小弟在DISCUSS 並無出文
你回應緊0既,都係一個有心引你派膠0既人,並非小弟。
若有人以為我係DISCUSS 出文引HATER, 是否太小學雞?
小朋友, 暑期放完好耐了. 好好努力上班吧...

2017年10月3日 星期二

小朋友能力圈 我可以唔撈嗎33

開學九月終於過去,相信我同女主人都過得唔容易。



因為我堅持帶升小一女兒番放學,結果作息時間大混亂。要習慣仲要一段時間,話哂十年八年習慣唔係一個月可以改變。

辛苦左?其實唔係,咪又係咁過,以不變應萬變。同時試下減少飲少D高糖飲料(你話我迷信又好乜都好,高糖飲料對我工作有點作用),改左飲茶,同時要工作時食番D野,否則又係會唔夠電。

無計,個人弱雞。

不過小學家長同幼稚園家長一樣,都有小學雞同自私精。莫名其妙地,老婆入唔到家姐個班0既WHATSAPP GROUP,結果可能少左D資訊。算吧。。。

反正入到小學,都變成鬥成績遊戲。自理與否,三歲定八十。

講到鬥成績,女主人開始發癲,玩做練習!我意見係,中文的確有難度,要練。其他科就由佢先,考試先算吧。

既然個女都話易,唔好同佢溫。




再者,從來成績好0既人都有自己讀書0既方法,一齊溫書個D嘍囉,通常成績都唔入流。

何必用自己0既方法去改一張白紙呢?只要遠遠望住佢就可以了。

講真,兩姐弟都係學得快0既人,細佬直頭超卓。只要係記憶力方面好好比佢地自己適應下,唔好攪咁多古怪野,其實未來成績唔會太差。

學校攪0既溫習班,我千萬個不願去。適量做下中文便可以,睇過本中文書同平時D工作紙,作句同埋閱讀的確有點難。

兩個小朋友0既能力都唔低,千祈唔好傷仲永。再者,你寧願佢將來有個可愛的人,定想佢搵到錢財自但孤獨一人(我有中同BIG4高層樣衰女人,好可憐。)

另外,呢期PS4 遊戲打捉鬼敢鬼隊,真係可以四打喇!雖然細佬戰士唔掂,家姐射極都唔準,不過個遊戲較易打又唔易GAME OVER,百幾蚊算係咁。有機會拍番條片由個女作旁述先!

講工作

以為改左作息時間會影響工作,結果竟然估唔到係咁好,個人相對電力充足好多。過埋呢三個月,再休息多一日。預計收入少左五萬左右。

女主人工作應該比較淡靜,而佢亦都為左個女對功課而早左一個鐘收工。另外,過幾日女主人鋪頭就會上電視了,相比以前0既採訪,今次其實無乜期待感覺。或者女主人唔出鏡,同時訪問內容同鋪頭好似唔太相符吧。

講投資

呢個月變動比較大,首先GLD高位又回落,結果我又係要轉倉。去到11月中,SP122/SC128,約為882美金,即大約1%"股息"。

另,我非常豬咁賣左TOY,因為佢上番我買入價,我以為會有ACCRUED INTEREST,原來係TRADING FLAT BOND係無0既。結果我蝕左一個月半息。勉強阿Q叫做平手走(但蝕借貸利息),買入XRM9。5。

同時,SPN CORP被CALL,賺息賺價之下,換左貨SVU7。75。

早前手痕買入WIN7。5,依然係跌。我呢D零分析亂九買跟大隊0既人,太過BELOW PAR 真係買唔過。雖然早兩日升番上74,依然係蝕0既。

女主人個兩桶油,一升(中海油)一跌(中石化)。佢本來諗住一齊沽左佢當賺少少,比我阻止左。既然又未知買乜好,銀碼又唔大,不如讓子彈飛一下。出文今日,一桶唔郁一桶再升。如果計埋之前股息,其實另一隻唔係蝕0既。

我比女主人既策略係,小注執死雞,尤其唔少有料BLOGGER都有推介下,唔係叫佢跟,只要尾行呢D推介,合適時小注買入便可以。

九月份女主人扭計話唔做,叫我比個目標佢。我都好有心機地J哂風兄所有投資相關文章,同佢計過下,有得必有失,由奢入儉難。每月得萬幾蚊其實唔係好好駛!

