢0既,不提也罷。

為免大家中招,阿女被隔離在房兩星期。

到佢好番,就到女主人中水豆。。。佢自我隔離,我?訓廳!就係咁,一直提唔起勁出文,今天只能作個生活UPDATE。

而BLOG文都偏向講生活多,始終現時無乜新資金再投入,同埋一動不如一靜吧。

****

一日作息,可以好忙,亦可以好得閒,今個星期已經試過一連四日無番工,其中一日屋企打機,仲攰過番工呢!哈哈!!

打乜?打呢個。。。

唔好笑我低能,呢套卡通片其實好有意思,比海綿寶寶更神。
講好多人生,包括愛情0既取捨,友情0既偉大!
仲要係成人角度睇,非單單小朋友角度喎!

而個女已考完試(趕得切係考試前好番),我又唔駛跟佢功課同溫書。。。

過埋今日, 仲有三日要工作, 過多四日我就唔做了。

月底交還鋪位及機器,正式同畢業後唔夠一年就開始0既炒旦工作說再見。咁就做左十幾年,有冇唔捨得?只有少少,因為心情早就收拾好了。反正炒旦這一行,鐘意可以做返(但收入得番1成都無),不過我唔會再做就是。

當初諗住做十年就會變老左,就做唔到,而家十九幾年,乜都賺左。我太太識我時都講過,估唔到彊越老越辣,後期越做感覺越輕鬆。

放棄工作值得否?若然可以早D體會別人體會唔到0既野,已經唔係用錢可以量度。再者,從來我都係獨斷獨行,如果唔係會溝女,相信現在我只是一個平日收工ON99,一個人去吉野家打邊壚0既中坑。

我唔鐘意即興,所以退休計劃早有部署,寫BLOG/VLOG其一二,減肥/湊小朋友其三四。至於其他事情,要等埋太太退出,先陪佢去做吧。

家本位之下,好多人卦住番工/打著要番工旗號,忽略身邊太多人和事/個人理想,基本生活是緊要,但再多錢的生活於我無用,若然到我80歲打回原形一窮二白,我都會選擇現在退休。

AV男優VS財自老獨L,你會點揀?

班老野叫你努力D累積財富,其實幾好笑,佢地年華已去,無得揀,唯有迫你揀同佢一樣0既路。一個無青春0既人叫你放棄青春換金錢,乖乖走所有老人走過(走錯)0既路,新時代0既你,會否太蠢?

2019年5月30日 星期四

檢視投資槓桿 我的香港務自由路(二)

皮老闆
香港人
無自住樓, 亦無收租樓
有著不一樣的價值觀
四十歲前財自, 唔搵錢, 做自己事!
(其實我都係公屋仔、無父蔭,不過我唔鐘意咁形容自己LAW...)

上面寫得幾巴閉....

事先講明

1 我投資唔叻
2 我交際都唔叻
3 唔高大唔靚仔
4 個人又懶又求其

如果你自問勁過我,請移玉步。

這個系列,希望有同道中人睇到,互相交流,亦希望後來者可以作前車之鑑。

我唔係認屎認屁,幾無料我自知,不過對於從未接觸過準備財自的朋友,應該總有點用處。

上一篇:時間的覺悟,我想帶出,能否提早財自,是自己慢慢意會到的。既然有可能,就要去準備。

我自己ON9唔買樓,否則做收租仔我應該更快可以唔撈(賣哂升值樓便可以,簡單易明),又正正我唔買樓,要財自難度都算高,如果你已經有物業,無可能做唔到,係咪?

至於投資,其實我主要都係靠一隻港股收息,內銀建設銀行。呢兩三年都提供超過60萬一年年息比我,即每月有50000港元可以用。

同時,買入六支不同月份派息,每半年派一次息0既垃圾級別債券,可惜行文之時,有一隻被提早贖回,另外有一隻違左約唔派息,可真屋漏兼逢連夜雨。

其次,我亦持有ETN/優先股,大約每息派息一次,可恨HSEA HSEB已被回,現只有C PRN 、SSW PRH及DKT 收少少利息。

最後,亦有少量月月派息的GOF(一隻CLOSE END MANAGEMENT FUND)收下息。

除此之外,持有金ETF(GLD)

最令人頭痛的,就是上年六月高位買入三球港股,以及按錯制無理0既美股ATVI,若當時沒有買入,現在資金調動應該更加輕鬆。

將上面收既息加埋,平均每月都有幾萬蚊,未到十萬(已扣利息開支),算多定少?肯定比我最初想像中少。

不過,我只係用左唔多槓桿去做。

即使跌市,資產少左,槓桿計埋都只係去到1.54

點樣係IB 睇槓桿比率?係TWS入面,按ACCOUNT,入面有得睇。如果搵唔到,係AVAILABLE FOR TRADING 右邊有個+號,可以係果度TICK番"LEVERAGE"出黎!

咁就會SHOW 到個LEVERAGE!



如果將槓桿比加到去2,買一D固定收息產品,咁就基本上可以完全應付生活有突。只是想暫時保留彈性(蝕左太多係港股同ATVI了,怕怕)

最後,仲有小量零用來自GLD,939的股票期權。每月零至幾千不等,九牛一毛,貪玩過日晨而已。

當身家跌番番兩年前水平,有咩感覺?除左平常心去面對,其實佢又唔影響生活,同時,加埋女主人個份,已經非常充裕了!

最後,係我個垃圾財自EXCEL度,入多一皮野家用比老婆(其實佢都有收息零用的),發覺剛好用哂我一年股息收入。哈哈哈~~~ 1.54槓桿已經夠食呢。

最後,賣個廣告,以下乃小弟語音導航吹水頻道,希望最後能夠做到互補長短。但首要我想要過1000個訂閱者。能否訂閱一下小弟頻道??


你無睇錯,我太太終於登場了!(雖然只得一句)

JUPAS揀物理治療定追夢? 
四十歲前財務自由只是BONUS 
DSE考生入看! 入唔到MEDIC 唔一定要入PHYSIO! 
今集回理工大學圖書館砌GUNDAM MK II EXTRA FINISH VERSION! 

