小弟在DISCUSS 並無出文
你回應緊0既,都係一個有心引你派膠0既人,並非小弟。
若有人以為我係DISCUSS 出文引HATER, 是否太小學雞?
小朋友, 暑期放完好耐了. 好好努力上班吧...

2017年5月12日 星期五

年青時比人睇唔起 相煎何太急 心態決定境界17


各位年青時有冇試過比人睇唔起?
本文十分歡迎留言,來吧!


今晚係YOUTUBE 睇左唔少年青人創業同埋講樓市如何貴買唔起0既創意短片,少不了又睇到撚蛇教人九成出租等有錢時變番五成再用租金當入息再買樓呢D屎橋,又睇到D四十幾五十老人身為老師笑年青人大駛去旅行買唔到樓,講埋D我悶到想訓0既道理。。。

係人生入面,你點面對比人睇唔起(過去或現在)?

發奮圖強就必然架啦,當你成功絕地反擊之後,事過境遷,會唔會用番相信方法睇人唔起?

做人呢,要有同理心,相煎何太急?

先講我自己後生個陣。。。

睇死你畢業好做唔做走去炒旦?當年我真係有同學咁樣同我初戀情人講(對呢D三姑六婆我最憎!結果八婆一號條仔比我初變情人搶左,因果報應!),以為我一世做炒旦(又比佢UP中喎!)

走到呢一刻,當年0既同學,以錢計,最搵到唔係最讀得書最攻心計個班。反而係追夢果個。。。不過,大部份同學生活應該都唔錯,點都有三五七萬一個月呀!

如果我唔炒旦,行佢地條路,我估我都係得三四萬,但問題係我唔做意做呢一行呢!

正好常常留言有位係隔離個科,早日投資其實可以避免中年悶悶地唔想屈係政府,到時有錢出黎自己執業都大膽D啦!

上司放假休息時打比你追魂CALL?

話說炒旦前我都做兩個月文員仔(八九千個D,而家諗番,我個EX唔嘈我都算係咁),明明星期六放長短週,你老味次次短週晨咁早打黎屋企搵我講工事?最後梗係嘈佢啦。上司?其實我一D都唔驚佢,我又志不在此,當時只係想試下。

而家如果見番佢?其實我都想SEARCH下佢已經搵唔到,上司離鄉別井一個人,我最記得佢話日日食麥當勞,因為每一度麥當勞都係同一味道。

有時,同理心其實好重要。人地刻薄過你,掉番轉頭係咪一定要咁樣對番人?咁多年前,艱苦都變成有趣0既回憶啦。

被後生女同事睇少你係酸臭毒男?

被後生女同事睇少你毒男?唔好意思,雖然我真係打機砌模型玩電腦0既毒男,仲一D都唔靚仔(老婆都係咁講),之但係我講野都幾FUNNY,說話間帶點智慧(有時係串D),不論進修定工作,都引到下同年齡女同事(靚唔靚唔好計啦!),有人送高達比我做聖誕禮物TIM!

上面隻S GUNDAM 係重新噴過,其實已有十多年歷史。

對於年輕過我的人,其實我又覺得做人要有夢想,成日行人地條舊路或者最安全0既路,可能係死路!咩係死路?唔係餓死你0既路,係令你平凡地浪費左人生0既路。



日日番工放工食飯ALL屎到老,就只係咁樣?

窒你成日去旅行唔儲錢買樓?

要知道,而家坐飛機去旅行好普遍,以前D老野唔捨得去旅行,可能因為真係貴,而社會上物質又唔豐裕,錯左唔少美好人生。所以老左喇,退左休,咪去下旅行滿足下自己。如果果班老人家又睇死你成日去旅行唔儲錢?其實係GENERATION GAP來,現在去旅行,就好似以前拍拖睇場戲咁正常。你以前要捱,點解一定要後生個班都捱?

(好似奶奶蝦新抱咁,將以前受過0既苦都要新抱受多一次?)

睇死你亂洗錢一世買唔起樓?

