小弟在DISCUSS 並無出文
你回應緊0既,都係一個有心引你派膠0既人,並非小弟。
若有人以為我係DISCUSS 出文引HATER, 是否太小學雞?
小朋友, 暑期放完好耐了. 好好努力上班吧...

2017年6月1日 星期四

換債又換股 我可以唔撈嗎29

講工作



五月份工作又輕鬆過四月,哈哈。。。係困身0者。

如無意外,六月份炒旦一係得閒死一係忙死。生意的確係可以估計,而且年年都估得好準。

今年的確無上年咁受氣,女主人講0既,"做得唔開心唔好做"。係LAW!反正唔係無錢唔係等錢駛,何必谷到咁盡?

計埋建行利息,唔再投資的話,扣埋借貨成本,一個月九萬蚊息,即使唔撈都唔駛擔心。

另外,男主人鋪頭法團話要攪翻新工程,要每戶分擔費用。睇下張通告,都唔少,約係兩個月租金。

阿業主買左番來收租唔知夠兩年未(我真係唔記得,我個鋪應該係易手最密的!),無啦啦比人扣番兩個月租。

肯定今年年底加我租,我估我加4%就可以抵銷佢加我25%。而呢個亦係我預計0既最大值。

年底,簽多18個月,過埋佢就收山!

講投資

賣左兩支債,換入另外同月份兩支。

PBFENE被贖回,贖回價平過市場價,賣左佢,換入TOY(希望佢唔執啦!)
KND見有6蚊利潤,換入另一BELOW PAR 債HTZ(希望佢唔執啦!X2)

截圖如下:

另外,又賣左SGX REITS,持有半年,連三次股息及股價升幅(有一隻蝕0既,P40U!),獲利10%

原因?我發現C-PRN 都做到係我想派息0既月份派息,而且浮息,買入價時股息有7%,比HSEA HSEB 低,結果買多少少啦。


反而最新不肖子係CUF.UN!蝕緊四千幾加紙。。。睇下溝淡佢好唔好吧。

截止五月三十一,資產分佈如下


建行輕微上升,升到八蚊我唔續鋪租啦~~~!

講目標

女主人本月資產(得番一隻中海油,其餘現金)365萬(上月357萬)

男主人現金連CAD資產為66萬(上月為53萬)

本月合共432萬(上月為410萬)

香港人最鐘意講樓,
我呢D無殼蝸牛死窮L,
只能買到890萬0既樓!

唔係我謙虛!!!
我住緊個度0既三房叫價都900萬啦,仲要唔係你想睇就睇,要比睇樓費架!幾錢?AGENT SEND過來的,如下圖!


女主人話,貴成咁唔會買,租把啦。係喎!432萬做少量槓桿,7-8厘一定有,仲慳左其他洗費!你唔跌又唔係問題,我其他資產一路跟住升。

可憐香港班後生,一係窮一生精力上車買間阿婆舊樓自覺威威,而懵然不知正被老人家用樓透支佢地青春。。。

唔買樓,又有幾多人講得出做得到?

最後,上兩個星期0既實驗品!
MOLOTOW LIQUID CHROME 上色!
Wing Gundam EW (SD)
用GAIA T09溝稀1:1,噴完放番三五日唔好摸,
等佢乾左就唔怕有指紋了!再係上面上色也OK!



65 則留言:

  1. 用樓透支佢地青春呢句說得好!

    回覆刪除
    回覆
    1. 我都係拾人牙慧。

      老人無左青春,想後生既都一樣成世on99消耗自己青春。

      刪除
  2. 預祝70兄早日達成目標!

    回覆刪除
    回覆
    1. 其實已經係時間問題,經濟上係可以隨時劈砲的。

      刪除
    2. 要唔要臨記幫手炒蛋,睇下我有無慧根等你劈砲時承傳下去

      刪除
  3. 睇樓比$500 好過去搶,睇十鐘,即每六秒收五蚊,好搵過聽咸濕電話。

    回覆刪除
    回覆
    1. 我同老婆講,每個星期日都約佢睇樓,再放飛機。
      等佢每星期on99係屋企等。

      刪除
    2. 我都係第一次聽到要比錢睇樓

      刪除
    3. 新聞睇過就係一百幾十, 五舊水咁大咬就未聽過.

      刪除
  4. 睇樓費?AGENT收定業主收?

