小弟在DISCUSS 並無出文
你回應緊0既,都係一個有心引你派膠0既人,並非小弟。
若有人以為我係DISCUSS 出文引HATER, 是否太小學雞?
小朋友, 暑期放完好耐了. 好好努力上班吧...

2016年7月17日 星期日

家長日(女主人寫blog)





今日係我一年一度最期待的家長日

可以了解個女唔同層面多一點 (男主人成日話我唔了解小朋友)


對於個女的學校活動      無論自己幾忙都好都要抽時間參與

學校旅行   運動日     校內開放日     所有需要家長出席的都必定現身

為嘅係唔想自己個女有份失落感       唔知道咁樣會否好怪獸


講返家長日      在家長日前一晚已經問定男主人有咩想問老師

佢話冇     點知暗地裡密謀緊一條問題.....

事後佢話怕講出來我會左想右想問埋老師奇怪問題壞佢大事....

見到老師      一如既往      老師對個女的評語都係不錯    今年又係拎操行



去到尾聲     男主人突然就爆出佢收埋左一晚嘅問題....

原來佢問老師有關升小學問題

其實這問題我也煩惱左好耐

始終第一個小朋友      對升小學呢家野真係零經驗

眼見身邊家長成日講邊間小學點點點       又熱烈地參觀小學OPEN DAY

而我     好像咩都冇做過     怪獸想法會上身    怕自己比人地做少左些什麼個女會輸蝕左

當然      只是怪獸地想    卻沒有付諸實行      懶...

幸運地     老師俾出左實際建議後    更幫我地打定強心針話如果抽唔中入去X小學

佢會叫校長寫信推薦入去     總之就一定冇問題咁話

睇得出老師真係好鍚我地個女

少左"小學"呢一個大煩惱      個人即時輕鬆左好多

因為家姐入到呢間小學     即代表細佬都好大機會入到

一時間KO左兩個煩惱     有時真係覺得好幸運


回想我自己小學(好多年前已被殺校    不存在了)

當時是我爸爸去教育局申請     我太細個亦唔知大概係咩情況

應該邊度有位就去左邊度讀     對於小學好與壞亦冇點講究

到左小六選中學       都係自已填表選中學

父母讀書不多    也不懂      當年自己也不懂

最後抽中左第二志願      入左區內一間Band 3 女校 (當年5個Band)

點解會選呢間做第二志願      已經記不清楚      好模糊

所以寫日記有寫日記好      就算記載的是多無聊事

畢竟是發生過在自己身上事      他日睇返都係一種回味

就算冇好的栽培      我都係咁樣長大過來      也不見得今天的我比別人差

所以我好同意男主人說沒有必要去跟人入埋玩同一個遊戲      冇意思的

我只要我小朋友生活健康快樂成長



最近聽到個女主動說想學琴     私心地我係好開心

因為我自小好羨慕人地識彈琴      如果佢學落去真係有興趣

我會毫不猶豫地買座鋼琴俾佢

自幼家窮      見人地屋企有個鋼琴      暑假有得去遊學

我都好想擁有

小時沒法子     到大時有能力      可惜已經彌補不到      已經回不到小時候

我承認我係想在個女度彌補自己小時曾經想擁有卻又無法觸及的

所以男主人成日話我俾太多物質個女

我也無法不承認     亦知道這樣不是很對    (幸好未算很病態)

我自己知道的    請老公你放心



題外話一下,  本想5.5 放晒建設走, 可惜佢爭少少到價就回落

男主人話我係燈神    我講出來指引一下道路俾大家

有機會再打     今晚實在太有興致喇

在男主人的多翻催促下終於要收手了!

以下係在釜山時部分隨手攝的相片
















28 則留言:

  1. 你個女真係幾可爰。但好似好少見佢開懷大笑。
    近排好似少佐成品喎。兩個posts都冇。

    回覆刪除
    回覆
    1. 睇漏左係女主人寫 。sorry

      刪除
    2. 佢少左成品, 因為佢又開始忙碌了

      刪除
  2. 放心啦,小學課程係為女仔而設,男仔冇運行。

    回覆刪除
    回覆
    1. 見完老師已經放心左好多喇
      基本上我地好似放羊咁對阿女,
      平時都冇點同佢溫生字睇書...

      刪除
    2. 小學女仔早熟一d,結果成績比男仔又好d

      刪除
    3. 小學成績無關成熟,無關知識,無關智力。要細心和聽話才能取得好成績。
      填充題:
      可( )的小狗
      同學仔填(愛)。100分。
      池某仔仔填(憐)。0分。老師說呢個字堂上未教。

      刪除
    4. 應該而家都會比分。
      不過考試就係咁架啦,d 分要唔要?
      其他東西與別不同是否更好呢?