喂,以前粵語長片個陣,人人都係窮到租樓架啦。我果個年代,童年時可能都係住木屋,臨屋,徙置區,慢慢先轉去公屋啦!(我出世個陣,好似係同親戚SHARE地買左一隻船,再申請公屋!)

儲唔起錢買樓,咪租樓LAW!


其實租樓進可攻退可守,有人會話,失業唔駛交租?HEY,失業可以搬細D,或者搬番同屋企人住!未來搵錢0既野,你又點估到?搵得到,又駛乜怕買唔到租唔到?

與其諗住收租,做苦行僧咁節衣縮食儲錢,不如諗下,廿幾三十幾歲人生最美好0既時光,應該點去用。三十歲買個三四百呎細單位,不如租個五六百呎。唔通等到四五十歲先換大D咩,到時個種享受0既喜悅又唔同了。

而家D樓越黎越細,第日更細?非也,男主人個邊,樓齡大過我0既樓,一樣好細!以我所知,二三十年前,有一期0既樓又細又縮水TIM!都係樓價政策帶黎0既產物,並非一個絕對趨勢!

租客係消費者,收租仔係投資者。加租?比錢咪得,搬屋?比錢咪得。何必諗得咁複雜邊個著數邊個唔著數?討論區個D租樓日日賺(曲線來的),咩鬼記得交租,其實都係廢UP,每月多幾千蚊現金流,其實求其一個大學畢業生,跑番兩三份補習都有啦,真係要節衣縮食為買收租樓先做到?

唔好講年輕人,講我呢D唔上唔落0既年紀,我自己住果度,買黎收租的話,每月都只能提供四五六千現金流(未計物業稅差餉管理費地租),如果以我家庭開支黎講,要十幾廿層先夠。。。

小弟2007置過業,如果果陣唔放,而家果間物業都係一個月帶來唔夠一萬現金流(月供已經好小,三四千,問題係雜費唔少),又係要十層八層。果陣我邊有咁多錢?

逐間逐間買上去的話,
除非你毒撚一條兩三萬夠洗
否則根本好難短時間財自。

如果要二三十年,咁刻下光陰是否被浪費了?

我呢個淨身家過兩球美金0既家庭,靠物業收租的話,有排都未可以唔撈。年輕人想開始第一間收租的話,如果幫補下收入還可以,要提早退休,應該真係要做到五六十!

睇死你一定留係香港?

我唔係講果D發悔氣話移民個班,其實覺得無前景,出走唔係一件壞事。我呢個年齡層都有唔少BLOGGER因其他原因離開香港。唔想同佢癲,離開好正常。講人工講政治講工作機會都係SIDE氣,人最緊要活得開心,活係自己最理想0既舞台入面。

大家小時候,我的志願係咪做有錢佬?係咪想財自?我估唔係卦。。。

班老野向現實低頭,年輕時選擇左逆來順受,為何現今年青一輩一定要同樣SUFFER?以前規則係已經死左入埋棺材個班定出黎,點解要跟?我唔係黃絲更加唔係熱狗,有咩唔公平,大家同樣有SAY,點解要跟老一輩0既規則?



做人呢,要有同理心,相煎何太急?AGAIN!

當年你或者ON99讀書日日讀書夜夜讀書,深信讀大學會出人頭地,書中自有顏魚肉。何惜果個年代無互聯網,無人同你講又無人可以比較,結果默默走左條死路浪費人生。本身奴性又重,比人鬧都敢怒不敢言,現在屈埋帶唔落棺材之餘,連刷自我存在感都要刷得如此可憐。人生有咁多可能性,奈何年紀越大可以選擇越少,何必眼紅年輕一輩能放浪不愛束縛呢?