    回覆刪除
    回覆
    1. 梗係業主收啦。
      肯定自住又想試賣,廢事變示範單位。
      吉左就係鎖匙盤啦。

      刪除
    2. 如果一日有一個傻瓜來睇就好搵過放租,仲唔使比傭金AGENT?!留個賓賓o係屋企應下門就得,名副其實零成本,咁收租仔搞咁多野咪好on膠?XD

      刪除
    3. 係喎,自住仲有睇樓帶黎既現金流。
      無租霸,暪稅就一定。
      一個月睇八次,等如工人一個月人工,免費工人。

      刪除
  5. 個三房間格都幾四正,不過唔知點解香港好多單位設計都係大門對房門,風水唔係咁好

    話時話呢個睇樓$500既單位標價重貴過佢樓上個層,真正吊高黎賣

    回覆刪除
    回覆
    1. 估計自住又想搏下有冇水魚。
      哈,竟然集中係個平面圖,最大果隻計天台車位叫緊1500萬。

      刪除
    2. 我都留意緊三房單位丫嘛

      刪除
    3. 基本上三房適宜一家三口(一主人睡房加書房/衣帽間,一房給仔/女),另外每多一隻小魔怪就多一間房,如有工人姐姐再多半間房。

      刪除
    4. 三隻就可以兩兄弟或姐妹share 房。
      搵d 有工人房的,無咁刻薄

      刪除
  6. 如果佢唔係真係賣樓....你出完價...佢話唔岩...每次都賺$500~~~ 會唔會係咁?

    回覆刪除
    回覆
    1. 係喎。
      財自孤獨老人適用。
      無兒無女,但定時有睇樓客探佢。

      刪除
  7. 睇樓費都有⋯⋯⋯⋯祝佢好運
    另外個則唔錯,算ok.

    回覆刪除
    回覆
    1. 幾十蚊都可能係唔想白撞。
      五舊水係一門小生意。
      80後求死隊長可用呢招,好過攪一大堆野仲比銀行睇唔起咁去轉按。

      刪除
  8. 70後兄所持的3隻直債我都有...
    我都係希望佢地唔好2021前會清盤笠!! 哈哈~

    btw, 睇樓要收錢好過收租....

    回覆刪除
    回覆
    1. 日日有人睇就正。
      竟然換左兩支債都同你有三隻重覆。

      刪除
    2. 公司債高息其實唔係選擇太多, 我多數選par低過100~
      HTZ係我買入後由97跌到92... 長楂等到期雖然無乜所謂, 不過前題係佢唔好執笠呀!!

      刪除
    3. 我計埋accrued interest 應該94點幾入。
      升過par就換,否則咪等佢唔執笠到期。

      刪除
  9. 70後兄 . TOY 果隻 Bond 用左TRU Taj LLC / TRU Taj Finance Inc (TOY 12 08/15/21@), 不是TOY INC....12% Bond Yield 似乎風險較高? 定係70後兄有另類評估風險的決策model ? (願聞其詳⋯⋯。^_^)

    回覆刪除
    回覆
    1. 我亂黎架。
      真心博佢唔default.
      你太高估我了。

      刪除
    2. 又是呢句^.^ 好彩我看慣左你ge Blog...haha anyway thanks

      刪除
    3. 70後兄有運氣好重要!
      間公司名咁奇怪我都查左查~ 原來母公司係Toysrus~

      https://www.bloomberg.com/research/stocks/private/snapshot.asp?privcapid=378824209

      刪除
  10. 70後兄好耐冇見。買樓唔同買棵菜,隨時一步一生。

    回覆刪除
    回覆
    1. 但買棵菜心態個d 發左。
      買股個班發哂。。。毛。

      刪除
  11. 你會唔會怕ib 執粒攪到身家無左半部份?
    我都有筆錢係身,都諗過買債收息 租樓唔買樓, 計過條數都ok. 只係怕ib執粒...

    回覆刪除
    回覆
    1. 怕就唔好買喇。
      正常買下樓買下港股也不錯。

      刪除
  12. 其實以70兄既資產,只租樓唔買樓,絕對可以過到天上人間既生活質素。相反買樓…不多說了我們都懂的

    不過租樓至少面對下面問題,我都未念通。而加因為準備結婚,又唔想白比租人賺,比左小小錢買住間啊婆樓當儲錢又唔洗交租先,考慮多幾年再決定吧。

    1. 搬屋問題。租約多數一生一死,如果唔好彩次次都一年比人趕走又要搵樓又要搬都幾係野。另外裝修同埋粉飾家居,其實都係生活情趣同成就見證泥,如果成日盈住有日都係要搬,就咩都唔敢搞了。

    2. 面子問題。呢個聽落比較膚淺,但都明白香港有樓先係成功既價值觀。有時無知的朋友親戚問起,一聽到你係租屋,任你住幾靚幾大既屋,都即刻表情上刻著"下~~租嫁炸?"的表情,然後又會話幫人供樓好泄底,不如正正經經儲錢買返間宏宏~特別係對住老婆既親戚朋友,大男人心態發作可能更不好受。

    3. 退休問題。可能後生時唔怕搬,只租不買省返d現金流可以享受生活。但真的難保老來時投資盈利追得上樓價升幅。只怕老到有一日想定下來,不過資金唔夠一炮過買起層樓,銀行又唔肯做按揭比你。除非到時仔女考順幫手供啦,不過呢d真係冇得預。

    唔知70兄又點睇呢?