同時幸得風兄一眾BLOG友提醒,追通漲個部份我計錯左數,實際上唔駛咁多。

結果,女主人有目標可追之下,係公司提左15萬出黎自己戶口充數。。。哈~

講資產

女主人九月底止,有414萬(上月393萬),女主人目標為650萬。

男主人買買賣賣,唔X識計,唯有用淨資產減去港股淨值(因餘款來自債息股息及其市值,再加自己現金儲蓄),咁樣港股部份升跌我都唔理佢。

男主人九月底止為208萬(七月為152萬,計法不同,比較黎無謂)。男主人目標為淨資產2000萬,或時間過去635日之後。

23 則留言:

  1. 唔使二千,一千都夠退了。

    回覆刪除
    回覆
    1. 如果得我一個,無老無小朋友的話,或者無四大長老,就夠。
      慶幸我有齊哂。

      刪除
    2. 1000加自住可以過的很瀟灑了。
      不過70兄家大業大,開銷也大,最緊要係2000嘅目標佢做得到。咁就梗係多多益善喇

      -Allen

      刪除
    3. 你中了,我無自住。加多五球收息就好夠,住屋預得好鬆,到時能屈能伸。

      刪除
  2. 淨資產2000? 仲差一倍喎:|

    回覆刪除
  3. 恭喜70兄, 沽左TOYS 唔豬呀, 萬事大吉!

    回覆刪除
    回覆
    1. 係,沽左唔駛日日睇下佢有冇大變。
      否則有違當初投資本意。

      刪除
  4. 650萬,保守啲以3%通脹為目標,當50萬係備用資金,600萬揾6%以上回報嘅投資物,完全無槓桿,其中400萬嘅6%當生活費,即每月2萬,其餘200萬嘅6%回報再投資追通脹。200萬嘅6%等於400萬嘅3%,剛好可以追到通脹。

    以上只係極保守估計,2萬係女主人一個人嘅使費仲不包租金水電煤(呢啲70兄包哂,哈哈),其實已經好好使。當然如果70兄同女主人對生活水平嘅的要求同我不是同一level,又另當別話,科科。

    回覆刪除
    回覆
    1. 我預佢用一兩球槓桿再投資,若仲有能力就小量執死雞。
      若佢早過我完成,可能佢要養住佢同埋外母。
      外母是變數,千萬唔好再比銀行點佢買基金年金等月供東西。
      到時外母佢又重返職場。

      刪除
  5. 其實你兩公婆都到左一個可以安心的層次境界,可以放慢下腳步感受下人生。普通人正常生活,2千個應該好足狗了。btw, 有千五萬同兩三千萬,其實生活水平分別不大,全心理關口作祟。

    回覆刪除
    回覆
    1. Yes. 不過住屋,個人駛費可以慳,四大長老不可慳。
      留多少少buffer, 一黎再投資增值又可,二黎安全感高d, 免被人/家人/陌生人笑我炆炆緊。

      刪除
  6. 其實你已可以唔使撈,希望能繼續分享你的投資心得,多謝多謝

    回覆刪除
    回覆
    1. 其實無乜投資心得,九成九抄人。
      反而真係乜都唔撈既生活,我搵極都搵唔到有分享。

      刪除
    2. 等70兄開先河介紹財自生活了,我諗多數人都係又返轉頭做返嘢

      刪除
  7. 聽落計劃最大風險,係長老/第時自己醫療開支。希望70後兄有計埋呢部分。

    飲少d甜嘢係好,癌細胞依賴糖分生存。

    回覆刪除
    回覆
    1. 私家有時唔夠政府好. 不過兩公婆已有醫療保險COVER. 人壽兩人買TERMS 加埋有10M.

      多口講句,全訲細胞都依賴糖份生存0既...

      刪除
  8. 七十兄兩公婆已經接近搵夠(實情係已經夠有突),我呢D十劃都未有一撇,好遙遠既目標

    講開家長group,會唔會因為係七十兄接送所以先埋唔到堆?媽媽同媽媽係比較容易接近。同埋而家上學期都未過一半,講咩都係言之尚早。

    回覆刪除
    回覆
    1. 老婆都入唔到, 佢有去新生報名呀...
      不過唔理啦, 可能係是非地呢.

      刪除
  9. 有老有嫩,一千萬應該好忟,頗同意70後兄以二千萬(以上)為目標。

    就算唔用槓桿,用再投資追通脹,剩下作洗費都綽綽有餘,那才算是找到自由。

    回覆刪除
    回覆
    1. 慳有慳洗啦.
      四座山, 住屋, 自己駛, 長輩, 小朋友.

      我齊哂.
      唔靠收租, KO 四座山加四十歲前看透唔撈, 未見有BLOG 紀錄.

      刪除

各位每個留言,係我繼續9UP動力,必覆。

Related Posts Plugin for WordPress, Blogger...