女主人燈神倉 中國郵儲銀行新股 我可以唔撈嗎２０

近期又再抱恙，不過只係少少喉嚨痛，聽日應該好番可以番鋪頭噴油。

原來上個月無呢個系列出過，難得女主人股票倉有變動，即管ＳＨＯＷ出黎比人睇下。（當然，女主人係同意架啦）

佢多左Ｄ乜？

佢抽左中國郵儲銀行 1658.HK  ，分配結果？佢抽十中六！咁高中籤率，梗係有問題啦。

結果呢，佢又同各位抽新股搵食０既人一齊搭沉船。

一共２４萬股票，連現金三十二萬係輝立，怕唔怕？無所謂啦。

印象中，佢得匯控同埋建行係正數，中車同郵儲都係負少少。

佢係我地家庭０既現金牛，以備不時之需，盡量唔會去做股票買賣，除非佢認為跌到價殘啦。

其實，佢買優先股賺息都係一個好出路，買價呢，買賣差價太大，急用時真係會蝕價。

講工作

呢個月又忙番一大輪，同時又埋數計下有幾多錢。果真如我所想，衝過左二十大關！每次以為已經係最大功率輸出，微調下結果又有空間再升。不過今年都唔太強求，ＫＥＥＰ住而家個收入到十二月先再算。

其實，下年２０１７做到１５－１７已經算唔錯。如２０１７年度都可以掂到二十萬，好有可能可以提早一年達標。

重有，令我最開心０既，係今年受氣比以前更少！我本身已經唔駛點受氣，今年忍痛作出改變，優化結構，本住最多做少Ｄ心態，點知反而唔駛咁受氣仲要錢多左。

唯一令人煩惱，係食材數量比較難控制，往時訂二十五包面粉，運輸哥哥好唔開心，可能因為太辛苦，搬重野０既錢又唔多。

上兩個月開始改訂１５包，即時唔同左，至少運輸唔駛成日轉，上到黎又唔會黑面。不過我就好怕遇到無哂料０既情況。

另一方面，因為ＵＰＧＲＡＤＥ左部機器，而家機用０既材料係會ＪＵＳＴ　ＩＮ　ＴＩＭＥ送黎比我！至少，煩少左樣野。

無錯，我Ｄ小生意就係咁細小咁無大志，訂個水我都覺得煩，清潔搵清潔阿姐攪掂，總之我炒旦就算。

唔會放大個生意，

又唔會縮小佢。

等２０１７開個好頭，可以保障２０１７同２０１８生意ＯＫ，咁退休之路應該無乜問題。

講資產

建行現價５.８９，曾經升到六蚊以上。

保守估計，升過六蚊我肯定全部股票倉位都番哂家鄉！喂，原來我Ｄ股票係蝕緊？保守估計０者，因我派息唔扣減股價，一路以來低位買入溝低個成本，應該都差唔幾了。（其實好肯定唔係打和０既，股息都收左百幾萬而呢兩年大手買入０既價錢都係５.５以下，兩年前邊有咁多錢去幾球咁買？）

另，持有六十一萬美金美國公司債，應該過兩日再有四千美金債息入袋，真的月月有息收。

再另外，有九萬美金買左ＧＬＤ（黃金ＥＴＦ）

再以ＳＨＯＲＴ　ＳＴＲＡＮＧＬＥ　來做１：１期權。剛剛九月平左倉，獲利一千六百美金。再即時開左十月倉，１３０／１２４。

現槓桿比率為１.４６，應該還算安全，若有其中一債違約跌到零，都唔會有咩事。建行跌到１.５先出事，除非，以上情況同時出現。

侍機再買入優先股食息，德銀唔諗，驚驚。都係睇ＨＳＢＣ個兩隻啦。

目標係維持比率係１.８之內，即借入金額係１１０萬美金（８５０萬港元）之內。’