2019年5月27日 星期一

逃避現實,打機砌模 我可以唔撈嗎49

近這個月跌市,其實我只係每朝早起身睇一次。

有冇咩感覺,梗係唔高興啦,個300萬 倉由負42萬,去到負番100萬。。。



一球喎,我要儲一年呀!

不過,真係佢有佢跌市,我有我忙碌。我只係早兩日買左少少盈富,叫做撈下,九牛一毛。再跌? 又買多少少。


建行同人仔都跌,似乎今年收港紙息應無上年咁多。

建行跌,令按倉值減少。不過,要買到去2倍槓桿,仲有500至800萬左右可以買。

上個星期,開始搬番鋪頭d高達番屋企,同佢地洗白白。由我最鐘意個d 開始,有機會拍條片介紹下(又係無人睇的自high 片)。

今日,我番去去polyu library ,多謝吹水group 某熱心朋友借我locker 一年,否則我要搵學生哥幫手。。。

今日砌左隻 Gundam  MK II 劇場限定版。



制作過程? 我將會縮時放上我 YOUTUBE 頻道,訂閱左一更新就會有通知架喇!

如果你未睇過,介紹下你睇我0既新片

未夠四十退休悶唔悶? 瘋狂去旅行? 戲院睇早場? 做義工/做兼職? 日日自然醒? NONONO! 喂,你試過財自未?我未財自已經日日自然醒!

女主人陪我睇哂新倚天屠龍記,睇到後期佢好憎張無忌,話佢拖泥帶水。哈哈。。。難得張公子天生樣好,收下女兵好正常。(呢d 我無份啦)

趙敏係幾靚!四位都好明顯唔同樣,唔知點解港人係要話人整容樣。(有邊個唔整?)

高達世界,MK II 個駕駛員,阿嘉美尤咪係呢類,咁多個主角,我最鐘意佢。到最後佢癲左,都有青梅竹馬女友陪伴,你話幾咁正。(我以前寫過一篇 男人都想做一個嘉美尤


劇場版入面,個結局改左,最後一戰花園麗,即佢女友,走左去叫醒佢,佢無癲到,仲一齊快樂生活tim,可能原作個結局大家都唔鐘意。

武俠小說,科幻卡通,也可逃離下現實吧。

當年推出,應是我讀大學個陣,真係十九幾年,無諗過去戲院睇,一黎無錢,二黎初戀情人(也是物理治療師)唔太鼓勵我玩高達(無錢學人玩乜丫)。

男人玩高達,女人唔明白?
荃灣川龍街知源玩具鋪面金句
同時,我上面隻MK II 兩年前就係呢度買。

間鋪0既招牌!GOOGLE 下知源玩具

我話,若找到一個明白你既女人,生命中既煩惱真係會少好多,有錢無錢也好,人生中好多壓力,都是來自別人/別人目光。

見得最多果個都唔讚成你追夢,咪只能夠好似 the sims 咁,日日番工,放工無哂精力。。。呢d 模擬人生真係人生??


2019年5月17日 星期五

時間的覺悟 我的香港財自路(一)

覺悟時間,係指我用左幾多時間去實行退休撈大計。

重申多一次,唔撈,係指唔再搵錢,同好多人心中唔做而家個份工,但去做下PART TIME/打風流工個種奴性過日晨不同。

這篇應是另一系列,又介下其他比較熱門0既文!

心態決定境界:多是講人,用以投射一般膠人膠事,免各位中人生誤區。

我可以唔撈嗎:純粹以時間倒數紀錄自身情況,現在回看,得啖笑。

我的財富大道:被我太太喻為三幅被,不停重覆,多為資產與時間描述,亦有提及我的工作/生意如何煉成。

我的實習時代:就係小弟大學修物理治療時實習經歷

我個鋪,仲有一個月要拉閘,呢D野我有幾塊,掉左佢定留念?

由覺得自己可以提早退休,至到今日洗濕個頭仲有一個月就唔做,一共十二年。\

應該大約2006年開始,那時未識現在太太,已經發現收入高過同輩朋友少少,結果每月能剩下的錢又多少少。

計算之後,當時同父母同住,覺得有250萬已經足夠。

後來,大約2008年,覺得至少要500萬,至少夠自己同住屋開支。

2009年結婚,同時遇到有人講,要留多一點點BUFFER。好吧,1000萬。

直㺫2016年,一千萬(淨資產,要強調)有了,有感樓市上升(其實十年來,租金升中幅未有一倍,我搬大左又靚左,但只用多最初一倍價錢而已),加上有孩子及長老要養,不如定個二千萬吧。

走到2019,發現錢是夠,但太太自己未必能維持現時花費生活,要提醒她有資金缺口要補。

結果,財自之路,依然感覺不踏實。
但我相信,船到橋頭自然直。

不過,自從第一個小朋友出世後,已希望可以不再工作,湊小朋友也好,做回自己也好,總之就不想再搵錢。

另外,我有個小目標,就是希望工作年數不多於讀書年數,達成了。

再另外,三個好友的離世,令我反思,有錢無命享,留給子孫也沒意思。人生是自私的,我活得好,太太活得好,就已足夠。

最後,2017年末我母親離世,更令我下定背水一退的決心,如能早一兩年財自,多些見面,多好。再者,即使母親還在,他的快樂也是來自我的快樂吧?只要我快樂,她就ok。

做父母的,不是這樣嗎?

如無意外,近系列0既曹操高達同孫堅高達,會係我今年父親節禮物。

最後,是來自我的垃圾父親,看到他現在,食又食不多,又不能四處去,有錢也沒命享,有何用? 身體退化是必然的,有錢也不能逆轉太多;孩子長大是不能人,親人變老也是不等人的。

最後,樓市坐貨十年八年,如覺值得,go ahead。我短視,看不到十年八年光景,

人生在世,能換多一年光陰便算一年。

我沒什麼長處,投資也不聰明。但我自豪的,是不靠樓市順風車,達到我想做的事。各磚頭朋友,不如你又試下?

2019年5月9日 星期四

最後的工作日敲定 我可以唔撈嗎 48

終於等到工作日程表!

六月18日將會係小弟最後一個工作日。
六月23將會同朋友(現實生活果D)影下相,留個念。
剩番最後一星期,用黎清場,足夠有餘。

佢叫丁丁,是忘母送給我的。今年十一歲多了!

