以下是本網誌一系列文章

心態決定境界:多是講人,用以投射一般膠人膠事,免各位中人生誤區。

我可以唔撈嗎:純粹以時間倒數紀錄自身情況,現在回看,得啖笑。

我的財富大道:被我太太喻為三幅被,不停重覆,多為資產與時間描述,亦有提及我的工作/生意如何煉成。

我的實習時代:就係小弟大學修物理治療時實習經歷

2019年1月6日 星期日

HAPPY MONDAY STARTS 我可以唔撈嗎 44

講投資

先唔理舜宇,瑞聲同埋惠理集團呢D無機會番家鄉0既蟹貨(女主人串我以後都係買番D正常悶股),近日收息組合都跌埋一份,不過一於少理。

本來想再沽多次建行期權,上月收左幾千蚊,食髓知味。不過今個月價唔岩。再想做,佢已經急跌,做黎都無肉食。

成個組合,升得比較易發現(WELL,真係成個星期都唔會LOGIN睇一次),應該係GLD。順手SC即月GLD@126,收番幾千蚊港紙。

回望一下,GLD自己做SC,絕對係好過買GLDI。相信QYLD同埋MORT呢類自動SHORT CALL0既東西都一樣,自己做好過比人做。

另外,因早前有兩隻債被贖回,將果舊錢分成若干份,早兩日買左幾手盈富。本來想做埋期權SC,點知一年期權庄家開價個SPREAD實在太大,完全做唔落手。

講生活

十二月份,同女主人北上左兩次,都係飲飲食食。喜茶的確係唔錯,火鍋呀、酸菜魚呀,都真係幾OK。朝早唔想出去食?叫美團外賣去酒店。。。

呢一刻,香港錢番內地消費,認真係抵,仲要質素好過20年前。

點解同20年前比?我係指同班港叔港嬸廿年前番上去食野揼骨比,當年佢地用平價食垃圾,今時今日,雖無以前咁平,但食物係有機會好過香港,裝修同服務更加係無得彈。



上次過港珠澳番澳門,今次番左兩次大陸,其實都快。

1的士上深圳灣口岸,一地兩檢之下,快過上澳門好多。。。
2的士去落馬洲鐵路站(唔係口岸啊!),基本上行去過關,另一邊就係福田地鐵站。

唯一同女主人掙扎0既,就係過夜定唔過夜,交通咁方便,其實即日來回重方便過入屯門/天水圍呢D不毛之地!




講工作

放左自己一輪假,都成半個月,不過好多日都番左公司執頭執尾,其實唔似放假。

踏入一月,開工大吉。

今日係星期日,明天係星期一,亦都係我第一個開始放假0既星期一!2019年,終於實行四天工作了。

做多半年,正式退休,最多唔夠駛就慳D。

預計手尾如下

3月份要開始賣左鋪頭個噴油泵,同埋部高達波子機
4月份要開始BOOK同用下噴油場
5月份申請番個自修空間,暫定最方便係POLYU圖書館!

鋪頭D高達模型,真係唔知賣唔賣好。。。

講資產

女主人資產561萬(上月已修正,應為553萬),男主人股票回升(??),現有269萬(上年比235萬),可見呢一年大上大落無乜增值,工作收入投入後可能都蝕埋。

若真係要由IB抽錢出黎,AVAILABLE FUND(不可用盡,否則一跌就比人賣股救倉。。。),大約有七球港紙。

建行只要唔減派息,第一年退休生活係幾穩陣。因為我暫時當其他固定收息資產剛剛夠比孖展息(當然無咁少啦),所以實際上利息收入係多過支出0既。

13 則留言:

  1. 第一次有沙發~ 間酒店幾靚
    大陸啲service真係做得精細過香港, 差唔多價錢真係享受好多~
    同埋佢地做左個model可以不斷係全國復制, 抵過香港咁細market~

    回覆刪除
    回覆
    1. 係, 同一價錢, 所得大不同.
      果D飲品店, 的確係唔差, 除非港人一味只識飲咖啡同珍珠奶茶, 仲停留係用八達通晶卡年代....

      刪除
  2. 1. 老闆住邊間酒店? 好靚咁WO, 幾銀, 介紹下。兩公婆如果可以既話, 而小朋友又有人照顧, 梗係住下酒店好 (你懂的)
    2. 香港地, 成本反映唔到係售價到, 唯有減 COST (來貨, 人手, 人工), 食物差服務差但價錢OK已經大把人食。 所以我成日都話, 搵多左, 洗多左但生活體驗差左
    3. 老闆計資產點解唔計埋建行既? (驚俾人知身家?)

    回覆刪除
    回覆
    1. 有一間係JW萬豪, 近深圳灣, 近2000港紙. (我地覺得唔太抵)
      另一間係荷花公寓, 近九方購物中心, 七百幾港紙, 其實都好豬, 兩個人, 匿係上層睇電視,係用唔著下一層...

      唔計建行原因, 因為我想睇下其他投資同收入增長如何, 否則一隻建行升跌影響總資產太多了...

      刪除
    2. JW萬豪, 2千蚊真係唔抵........700蚊既公寓可以一試, 謝推介。

      刪除
  3. 會否搞個榮休飯局?我報名先🕺🏻

    回覆刪除
    回覆
    1. 生意鋪頭係有party 的, 金盤洗手。
      Blogger 是另一開始,不會有局了。

      刪除
  4. 推薦試下探爐,佢D烤魚幾好食,兩個人食一條可能份量比較多。。外婆家食新式上海菜都幾好。

    回覆刪除
    回覆
    1. 謝謝推介,齋睇美團,一年都食唔哂。。。。

      刪除
  5. //呢一刻,香港錢番內地消費,認真係抵,仲要質素好過20年前。
    深圳的高級美食已聽聞多時,只是未有機會去嘗試。下次有機會上去開餐時,定必向老闆請教一下有哪些餐廳值得一試!

    回覆刪除
    回覆
    1. 好多香港90後尾00後0既後生仔, 上去又食又拍片介紹, 拍得極好.

      唔駛睇我.

      (留意年齡又有分界, 80後至90前, 係極唔鐘意大陸...一講喜茶會黑面的)

      刪除
  6. 老闆,<我可以唔撈嗎>系列看來即將結束了。。。。
    下一個是什麼?

    回覆刪除

各位每個留言,係我繼續9UP動力,必覆。

Related Posts Plugin for WordPress, Blogger...