    回覆刪除
    回覆
    1. 如果我無仔女,應該可以一路租到死。或者臨老才FULL PAY。
      但我有仔女,要搬唔係難度。再者我估果陣四大長老唔係度,洗費又少左。

      同埋,氣力0既野,可以用錢解決!(我係無乜力氣0既男人,老婆大力過我)

      面子問題呢,我一向唔理人點諗。就好似你個科咁,我完全無視果種懶勁懶高尚0既PROFESSIONALISM。。。

      簽約可以簽兩年死,錢解決到就唔係問題。

      刪除
  13. 香港樓設計, 我唔識評論. 我係中東住慣千幾呎呢.

    回覆刪除
    回覆
    1. 哈哈。
      同中東同事比,佢地住得大唔大?
      係香港,也是人比人。

      刪除
  14. 嘩, 乜睇樓有$500咁好!
    我朋友不在香港住,依家放間吉的豪裝樓,我幫手去開門, 通常我group 埋 d agent 一次過星期 六,日入去2,3 個鐘俾客睇。我都想收番 $500車馬費。岩岩我朋友話唔放住, 我就收到agent 打黎講粗口。

    回覆刪除
    回覆
    1. 講粗口咁差? 打去同經理講下啦...
      你同你朋友好好感情喎, 肯幫手做跑腿.

      刪除
  15. 70兄我又學你放咗KND入HTZ,但HTZ第一季業績好唔靚仔,同埋租賃業被共享概念打,唔會有運行,只不過佢全球有三萬幾員工,無咁易執,再唔掂會炒人先。
    另外,我0.77放咗放咗P40U,準備換另一隻T8B。

    回覆刪除
    回覆
    1. 希望唔會搭沉船, 哈哈哈~~~
      P40U 我0.755放左, 好彩有少量溝淡過. 換馬買左C PRN

      刪除
  16. T8B 88%的年期大约为14年或更短

    http://cj.sharesinv.com/20170309/44635/

    回覆刪除
  17. 我隻HTZ 2019也被贖回了, 又要係極貴的bond market中搵嘢來買, 真係好煩.....

    回覆刪除
    回覆
    1. 我唔介意你抄我,買左幾耐?CALL PRICE 好似102。幾咋

      刪除
    2. HTZ 2019 Call price 100...買咗2個月唔夠就玩完 LOL

      刪除
  18. 介不介意透露一下你買隻TOY Bond時大約什麼價位?
    JR

    回覆刪除
  19. 謝謝, 只是想用來參考一下而已,
    因為而家隻bond已經上到99元了.
    JR

    回覆刪除
  20. 70兄,本人新手一名,留意到IB借美元息率升了不少,若買債息差收窄了,只能選評級較低的債買以维持回報, 請問你有何睇法? 或者將借了的美元債轉其他較低息currency是否行得通?

    回覆刪除
  21. 你好70兄,剛找到你的blog學到好多野!
    剛使用了IB模擬ACC,找到部份你介紹的債.
    我找到一隻citi group 8.5% Domestic bonds,詳細資料:
    http://cbonds.com/emissions/issue/53777
    上網找了很久都冇Domestic bonds的資料,請問能介紹下或指點下邊到搵到相關資料
    想買之前了解下先,citigroup應該好穩陣,最怕佢續回,或唔排息

    另外問左IB,息口,頭$10萬USD要2.66,大部分債都係做緊最多3成
    但如果每月冇做到trade 會收$10USD,70兄你每月都做trade定照比錢?

    多謝!

    回覆刪除
  22. 你好70兄, 招牌菜「小奄列」 VERY GOOD.

    回覆刪除
  23. 70兄,我也是用IB 買野的,想請教一下,你知不知道經IB買美股/債死後是否都要比遺產稅? 用公司再開IB 戶口是否可以避過?

    回覆刪除
  24. 70兄, 多謝分享你的投資心得, 本人已把手頭物業放了, 想學你買下野收息, 由於本人不太熟金融產品, 如果手頭有1千萬, 可以如何令每月有5萬的收入, 因為本人已退休及沒有仔女, 只想休閒地過活. 謝!!

    回覆刪除
    回覆
    1. "不太熟金融產品" 但走左去賣樓?
      老人智慧買匯控都有五厘一年, 洗費少的話, 買隻盈富可抗少少通漲.

      刪除
  25. There is a news about Toysrus today:

    明年4億美元債務到期 正重組債務 CNBC:玩具反斗城或破產
    https://news.mingpao.com/ins/instantnews/web_tc/article/20170907/s00001/1504757750554

    回覆刪除
    回覆
    1. 即時有人彈出黎。哈哈。
      我也留名等佢違約。

      刪除

各位每個留言,係我繼續9UP動力,必覆。

Related Posts Plugin for WordPress, Blogger...