我刻意安排下,最唔太想見到個D客人,應該唔駛等到六月,五月一完就可以唔炒比佢地食。

其實工作一路以黎好輕鬆,真係從來無辛苦過無受過氣,有時仲有意想不到的尊重(個人認為同敬業精神有關)。只不過,好客之中,都有無咁好的。咁一圍食客入面,一個半個衰的,就會令我唔想做,自己生意0既好處,就係想點就點,無理由要忍。

仲有三樣野要係清場前做

1清理一個多年無開過0既儲物格,入面有好多野掉,同埋有我十年前出0既工具書,要拎番番屋企,留個紀念。

2高達波子機。。。要賣走

3一堆未砌模型,要GOGOVAN回家

記底完六月份工作後,個人停低左落黎,原來真係眨下眼咁快就到呢一日。

有冇唔捨得?一定有,不過,呢個係另一個開始,而非終結。今次0既人生路,同讀書、工作不同,至少,無乜人可以跟,無乜路可以參考。

我問老婆,駛唔駛續多九個月租約等埋佢。。。哈哈。

講錢先有人睇?不如統計一下:

回想當初搬過黎(2012年一月),應該係股票期權災難日之後無耐,錢又唔係無,不過就重傷。。。

首次獨資經營,當然係搏老命啦,首月已經衝過六位數收入,唔記得邊一兩年,係有二十個/月。。。

租金升幅由2011一月年到2019年六月,七年半間,租金只係多左25%,但鋪位已被易手多次。老實講,我只係要間鋪四四方方,位置唔太差便OK,呢D要求好多地方都有。

裝修連基本設備,都係七萬幾,攤分番每年,都係一萬/年。

如無意外,六月收入只能應付當月家庭及生活開支。即七月開始,要食老本了。

以後生活如何過??

小弟2001年畢業,走到2019年,終於都完成工作搵食人生階段,可以全職做番自己。

今年未夠40,可以退下火線,我希望係退下搵錢相關事情(即係唔再搵錢),而非退下現時工作去做其他工作,咁做對我來說無意思,更是浪費多年安排。好多人攪錯兩者意思,我係唔想搵錢,並非只係唔做現工作咁簡單。更加唔會去開投資班收錢。。。想學,大家睇我個YOUTUBE CHANNEL啦!

WHATSAPP GROUP中,有朋友叫我去飲下早茶/睇下早場電影,其實我唔係想要呢D!呢幾年工作上左軌道,其實我已經好清閒,尤其呢幾個月,我為左適應一下,都已經放假時日日出街行(每個星期一、四、五),其實係幾悶的,食都食唔到咁多,買野都係有限數。

我幾鐘意食太子果間沭八燒烤!

所以,才會去申請POLYU圖書証,同埋JOIN T HOBBY 個噴油場。

寫BLOG,寫書,拍片,砌高達,暫時會係首年財自過日晨活動,仲有要同小女上暑期班預習,睇下又如何!

寫BLOG,繼續現時方針。

寫書,應該不太多投資相關,反而同工作有關,或許需要自資。

拍片,投資為先,高達次之,再另有一個題材,要等我真係脫離左工作先拍,為左滲入另一年齡層,早有預備。

以上三個做唔到,都唔緊要,最重要係,要幫十個月後財自0既太太諗下佢可以做D乜。

最後最後,財務上呢,為左要補番大約18萬/年既收入缺口,似乎要再投資多少少(三球,六厘),近日跌市,可能係一個好機會。

2019年4月28日 星期日

一通衍生工具風險 答問題大合集

為左唔好好似我咁,答好多次都錯,又要GOOGLE搵0既人,特設以下答案。

佢攪到我拍呢條片時,NG左幾次!!



真係要講句: DLLM!

問題
以下那種衍生合約是以實物交收?
A. 指數期貨
B. 指數期權
C. 股票期貨
D. 股票期權

(D. 股票期權,呢個我識)

—————

問題
如果行使價相同,以下那一個持倉風險最高?
A. 即月認購期權長倉
B. 即月認購期權短倉
C. 下月認購期權長倉
D. 下月認購期權短倉

(D. 下月認購期權短倉)
呢個我諗錯左,短倉風險無限,長倉有限(理論上);而時間越長,越大風險,所以權金越高!認購認沽無分別!

—————

問題
以下那一項持倉在恒生指數下跌時增加獲利?
A. 恒生指數期貨長倉
B. 恒生指數認沽期權長倉
C. 恒生指數認購期權長倉
D. 恒生指數認沽期權短倉

答案唔一定,總之就係認沽長倉/認購短倉(即LONG PUT/SHORT CALL)
(B. 恒生指數認沽期權長倉)

—————

問題
以下那一項資產未有其期貨合約?
A. 指數
B. 股票
C. 貨幣
D. 以上皆非
(D. 以上皆非)

—————

問題
以下那一項不影響股票期權價格?
A. 股票市價
B. 利率
C. 股票價格波幅
D. 以上皆非
(D. 以上皆非)期權基本知識

—————

問題
客戶期貨按金要跌至那個百分比水平便會立即被強制平倉?
A. 90
B. 80
C. 70
D. 60
70%,GOOGLE HELP。
但又有留言話係60%
有待求證。

—————

問題
恒生指數即月期貨的到期日是那一天?
A. 本月的最後一個曆日
B. 本月的最後一個交易日
C. 本月的最後第二個曆日
D. 本月的最後第二個交易日
(D. 本月的最後第二個交易日)尾二個交易日!

—————

問題
香港股票期權屬於那一款行使方式?
A. 美式
B. 歐式
C. 亞式
D. 港式
(A. 美式,謝風兄糾正)

—————

問題
以一張合約計,恆生指數期貨價值是其小型期貨的多少倍?
A 2
B 5
C 10
D 100
(B 5 )

—————

問題
當期貨長期低水,以下那一項是主要原因?
A. 有指數公司派息在到期日前除淨
B. 利率在到期日前上升
C. 投資者普遍對後市悲觀
D. 有指數公司供股
呢題最有爭議,我唔知答案,我覺得係A,但狂錯,應該係C!
因為要睇佢題目,係咪COMPARE WITH 現貨價!DLLM X2
同埋有高人提出,每年4同5月,都差200點,長期低水一字可圈可點!