都係個句，若建行升到十蚊，即時ＴＡＫＥ　ＰＲＯＦＩＴ走人逍遙遠去。

小弟非貪財之輩，只希望用錢換時間，去做一Ｄ自己想做０既事，幾千萬同幾億，其實無分別。

雖現在已好自由，但我想更自由。

講目標

其實主要係現金部份，考慮過能力問題，自由目標推多左一球。即８００萬現金收山。

以下是女主人部份：

以上係佢私人戶口

（佢重有公司戶口未計，個戶口好神秘平時唔拎錢出黎，佢自己都唔知有幾多，由佢）

女主人，ＨＳＢＣ入面有２０５萬，加埋輝立Ｄ錢，有３２萬，一共２３７萬。

而小弟呢幾個月０既收入（６０萬）都會還哂比佢，即係佢實際有２９７萬。

男主人，三年股息，約１７０萬（如派息不加不減）預計明年三月至合約終結前，一共２８個月，每月儲起八萬（低估前段高估後段啦），儲到２２４萬。

即係，女主人（２９７萬）加男主人（３９４萬）

等於６９１萬！

剩番個１０９萬點算？

靠女主人吧，哈哈。

當然，只要我２０１７同２０１８都開得ＯＫ，其實女主人可能不用增加一分一毫。

再者，我未計美債，＂金期權金＂，同將會買入０既優先股帶來額外收入。預計每月都兩三四萬。計埋其實已經唔駛用女主人錢。

八球，平平地買到區內三房（８００呎實用了），又或者加多兩三球按揭，可以買過千呎實用全區最大個Ｄ了。

如果到時上車盤都要八球？

你估Ｄ人反唔反？

到時我都要講多句，我呢Ｄ偽中產家庭，
每月主動被動收入得個三十萬，
兩個廢柴夫婦學咩人買樓，
學咩人做生意？
學咩人寫ＢＬＯＧ？

講其他

ＵＭ。。。細佬開學並唔係想像中咁順利。上左成個月朝早都仲係喊０既，可能係因為我鬧佢。試下唔鬼理佢，睇下好唔好Ｄ。另，咁快已經有功課做，細佬無家姐咁醒，唔算太識做，唯有教下啦。

家姐？佢好多課外活動，又唱歌比賽又朗誦比賽，真係送苦了帶佢去學野練野０既女主人同埋我老豆。尤其女主人放低鋪頭東西走出來接佢，仲特登將公司固有假期改左（其實另一原因同公司有關，非私人因素），非打工就有呢個好處，至少時間可以自控。

女主人送我ＴＵＲＮ　Ａ　高達盒旦，

因為佢記得我讚過靚！

頂，其實我唔係特別鐘意ＴＵＲＮ　Ａ，上次只係讚我自己噴得靚咋！

其他集數，經典重溫，睇下以前我點諗退休唔撈？

玩野之作，經典重溫！

我可以唔撈嗎 1
我可以唔撈嗎 2
我可以唔撈嗎 3 (減父母家用至自由咁仆街?)
我可以唔撈嗎 4 (葵花寶典)
我可以唔撈嗎 5 (你真係信做埋唔夠交租?)
我可以唔撈嗎 6 (幾日千萬富翁)
我可以唔撈嗎 7
我可以唔撈嗎 8 (我係溫室小花,你做唔做得起?)
我可以唔撈嗎 9 (性格是遺傳)
我可以唔撈嗎 10 (唔同年紀, 目標不一. 六十歲仲講有收租樓?)
我可以唔撈嗎 11 (讀書真係無用?)
我可以唔撈嗎 12 (深水埗玩具模型倉有我整0既模型)
我可以唔撈嗎 13 (買夠貨)
我可以唔撈嗎 14 (千金難買少年窮)
我可以唔撈嗎15 (建行減派息 成功財務自由)
我可以唔撈嗎 16 （入廠維修）
我可以唔撈嗎 17 (去蕪存菁；又上千萬)
儲夠七球就退休　我可以唔撈嗎１８
資產再配置 我可以唔撈嗎 19

再呼籲下，ＬＩＫＥ下ＳＨＡＲＥ下我個ＦＢ　ＰＡＧＥ丫，當流量不再單一時，更能令我暢所欲言。

各位０既留言係我繼續九ＵＰ０既動力！

小弟生活鎖事或股票期權小變動，會先係ＦＡＣＥＢＯＯＫ分享，再行文。按此ＬＩＫＥ我ＦＢ　ＰＡＧＥ