男主人廿幾歲時誤打誤撞完成左我的志願,之後鬥氣想試下炒旦搵錢。誤墮塵網中,一去十幾年了。雖然我都唔係易相處0既人,不過一個人0既特質,並唔係單睇佢學識,講野,用字可以量度,都係個句,你睇唔到別人優點同埋點解成功,正因為你道行太少層次太低。

看不到現今年輕人思維想法,你永遠唔明白佢地有0既創意,以及這一刻0既無力感,亦同能力有關。

40 則留言:

  1. 每日返工見到d 年紀比較大的同事日日坐係度等放工等退休,我唔想好似佢地咁,呢個係我搵錢動力之一。

    回覆刪除
    回覆
    1. 快d 教佢地如何財自退休,留番個位比年青人吧。

      刪除
  2. 如果自己無理想無夢想,對現在份工又無熱情可以點樣。

    回覆刪除
    回覆
    1. 識番條仔。
      不過如果長期咁負面,男人見到都會掉頭走。

      刪除
    2. 做人點會無夢想無目標,你未揾到姐
      每個人條路都唔一樣,慢慢諗啦

      刪除
    3. 當初其實點搵到去炒蛋呢?

      刪除
    4. 其實炒旦只係一樣極之平凡0既低下工作,視乎你點去運用。

      刪除
  3. "本身奴性又重,比人鬧都敢怒不敢言......何必眼紅年輕一輩能放浪不愛束縛呢?"

    哈哈,就係有太多向現實低頭的奴才,無夢想無理想,可憐地捱咗幾十年,然後指責下一輩唔行佢條舊路,唔去做奴才。。。痴X線。

    回覆刪除
    回覆
    1. 講出我心聲。
      唔去做奴才竟然比人笑係廢青。
      趁後生追尋自己喜歡既事喜歡既生活,到中年先至生活得如意,有冇錢係其次,最緊要自己鐘意。
      如食屎可長命,我寧願短d.

      刪除
    2. 其實巴菲特都講過:做愛梗系後生就要做,唔痛要等到80歲先做?

      刪除
    3. 咁多位前輩既說話簡直講中我心聲
      如果為左銀碼上多一兩個數字而日日行屍走肉,到底係為生存定生活?
      無奈小弟不才打緊份無興趣既工(但唔算辛苦),諗儲多陣錢走人轉行
      希望一路學投資+實踐,進修,可以完成我夢想(長期單車旅行)

      -一位初入社會的九十後毒撚

      刪除
  4. 莫欺少年窮,後生係本錢 :)

    回覆刪除
    回覆
    1. 係,後生係本錢,有無限個可能,能承受多種風險。
      表面上穩陣既路,其實留番比老野行,對年青一輩先最唔安全,扼殺青春。

      刪除
  5. 俾我有假都去旅行, 見到有D老野同時做左幾十年, 儲左幾百個鐘頭假, 真係唔知佢地係為左咩

    回覆刪除
    回覆
    1. 可能可以換番錢,或者唔做時當薪金咁出糧吧。

      刪除
  6. 收租人士中有好有壞,但我最看不順眼的,便是哋偽君子。

    例如自己做architect的,持幾個收租樓,就講到自己對租客幾咁好、比其他收租佬高一截咁~~laughs my head off:)

    回覆刪除
    回覆
    1. 果個藍有班下話。
      睇佢都撈唔掂,要靠收租樓先有得威威,而非本身專業。
      二三線演員去拍AV之後一鳴驚人。

      刪除
  7. 幾時香港人無咗包容嘅心?每一代人都有佢地自己嘅困難,苦惱。點解大家睇每一樣嘢都唔順眼?因為自我中心。從來無响人地嘅角度睇事睇物。
    70後60後嘅經驗唔可以強加落80後90後。應該分工互相體諒。可能你會話邊度咁容易?其實係睇你自己嘅性格咋。
    後生話d中年唔幫忙仲奚落人,其實係講嘢寫嘢嘅人的問題,應該分享經驗而唔係教人點做,點跟返佢地嘅footsteps..
    年輕一代有衝勁有理想有目標係好值得尊重,人人生活方式,價值觀唔同。做乜要強加你嘅觀念俾佢????後果肯自己承受就ok.唔埋怨咪ok lol
    大家唔好話d old seafood阻住地球轉,經驗係有用架。你睇醫生都揾個老老地架啦,做手術你都揾個有經驗架啦!