希望各位用GOOGLE大神時幫到手,其實答對與答錯,唔影響會否輸身家架喎。。。

2019年4月26日 星期五

老人財自先要捱? 欲練神功你又信?

今日放假,一早同小朋友去左政府個D遊戲室玩。

趁無聊打下文,希望唔好介意我重覆。

另外,拍左以下兩條片,似乎我要買番隻正版威力導演!

 

*********


呢十年,樓市上升,後生個批又開始畢業,造成唔少社會矛盾。

廢老一字由此而起,何謂廢老?其實唔一定係窮,只係年青一輩發現班老野符6當實力,實際上並無過人之處,從而冠以廢老之名。

究竟要成功,係咪一定要捱得,又要蝕底比老細,仲要一步一步黎等到七老八十?

我有以下發現:

(一)好多唔成功/未成功嘅人都同你講,佢嘅成功之道(真係黑人問號!)或者唔成功嘅人久唔久QUOTE下20個成功名人嘅金句!
老實講,我唔捱得又怕蝕底,更加唔搬得唔抬得,比我搵到我興趣同搵到錢,全因我將長處發揮到極致,其實我好多時間都係放空唔駛點做的!

(二)五六十嗰班濕九老野,其實佢哋年青嘅時候一啲都唔成功!即係話佢鬧人廢青時,當年佢都係廢青,可能更廢!只不過因為時間複利效應或者負碌效應,買左樓,現在略有小成所以先至同你講要捱!其實樓價升,關佢捱唔捱L事?

(三)佢哋同你講年青人唔好怕捱唔好怕蝕底,其實歸咎於佢哋唔成功嘅青年人生,係捱苦同埋蝕底左幾十年,其實係佢哋畀人呃鳩咗自己都唔知!欲練神功,真的要自宮?

(四)真係成功咗嘅人,無論係金錢上定係ACHIEVEMENT上,喺佢地好年青嘅時候已經略有小成,唔會到老先同你講!當然佢地後生嗰陣,啲人認為佢係符碌,講出黎又以為佢發神經/邊有咁大𨾏蛤蜊隨街跳,當年冇人理佢。到佢哋老嗰陣都已經成為閑雲野鶴,都冇咁好氣呀佢叫人點樣先可以成功啦!

呢個體會好深,我教人XXX,唔少人以為我老點佢/想害佢!唯一相信我的物理治療同學,今日肯定好過同佢同0既人LAW。。。

(五)老人憑樓發達,其實符碌成分好高!相信佢哋做物業買賣嘅時候都唔係識太多關於物業嘅知識!而家同你講嘅知識,只不過係佢落場嘅經驗!就同我買股票同玩期權一樣。

咁究竟係先求知再投資;定係先投資再求知呢?

你真係相信讀左D理財班會勁左?溝女駛唔駛上下堂打下底?溝多幾條就識架啦。。。

好耐之前一篇文講過,如果要比較成功與否,香港地可能要講錢!而講錢嘅比較之下,相信同打拳一樣,要分級數用年齡分類分級數就最穩陣!

當你笑報紙上年青人30歲40歲財自,係負碌/好彩/炒賣嘅時候,而你卻去尊敬一啲老人家,果班老人財自度縮/逃稅/ 唔交稅/笑人扣稅無用/0既縮縮,係咪有啲反智呢?

************

喺捐款吹水whatsapp group入面/睇我個youtube channel嘅留言入面,好多人都叫我講下期權或者講下IB



我覺得,比錢落場玩係最快學得識,做得好唔好就睇個人。

所以,一知半解嘅我/大部份人,<控制注碼>同埋<唔好貪心>就係兩大法則!
whatsapp捐款吹水group見到有人話,佢親戚上完撚蛇嘅堂之後,ALL—IN買曬佢建議嘅債基/保險融資等產品!有人甚至叫父母抵押物業畀佢去做呢啲投資~

最後貪心啲求下各位可以嘅話:

訂閱我嘅youtube channel
同埋share啲片上facebook或者你朋友個whatsapp group吧~

呢條youtube channel其實都係我才之後嘅目標/玩樂之一!


希望唔好咁快畀盤冷水淋熄佢呢!

2019年4月18日 星期四

YOUTUBE拍片始動 三百萬期權倉更新

未講呢個期權倉絕地反擊前(文末講下吧),先介紹下小弟PAT PAT㾗自己拍片(但又唔剪片),亂UP一通節目。

若大家想支持一下,幫我LIKE同訂閱丫!(而家訂閱人數仲未過一百,就好似當初BLOGSPOT咁)

若然想聽D乜,我識唔識都可以講下0既,係YOUTUBE片內留言吧。


圖中連結直去YOUTUBE,不作嵌入式了!
也容許小弟非為錢只為有趣而拍,比時間我慢慢改進吧。

都係個句,其實我乜都唔識,若然各位聰明豆想講下我教錯D乜,不如你又試下錄下拍下?寫過一兩篇關於0既文,又唔代表可以發揚光大。

都係個句X2,不如你試下丫!

打BLOG快定拍片快?肯定我唔剪片之下拍片係快好多!之後兩邊都會UPDATE,目標係,將自己0既做法,講比更多人知,目的有二

1令同樣係人生道路上塞住0既,可以搜尋到相關資料。(呢個係我未寫BLOG時想搵料又搵唔到而想出來的)

2從而令平日同佢講投資以為我厄9佢0既朋友轉折地知道有此方法。非常諷刺地,真身同佢講又唔會信,覺得你滿身臭味好L叻咩(再加埋我份無出息0既小小生意)

有幾多人受惠於1我唔知,但至少我見到有唔少物理治療界0既人(竟然仲有師兄),加入左我WHATSAPP GROUP,真係好開心。幾時會回流番去同年0既同學入面?

目標1,我相信我都達到一半已上,我好滿意了,至少點去DIY噴油箱,同埋點整番部BLUE LIGHT OF DEATH 0既PS4,都可以搵到我個BLOG。財務自由四個字太濫,如果打"唔買樓"可以搵到小弟,咁就完美了!