      刪除
  3. 塘人老婆話:[咁似朱x賢小學運動服]

    回覆刪除
  4. 我自己啱啱生果陣諗住順其自然、但依傢對小學嘅情況了解多少少、我自已果區一線嘅小學無論功課同測驗考試都比「上緊位」的小學輕鬆。如果真係無功課無壓力果啲小學、入到的中學真係差到無眼睇。

    不過我仔今年先升K1, 仲未殺到埋身做決定。

    回覆刪除
    回覆
    1. 其實我都唔知咁快要留意小學, 係周圍聽到好多媽媽都講緊呢樣野...
      我最想係個女開心咁讀書, 如果入到勁校, 但壓力大失掉自信, 咁又有咩用呢。

      原來你仔仔先咁細個, 同我仔仔一樣都係來緊讀K1 喇

      刪除
    2. 我女就係咁,讀自己區名小學母校,小學六年都係中後,無哂自信,幸好失手都派英文中學,而家返學幾開心,後悔報錯,自己由百五年年進級到小六全級第三,唔代表個女做得番。人哋人哋嘅事,支持佢哋只係得父母兩人,人哋嘅嘢可參考only, 個經歷話俾我知好父母要幫佢哋就係佢哋出聲要俾選擇權佢,謹此而已!

      細仔K2 係咁練字,又加數,世界已變,家姐爸爸間小學唔會報,其實開心小學可能絕跡,可否諗吓國際學校?而家有人話三類學校唔掂得,政治入侵,聖公會,道教,佛教,睇吓新聞就會明。陰公我女聖公會小學上佛教中學,感覺可能人哋係啱!

      刪除
    3. 盧山兄有番咁上下年紀呢,個囡都讀中學。
      佛教英文無幾多間,善德??
      我自己認為,讀書開心與否在主觀的心,勁校教前面個d,讀到pk 都好爽,擊敗別人過程非常好玩。
      反而,揀番間能力相若既戰場會好好多。
      如果我個囡讀非資助幼稚園,成班怪獸同偽中產,肯定d 比賽唔夠佢地黎。

      刪除
  5. 好多時都係家長太貪心,自尋煩惱。男女主人態度一致,其實好難得

    回覆刪除
    回覆
    1. 因為我冇男主人咁叻...所以好多時都聽佢講好喇

      刪除
    2. 你唔會話我係豬,佢係老虎掛

      刪除
    3. 真心讚架。有d兩公婆信外人都唔信對方,憎足對方一世又唔分開,害埋下一代。

      刪除
  6. 作為一個中六學生,我認為一路到了初中才開始放手是最好的選擇,因為當時的年齡會開始有自己的想法,這時我們最好不去阻擋他們發揮吧o.o當子女到了可以擁有可以應付自己的自由之前,怪獸也不失為一個好選擇啦(茶

    回覆刪除
    回覆
    1. 都係既, 小事佢決定, 大事還是由父母決定。
      到升中學, 父母就開始要半放手狀態, 不過呢個階段仲離我好遠, 哈哈。

      估唔到睇呢個Blog嘅人, 年齡層都幾廣。

      刪除
    2. 最理想係,由細個開始識得去揀。
      去揀自己鐘意既。
      父母都唔影響佢太多,因為我無乜期望,亦唔需要同人鬥,因為鬥完結果差唔幾。

      刪除
  7. 囡囡又靚又乖,難怪老師咁想幫手=D

    祝女主人的兩位小孩快高長大,有快樂的童年!

    回覆刪除
    回覆
    1. 多謝你,
      做媽媽嘅見到自己小朋友多人鍚係幾開心嘅。

      刪除
  8. “自幼家窮 見人地屋企有個鋼琴 我都好想擁有“ 我正是這樣。
    唔緊要,三十幾先去學,比朋友同事暗笑,都唔緊要。好彩有個好老師肯收我,仲好有耐性。
    你地就快財自,好有條件去學好佢,圓夢。加油啊!

    回覆刪除
    回覆
    1. 我老婆都學過下,越學越疏懶。最後琴都賣埋。而家事件又再輪迴。

      刪除
    2. 都好睇個老師. 我成日都想GIVE UP TOO

      刪除

各位每個留言,係我繼續9UP動力,必覆。

Related Posts Plugin for WordPress, Blogger...