    回覆刪除
    回覆
    1. 找尋理想當然值得鼓勵,你要過放縱的生活的生活,洗脚唔抺腳亦係閣下的選擇,最重要的就係「唔好怨」。
      既然話自己有自己的生活,就無需要 conform to the norm ,同時又話要想買樓一生三宅,怨樓價高呢樣嗰樣。
      所謂唔好成日去旅行,唔好頻頻手機之類的說話,同「做多份兼職」一樣,都係for 嗰啲想要有一舊錢做某些事(例如買樓)的人的「可行意見」而已,而不是給那些想追夢的年輕人的意見

      刪除
    2. 魔術兄說得對,每個年代都有追夢的年輕人啦,更何況努力也不一定會成功,如果唔係都唔會有人有父幹有人乜都無。要追夢根本不會怕這些人說東說西的奚落,追夢的人付出從來都比普通人大。

      最後想說先苦不一定後甜,先甜不一定後苦,但是機會率一定大一點。

      P

      刪除
    3. WAWACHING:睇下果位老屎忽係行內係咪勁人啦,果堆叫人收租唔好揮霍0既,好多都係呢十年先掘起,之前?浮浮沉沉係自己工作中,舉頭怕老細,低頭思辭職。
      魔術師:理想又好夢想又好,難度有高低之份,至於可行意見有冇靠害成份?苦行僧式儲錢而家已經無用!你令我諗起大學時有個仆街同學見我無女朋友,同我講,不如考慮下REBECCA!屌。。。又矮又醜,我無女朋友0者,呢個可行方法係靠害。
      P:追夢0既人不一定堅強,亦不一定一出世就好叻,多一分老點,少一個可能。先甜後也甜WHY NOT BOTH?

      刪除
    4. //至於可行意見有冇靠害成份?苦行僧式儲錢而家已經無用!

      條條大路通羅馬. 有人真係靠苦行會方式儲到錢, 都係方法一個, 其他方法都係一樣, work 唔 work 睇配唔配合到自己能力啫. 唔好成日去旅行、唔好頻頻手機、做多份兼職等等, 應該都係 target to 嗰班洗腳唔抹腳, 但係又怨無錢買樓的人, 而唔係「有其他方法搵到錢,唔介意間中享受下生活」的人囉.

      刪除
    5. //有個仆街同學見我無女朋友,同我講,不如考慮下REBECCA!屌。。。又矮又醜,我無女朋友0者,呢個可行方法係靠害。

      如果搵 rebecca = 買細價樓做收租仔, 對某些人來說真係work的,係唔啱你口味啫;咁你唔去馬搵rebecca, 反而做留自己的「availability」,其實就等於儲起一筆資金去做其他嘢(例如創業),都係另一種方法啫.

      刪除
    6. 羅馬未必係人人想去0既目的地, 有人意志簿弱或者無主見, 易隨波逐流呢. (唔代表佢地無其他過人之處, 佢地亦有資格談夢想), 呢班怨樓價高的人, 未必真係在乎樓價高, 只是價值觀一路被扭曲.
      當年, 其實REBECCA 外我是有人s追的, 不過最後揀左自己另一個鐘意0既.
      我無保留到availability...

      刪除
  8. 好榮幸可以粉墨登場到係師兄篇blog,多謝😹

    睇到師兄講我的志願果度,真係有D感觸。大家細個志願都係老師警察上太空,但點解人到大左,反而個個都變成發達,財自?不過再念多陣又念通左,其實細細個衣食住行都有父母提供,其實已經變相"財自"左。如果人大左有日可以唔憂柴米,我念仍然可以大談理想。
    近日睇左starman 兄本書都有d啟示,第一part有講 年青人打份牛工好正常,畢境我唔食,父母都等我開飯。但應該搵份學到己第日想做既野既工,收住人工學野,累積財富,收成就指日可待。
    其實我而加都勉強達成到70兄講既假財自,所以有時都念好唔好及早跳出泥試下其他野。

    回覆刪除
    回覆
    1. 當年我IN過荔康居(我無做番本行,只係個陣實在太窮),而家果度變左文物了。
      果個SENIOR仲笑我地,一份0.25好過做份文員丫。
      我真係想DLM,最後呢個SENIOR好似出左去做私人,儲到錢,就試下自己想做0既野,唔好等。
      再老D就無得試。
      STARMAN我同佢同台食過飯,佢好後生,就係創業追夢要趁年青!