目標2,希望大家可以係FB SHARE 一下小弟連結,如果覺得係好文。因為我目標人士都係玩FB,睇到讚好0既朋友有我自己真實生活的MUTUAL FRIEND,其實好鼓舞又好奇妙的!

*******

買樓致富唔難,人人也是專家,人人也可以教你。

至於敢於離開COMFORT ZONE不依正路走(仲要係讀過大學而又讀得好個班,唔計被迫打拼個D朋友啊),小弟自命都算大半生如是。

小時候家人給與極大自由度(我讀書OK又唔駛佢理),揀科揀學校都係自己黎。

想搵零用幫人補習,PRINT 街招貼又係咁(當年無網上AGENT)

ON99誤入自己唔鐘意0既PHYSIOTHERAPY學系,齋讀唔做,當年應該少於一成人會咁。睇見有相同諗法0既同學最後因前途問題頂唔順,又入番去做,都覺得有點可惜。

幸好當年未有美圖工具,未有咁多交友陷阱,小弟連女朋友/老婆都係網上識的。當然,而家大把呢D CASE啦!

工作上,機緣巧會比我接觸到炒旦行業,其實唔算係D乜,之但係,人地唔做0既,咪試下LAW。發現原來有唔少前輩都搵到餐。

多年來,加入一點改善一點創新大量個人技術,18年後,我發現我變左前輩了。。。

2005年開始,覺得搵到0既錢(個陣都係十萬元),要投資一下,開始買股票。

2007年,識左我太太,同時第一次衝破一球,發覺收入係人地三倍,儲0既錢可能係四五倍,再做落去係可以唔駛做。(果陣好天真覺得5球就夠)

2015年,衝破1000萬(若買樓會更快),基本上肯定退休有期。

2017年,我媽突然離開人世,有感生命有時,決心定下唔撈日期。

2019年,之前一路培養0既目標,同興趣,同埋小朋友包袱,應該夠我玩三五七年,之後點?之後先算啦~~~!


我的財富累積大道(下) - 70後與80後, 兩個小小生意人


2019?應該六月寫吧。

點解無2018?這一年,我好不容易才能在親人離去傷痛中再出發,再者,當時醫生說,唔醫可能有半年命,阿Q的諗,無論當初決定醫定唔醫,2019年打文的今天,我的母親也不在了。

再者,即使她在某地方看著我,也會由得我劈砲唔撈吧,反正我由細到大都係意思照聽但一意孤行。

退休唔撈,並不是一個終結,而是人生中的另一個開始。而呢一個決定,相信唔少人都唔會經歷,亦都唔會有膽主動去試。

就同300萬期權倉一樣,唔試又點知會點?(我知,好多人好叻識計數又笑我蝕左ON99,不過我地呢D凡人,可以點?)

同樣,我識炒旦奧義,你又唔識(我幾肯定唔少人要用),唔通我又笑你?

同鬧人係巴士食煙一樣,呢D樣衰野,我唔做,邊個做?

如無計錯,三百萬港股加期權倉,現在蝕緊20萬左右。


因為比亞迪,恒大已番家鄉,加埋一成權金都和味。

不肖子三寶,雖然加埋蝕四十萬,只要其他股票(騰訊及吉利)都番家鄉,基本上會有少量利潤。

用左近一年時間,吸收教訓吧。下次不要狗衝入市,哈哈哈~~~(我又唔會講大話話你知我偷偷地放左/低位加左倉咁傻,面子對我而言一文不值。)

2019年4月9日 星期二

心態決定境界 25 呢個年代,你搵到錢唔代表你識字!

睇到某FB PAGE 西客之道,有兩個大嬸對話,其中一句,頗有意思。
(文末有我初完0既高達頭!)


"呢個年代,你搵到錢唔代表你識字!"

其實,可以作出無限改變

"呢個年代,你讀書叻唔代表你搵到錢!"
"呢個年代,你讀書叻唔代表你叻!"
"呢個年代,你叻唔代表你讀書叻!"

我知道,改做其他野一樣WORK,例如"買到樓"/"財到自"

不過香港地,唔講錢講乜?

而中國人,唯有讀書高,唔講讀書講乜?拿,唔好咁包拗頸話你唔介意讀書成績呀,到你有小朋友/可以時光倒流,你係咪會完全放棄學業?

錢、讀書,同老婆個樣一樣,無人會話唔要。。。只係,你有冇本事擁有0者。

"呢個年代,你搵到錢唔代表你叻!"

其實又係一個謬誤!不如大家估下,以下邊種人數量最多?

A讀書好,搵錢多
B讀書唔好,搵錢多
C讀書好,搵錢唔多
D讀書唔好,搵錢唔多

先剔除搵錢一般,讀書一般個班。小明數學85分,佢話好多人84分低過佢,其實呢D比較無意思。

我們只討論特別好/差個堆。

我諗撥FUNDING研究,會比人話SIDE錢~!
當然A同D比例最多。

WHATSAPP 吹水谷做過小統計,大家覺得D係最多。(有人話窮人本身人數多,OK,改改佢,以相同程度出身計。)

不如逆向睇下濕九新聞報導,阿媽係女人就無人會報0既,阿媽有JJ就肯定FB,巴士的報一堆內容農場會不停散佈。

不如又估下,邊樣會吸引眼球?

X碩士生失業多年,最後失業/搵一份低人工工作
Y公屋窮小子物業致富

講到呢度,應該都唔難明我想講乜。

鬼唔知阿媽係女人,唔駛報導;相反水鬼升城隍,符6加勇氣,就可以上新聞扮專家啦!

結果,呢堆人,由小人物變勵志故事。

再而,或者比自以為成功0既人去申訴,我無乜讀書,但都可以咁咁咁,讀書有咩用?
而網上一大堆老屎忽笑大學生無用,亦同樣道理。

所以我話,而家D後生仔鐘意叫老人家做廢老,並非事出突然。

網上大把被訪問者,一開頭話自己出身公屋,其實極其自悲。

正因自悲,老來得錢暴發,為吐一口烏氣,茅頭直指兩類人

1年青人(尤其而家普及教育下,一堆大學生)
2以前佢識得,讀書叻過佢0既人(呢個真心好好笑!)

