小弟在DISCUSS 並無出文
你回應緊0既,都係一個有心引你派膠0既人,並非小弟。
若有人以為我係DISCUSS 出文引HATER, 是否太小學雞?
小朋友, 暑期放完好耐了. 好好努力上班吧...

2018年5月24日 星期四

心態決定境界22 尖酸刻簿哈比人

一直想寫哈比人0既故事,每次起手又放番低。


邊個哈比人?我同佢見過一兩次面,唔FRIEND但郤間接常有聯系0既人,正確黎講,係太太0既中同0既老公。因為某D原因,中同同我老婆關係幾密切,一黎係同學,二黎係工作上有合作機會。

要講,應該要由哈比人背景說起


1 今年33歲身型極似哈比人(我已經唔高,佢又肥但矮),樣似倫永亮(如上圖),其實倫生個樣都似哈比人!

2 土砲理大畢業,商科仔(當年呢D科好易入)

3 曾經一度算係男主人半個同行,只不過係打工仔

4 之後,撈唔掂(佢唔認0既)改左去賣玩具。即係入D一二手玩具番黎,經網站賣去外國,又係INS POINT 寄賣下咁啦。咁得閒0既在家同行街街工作,但老婆就繼續做打工仔。。。

5 最近更新都兩年前,做番老本行,實行兩邊都做。

6 今時今日都仲係同老豆住!老豆係退休整飛機佬,有退休金。又係2014定15年賣左間柴灣居屋變租奴(搬左入元朗喎!),但另一方面又爭住親戚七位數字(有冇還清就唔知了)

7 同時,佢太太又話佢投資基金有斬獲(真係估唔到有幾多喇)

正因哈比人個老婆同我家關係都算密砌,初期我對佢太太無乜意見(後期0既問題,算吧),但對佢老公哈比人都無乜好感

打從2012年,食過一次飯,當年佢都只係廿幾歲,聽佢講野已經好不可一世。正因小弟算是半個地區行內龍頭,附近區域咩人咩公司做得好唔好,都略有所聞。見哈比人好似井底之蛙咁以為自己好勁,印象已經唔太好。

即使今時今日,我都覺得炒旦小生意並唔係D咩值得一晒0既生意/工作。如果唔提收入,根本人地會覺得你搵朝唔得晚。。。哈哈。

**********
以下係小弟私人埋怨,寫完覺得都幾悶,可以skip

如無估錯,2012年我應該每月收入已過十萬有餘,當年亦估計佢最多三萬。何解?一黎因為佢打工,人工係可以估到,炒旦人工我好清楚。二黎,如果可以獨當一面,根本就會自己做老闆,唔會幫人煮野。見佢一路都唔獨立出黎,就知佢生意額有限,但又常聽到佢點點點把炮。。。

後來,應該生意少到去一個臨界點/同老闆意見不合,無啦啦改左自己做私房菜送外賣,飛左佢個老闆。如是者一兩年,理由係想舒服一點,唔想咁勞碌。最後?客仔自然流失又無後繼,最後連外賣都無得做。

之後,唔知咩原因,去左賣玩具。最開頭個陣,仲諗住問銀行借十幾萬做生意,真係奇怪,咁多年十幾萬都無。。。

最令我覺得不滿,係有次中同同我太太講,(我和太太)咁辛苦做乜?當時我倆的確好勤力,至少我開足七日工,而哈比人就留係屋企做其外賣仔,閒時送下餐,因為佢年老0既老豆都有番工搵錢養佢呢。

典型例子"老婆跑萬幾蚊人工,自己留係屋企嘆"

******

哈比人雖矮,但佢女友(後來變老婆)都覺得佢係潛力股,終有一日會變藍籌。

話睇相佬估佢唔知幾多歲會有運行有貴人會發達!可能你覺得我睇唔起佢,又或者葡萄佢,不過以下現像,我都現在都解釋唔到!

A 若然大富大貴好好搵,何解仲要老婆打份萬幾蚊工跑數?仲要已經有兩個小朋友,都唔做全職媽媽?如果我老婆仲係十年前做個秘書仔,我估我搵十萬個陣,已經會叫佢唔好做。(老婆剛UPDATE我,上個月扣埋開支,佢自己都袋左十萬!)

B 長期係FB玩具GROUP放單件玩具,但口中又話外國買家如何豪氣,香港人又講價又乜乜七七(但又繼續賣比港人),一件個幾舊水,每樣得一件。

C 係FB賣野0既時候,講埋D好刻薄0既說話單單打打潛在買家/問價者(我長期只讀不回,一地花生),如果真係搵到大錢0既,又駛乜咁重怨氣,講價0既,直接唔做佢生意咪得。

D 仲有,前年開始又好似打算轉型,由賣玩具又番番去炒旦,係咪玩具撈唔掂?不過,佢重操故業都兩年,繼續係要一件一件玩具賣出去。約交收同出FB POST 都要心力,比著我,呢D辛苦錢我就唔會賺喇。

E 正因我炒旦做得OK,我唔會去賣玩具!反之亦然,如果佢賣玩具可以風生水起,我肯定佢唔會又番番去炒旦!