      刪除
  9. 人生是自己的,梗係揀自己鍾意行的路,何需理會塘邊鶴點睇。

    回覆刪除
    回覆
    1. 最慘果班人唔係寫住"塘邊鶴"係個頭度,會以前輩/成功者自居。。。

      等同財演一樣,"我昨日推介0既,己爆升"

      小弟好著重自主自決(唔係政治個D),三姑六婆出黎左右最唔鐘意。

      刪除
    2. 但這些“塘邊鶴”也會影響你將來的收入和生活,人在江湖。

      刪除
    3. 人在江湖,就要做江湖大佬。

      做出黎係WORK,三姑六婆即時無野講。

      刪除
  10. 所謂「睇唔起後生」的中年,相信主要存在於職場上,個人認為其實在於職場文化的改變。

    例如假日追魂Call,中年上司以為這是理所當然,因為他「想當年我後生嗰時咪又係咁」。又例如責罵下屬,被黑面甚至反被串返轉頭,中年上司認為不可思議,因為當年他上司曾經跟他說被責罵是「份糧包埋」。

    當然,也有部份年輕人認同,會假日免費工作,以及笑着被罵。但是,也只有一部份而已。

    另一部份,假日追魂Call?潛水唔接。份糧包埋?「我簽嗰份約無哩條個喎」。然後該中年上司才會發現,原來電話是可以不接聽的,也原來合約真的沒有被罵條款……

    這情況,其實跟傳銷差不多。找到認同的,就能夠繼續一層一層壓下去。找不到接貨的,唯有自己硬食,咁佢抱怨吓都好正常。

    鬼叫而家啲後生都有讀過書,同埋僱傭條例可以喺網上查到咩。面對上司無埋要求,博上位嗰陣咪做囉。唔得閒嗰時,真係睬佢都傻。

    快餐人上

    回覆刪除
    回覆
    1. 快餐人講得好好呢,「想當年我後生嗰時咪又係咁」!
      就係班友仔當年七左,而家想用同一圈套厄九年青人。

      比著係我,一定反擊,一係辭職。

      係資訊發達0既年代,上一輩係唔夠而家呢一輩黎,只要再有多一點點創意,要搵番佢地錢,一D都唔難。

      刪除
  11. 回覆
    1. 你個BLOG好多旅行相呢,真開心,

      可借我已為兩個化骨龍之父,好難咁逍遙自在了。

      刪除
  12. 後生梗係咩都試, 做下自己中意做既野, 時間係錢買不到的. 例如...去一轉烏俄見識一下沒有港女的世界

    回覆刪除
    回覆
    1. "去一轉烏俄見識一下沒有港女的世界"
      相知恨晚....

      刪除
  13. 追夢,是一個很好的提醒,尤其在現今的社會氣氛,不少香港人都漸漸迷失了自我。

    回覆刪除
    回覆
    1. 是的, 我相信唔少人的夢想唔係想財自.

      不過被工作及金錢困擾,早日財自才可以有時間追夢.

      但買樓收租現時未免太慢, 財自可能都勉強得, 但係花費光陰太多了.

      倒不如要夢想唔要面包.

      刪除
  14. "本身奴性又重,比人鬧都敢怒不敢言......何必眼紅年輕一輩能放浪不愛束縛呢?"
    身邊朋友本身沒有資金,現在每個月拿45k 薪水(工時真正24/7不停做,你應該猜得到是什麼工作),視這種工時為正常,朋友完全沒有追夢的心啊。。重點是第一桶金從哪裡來。打工也行,創業也行,條條大路通羅馬

    回覆刪除
    回覆
    1. 羅馬只是金錢的話, 我從沒興趣通去羅馬.

      只係追夢期間, 做得好, 錢自然會來.

      羅馬只是伴菜, 不用行什麼路.

      刪除

各位每個留言,係我繼續9UP動力,必覆。

Related Posts Plugin for WordPress, Blogger...