錢、讀書,同老婆個樣一樣,無人會話唔要。。。只係,你有冇本事擁有0者。

至於讀書有冇用?先唔好講讀書能否用在日常生活中,單單當佢係收藏品,名畫,古董,放係度都無用架喎!?咁又咁多人想擁有?

讀書,更難得0既係,有時間性,後生唔讀書,老來追唔番。讀唔成書0既收租仔,只能葡萄,將之又愛又恨。

講左咁耐,何解呢班讀書唔叻0既人可以吐口烏氣?咪又係樓。。。

唔靠物業,可吐烏氣,有幾人?

我覺得上面呢堆野,講出黎,應該好過寫出黎。。。
POLYU LIBRARY CARD係唔可以租用POLYU個ONE BUTTON STUDIO!即係話我拍片都係要係屋企!

係咪好可愛呢?哈哈哈哈~~~~

2019年4月4日 星期四

尋找模型噴油場 最終篇

這是退休準備之一

如何選擇,可以參考番上一篇

左揀右揀,其實都無得揀,因為24小時開放真係殺哂。

大部份噴油場,都係中午先開始開,平時星期六日開早。

可惜,我係偽退休人士,打算日頭小朋友番左學至去噴油,結果下午先開既噴油場(有d仲要晚上6點開)就絕對唔岩小弟了。

我揀左係旺角㜬景商業中心既T Hobby

註:剛剛油場場主話有人退租有空位,若有興趣可留意/留言,經小弟皮老闆介紹,我同你每人都可以免一個月月租呢!(地址係旺角好景商業中心)

約果位先生睇噴油場,其實都約左兩三個月,因為我又未開始租,離唔撈退租之日仲有成半年(當時十二月)。

上到去,同睇相一樣啦,噴油箱係一般上揭式儲存箱,一條目測4吋左右風琴喉,抽氣用個工業用大泵,每個位一條光管仔。



最大賣點,當然係佢開24小時拍卡入啦,其他可取之處,就係佢有個比一般噴油場大既locker!真係好彩,我搬過去既野都幾多,一般locker 原來裝唔哂的。



至於位置放面都唔錯,附近真係多野食,至少多過我公司附近先。

唯一美中不足,就係好景部笠真心好慢。。。

鋪頭開始定期清下雜物,大型既應該送得出就送,送唔出就掉了。

下一篇,可能係講cut 買落多年已唔適合小弟現階段狀態的儲畜人壽保險,慳番d錢吧。保險我唔熟,真係全靠吹水whatsapp group 眾多專業朋友指點迷津,再一次感謝胳位無私的分享。

仲有咩check list 要做? 以下連結。

退休倒數100天 我可以唔撈嗎 45


2019年4月1日 星期一

女主人工作大暴走 我可以唔撈嗎 47

原本想寫下噴油場一事,不過都係寫左呢篇先。

註:剛剛油場場主話有人退租有空位,若有興趣可留意/留言,經小弟皮老闆介紹,我同你每人都可以免一個月月租呢!(地址係旺角好景商業中心)

四月一日?哈哈哈!
打趣笑說:我有兩張飛,不如。。。

如無意外,佢應該會係2020年跟隨我之後,撒出唔撈。

近日佢工作大暴走,除左新年後突然多左單之外,同佢0既服務供應商亦有關,轉左都係唔掂,晚晚有野煩又累又遲番屋企,希望再轉新0既服務供應商,情況會有改善啦!無理由臨尾香架MA!

女主人退休後,會唔會賣盤?我估無人買。
男主人退休後,會唔會賣盤?男主人工作乃技術型,好難教識你去炒旦。

不過,佢同我唔同,佢打算轉做網上店。(咁即係唔係退休啦?我唔識分了!)

現時,佢0既被動收入,來自以下投資

一百萬買到D乜? 女主人99萬收息基金

女主人之匯控期權 抽中天仁茗茶

蝕0既係我,息就佢收。貸息佢成日唔比番我。。。

呢個組合,用左佢153萬,持貨為203萬(現值183萬),每月約產生10000蚊現金流。

其餘佢自己短炒個D,我唔理亦都少問。

三月尾埋單一計,原來佢資產已達585萬,其中現金約431萬。

是次暴走,應該係

1我比番D旅行錢佢。。。
2佢一次過出番上兩個月人工比自己
3沽清獲利股票

如無意外,離我同佢定0既目標,650萬,應該好有機會達到。

咁0岩,佢唔撈之一,剛剛好係佢創業十年。我覺得蘋果應該訪問下佢,如何由一個花瓶秘書仔創業十年。。。好多九唔搭八0既個案,軟飯呀,一萬蚊財自,的士阿哥買匯豐,賣港樓去泰國慳住用等等,都有人想知。

計番,佢又唔係真係儲到好多錢,平均一個月都係儲五萬幾。但2009年,可以月儲五萬又有幾人?

佢0既現金,最後會點?我估出路有二

1買收息東西,為佢帶來每月現金流,其實佢仲有大約15000/月缺口未夠。預計厔少要用三球現金(之前打錯左)。

2若樓市久唔久回下,入市?咁用IB借黎買樓,係平過交租(租金實在太低),即使唔用銀行按揭(唔知用到無),一千萬樓,我都係貼多六球。

3就係1同2混合版,買完收息東西,放係我度提高倉值。然後侍機買樓?幾時?話唔埋係2029!或者2039!(拿,同TERMS壽險一樣,2039我小朋友都大哂,住乜住邊都無所謂啦,我仲賺左提早財自呢個BONUS TIM!)

為左呢舊錢可以神速抵達,我申請左以下呢張野

DIGITAL SECURITY DEVICE +

有咩用?就係原本個張口令卡有提款上限!(以下IB網站截圖)




2019年3月29日 星期五

三球蝕到HIHI港股倉更新

已經2019年三月尾,係時候諗下我個蝕到HIHI0既期權倉衰成點。

話說上年六月初,我用左302萬買入十隻港股,當時幾近高位,之後跌到HIHI啦。
以下股票,9成做左SHORT CALL(認購期權)



傳送門如下:

10%年回報計劃 賣球員不務正業

呢個不肖子倉,好彩當初不務正業,否則都真幾難翻身。

係時候逐隻睇下,由賺到蝕:

3333中國恒大
買入價 24.5
權金 3.7
但行使價為26, 即係即使現價係26.15, 我利潤已鎖定係29.7 度....
不如咁講, 最多只能獲利6萬幾
(三月26公佈業績, 不派息!)