呢篇哈比人,其實想打好耐,不過內裏關係千絲萬縷,我老婆一直當佢係好朋友。無耐係我媽媽入院之時,心煩0既女主人繼續比佢刺激真至心淡心死。

此文預左一定要寫,只係要等到各人關係真正完結之時,才能下筆。

後記,其實哈比人係我平時食花生最愛之選,佢講野刻薄,我一路睇一路笑佢小家。

老婆一路話我小看哈比人,不過如果佢唔係撈唔掂,又邊駛講野咁尖酸刻薄?如果真係撈得掂,又邊駛老婆打其他工跑數自己留係屋企嘆世界?

做生意,不論大小,各人成績有異者,如下圖吧!
(小弟應該係:唔受得氣型!)

心態決定境界,如果佢無父幹(佢老豆仲要錢唔係多,至少唔打本比佢做生意,只係夠養埋自己個三十幾歲0既仔),佢未必會一路打遊擊而發唔到圍,若然肯放手一博,又或者堅持炒旦,可能唔會仲係今時今日咁唔上唔落。


19 則留言:

  1. 雖然係私人恩怨, 但都提醒左我, 自己個份夠係冇用架,有本事就搵埋老婆個份。

    回覆刪除
    回覆
    1. 其實佢有冇搵埋老婆果份唔緊要,不過佢扮到工作好輕鬆,事業又成功,但老婆仲要為萬幾蚊人工番工。
      感覺奇怪。

      刪除
  2. 雖則唔識你果位哈比比朋友,但字裡行間都感到佢唔多識做Sales。唔識做Sales,除非佢手絕學獨步天下,否則好難做好生意。一般小生意的老闆就是公司最好的Sales。打工做得好,抄散做唔住,咁好明顯sell得果個係佢老闆。

    回覆刪除
    回覆
    1. Bingo.
      佢老闆幾出名的,一講我相信七成blogger 知道佢,九成成財演聽過佢。
      之前佢炒旦係要有技術(佢無丫),但同款玩具係一樣樣,唔鬥價錢唔通佢賣玩具送菊花咩。。。

      賣唔去,只因唔夠平,卻發脾氣常常鬧香港人無錢唔好玩玩具。

      刪除
    2. 查實香港人勁有錢,好貴都實有人買,但前題要獨特同真係正野。通街都有,又要賣到好價錢,係好有難度,除非個sales真係好掂。小弟話現今唔同三國時代,沒有懷才不遇,持續成功絕無死好命,持續失敗都絕少死錯人。

      刪除
    3. 真係講得好啱!我老公成日講可憐人都有可恨之處,都有類似的意思!

      刪除
    4. 最正係,佢唔知自己可憐,只知佢d潛在客人可恨。

      刪除
  3. 感恩。

    亦慶幸自己不是他,這就夠了。

    回覆刪除
    回覆
    1. 其實佢自以為二世祖有父蔭。
      以佢能力,打份工都應該唔會太差,只係佢個人太貪但又唔夠貪,hea 做浪費青春而佢老婆又無知信佢可以出人頭地。

      刪除
  4. 有2個小朋友⋯⋯負擔都唔少架喎⋯⋯

    回覆刪除
  5. 志大才疏到一個點,就由自卑變自大,哈比人心底係自卑定自大,只有佢自己先知。

    回覆刪除
    回覆
    1. 風兄,其實我都唔肯定佢係咪真係搵到架。。。
      只是憑種種跡象推敲,話唔埋佢賣玩具賣到出年我地有得抽佢上市新股呢。

      刪除
  6. 唐突一問,請問炒旦行業即係做邊行?

    回覆刪除
    回覆
    1. 唐突一答,建議你睇哂全個網誌, 答案就在其中.

      刪除
    2. 又话過2千萬開估,依家3千萬啦!? 雖然d posts都超正超精彩超易明,不過都心癢癢想知架嘛!

      刪除
    3. 認真MODE...我真係有講過咩??????
      無理由架喎....

      點都好, 謝謝支持!!!

      刪除
  7. 好少見70兄去到咁盡咁去踩一個人
    是不是除左佢乞人憎無料扮四條之外,還有什麼恩怨情仇?
    願聞其詳~
    (i.e.花生唔夠食,唔該派多啲)

    回覆刪除
    回覆
    1. 其實就係多花生食.
      自從大家唯一關係都無左, 佢派得更多花生!

      刪除

各位每個留言,係我繼續9UP動力,必覆。

Related Posts Plugin for WordPress, Blogger...