1211比亞迪
買入價 54.2
權金 5.7
行使價 57.5
現價47.2, 加埋權金蝕七千。。。
(三月27公佈業績, 派息0.204)

2319蒙牛
買入價 28.7
權金 2.97
行使價 31
現價29.1 , 加埋權金, 賬面唔駛蝕,獲利五萬幾。。。
(三月27公佈業績, 派息0.181)

700騰訊
買入價 424 及309 加注(但無做期權), 拉埋成本399
權金 35.3
行使價 460
現價358, 加埋權金, 賬面蝕一萬二千。。。
(好彩有溝貨!)
(三月21公佈業績, 派息 1蚊)

1928金沙
買入價 45.08
權金 4.49
行使價 46
現價39.1, 加埋權金, 賬面蝕九千。。。
(派息 1蚊)

27銀娛
買入價 65.6
權金 6
行使價 70
現價52.9, 加埋權金, 賬面蝕二萬六。。。
(派息 0.45 )

2007碧貴園
買入價 17.2
無做期權! 因為剛遇著派股.
派左碧貴園服務比我, 現值22800, 相等如1.5元
現價12.26, 若和碧貴園服務一同沽出, 賬面蝕,五萬。。。
(未知幾時出業績)

175吉利汽車
買入價 23.1
權金 2.22
行使價 26
現價14.76, 加埋權金, 賬面蝕,九萬。。。
(三月21公佈業績, 派息0.35)

2382舜宇光學
買入價 165.6
權金 20.3
行使價 180
現價92.9, 加埋權金, 賬面蝕,十萬。。。
(三月19公佈業績, 派息0.568)

2018瑞聲科技
買入價 129.2
權金 13.8
行使價 142.5
現價46.2, 加埋權金, 賬面蝕,二十一萬。。。
(三月22公佈業績, 派息1.03)



唔駛加, 成個倉蝕42萬左右(上面有ROUND UP)如果做唔期權, 蝕71萬.

收到股息, 就當係利息支出吧(其實好少,唔夠COVER)

高位買貨,唔見15%,又睇下六月到時點吧。



題外話,建行今年派息30.6仙
減埋10%股息稅,即係得RMB0.2754
七月二日除淨,七月三十日派息。
我大約有$53000/月,應該退休第一年夠洗(暫未預女主人個份,我係好夠洗的。)

下一篇,講下女主人身家大暴走!!

2019年3月26日 星期二

申請理大舊生圖書証 我可以唔撈嗎 46

重申多一次,寫BLOG目的,並非為名為利(我都追求唔到),而係希望有後來者可以搵到一D我搵唔到0既資訊!


就好似今次咁,我申請理工大學0既舊生圖書証,都唔覺有人寫過,或者咁講,大家都輕描淡寫,主要都係要靠POLYU官網搵。

其實官網已經講得好清楚,只係圖書館已經唔係當年咁簡單0既圖書館,多左唔少ADD ONS!

https://www.lib.polyu.edu.hk/collser/eform/library-card-application-grad.docx

上面條LINK張FORM寫得好清楚點做!

收費?我CAP出來吧。


有東亞理大舊生信用卡,係平唔少,打個七五折!而張卡又無年費,基本上你申請就平250。

結果,先去東亞個網申請。以下有LINK

https://www.hkbea.com/html/tc/bea-polyu-graduate-visa-card.html

填完,再網上SEND番張CERT同埋身份証明文件(如有其他東亞信用卡,唔駛比入息証明),一星期就寄到來屋企。

即時安裝個東亞APP ACTIVATE 張卡,再上POLYU度交錢($750)


PRINT三樣野帶去

1 佢個確認付款EMAIL
2 畢業証書
3 上面條LINK個張FORM(填好佢)

帶三張野
1 自己身份証
2 東亞信用卡
3 呢樣最難攪,証件相!不過POLYU舊CAN係有30蚊即影即有証件相影。(我搵女主人幫我影再PRINT出來),其實職員都係SCAN,會比番張相你。


去到圖書館,同門口個保安講申請圖書証,佢會放你入去。再去同職員攪手續,15分鐘後就出到張卡。不過系統問題,要第二日先用得到。(其實我都入左去啦)


題外話,圖書館廁所真係咁多年都無變,好差。人多左,但廁所無大到!去番出面ALL吧。。。

另外,舊CAN改左自己點餐,又幾好喎!



我嘗試係圖書館做下野,就埋下數啦。。。

埋完,好眼訓,果然係訓覺好地方,我需要一個枕頭!結果,係需要一個LOCKER放枕頭!(小弟吹水WHATSAPP GROUP中有愛,有碩士肯借我用!雖未成事,但多謝先!)

另外,同以前一樣,好多人鐘意用死物霸位,呢個我理解。下次如果真係要去做野/寫野,係要早D去霸位。

下一篇,講租噴油場。

2019年3月18日 星期一

幪面超人 港人狹窄視野 心態決定境界24

好耐無講過自己果個跌到四腳朝天0既倉,文末講下啦!

先貼下兩條片0既YOUTUBE LINK

幪面超人變身比賽過2,000 likes 達人現身說法:屋企人同女朋友都好支持



【點做到〡高收入筍工】HKTV揸車月入4萬 譚仔阿姐月薪萬五以上


其實幪面超人變身比賽,香港不是首站。早幾個月前已經見日本仔玩,不過香港港玩具業其實幾UPDATE,有展覽就順出推舟出左呢個比賽。片中年青人因超時3秒被扣分,最後得第三,但第一名果位認為佢最好,將部獎品(SWITCH)比左佢!如果係中產港豬?仲唔偷偷地跳起YEAH拎埋獎品走,之後係FB出POST話自己好好彩咩!

利申,真係無睇過任何一集完0既幪面超人(網上人叫佢做拉打RIDER),只係好細過打過以下遊戲:

你都玩過?遊戲連結按㧗

所以,我對RIDER認識識其實好少,如果要揀一隻,我鐘意V3,因為佢唔係黑色!(哈哈哈),同埋好多RIDER玩具都炒到貴,唔好問我點解,真係無追開。

上面條片,各位讀者,真係好值得同另一半一齊睇,如果小朋友夠大,搵埋佢睇。我個女7歲,都識同我講:

"應該搵一份自己有興趣0既工作"

我就全家一齊睇左變身道,連我個工人都睇到唔眨眼!


我又唔會話個RIDER變身有幾高尚,不過都係幾十年不滅文化神話之一。果班上左年紀0既港豬,只係識得SEARCH OPEN RICE 假食評,扮食好西,放上只有爐取暖0既FB 專頁度哂命互LIKE(其實無乜後生仔用,集中哂係三十五以上港媽。。。同埋一堆剛學電腦0既老人),又或旅行日本一泊二食相,極其單一。

只能講,或者佢地人生只係得食同住呢D人生最基本層面,所以即使有兩個錢,生活好少少,都只係停留係食同住放面可以提升自己水平,其實水平一路無提升過!

話人買唔起樓?結果某模型店後生老闆,講自己間鋪都二千呎。。。(呢條友成日靚抽,講野比我更正),人地理想變事業,再變番理想,果班日日番工出糧一生三宅當目標0既港豬係唔會明白。

講兒子?如果我個仔有一樣可以咁專注0既野,總好過佢無仁心地讀好書做個醫生!當然作為父母,都希望小朋友第日可以溫飽幸福,不過,生命無TAKE2,倒不如活一次自己不會後悔0既人生,千祈唔好到老先去做自己想做0既事(大把老港豬去旅行!)


譚仔阿姐月入15K果條片,後面個一段年青人COMMENT好有意思,我又唔係鐘意寫影評0既劇透L,唔想CAP哂D圖出黎,或者我節錄一下吧:

A 若一些目標,你要放下人生的追求或自己的尊嚴,就沒有意思

B 大人(老人)覺得買樓重要,但我們覺得不是這樣,錢會用在不同地方,所以不能比較。

C 條路自己揀,跌低唔好喊。(註:原出處為"仆街唔好喊")

我最鐘意寫野比年青人睇(有幾多年青人睇又另一回事),如果年紀同我一樣有番咁上下,其實都已經過左最好玩0既時光,溝女,玩通頂,四圍癲0既日子已經一去不返。

失去左呢D日子0既人,去睇唔起仲有能力去花既人,仲要教化年青人要同佢當年一樣,放棄無限可能性去走單一單結果人生路,係咪可笑?

唔知邊條毒L白痴碌葛話數學最準唔會厄人唔會錯,其實剛剛相反,好多野,係計唔到。感情健康文化知識等等。

即使你有三個碩士學位,人生會滿足過我屋企個件(由細到大都比人錫0既)童顏靚太太?或者降一級,連由細到大都比老師偏心0既男主人,佢連燈尾都睇唔到。。。

我認為,買樓前計數,好0岩;計數後買樓,就好有問題喇!(唔一樣架!)

相信,唔少人都有玩FB(至少我呢個年紀會啦),不妨睇下有幾多朋友親人,當初夢想已被消磨?無錢個陣,係咪仲開心過而家有錢無光陰?當然,佢地唔會表達出黎,邊有人豬左仲會笑自己?

點算?唯有搬下龍門,講下自己財富有多少,樓有多少,好讓佢白白浪費0既人生可以量化,可以說服"他比你好"

******
忘了報倉

原來恒大已經升過左交貨位。。。另外比亞迪已經正數!騰訊都好快正數了!(扣埋期權金)

最差個三隻,都係吉利,舜宇,瑞聲!三隻加埋應該蝕成四十萬左右。。。


註:權金收益,約29萬。

六月個倉到期,又睇下點攪啦!

2019年3月12日 星期二

退休倒數100天 我可以唔撈嗎 45

離金盆XX之日,重有100日。

圖文不符,吹水GROUP講開搬屋
原來有搬屋公司代PACK的!!仲要唔貴!
上圖係老婆親自幫我搬高達模型,其他野才找搬屋吧。

雖租約6月30日完,但應該6月尾就開始唔做,留番十日八日去清場。

為免自己唔記得,100天內,完成以下動作,立文以作紀錄

事有分緩急,如A為要先做,C就不需急

A申請東亞張理大舊生信用卡
A申請理大圖書館証



因為申請需時,同埋現在都用得,所以應該做左先!
申請圖書証原因有三,一黎可以靜靜地寫下BLOG,又可以寫下書(如有);二黎有個地方可以放空(屋企/公共圖書館/會所閱讀空間都比唔到咁正環境);三黎,比自己出下街,長期懶洋洋留係屋企,絕對對身心都唔徤康。

四樓自閉位原來變成咁


B賣高達波子機
B賣噴油泵
B賣噴油抽風箱
B賣高達模型(暫定唔賣?)


二手都賣緊五千幾,我平過佢啦。。。

上圖連結

尋找蘇眉的故事


都係模型相關,最初呢D野,算係工作上一種調劑。除左波子機外,其他野平走就走吧。波子機,希望遇到有心人,最好係有鋪頭會接收佢,咁我第時都可以去睇下。。。

C清左個得一條魚0既魚缸
C清理雜物

清走一切儀器工具雜物,應該踏入6月先做。尤其有D幾重0既搵食工具,可以送比行家,可能佢都唔知原來有呢D用途。仲有D消耗品,送哂比行家實有人要。至於個魚缸,真係唔識攪,抽走D水,條魚(??),D泥(???)。

題外話,鋪頭二十步之內,開左另一間炒旦,老闆好後生,市場好相近,不過應該係唔太搵到錢。唔知佢係咪開頭個陣見到有我才搬進來,似乎。。。佢個如意算盤打唔響了。

D停工具合約(應該六月完,不用賠)
D停寬頻會約(好似要賠一年。。。)
D清走店內傢具(錢可解決)

呢D應該可以最後做,比錢就得,要例個清單唔難,錢可以解決到。

止凡問,會否攪個飯局?當然唔會啦,退出工作是另一個開始!不過就會同自己現實世界的朋友,係鋪頭食下乳豬西餅影下相吧。

當年開鋪𨾏乳豬!

至於退休後D錢點分配?留下一篇再講吧!
Related Posts Plugin for WordPress, Blogger...